1. Sostar si mișto anda amende te încăras ande fiesavo bărș o ghies cana anas amenghe amintea le merimastar le Isusosco?

 O IEHOVA dea amen iech cuci daro cana bișaldea pesche șiaves te merel anda amende! (2 Cor. 9:15) Prin o merimos le Isusosco, vi tut daștil te avel tut iech amalimos chidino le Iehovasa hai te trais anda sea o timpo. Cadea că, avelas mișto te sicavas pachiv caring o merimos le Isusosco hai caring sea so cărdea o Iehova caște sicavel amenghe peschi bari iubirea. (Rom. 5:8) Caște na bâstras niciechdata so bari buchi cărdea o Iehova hai lesco șiavo anda amende, o Isus dea i porunca ca ande fiesavo bărș te încăras o ghies cana anas amenghe amintea lesche merimastar. (Luca 22:19, 20)

2. So va avela te dichas ande cado articolo?

² Ande cado bărș, o ghies cana anas amenghe amintea le merimastar le Isusosco si savatone, 12 aprilia 2025. Si ciaces, savore camas te avas code. Dacă angla hai pala cado baro ghies cheras amenghe timpo te gândisaras amen a ca so cărdea o Iehova hai o Isus anda amende, va avena amen but miștimata. Ande cado articolo, va dichaia so sicavel amen o merimos le Isusosco anda o Iehova hai anda lesco Șiavo. Ando articolo cai avel, va avela te hachiaras sar daisaras te țârdas miștimata anda o pochinimos cai dea-les o Isus hai sar daisaras te sicavas că si cuci anda amende cado baro daro.

SO SICAVEL AMEN ANDA O IEHOVA O POCHINIMOS CĂRDO LE ISUSOSTAR?

3. Sar prin o merimos ieche corcore manușesco daștin te aven salvime milioanea manușa? (Dich vi le imagini.)

³ O pochinimos cărdo le Isusostar sicavel amen anda o ortomos le Iehovasco. (Deut. 32:4) Sar? Te gândisaras amen: anda codoia  că o Adam ci așundea le Devlestar, savore arăsleam păcătoși, hai cadaia îngărel amen co merimos. (Rom. 5:12) Caște salvil amen anda o păcato hai o merimos, o Iehova dea pesche șiaves caște merel anda amende. Tha, sar daștilas o merimos ieche corcore manușesco te salvil milioanea manușen anda o merimos hai o păcato? O apostolo Pavel phendea: Cadea sar, but arăsle păcătoși anda codoia că iech corcoro manuș [O Adam] ci așundea, sa cadea but va arăsăna orta anda codoia că iech corcoro manuș [O Isus] așundea.” (Rom. 5:19; 1 Tim. 2:6) Cadea că, arăsleam sclavi le păcatosche hai le merimasche anda codoia că iech corcoro manuș perfecto ci așundea le Devlestar. Caște avas salvime, iech manuș perfecto trebulas te așunel le Devlestar.

4. Sostar ci mechlea o Iehova te train anda sea o timpo le șiaven le Adamosche cai așunenas lestar?

⁴ Tha, chiar trebulas o Iehova te bișalel le Isusos te merel anda amende caște salvil amen? Ci daștilas o Iehova te mechel te train anda sea o timpo le șiaven le Adamosche cai așunenas lestar? Ande le iacha le manușenghe, cadaia avelas iech lași buchi. Tha, dacă o Iehova cherelas cadaia, ci sicavelas pesco ortomos perfecto. Anda codoia că vo si orta ci daștilas te phandavel niciechdata pesche iacha angla o baro nasulimos cai cărdea-les o Adam cana ci așundea lestar.

5. Sostar daisaras te pachias ciaces că o Iehova va cherela sea o timpo so si orta?

⁵ Sa cadea, dacă o Iehova ci bișialelas le Isusos caște del cado pochinimos hai mechelas le șiaven imperfecto le Adamosche te train anda sea o timpo, le manușa daștinas te pușen-pe dacă va încărela vroiechdata pesche norme anda o ortomos. Le manușa daștinas te arăsăn te pachian că o Iehova ci va încărela pesche promisiuni. Tha, so mișto si că amen ci trebul te gândisaras amen cadale buchiande. Sostar? Anda codoia că o Iehova încărdea pesche norme anda o ortomos, chiar cana trebuisardea te pochinel le ratesa pesche cuci șiavesco. Cadaia cherel amen te pachias ciaces că vo va cherela sea o timpo so si orta.

