1. Ca so gândisaren-pe aghies le manușa?

 DICHLEAN vi tu că ande amare ghiesa but manușa gândin-pe mai but pende sar averende? Sar avelas, chichiva anda lende den-pe bare hai așaren-pe po interneto le buchianța cai silen hai cai daștin te cheren-len. Cu sea cadala, țâra manușa roden te den pachiv le Iehovasche. Ande cado articolo, va avela te hachiaras so însemnol te das pachiv le Iehovasche hai sostar trebulas te cheras cadaia. Sa cadea, va avela te dichas sar daisaras amen te das pachiv le Iehovasche hai sar va sicavela vo ando viitorii i pachiv cai meritil-la lesco anav.

SO ÎNSEMNOL TE DAS PACHIV LE IEHOVASCHE?

2. Sar sicadea o Iehova pesco baro zuralimos co plain Sinai? (Dich vi i imaginea.)

² I Biblia sicavel că o Iehova si iech baro Del. O Iehova sicadea pesco zuralimos numai pala chichiva ghiesa pala so le israeliți sas mechle avri anda o Egipto. Te gândisaras amen: milioanea israeliți sile chidine angla o plain Sinai caște așunen so phenel lenghe o Del. Pala codoia, o plain sas pachiardo ieche bare norostar. Sigo, i phuv astardea te mișchil-pe zurales, sas fulgerea, tunetea hai așundea-pe iech zuralo bașaimos cornosco. (Ex. 19:16-18; 24:17; Ps. 68:8) Cana o Iehova cărdea cadal buchia, le israeliți sas zurales uimime cana dichle sar sicadea o Iehova pesco baro zuralimos!

3. Sar daisaras te das pachiv le Iehovasche?

³ Tha so daștil te phenel-pe anda le manușa? Daștin te den pachiv le Iehovasche? Da. Daisaras te das pachiv le Iehovasche cana das duma averența anda lesco baro zuralimos hai anda lesche șucar calități. Das pachiv le Iehovasche vi cana așaras-les anda le buchia cai cheras-len lesche ajutorosa. (Is. 26:12) O Rege David sas iech manuș cai dea pachiv le Iehovasche. Vo si iech lașio exemplo anda sar te das pachiv le Iehovasche. Cana dea duma le Iehovasa ando manglimos angla sea  i congregația le Israeloschi, o David phendea: „Chire si, o Iehova, o barimos, o zuralimos, o șucarimos, o barvalimos hai i pachiv, că sea so si andel ceruri hai pi phuv si chiro!”. Pala so o David phandadea pesco manglimos, „savore andai congregația așarde le Iehovas”. (1 Cron. 29:11, 20)

4. Sar dea o Isus pachiv le Iehovasche?

⁴ Cana sas pi phuv, o Isus dea pachiv le Iehovasche cana phendea le manușenghe că o Iehova dea-les o zuralimos caște cherel miracolea. (Mar. 5:18-20) O Isus dea pachiv pesche Dadesche vi prin sar delas duma anda Leste hai prin sar phiravelas-pe averența. Ande iech ghies, cana sicavelas andi sinagoga, o Isus dichlea iecha jiuvlia opral savi ieche demonos sas-les zuralimos de 18 bărșa. Cado demono cărdea-la te perel nasfali, voi sas banghiardi hai ci daștilas te ortosarel-pe. Cadai jiuvli sas zurales duchadi! Cana o Isus dichlea-la, pașilea latar hai phendea lache pherdo lașimos: „Jiuvlie, san sastiardi catar chio nasfalimos”. Pala codoia, șiutea pesche vasta opral late hai voi ortosardea-pe hai „astardea te așarel le Devles” anda codoia că sas sastiardi. (Luca 13:10-13) Cadala jiuvlea sas-la ciaces sostar te del pachiv le Iehovasche cadea sar si vi amen sostar te das pachiv lesche.

SOSTAR DAS PACHIV LE IEHOVASCHE?

