ARTICOLO STUDIOSCHE 5
GHILI 108 I iubirea loialo le Devleschi
So miștimata si amen anda codoia că o Iehova iubil amen
„O Cristos Isus avilo andi lumea caște salvil codolen cai sile păcătoși.” (1 TIM. 1:15)
ANDA SO DAS DUMA
Le miștimata cai si amen anda codoia că o Isus pochindea amare păcatea prin pesco merimos hai sar daisaras te sicavas le Iehovasche că cadai buchi si cuci anda amende.
1. So daisaras te cheras caște bucurisaras o ilo le Iehovasco?
GÂNDISAR TUT că des varecasche drago tuche iech șucar hai lașio daro. Chio ilo avelas zurales duchado dacă cado manuș garavelas o daro hai bâstrelas lestar! Tha, chio ilo avelas bucurime dacă codo manuș folosil chio daro hai sicavel că si cuci anda leste. So sichioas cathar? O Iehova dea pesche șiaves te merel anda amende. Chichi de voime si o Iehova cana sicavas că si cuci anda mende o baro daro cai dea-les amenghe hai leschi iubirea cai îngărdea-les te cherel vareso anda amende caște aven chosle amare păcatea! (Ioan 3:16; Rom. 5:7, 8)
2. So va avela te dichas ande cado articolo?
2 Cu sea cadala, dacă pala so nachen le bărșa, o merimos le Isusosco ci mai si cadea de cuci anda amende, avelas sar cana garavas o șucar daro le Devlestar hai bâstras lestar. Caște dichas cuci vi mai dur so cărdea anda amende o Del hai o Cristos, trebul te gândisaras amen mai butivar che cadai buchi. Cado articolo daștil te ajutil amen te cheras cadaia. Va avela te dichas le miștimata cai anel-len amenghe acana hai vi ando viitorii o pochinimos cai dea-lea o Isus prin pesco merimos. Sa cadea, va avela te hachiaras sar daisaras te sicavas că si cuci anda amende i iubirea le Iehovaschi, vi mai but anda le curche angla hai pala o ghies cana anas amenghe amintea anda o merimos le Isusosco.
LE MIȘTIMATA CAI SI AMEN ACANA
3. So miștimos si amen acana anda codoia că o Isus mulea anda amende?
3 Vi acana si amen miștimata anda codoia că o Isus mulea anda amende. Sar exemplo, prin cadaia, o Iehova iertil amare păcatea. Vo ci si oblighime te iertil amen. Tha camel te cherel cadaia. O psalmisto sicadea că si cuci anda leste i iertarea le Iehovaschi cana phendea: „Că tu, o, Iehova, san lașio hai gata te iertis”. (Ps. 86:5; 103:3, 10-13)
4. Anda caste dea o Iehova pesche Șiaves te merel? (Luca 5:32; 1 Timotei 1:15)
4 Chichiva pachian că ci meritin i iertarea le Iehovaschi. O ciacimos si că niciech anda amende ci meritil cadaia. O apostolo Pavel hachiardea că vo ‘ci silo demno te avel numime apostolo’, tha vo mai phendea vi că: „prin o baro lașimos le Devlesco som iech apostolo”. (1 Cor. 15:9, 10) O Iehova iertil amen cana risaras amen catar amaro phiraimos nasul. Sostar? Na anda codoia că meritisaras, tha anda codoia că iubil amen. So daștis te cheres dacă peravel tut o gândo că ci meritis i iertarea le Iehovaschi? An tuche amintea că o Iehova ci dea pesche șiaves anda le manușa cai ci cărde niciechdata buchia nasul, tha anda codola cai risaren-pe catar pengo phiraimos nasul. (Citisar Luca 5:32; 1 Timotei 1:15.)
5. Meritil varecon i iertartea le Iehovaschi anda codoia că cărdea buchi anda leste? Explichin.
5 Niciech anda amende ci trebul te pachial că meritil i iertarea le Iehovaschi, chiar cana cărdea but bărșa leschi buchi. O Iehova ci bâstrel i phari buchi cai cărdeam-la anda leste. (Evr. 6:10) Tha vo dea pesche șiaves anda amende sar iech daro, na sar iech pochinimos andi buchi cai cheras-la anda leste. Dacă pachias că meritisaras i iertarea le Iehovaschi anda codoia că cărdeam but buchi anda leste, avelas sar cana phenas că o Isus mulea anda amende de ivea. (Dich vi o Galateni 2:21.)