6. So aver calitatea cărdea le Iehovas te bișalel pesche șiaves te merel anda amende? (1 Ioan 4:9, 10)

⁶ Tha, vi iech aver calitatea cărdea le Iehovas te bișalel le Isusos caște merel anda amende. Les si les iech bari iubirea caring amende. (Ioan 3:16; citisar 1 Ioan 4:9, 10.) Anda so cărdea o Iehova anda amende, hachiaras că ci camel numai te traisaras anda sea o timpo, tha vi te avas ande leschi familia. Cana o Adam păcătuisardea, o Iehova duriardea-les anda leschi familia. Cadea că, cana cărdileam, niciech anda amende ci samas andi familia le Iehovaschi. Tha, prin o merimos le Isusosco, o Iehova iertil le manușenghe păcatea hai va anela ande peschi  familia sea codolen cai sicaven pachiamos hai așunen lestar. Vi aghies daisaras te bucurisaras amen catar iech amalimos chidino le Iehovasa hai amare phralența. Savore simțosaras sar i bari iubirea le Iehovaschi tachiarel amare ile! (Rom. 5:10, 11)

7. Sar le bare ducha prin save nachlea o Isus ajutin amen te hachiaras chichi de but iubil amen o Iehova?

⁷ Daisaras te hachiaras mai mișto i bari iubirea cai si le Iehovas caring amende cana gândisaras amen chichi de duchado trebulas te avel lesco ilo cana dichlea prin so bare ducha nachlea lesco șiavo caște merel anda amende. O Satan phenel că niciech manuș le Devlesco ci va așela lesche loialo cana nachel prin pharimata. Caște sicavel că o Satan si iech hohamno, o Iehova mechlea pesche șiaves te nachel prin bare ducha angla so te merel. (Iov 2:1-5; 1 Pet. 2:21) O Iehova dichlea anda o cerii sar le manușa prasanas le Isusos, sar le soldați marenas-les, hai pala codoia, sar marenas carfina ande lesche vasta hai ande lesche pânre. Pala codoia, vo dichlea pesche cuci șiaves sar mulea ande bare ducha. (Mat. 27:28-31, 39) O Iehova daștilas te așiavel oricana le buchia prin save nachlea o Isus. Sar exemplo, o Iehova daștilas te salvil le Isusos cana codola cai camle te mudaren-les phende: „Acana te salvil-les o Del dacă camel ciaces”. (Mat. 27:42, 43) Tha, dacă o Iehova cherelas cadaia, o merimos le Isusosco ci daștilas te avel o ciacio pochinimos anda amare păcatea hai ci avelas amen niciech speranța. Cadea că, o Iehova mechlea pesche cuci șiaves te nachel prin bare ducha ji co merimos.

8. Sas o Iehova duchado cana dichlea prin so bare ducha nachlea lesco șiavo? Explichin. (Dich vi i imaginea.)

⁸ Anda codoia că o Iehova si o mai zuralo, ci trebul te pachias că les nai-les sentimentea. Vo cărdea le manușen caște avel-len sentimentea. Anda codoia că i Biblia phenel că samas chărde pala lesco chipo, însemnol că vi les siles sentimentea. Sar exemplo, i Biblia phenel că o Del saslo ‘holiardo’ hai „duchado”. (Ps. 78:40, 41) Te gândisaras amen prin so nachlea o Avraam hai lesco șiavo, o Isaac. Cadea sar jianas, o Iehova phendea le Avraamosche te del pesche corcore șiaves sar jertfa. (Gen. 22:9-12; Evr. 11:17-19) Amen daisaras numai te gândisaras amen chichi de duchado sas o ilo le Avraamosco cana trebulas te mudarel la șiuresa pesche șiaves. O Iehova trebulas te avel vi mai duchado cana dichlea prin so bare ducha nachlea lesco șiavo ji cana sas mudardo. (Dichen o materialo video Len tumen pala lengo pachiamos – O Avraam, i duito Partea, pa jw.org.)

9. So daștis te sichios anda Romani 8:32, 38, 39 anda i iubirea cai si le Iehovas caring tute hai caring che phrala hai pheia?

