1, 2. Sostar si mișto anda amende că o Iehova cărdea amen te avas mai bucurime cana das sar cana primisaras?

 CANA o Del cărdea le manușen, cărdea-len te aven mai bucurime cana den sar cana primin. (Fap. 20:35) Însemnol cadaia că ci sam bucurime cana primisaras? Na. Savore simțosaras sar bariol amaro ilo cana primisaras iech cadouo. Cu sea cadala, cana amen sam codola cai das averenghe, amari bucuria si vi mai bari. Cadea cărdea amen o Iehova hai si ande amaro miștimos. Sostar?

² Anda codoia că o Iehova cărdea amen cadea, daisaras te bariaras corcore amari fericirea. Cana rodas vi mai but te das averenghe, si te avas mai bucurime. Si zurales șucar că o Iehova șiutea cadaia ande amare ile! (Ps. 139:14)

3. Sostar o Lil le Devlesco phenel anda o Iehova că si ‘o fericime Del’?

³ O Lil le Devlesco sicavel că, cana des, san fericime. Cadea că, hachiaras sostar i Biblia phenel anda o Iehova că si ‘o fericime Del’. (1 Tim. 1:11) Vo sas o dintuno cai cărdea cadaia hai chonic ci del mai but sar vo. Cadea sar phendea vi o apostolo Pavel, „prin leste si amen viața, cheras sea hai sam”. (Fap. 17:28) Ciaces, „orisavi buchi lași hai orisavo daro perfecto” avel le Iehovastar. (Iac. 1:17)

4. So va ajutila amen te avas mai bucurime?

⁴ Daștil-pe că fiesavo de mașcar amende camas te dichas sar si te avas mai fericime cana das. Daisaras te cheras cadai buchi cana das buhle vastesa, sar o Iehova. (Ef. 5:1) Mai dur, va avela te sichioas anda lesco exemplo perfecto hai, sa cadea, va avela te dichas so daisaras te cheras cana pachias că le coaver ci mulțumin amenghe anda le lașe buchia cai cheras-len anda lende. Cadaia va ajutila amen te das mai dur averenghe hai te avas mai bucurime.

 TE DAS BUHLE VASTESA, CADEA SAR O IEHOVA

5. So buchia del amen o Iehova?

⁵ Sar sicavel o Iehova că del buhle vastesa? Sar exemplo, o Iehova del amen le buchia cai trebun amenghe te traisaras. Daștil-pe că na-i amen luxo hai but barvalimata, tha, anda codoia că o Iehova del buhle vastesa, le mai but de mașcar amende si amen sea so trebul amen. Sar avelas, si amen so te has, so te las pe amende hai iech than cai te beșas. (Ps. 4:8; Mat. 6:31-33; 1 Tim. 6:6-8) Tha, del amen o Iehova sea cadala numai anda codoia că trebul? Jianas ciaces că na! Atunci sostar cherel o Iehova cadaia?

6. So sichioas anda Matei 6:25, 26?

⁶ O Iehova del amen le buchia cai trebun amen te traisaras anda codoia că vo iubil amen. O Isus sicadea amen cadaia cana dea duma anda le buchia cai cărdea-len o Del. (Citisar Matei 6:25, 26.) Vo dea duma andal ciriclea hai phendea: „Von ci șion semințea andi phuv, ci chiden so barilea anda lende hai nici na șion vareso de iech rig”. Trebul te dichas vi că, pala codoia, vo phendea: „Cu sea cadala, tumaro Dad andal ceruri del-len te han”. Hai vo pușlea: „Ci san tumen mai cuci sar von?”. Prin cado exemplo, o Isus sicadea că, anda o Iehova, lesche manușa si mai cuci sar le animalea cai cărdea-len. Cadea că, dacă o Iehova lel sama catar le animalea, jianas ciaces că va lela sama vi amendar! Sar iech dad pherdo lașimos, o Iehova lel sama pesca familiatar pherdo iubirea. (Ps. 145:16; Mat. 6:32)

