1. Sostar o Iehova dea amen o daro la căsătoriaco?

 O IEHOVA si ‘o fericime Del’ hai vo camel ca vi amen te avas fericime. (1 Tim. 1:11) Vo dea amenghe but daruri caște avel amen iech șucar viața. (Iac. 1:17) Iech anda lende si i căsătoria. Cana iech rrom hai iech rromni căsătorin-pe, von solaharen că va iubina-pe, va dena phenghe pachiv hai va avena drago iech averesche. Cana iech rrom hai iech rromni încăren zurali i iubirea cai si mașcar lende, le dui va avena ciaces bucurime. (Prov. 5:18)

2. Sar phiraven-pe but rroma penghe rromnianța?

² Fal amenghe nasul că but rroma hai rromnia anda amare ghiesa ci sicaven phenghe mai dur pachiv hai iubirea, cadea sar solaharde cana cărde o abiav. Cadea că, von ci mai sile bucurime. Iech studio cărdo catar I Organizația Mondialo le Sastimaschi, sicavel că but rroma maren penghe rromnian, phenen lenghe buchia jiungale hai phiraven-pe nasul lența. Chichiva anda lende phiraven-pe cadea penghe rromnianța cana sile corcore hai angla le coaver cheren-pe că sicaven lenghe pachiv. But rroma dichen materialea pornografico, hai cadaia ciorel i fericirea lenghe rromnianghi.

3. Sostar chichiva murșa phiraven-pe nasul penghe rromnianța?

³ Tha sostar chichiva rroma phiraven-pe nasul penghe rromnianța? Daștil-pe că lengo dad marelas lenghe deia, hai acana von pachian că si vareso normalo te cheren sa cadea. Aver maren penghe rromnian anda codoia că le murșa anda lenghi cultura cheren cadaia. Daștil-pe că von pachian că „iech ciacio murș” trebul te sicavel pesca rromniache con si o șăro ando chăr prin pesco zuralimos. Aver murșa ci sas-le sicade te încăren parpale penghe sentimentea, nici chiar penghi holi. Aver dichen butivar materialea pornografico hai cadala cheren-len te pachian că le rromnia si numai caște cheren penghe camnimata  sexualo. Hai, mai but experți dine penghi sama că cadal pharimata butiarde-pe ando timpo la pandemiaco de COVID-19. Tha, iech rrom ci va avela-les niciechdata sostar te phiravel-pe nasul pesca rromniasa.

4. Pe so buchia trebun te len sama le rroma creștino hai sostar?

⁴ Le rroma creștino trebun te len sama te na arăsăn te dichen le jiuvlean cadea sar dichen-len le manușa andai lumea. a Sostar? Anda codoia că, butivar, cana gândisares tut ca iech buchi, va avela vi te cheres-la. O apostolo Pavel phendea le creștinenghe machle andai Roma te len sama. Vo scriisardea lenghe: „Na mai mechen tumen îngărde cadala lumeatar”. (Rom. 12:1, 2) Cana scriisardea lenghe cadal dumes, i congregația andai Roma sas deja cărdi de chichiva bărșa. Cu sea cadala, anda so phendea o Pavel hachiaras că chichiva phrala hai pheia andai congregația, lenas-pe mai dur pala so cherenas hai gândinas le manușa ande codol ghiesa. Anda codoia, vo phendea lenghe te paruven pengo phiraimos hai gândimos. Sea le rroma creștino ande amare ghiesa trebun te așunen lesco sfato. Fal amenghe nasul că chichiva anda lende len-pe pala i gândirea cadala lumeachi hai arăsăn te phiraven-pe zurales nasul penghe rromnianța. b Sar ajucărel o Iehova te phiravel-pe iech rrom pesca rromniasa? O răspunso arachel-pe ando verseto pe savo si bazome cado articolo.