5. Sostar das pachiv le Iehovasche?

⁵ Das pachiv le Iehovasche anda codoia că meritil-la. But buchia cheren amen te das pachiv le Iehovas. Les si-les o zuralimos te cherel oriso camel hai vo ci chiniol niciechdata. (Ps. 96:4-7) O baro goghiaverimos le Iehovasco dichiol-pe ande sea le buchia cai cărdea-len. Vo dea amen i viața hai sea so trebul amenghe caște traisaras. (Rev. 4:11) O Iehova si loialo. (Rev. 15:4) Vo cherel mișto sea le buchia cai cherel-len hai încărel sea o timpo pesche promisiuni. (Ios. 23:14) Anda codoia, o profeto Ieremia phendea anda o Iehova: „Mașcar sea le goghiaver le themenghe hai ande sea lenghe raimata na-i niciech sar tu”. (Ier. 10:6, 7) Ciaces, si amen sostar te das pachiv le Iehovasche, amare Dadesche cerisco! Tha amen na numai das pachiv le Iehovasche, amen iubisaras-les.

6. Sostar iubisaras le Iehovas?

⁶ Das pachiv le Iehovasche anda codoia că iubisaras-les but. Le șucar calități cai sicavel-len o Iehova cheren amen te iubisaras-les. Vo sicavel mila hai hachiarel tut cana naches prin iech pharimos. (Ps. 103:13; Is. 49:15) Cana amen sam duchade, vi o Iehova si duchado. (Zah. 2:8) Vo ajutil amen te prinjianas-les mai mișto hai camel te avas amala lesa. (Ps. 25:14; Fap. 17:27) Tha o Iehova si vi umilo. „Vo mechel-pe tele te dichel o cerii hai i phuv hai vazdel le ciores anda i phuv.”. (Ps. 113:6, 7) Con ci camelas te del pachiv amare bare Devlesche cana jianel sea cadal buchia? (Ps. 86:12)

7. So bari buchi daisaras te cheras?

⁷ Das pachiv le Iehovasche anda codoia că camas ca vi aver te prinjianen-les. But manușa ci prinjianen o ciacimos anda o Iehova.Sostar? O Satan coriardea lenghi goghi le hohaimatanța nasul cai phendea-len anda Leste. (2 Cor. 4:4) O Satan cărdea le manușen te pachian că o Iehova pochinel parpale o nasulimos, că ci lel sama amendar hai că si doșalo anda sea le ducha le manușenghe. Tha amen prinjianas o ciacimos anda amaro Del! Daisaras te cheras i bari buchi te phenas vi averenghe sar si ciaces o Iehova hai cadea, anas lesche pachiv. (Is. 43:10) O Psalmo 96 sicavel sar daisaras te das pachiv le Iehovasche. Ando timpo so das duma anda cado Psalmo,  gândisar tut sar daștis te des le Iehovasche i pachiv cai meritil-la.

SAR DAISARAS TE DAS LE IEHOVASCHE I PACHIV CAI MERITIL-LA?

8. Save si chichiva buchia prin save daisaras te das pachiv le Iehovasche? (Psalmo 96:1-3)

⁸ Citisar Psalmo 96:1-3. Daisaras te das pachiv le Iehovasche prin so phenas anda leste. Ande cadal versetea, le manușa le Iehovasche sas zuriarde ‘te ghilaben le Iehovasche’, ‘te așaren lesco anav’, ‘te phenen i vestea lași anda leschi salvarea’ hai ‘te phenen anda leschi gloria mașcar le thema’. Prin sea cadal buchia daisaras te das pachiv amare Dadesche andal ceruri. Le evrei fidelo hai le creștini anda o iechto secolo ci încărde-pe parpale te den duma anda sea le lașe buchia cai cărdea-len o Iehova anda lende. Sa cadea, von ujiarde lesco anav cana trebulas. (Dan. 3:16-18; Fap. 4:29) Sar daisaras te las amen pala lende?

9, 10. So sichioas anda le buchia prin save nachlea i Angela? (Dich vi i imaginea.)

⁹ Te dichas prin so nachlea iech phei po anav Angela a, cai trail andel Statele Unite. Voi ujiardea o anav le Iehovasco pherdi tromai ando than cai cherelas buchi. I Angela hai aver manușa cai cherenas buchi de țâra timpo ande codo than trebunas te phenen chichiva buchia anda pende angla le coaver. Ande codo ghies, i Angela camelas te sicavel chichiva imagini cai sicavenas chichi de bucurime san cana san iech Martoro le Iehovasco. Tha, angla te del duma voi, iech colego phendea că barilea ande iech familia Martorenghi le Iehovasche. Pala codoia, vo astardea te phenel buchia nasul anda amende. I Angela phenel: „Mânro ilo marelas zurales. Tha jianglem că so phendea sas iech hohaimos anda o Iehova. Gândisardem man: Ci daștiv te na phenav chanci. Trebul te phenav lenghe sar si ciaces o Iehova”.