6. Sostar cărdea o Pavel phares buchi anda o Iehova?
6 O Pavel jianglea că i iertarea le Iehovaschi ci primis-la anda codoia că cheres phares buchi anda leste. Atunci, sostar cărdea phares buchi anda o Iehova? Vo cărdea cadaia caște sicavel chichi de cuci si anda leste o baro lașimos le Iehovasco. (Ef. 3:7) Cadea sar o Pavel, vi amen cheras mai dur buchi anda o Iehova iagasa ando ilo na caște avas iertime lestar, tha caște sicavas chichi de cuci si anda amende lesco baro lașimos.
7. So aver miștimos si amen acana anda o pochinimos cai dea-les o Isus prin pesco merimos? (Romani 5:1; Iacov 2:23)
7 Iech aver miștimos cai anel-les amenghe acana o pochinimos cai dea-les o Isus prin pesco merimos si că daștil te avel amen iech amalimos chidino le Iehovasa. a Cadea sar dichleam ando articolo cai nachlea, cana cărdileam, ci sas amen iech amalimos le Iehovasa. Tha, anda codoia că o Isus mulea anda amende, daisaras te avas „andi pacea le Devlesa” hai, cadea, te pașioas lestar. (Citisar Romani 5:1; Iacov 2:23.)
8. Sostar trebulas te dichas cuci i bari pachiv te das duma le Iehovasa ando manglimos?
8 Anda codoia că sam amala le Iehovasa, si amen i bari pachiv, te das duma le Iehovasa ando manglimos. O Iehova așunel na numai le manglimata cai phenas-len cana sam savore chidine ande iech than, tha vi le manglimata cai phenas-len fiesavo cana sam corcore. O manglimos daștil te del amen pacea ando ilo hai andi goghi. Tha, o manglimos cherel vi mai but. Daștil te zuriarel amaro amalimos le Devlesa. (Ps. 65:2; Iac. 4:8; 1 Ioan 5:14) Cana sas pi phuv, o Isus manglea-pe mai butivar anda codoia că jianelas că o Iehova așunel lesco manglimos hai cadaia ajutilas-les te încărel zuralo o amalimos pesche Dadesa. (Luca 5:16) Ande amaro ilo si iech bari pachiv anda codoia că prin o merimos le Isusosco daisaras te avas amala le Iehovasa hai te das duma lesa ando manglimos!
LE MIȘTIMATA CAI VA AVENA AMEN ANDO VIITORII
9. So miștimos va avela le manușen le Iehovasche ando viitorii anda codoia că o Isus pochindea amare păcatea prin pesco merimos?
9 So miștimos va avela le manușen le Iehovasche ando viitorii anda codoia că o Isus pochindea amare păcatea prin pesco merimos? Va traina anda sea o timpo. But ci pachian că daștin te train anda sea o timpo anda codoia că de cana si i lumea, le manușa meren. Tha, o Iehova camlea catar o începuto ca le manușa te train anda sea o timpo. Dacă o Adam ci păcătuilas, chonic ci avelas te pachial că i viața veșnico si numai iech șucar suno. Chiar cana si amenghe pharo te gândisaras că va avela te traisaras anda sea o timpo, daisaras te pachias ciaces că va avela cadea, anda codoia că o Iehova pochindea o mai baro prețo – i viața pesche Șiaveschi – caște daisaras te traisaras anda sea o timpo. (Rom. 8:32)
10. So ajucăren sea le ilesa codola machle hai le aver bacrea?
10 Chiar cana i viața anda sea o timpo si iech miștimos cai va avela ando viitorii, o Iehova camel te gândisaras amen late încă de acanara. Codola machle ajucăren sea le ilesa te train iech șucar viața ando cerii hai te rain ande iech than le Cristososa opral sea i phuv. (Rev. 20:6) Le aver bacrea ajucăren sea le ilesa te train ande iech Paradiso pi phuv cai ci va mai avena ducha hai pharimata. (Rev. 21:3, 4) San vi tu mașcar codola cai va traina anda sea o timpo pi phuv? Cadai speranța si sa cadea de cuci sar i speranța cerisco. O Iehova cărdea amen te traisaras anda sea o timpo pi phuv hai cadaia va cherela amen zurales fericime!