5. Cadea sar phenel-pe ando 1 Petru 3:7, sar trebulas iech rrom te phiravel-pe pesca rromniasa?

⁵ Citisar 1 Petru 3:7. O Iehova phenel le rromenghe că trebun te den pachiv penghe rromnianghe. Iech rrom cai del pachiv pesca rromniache phiravel-pe lasa iubireasa hai lașimasa. Ande cado articolo, va avela te dichas sar daștil iech rrom te del pachiv pesca rromniache. Tha, mai anglal, va avela te das duma anda le buchia cai ci trebul niciechdata te cherel-len iech rrom pesca rromniache.

TE NA CHERES NICIECH BUCHI CAI DAȘTILAS TE DUCHAVEL CHIA RROMNIA

6. Sar dichel o Iehova le murșen cai maren penghe rromnian? (Coloseni 3:19)

⁶ Iech rrom ci trebul te marel pesca rromnia. O Iehova urâl le manușen cai maren-pe. (Ps. 11:5) Vo doșarel le rromen cai maren penghe rromnian. (Mal. 2:16; citisar Coloseni 3:19.) Sar hachiaras vi anda o verseto cadale articolosco, 1 Petru 3:7, cana iech rrom ci del pachiv pesca rromniache, vo rimosarel vi pesco amalimos le Iehovasa. O Iehova daștilas chiar te na mai așunel lesche manglimata.

7. Cadea sar phenel-pe ando Efeseni 4:31, 32, sar trebul te del duma iech rrom pesca rromniasa?

⁷ Iech rrom ci trebul te duchavel niciechdata pesca rromnia prin dumes jiungale. c Chichiva rroma phiraven-pe nasul penghe rromnianța cana phenen lenghe dumes cai duchaven-len but hai den duma zurales holearico. Tha o Iehova urâl ‘orisavo nasulimos cărco, holi, sighiardi holi, cingarimos hai cana varecon del duma caște duchavel o ilo’. (Citisar Efeseni 4:31, 32.) O Iehova așunel sea so phenas. Anda leste si importanto sar iech rrom del duma pesca rromniasa, chiar cana sile corcore ande pengo chăr. Iech rrom cai del duma pesche rromniasa jiungales, na numai duriarel-pe pesca rromniatar, tha vi rimosarel pesco amalimos le Iehovasa. (Iac. 1:26)

8. Sar si i pornografia andel iacha le Iehovasche hai sostar?

 ⁸ Iech rrom ci trebul te dichel materialea pornografico. Sar si i pornografia andel iacha le Iehovasche? Vo urâl-la. Cadea că iech rrom cai dichel imagini melale rimosarel pesco amalimos le Iehovasa hai ci del pachiv pesca rromniache. d O Iehova ajucărel ieche rromestar te așel loialo pesca rromniache, na numai prin so cherel, tha vi prin so gândil. O Isus phendea că oricon dichel mai but iecha jiuvlea ji cana arăsăl te camel-la, sutea lasa deja „ande pesco ilo”. e(Mat. 5:28, 29)

9. Sostar iech rrom ci trebul te șiol pesca rromnia te cherel buchia sexualo cai voi ci camel-len?

⁹ Iech rrom ci trebul te șiol pesca rromnia te cherel buchia sexualo cai voi ci camel-len. Chichiva rroma șion penghe rromnian te cheren buchia sexualo cai cheren-len te simțon-pe melale sau neiubime. O Iehova urâl codolen cai phiraven-pe cadea hai cai ci sicaven iubirea caring penghe rromnia. O Iehova ajucărel ieche rromestar te iubil pesca rromnia, te dichel-la cuci hai te încărel conto catar lache sentimentea. (Ef. 5:28, 29) Tha, dacă iech rrom deja phiravel-pe nasul pesca rromniasa sau dichel materialea pornografico, so daștil te cherel caște paruvel peschi gândirea hai pesco phiraimos?

SAR DAȘTIL IECH RROM TE MECHEL PALAL PESCO PHIRAIMOS MELALO

10. Sar daștil te ajutil le rromen o exemplo le Isusosco?

¹⁰ Sar daștil iech rrom te mechel pesco phiraimos zurales nasul hai melalo? Cana cherel sea so daștil caște lel-pe pala o Isus. Chiar cana le Isusos ci sas-les rromni, sar phiradea-pe le discipolența si iech exemplo anda le rroma cai camen te den pachiv penghe rromnianghe. (Ef. 5:25) Mai dur, va avela te dichas so daștin le rroma te sichion anda sar phiradea-pe hai dea duma o Isus le apostolența.