¹⁰ Cana laco colego terminisardea te del duma, i Angela phendea andi goghi iech țâno manglimos. Pala codoia, pherdi lașimos, phendea caring pesco colego: „Vi me barilem sa cadea. Barilem ande iech familia Martorenghi hai som mai dur iech Martora le Iehovaschi”. Chiar cana sas zurales pharo, i Angela așilea liniștime. Voi sicadea chichiva poze pesa hai pesche amalența cai sas zurales bucurime anda codoia că slujinas le Iehovasche.  Pala codoia, pherdi lașimos, phendea lenghe ande so pachial. (1 Pet. 3:15) So întâmplosardea-pe pala codoia? Cana terminisardea te del duma, cado murș liniștisardea-pe. Vo andea pesche amintea so mișto simțosardea-pe mașcar le manușa le Iehovasche. I Angela phenel: „O Iehova si o ciacio Del. Si iech bari pachiv te des duma hai te ujares lesco anav”. Vi amen daisaras te așaras le Iehovas hai te das pachiv lesche anavesche vi atunci cana aver meliaren-les.

11. Sar le slujitori ciace le Devlesche cărde so phenel o Del ando Psalmo 96:8?

¹¹ Citisar Psalmo 96:8. Daisaras te anas pachiv le Iehovasche le buchianța cai si amen. De cana si cărdi i lumea, codola cai slujinas ciaces le Iehovasche dine lesche pachiv cana dine anda le buchia cai sas-len. (Prov. 3:9) Sar avelas, caște vazdel-pe o templo hai te len sama lestar le israeliți dine love hai anda le buchia cai sas-len. (2 Regi 12:4, 5; 1 Cron. 29:3-9) Vi chichiva anda le discipoli le Isusosche dine lesche hai le apostolenghe anda le buchia cai sas-len. Cadea, von daisarde te cheren mai dur penghi buchi anda o Del. (Luca 8:1-3) Hai i Biblia del duma anda chichiva creștini anda o iechto secolo cai trainas cana sas bochalimos ande lengo them, hai le phrala hai le pheia cai beșenas ande aver thana bișalde lenghe love. (Fap. 11:27-29) Aghies, vi amen daisaras te das pachiv le Iehovasche cana cheras donații.

12. Sar amare donații den pachiv le Iehovasche? (Dich vi i imaginea.)

¹² Te dichas iech experiența cai sicavel amenghe sar daisaras te das pachiv le Iehovasche prin amare donații. Ande iech raporto anda 2020, dea-pe duma anda o baro pharimos cai sas ando Zimbabwe cana code sas baro tachimos hai șuchilea i phuv. Milioanea manușa, mașcar save iech phei cai bușiolas Prisca, arăsle te na mai avel-len so te han. Chiar cana trainas phare ghiesa, i Prisca jialas andi predicarea, cadea sar sas-li sicadi, ande fiesavi tetraghi hai paraștui, chiar cana trebulas te cherel buchi i phuv. Lache vecini asanas latar anda codoia că, ando than te jial te cherel buchi i phuv, gălea te phenel i vestea lași. Von phenenas lache: „Va avela te meres bochatar”. Tha i Prisca, pherdi pachiamos, phendea lenghe: „O Iehova ci mechel niciechdata pesche slujitoren!”. Na pala but vremea, i Prisca primisardea catar amari organizația haben hai aver buchia cai trebunas-la.  I organizația daisardea te cherel cadaia anda codoia că amen deam donații. Lache vecini așile cadea de uimime, că phende: „Chio Del ci mechlea tut niciechdata, anda codoia camas te jianas vi amen mai but buchia anda leste”. Efta anda lende astarde te jian ca amare întruniri.

13. Sar daisaras te das pachiv le Iehovasche prin amaro phiraimos? (Psalmo 96:9)

¹³ Citisar o Psalmo 96:9. Daisaras te das pachiv le Iehovasche prin amaro phiraimos. Le rașaia cai slujinas co templo le Iehovasco trebunas te halaven-pe caște aven uje. (Ex. 40:30-32) Vi amen trebul te încăras amen uje – tha na numai te încăras ujo amaro corpo, tha vi te duriaras amendar hai te na cheras orisavi buchi cai o Iehova dichel-la nasul. (Ps. 24:3, 4; 1 Pet. 1:15, 16) I Biblia phenel că trebul te mechas palal ‘o purano manuș cai samas mai anglal’, hai ‘te neviaras o manuș cai sam de andral’. Cadaia însemnol că sea so gândisaras hai sea so cheras trebul te del pachiv le Iehovasche. (Col. 3:9, 10) Lesche ajutorosa, chiar vi manușa cai cărde buchia sexualo melale hai aver buchia zurales nasul daștin te paruven-pe hai te phiraven-pe cadea sar placial le Iehovas.