11-12. So bare miștimata ajucăren amen ando Paradiso? (Dich vi le imagini.)
11 Gândisar tut sar va avela chi viața ando Paradiso. Ci va avela te mai daras niciechdata că va avela te peres nasfalo sau că va avela te meres. (Is. 25:8; 33:24) O Iehova va dela tut sea le lașe buchia cai camel-len chio ilo. So ciaiolas tut te sichios te cheres code? Te citis? Te jianes mai but buchia andal animalea? Sau te ghilabes? Ando Paradiso, va trebuna manușa cai te jianen te cheren le proiectea anda le chăra, aver te vazden-len, manușa cai te jianen te cheren haben, te lașiaren buchia, te len sama catar le animalea hai vi la phuveatar. (Is. 35:1; 65:21) Cana va avela te trais anda sea o timpo, va avela te cheres sea cadal buchia hai vi aver.
12 So bari bucuria va avela ande chio ilo cana va avela te diches pale viațate codolen drago tuche cai mule! (Fap. 24:15) Gândisar tut so șucar va avela te sichios mai but anda le buchia cai cărdea-len o Iehova. (Ps. 104:24; Is. 11:9) Mai opral sar oriso, va avela te slujis le Iehovasche bi te simțos tut doșalo anda codoia că ci va mai avela te cheres chanci nasul! Meritil te meches i viața cai ajucărel tut ando Paradiso caște bucuris tut acana catar „i plăcerea le păcatoschi cai nachel”? (Evr. 11:25) Nici! I șucar viața cai va avela amen, va avela but mai lași sar oriso daștil te avel amen acana ande cadai lumea. Gândin tumen că va avela o ghies cana ci va mai trebula te ajucăras o Paradiso anda codoia că va avela te traisaras deja ande leste. Cadal miștimata va avena ciaces anda codoia că o Iehova iubil amen cadea de but că dea pesche șiaves te merel anda amende!
So miștimata ajucăres o mai but ando paradiso? (Dich le paragrafea 11 hai 12)
TE SICAVAS CĂ SI CUCI ANDA AMENDE I IUBIREA LE IEHOVASCHI
13. Sar daisaras te sicavas că si cuci anda amende i iubirea le Iehovaschi? (2 Corinteni 6:1)
13 Sar daisaras te sicavas le Iehovasche că si cuci anda amende o pochinimos cai dea-les o Isus prin pesco merimos? Cana șioas po iechto than andi amari viața i buchi cai dea-la amenghe te cheras-la. (Mat. 6:33) Ji la urmă, o Isus mulea „anda codoia că, codola cai train te na mai train anda pende, tha anda codo cai mulea anda lende hai sas-lo uștiado andal mule”. (2 Cor. 5:15) O Iehova sas zurales lașio amența hai iertisardea amen, hai cana cheras leschi buchi anda sea o ilo, sicavas că hachiaras so bari buchi cărdea anda amende hai că si cuci anda amende lesco baro lașimos. (Citisar 2 Corinteni 6:1.)
14. Sar daisaras te sicavas că pachias amen ande so phenel amenghe o Iehova te cheras?
14 Sa cadea, daisaras te sicavas că si cuci anda amende i iubirea le Iehovaschi cana pachias amen ande so phenel amenghe vo te cheras. Sar? Cana trebul te alosaras, sar avelas so școala te cheras sau so than buchiaco si lașio anda amende, si importanto te gândisaras so camel o Iehova te cheras. (1 Cor. 10:31; 2 Cor. 5:7) Cana alosaras sar phenel o Iehova, amaro amalimos lesa hai amaro pachiamos cărdion sea mai zurale. Mai but, amari speranța te traisaras anda sea o timpo, va avela vi mai ciaci. (Rom. 5:3-5; Iac. 2:21, 22)