11. Sar phiradea-pe o Isus pesche apostolența?

¹¹ O Isus sicadea sea o timpo pachiv pesche apostolenghe hai phiradea-pe lența lașimasa. Vo ci phiradea-pe niciechdata nasul lența hai ci camlea te daran lestar. Chiar dacă sas-les iech baro zuralimos, vo ci sicadea-les caște cherel le coaveren te simțon-pe mai tele sar vo. Mai but, vo slujisardea lenghe pherdo umilința. (Ioan 13:12-17) O Isus phendea pesche discipolenghe: „Sichion mandar, că me som lașio hai si man iech ilo umilo, hai va avena bucurime”. (Mat. 11:28-30) Dichas că o Isus phenel anda peste că si „lașio”. Iech murș lașio na-i covlo. Mai but, vo si zuralo anda codoia că daștil te încărel-pe parpale. Cana si holiardo, vo daștil te așel liniștime hai jianel te încărel parpale pesche sentimentea.

12. Sar dea duma o Isus averența?

¹² Prin so phendea o Isus, zuriardea le coaveren. Vo ci dea duma pherdo holi codolența cai așunenas-les. (Luca 8:47, 48) Chiar cana le manușa prasanas-les hai camenas te holiaren-les „vo ci prasadea parpale”. (1 Pet. 2:21-23) Poiechdata, o Isus, ando than te phenel parpale, alosardea te na phenel chanci. (Mat. 27:12-14) Vo si iech exemplo zurales lașio anda le rroma creștino!

13. Cadea sar phenel-pe ando Matei 19:4-6, sar daștil iech rrom ‘te așel pașa peschi rromni’? (Dich vi i imaginea.)

¹³ O Isus phendea le rromenghe că trebun te avel loialo penghe rromnianghe. Vo phendea le dumes pesche Dadesche, cai phendea că iech rrom trebul ‘te așel pașa peschi rromni’. (Citisar Matei 19:4-6.) I duma „va așela” andi șib  grecisco însemnol te lipis dui buchia caște așen ande iech than. Cadea că, o phanglimos cai si mașcar iech rrom hai iech rromni trebul te avel cadea de chidino, sar cana avenas lipime iech averestar. Cado phanglimos ci daștil te avel șindo bi te aven duchade vi le dui. Iech rrom cai așel pașa peschi rromni va duriarela orisavo felo pornografia angla pesche iacha. Vo va risarela pesche iacha catar ‘orisave buchia cai ci sile lașe’. (Ps. 119:37) Si sar cana cherel iech solaharimos pesche iachența că ci va dichela gule iachența caring iech jiuvli cai na-i leschi rromni. (Iov 31:1)

14. So trebul te cherel iech rrom cai siles iech phiraimos nasul caște avel-les pale iech lașio amalimos le Iehovasa hai pesca rromniasa?

¹⁴ Iech rrom cai marel pesca rromnia sau del duma lasa zurales nasul trebul te cherel chichiva buchia caște avel pale lașio amal le Iehovasa hai pesca rromniasa. Iech, trebul te hachiarel că siles iech bari problema. Chanci ci daștil te avel garado angla le Iehovasche iacha. (Ps. 44:21; Ecl. 12:14; Evr. 4:13) Dui, trebul te na mai phiravel-pe nasul pesca rromniasa hai te paruvel-pe. (Prov. 28:13) Trin, trebul te phenel le Iehovasche hai vi pesca rromniache chichi de but duchadea-len hai te manghel pesche iertarea lendar anda ilo. (Fap. 3:19) Sa cadea, trebul te manghel le Iehovas te ajutil-les te camel te paruvel-pe hai te del peschi zor te încărel-pe parpale cana avel lesche te gândil, te phenel sau te cherel vareso nasul. (Ps. 51:10-12; 2 Cor. 10:5; Filip. 2:13) Ștar, trebul te cherel so phendea ando manglimos le Iehovasche. Daștil te cherel cadaia cana sichiol te urâl o marimos hai le dumes cai duchaven o ilo, orisave daștinas te aven cadala. (Ps. 97:10) Panji, trebul te manghel sigo o ajutorii le phurengo andai congregația, cai sile pherde iubirea. (Iac. 5:14-16) Șov, trebul te gândil de mai anglal so te cherel caște na mai phiravel-pe cadea ando viitorii. Cadal buchia trebul te cherel-len vi iech rrom cai dichel materialea pornografico. O Iehova va binecuvântila leschi phari buchi cai cherel-la caște paruvel pesco phiraimos. (Ps. 37:5) Cu sea cadala, ci arăsăl te na mai duchavel pesca rromnia. Vo trebul te sichiol vi te del pachiv pesca rromniache. Sar daștil te cherel cadaia?