14. So sichioas anda so cărdea o Jack? (Dich vi i imaginea.)

¹⁴ Te dichas so cărdea o Jack. Vo sas-lo iech manuș zurales nasul hai cărdea buchia jiungale angla o Del. Vo sas-lo prinjiando sar „o Demono”. Pala le but buchia nasul cai cărdea-len, vo primisardea i pedeapsa te avel mudardo. Cu sea cadala, ji cana ajucărelas te întâmplol-pe cadaia, vo astardea te sichiol andai Biblia ieche phralesa cai predichilas ande codo phandaimos. Vo cărdea but buchia nasul. Cu sea cadala, o Jack daisardea ‘te mechel palal o purano manuș cai sas mai anglal’. La vremeasa, vo cărdea le paruimata cai trebunas caște daștil te bolel-pe. O Jack cărdea cadea de bare paruimata, că, ando ghies cana sas-lo mudardo, chichiva anda le gardieni rovenas hai line penghe ghies lașio lestar. Iech sergento anda o phandaimos phendea: „Mai anglal, o Jack sas o mai nasul manuș de cathar. Tha acana sas iech anda le mai lașe”. Pala iech curco de cana sas mudardo o Jack, cana le phrala avile te încăren iech întrunirea ando phandaimos, dichle că avilea iech anda le murșa phandade cai ci mai sas-lo niciechdata ca iech întrunirea. So cărdea-les te avel cai întrunirea? Vo așilea uimime cana dichlea  so bare paruimata cărdea o Jack hai camlea te jianel so trebulas te cherel caște slujil le Iehovasche. Dichiol-pe mișto că, prin amaro phiraimos, daisaras te das pachiv amare Dadesche andal ceruri (1 Pet. 2:12)

SAR VA SICAVELA O IEHOVA NA PA BUT TIMPO I PACHIV CAI MERITIL-LA LESCO ANAV?

15. Sar va sicavela o Iehova na pa but timpo i pachiv cai meritil-la lesco anav? (Psalmo 96:10-13)

¹⁵ Citisar Psalmo 96:10-13. Andel palutne versetea anda o Psalmo 96, phenel-pe anda o Iehova că si iech Rege hai iech Judecătoro orta. Sar va sicavela o Iehova na pa but timpo i pachiv cai meritil-la lesco anav? Prin so alosarel te cherel sar Judecătoro. Pa țâra timpo, vo va chosela cu sea o Babilono o Baro anda codoia că cado meliardea but lesco sfânto anav. (Rev. 17:5, 16; 19:1, 2) Daștil-pe că chichiva cai va dichena sar va avela choslo o Babilono o Baro va avena te anen închinarea uji amența. Hai, co Armaghedono, o Iehova va chosela sea i lumea nasul le Satanoschi hai va mudarela sea codolen cai așen lesche contra hai cai den duma nasul anda lesco anav. Tha, o Iehova va salvila sea codolen cai iubin-les hai așunen lestar hai den-pe bare anda codoia că daștin te den lesche pachiv. (Mar. 8:38; 2 Tes. 1:6-10) Pala o testo finalo cai va avela pala o Raimos de Iech Mia Bărș le Cristososco, o Iehova va ujiarela pesco anav cu sea. (Rev. 20:7-10) Atunci „i phuv va avela pherdi catar o prinjianimos la gloriaco le Iehovasco, cadea sar o adânco la mareaco silo pherdo pai”. (Hab. 2:14)

16. So cames te cheres anda sea o ilo? (Dich vi i imaginea.)

¹⁶ Chichi de bucurime va avela te avas cana sea le manușa pa i phuv va dena pachiv le Iehovasche hai lesche anavesche! Tha ji cana va avela codo ghies, te cheras sea so daisaras caște așaras amare Devles. Caște sicavel chichi de importanto si cadaia, o Corpo de Guvernare alosardea o Psalmo 96:8 caște avel o texto le bărșesco 2025 : „Den le Iehovasche i pachiv cai meritil-la lesco anav!”.