15. Sar daisaras te sicavas că si cuci anda amende o merimos le Isusosco ande le curche angla hai pala i Comemorarea?
15 Mai si iech buchi prin savi daisaras te sicavas le Iehovasche că si cuci anda amende leschi iubirea. Sar? Te cheras sea so daisaras ande le curche angla hai pala i Comemorarea caște sicavas le Iehovasche că si cuci anda amende o merimos le Isusosco. O ghies cana anas amenghe amintea le merimastar le Isusosco si zurales importanto anda amende hai camas te avas code tha camas te acharas vi averen te aven amența. (1 Tim. 2:4) Si mișto te phenas codolenghe cai acharas-len sar încăras cado baro ghies. Daisaras te sicavas le materialea video Sostar mulea o Isus? hai Te anas amenghe amintea le merimastar le Isusosco, pa jw.org. Ande cadal curche, le phure trebul te acharen le phralen cai ci mai sas-le de but timpo andi predicarea, te aven vi von che cado evenimento importanto. Te gândisaras amen so bari bucuria si ando cerii hai pi phuv cana iech bacri hasardi le Iehovaschi camel te avel parpale leste! (Luca 15:4-7) Ca i Comemorarea, trebul te las sama te na das duma numai amare phralența, tha avelas mișto te das duma codolența neve sau codolența cai ci mai sas de but timpo ca amare întruniri. Camas te simțon-pe mișto mașcar amende. (Rom. 12:13)
16. Sostar trebulas te das amari zor te cheras mai but andi buchi le Iehovaschi anda le curche angla hai pala i Comemorarea?
16 Daștis te cheres mai but andi buchi le Iehovaschi ande le curche angla hai pala cado baro ghies cana anas amenghe amintea le merimastar le Isusosco? Prin cadaia daștis te sicaves că si cuci so cărdea o Del hai o Cristos anda tute. Cana des chi zor te cheres mai but andi buchi le Iehovaschi, va avela te diches lesco vast andi chi viața, hai cadea, chio pachiamos ande leste va avela mai zuralo. (1 Cor. 3:9) Sa cadea, citisar de fiesavi data i Biblia anda le curche angla hai pala i Comemorarea, pala i planificarea i citirea la Bibliachi anda i Comemorarea, cai araches-la ando lilorro Te rodas ande fiesavo ghies ando lil le Devlesco, sau ando tabelo cai araches-les ando Caieto anda i întrunirea „Amari viața sar creștini hai predicarea”. Cana sichios corcoro andai Biblia daștis te citis hai te sichios ande cadal versetea.
17. So anel bucuria le Iehovasche? (Dich vi o chenarii „ Buchia prin save sicavas că si cuci anda amende i iubirea le Iehovaschi”.)
17 Si ciaces, daștil-pe că chi situația ci mechel tut te cheres sea so sas phendo ande cado articolo. Tha na bâstăr că o Iehova dichel cuci sea so cheres anda leste. Vo dichel so si ande chio ilo. Chichi de bucurime trebul te avel o Iehova cana dichel că si cuci anda tute cado baro daro, i viața le Isusoschi! (1 Sam. 16:7; Mar. 12:41-44)
18. Sostar si cuci anda amende amaro Del o Iehova hai o Isus Cristos?
18 Numai anda codoia că o Isus mulea anda amende, daștin te aven iertime amare păcatea, te avel amen iech amalimos chidino le Iehovasa hai i speranța te traisaras anda sea o timpo. Camas te sicavas sea o timpo că si cuci anda amende i iubirea le Iehovaschi, cai cărdea-les te del amen cadal bare miștimata. (1 Ioan 4:19) Sa cadea, camas te sicavas le Isusosche chichi de cuci si anda amende leschi bari iubirea, cai cărdea-les te del peschi viața anda amende. (Ioan 15:13)
GHILI 154 I ciaci iubirea cai așel
a O Iehova iertisardea codolen cai slujisarde lesche angla so te pochinel o Isus pesche merimasa. O Iehova daisardea te cherel cadaia anda codoia că jianglea ciaces că lesco șiavo va așela lesche fidelo ji co merimos. Andel iacha le Iehovasche o pochinimos le păcatosco prin o merimos le Isuosco sas sar cana sas deja dino. (Rom. 3:25)