⁹ Anda o pochinimos cai dea-les o Isus prin pesco merimos sichioas că chonic ci iubil amen mai but sar o Iehova, nici codola cuci anda  amari familia sau amare mai pașarde amala. (Citisar Romani 8:32, 38, 39.) Si ciaces că o Iehova iubil amen vi mai but sar amen. Cames te trais anda sea o timpo? Na cadea de but sar camel o Iehova. Cames te aven chosle che păcatea? Na cadea de but sar camel o Iehova te chosel-len. Sea so manghel o Iehova amendar si te primisaras cado baro daro. Daisaras te cheras cadaia cana si amen pachiamos ande leste hai cana așunas lestar. O pochinimos cai dea-les o Isus prin pesco merimos sicavel i bari iubirea cai si le Devles caring amende. Andi lumea nevi va avela te sichioas vi mai but buchia anda leschi bari iubirea. (Ecl. 3:11)

SO SICAVEL AMEN ANDA O ISUS O POCHINIMOS CAI DEA-LES PRIN PESCO MERIMOS

10. a) So duchadea but le Isusos angla so te avel mudardo? b) Sar ujiardea o Isus o anav le Iehovasco? (Dich vi o chenarii „ I loialitatea le Isusoschi ujiardea o anav le Iehovasco”.)

¹⁰ O Isus lea sama te na avel meliardo o anav lesche dadesco. (Ioan 14:31) O Isus sas zurales duchado anda codoia că daștilas te meliarel o anav pesche dadesco cana le manușa doșarenas-les că prasadea le Devles hai avelas te merel sar iech manuș nasul. Anda codoia, vo phendea ando manglimos: „Dade, dacă daștil-pe, te nachel mandar cado paharo!”. (Mat. 26:39) O Isus așilea loialo le Iehovasche ji co merimos, hai cadea ujiardea o anav pesche dadesco catar le hohaimata le Satanosche.

11. Sar sicadea o Isus peschi bari iubirea caring le manușa? (Ioan 13:1)

¹¹ O pochinimos cai dea-les o Isus prin pesco merimos sicavel vi că les duchal-les but le manușendar, vi mai but codolendar cai len-pe pala leste. (Prov. 8:31; citisar Ioan 13:1.) Sar exemplo, vo jianglea că chichiva anda le buchia cai trebulas te cherel-len pi phuv avenas zurales phare anda leste. Iech anda le mai phare sas  lesco merimos. Tha, o Isus cărdea sea cadal phare buchia na numai anda codoia că o Iehova phendea lesche te cherel-len, tha anda codoia că iubilas le manușen. O Isus sicadea iech bari iubirea caring le manușa cana dea duma lența anda i vestea lași, cana sicadea-len hai ajutisardea-len. Vi ando ghies cana sas mudardo, o Isus cărdea pesche timpo caște halavel le pânre le apostolenghe, te sicavel-len hai te zuriarel-len. (Ioan 13:12-15) Pala codoia, chiar cana nachelas prin bare ducha po stâlpo de tortură, o Isus dea iech speranța le manușesche nasul cai sas pașa leste hai phendea lesche că va avela lesa ando Paradiso. Sa cadea, vo gândisardea-pe ca peschi dei hai phendea le Ioanosche te lel sama latar. (Luca 23:42, 43; Ioan 19:26, 27) Cadea, o Isus sicadea peschi bari iubirea anda le manușa na numai prin pesco merimos, tha vi prin sar traisardea peschi viața pi phuv.

12. So cherel acana o Isus anda amende?

¹² Si ciaces, o Isus „mulea iech data anda sea o timpo”, tha cherel vi mai dur but buchia anda amende. (Rom. 6:10) So cherel vo anda amende? Vo cherel mai dur phares buchi caște del amen but lașe buchia cai daștin te aven amenghe dine numai anda codoia că vo mulea anda amende. Sar exemplo, vo si Rege hai Baro Rașai hai silo o șăro la congregațiaco. (1 Cor. 15:25; Ef. 5:23; Evr. 2:17) Vo trebul te chidel codolen macle hai i bari mulțimea, hai va terminila cadaia angla te phandavel-pe o baro necazo. b (Mat. 25:32; Mar. 13:27) Sa cadea, prin o sclavo fidelo hai prevăzătorii, del amen vi mai dur so trebul amen caște slujisaras le Iehovasche pherde pachiamos. (Mat. 24:45) Hai ande lesco Raimos de Iech Mia Bărș, vo va cherela vi mai dur buchi ande amaro miștimos. Cadaia sicavel că o Iehova dea ciaces pesche Șiaves anda amende!