 SAR TE SICAVES PACHIV CHIA RROMNIACHE

15. Sar daștil iech rrom te sicavel pesca rromniache că iubil-la?

¹⁵ Sicav lache chichi de but iubis-la. Chichiva rroma bucurin-pe catar iech șucar căsătoria anda codoia că sicaven penghe rromnianghe ande fiesavo ghies chichi de but iubin-len. (1 Ioan 3:18) Iech rrom daștil te sicavel că iubil pesca rromnia prin țâne buchia, sar avelas, cana încărel-la vastestar sau cana del-la iech bari angali. Sa cadea, daștilas te scriil lache iech mesajo hai te phenel „Si manghe doro tutar!” sau „So cheres? Sea si mișto?”. Poiechdata, daștil te sicavel peschi iubirea cana scriil lache pe iech lilorro chichiva gugle dumes. Cana cherel cadal buchia, iech rrom daștil te del pachiv pesca rromniache hai te zuriaren pengo phanglimos.

16. Sostar trebul te așarel iech rrom pesca rromnia?

¹⁶ Sicav chia rromniache că si cuci anda tute. Iech rrom cai del pachiv pesca rromniache del duma lasa caște cherel-la te simțol-pe mișto hai zuriarel-la. Sar exemplo, ci bâstrel te sicavel lache că si cuci anda leste sea so cherel voi caște ajutil-les. (Col. 3:15) Cana iech rrom așarel pesca rromnia, cherel laco ilo te bariol. Cadea, voi va simțola că laco rrom del lache pachiv, că sili andi siguranța hai iubime. (Prov. 31:28)

17. Sar daștil iech rrom te sicavel pachiv caring peschi rromni?

¹⁷ Sicav lașimos hai gândisar tut chia rromniate. Iech rrom cai iubil pesca rromnia jianel chichi de cuci si voi. Vo dichel-la sar iech sumnacuno daro le Iehovastar, cadea că phiravel-pe lasa lașimasa hai del lache pachiv chiar cana sile corcore. (Prov. 18:22; 31:10) Vo ci șiol-la te cherel buchia sexualo cai cheren-la te na simțol-pe mișto sau cai doșarel lachi conștiința. f Sa cadea, o rrom va cherela sea so daștil caște încărel peschi conștiința uji angla o Iehova. (Fap. 24:16)

18. So trebulas te camen te cheren mai dur le rroma? (Dich vi o chenarii „ Ștar buchia cai daștis te cheres-len caște sicaves pachiv chia rromniache”.)

¹⁸ Rromale, daștin te pachian ciaces că o Iehova dichel cuci sea i phari buchi cai cheren-la caște den pachiv tumare rromnianghe ande sea le buchia la viațache. Aven hotărâme te sicaven lașimos, pachiv hai iubirea caring tumare rromnia hai vi te duriaren tumendar orisavi buchi melali. Cadea, va avela te sicaven că iubin-len hai că sile cuci anda tumende. Cana den pachiv tumare rromnianghe, va avela te len sama catar o mai importanto amalimos cai si tumen: o amalimos le Iehovasa. (Ps. 25:14)