SICHIO VI MAI DUR BUCHIA NEVE

13. Sar hachiares mai mișto i iubirea cai sicadea-la caring amende o Iehova hai o Isus cana beșes hai gândisares tut?

¹³ Cana gândisares tut ca le buchia cai o Iehova hai o Isus cărde-len anda amende, va avela te hachiares vi mai mișto i bari iubirea cai sicade-la caring amende Angla hai pala o ghies cana anas amenghe amintea anda o merimos le Isusosco, daștis te citis atento iech andal evanghelii sau chiar mai but. Na citisar prea but capitolea de iech data. Na sighiar hai rode neve buchia cai ajutin tut te iubis vi mai but le Iehovas hai le Isusos. Hai si zurales importanto te phenes vi le coavernghe so sichilean.

14. Cadea sar sicavel-pe ando Psalmo 119:97 hai i nota de telal, sar daisaras te sichioas mai but buchia anda o pochinimos cai dea-les o Isus prin pesco merimos hai aver sicaimata? (Dich vi i imaginea.)

 ¹⁴ Dacă san de but bărșa co ciacimos, daștil-pe că pușes tut dacă daștis te araches neve buchia cai te sichios-len anda o ortomos le Iehovasco, anda leschi iubirea hai anda o pochinimos cai dea-les o Isus prin pesco merimos sau aver sicaimata. O ciacimos si că sea o timpo si amen vareso te sichioas. Cadea că, so daștis te cheres? De chi zor te țârdes chichi mai but miștimata anda amare publicații bazome pi Biblia. Cana araches vareso andai Biblia cai ci hachiares mișto, rode te prinjianes mai but anda codoi buchi. Pala codoia, ande codo ghies, gândisar tut ca so sichilean hai ca so sicavel cadaia anda o Iehova, anda lesco șiavo hai anda lenghi iubirea caring tute. (Citisar Psalmo 119:97 hai i nota de telal.)

15. Sostar si importanto te des chi zor te sichios buchia neve andai Biblia?

¹⁵ Na mech tut perado cana ci araches vareso nevo de fiesavi data cana citis sau sichios andai Biblia. I buchi cai cheres-la si sar ieche manușeschi cai rodel sumnacai. Vo rodel pherdo răbdarea but ceasurea sau ghiesa caște arachel numai iech țâno cotor sumnacai. Cu sea cadala, vo ci mechel-pe anda codoia că anda leste fiesavo gramo sumnacai silo zurales cuci. Tha, mai cuci sar o sumnacai si fiesavi buchi nevi cai sichioas-la andai Biblia! (Ps. 119:127; Prov. 8:10) Cadea că, na mech tut, citisar hai sichio ande fiesavo ghies anda o Lil le Devlesco! (Ps. 1:2)

16. Sar daisaras te las amen pala o Iehova hai pala o Isus?

¹⁶ Cana sichios andai Biblia, gândisar tut sar daștis te cheres so sichios. Sar exemplo, daștis te les tut pala o ortomos le Iehovasco cana phiraves tut șucar savore manușența. Sicav iubirea cadea sar o Isus sicadea caring pesco Dad hai le manușa. Av gata te naches prin orisavo pharimos anda o anav le Iehovasco hai te cheres sea so daștis caște ajutis che phralen. Sa cadea, daștis te les tut pala o Isus cana phenes averenghe so bare buchia cărdea o Iehova anda le manușa hai cadea te daștin vi von te sicaven pachiamos ando merimos le Isusosco.

17. So va avela te dichas ando articolo cai avel?

¹⁷ Cana hachiaras mai mișto hai dichas mai cuci o pochinimos cai dea-les o Isus prin pesco merimos, va avela te iubisaras le Iehovas hai lesche Șiaves vi mai but. Anda codoia că iubisaras len mai but, von va iubina amen vi mai but. (Ioan 14:21; Iac. 4:8) Cadea că, te das amari zor te sichioas mai but anda amare publicații hai andai Biblia caște arachas vi aver buchia anda o pochinimos cai dea-les o Isus prin pesco merimos. Ando articolo cai avel, va avela te dichas chichiva miștimata cai si amen anda codoia că o Isus pochindea amare păcatea prin pesco merimos hai sar daisaras te sicavas că dichas cuci i iubirea le Iehovaschi.