7. Sar daisaras te das buhle vastesa, sar o Iehova? (Dich vi le imagini.)

⁷ Cadea sar o Iehova, vi amen daisaras te das averenghe le buchia cai trebun-len, anda codoia că iubisaras-len. Sar avelas, daștil-pe că prinjianes iech phral sau iech phei cai nai-les so te hal sau sosa te hureavel-pe. O Iehova daștil te folosil tut caște ajutil-len hai te del-len so si-len nevoia. Pe sea i phuv, le manușa le Iehovasche sile prinjiande anda codoia că den buhle vastesa andel phare ghiesa. Sar avelas, cana sas i pandemia de COVID-19, le phrala hai le pheia dine averenghe haben, hureaimos hai aver buchia cai trebunas lenghe. Aver dine mai but love caște cherel-pe mai dur i predicarea pe sea i phuv. Cadea, von ajutisarde sea penghe phralen cai sas-len nevoia ajutorostar anda codoia că sas-len pharimata. Von cărde so phenel-pe ando Evrei 13:16: „Na bâstren te cheren o miștimos hai te den vi averen anda so si tumen, că le Devles ciaiol-les but cana cheren cadaia”.

8. Cana del amen o Iehova zuralimos? (Filipeni 2:13)

 ⁸ O Iehova del amen zuralimos. O zuralimos le Iehovasco ci terminil-pe niciechdata hai vo si bucurime te zuriarel vi pesche manușen pherde pachiamos. (Citisar Filipeni 2:13.) Manglean tut vroiechdata te așes zuralo cana chio ilo țârdea tut te cheres vareso nasul sau te naches prin iech baro pharimos? Sau daștil-pe că manglean le Iehovas te avel tut zor anda încă iech ghies. Cana o Iehova dea tut o zuralimos cai manglean-les, daștil-pe că ande chio ilo sas so phendea vi o apostolo Pavel: „Anda sea le buchia si man zuralimos prin codo cai del man zor”. (Filip. 4:13)

9. Sar daisaras te das buhle vastesa anda amaro zuralimos, cadea sar o Iehova? (Dich vi le imagini.)

⁹ Si ciaces, amen na-i amen o zuralimos cai si le Iehovas hai ci daisaras te das averenghe zor sar cherel vo. Tha daisaras te las amen pala leste cana ajutisaras averen amare zuralimasa. Daisaras te ajutisaras le phralen phure sau cai sile nasfale te cheren ujimos ande pengo chăr sau te jias te chinas le buchia cai trebun-len. Sa cadea, daisaras te cheras ujimos sau te lașiaras le buchia cai trebun ca i sala le Regatoschi. Cadea, amare zuralimasa, daisaras te cheras lașe buchia anda amare phrala hai pheia.

10. Sar daisaras te zuriaras averen prin so phenas caște ajutisaras-len?

¹⁰ Te na bâstras că daisaras te zuriaras averen vi prin so phenas. Prinjianes iech phral sau iech phei cai daștilas te avel zuriardo cana așares-les anda o ilo? Prinjianes varecas cai trebul te avel zuriardo? Sicav că duchal tut lestar. Daștis te jias leste chăre, te sunis-les, te bișiales iech lil, iech e-mailo sau iech mesajo. Na gândisar tut că trebul te phenes bare buchia. Arăsăl te phenes vareso sea le ilesa hai, cadea, codo phral sau codoi phei daștil te avel zuriardo te slujil le Iehovasche încă iech ghies sau te dichel mai mișto le buchia. (Prov. 12:25; Ef. 4:29)

11. Sar del o Iehova averenghe goghiaverimos?

¹¹ O Iehova del amen goghiaverimos. O apostolo Iacov scriisardea: „Cana varecas mașcar tumende na-i les goghiaverimos, te manghel-les sea o timpo le Devlestar, anda codoia că vo del fiesavesche anda sasto ilo hai bi te doșarel-les”. (Iac. 1:5) Cadea sar hachiaras anda so phendea o Iacov, o Iehova na încărel numai anda peste o goghiaverimos. Mai but, vo del buhle vastesa vi averenghe. Sa cadea, trebul te dichas că vo del averenghe goghiaverimos „bi te doșarel-len”. Cana mangas-les te sicavel amenghe so te cheras, vo ci cherel niciechdata te avel amenghe lajiav. O Iehova  chiar zuriarel amen te rodas lesco ajutorii. (Prov. 2:1-6)

12. Cana daisaras te das buhle vastesa anda amaro goghiaverimos?

¹² Daisaras te das vi amen buhle vastesa, goghiaverimos averenghe sar o Iehova? (Ps. 32:8) Sar manușa le Iehovasche, daisaras butivar te sicavas averen sosa jianas, sar avelas, cana sicavas le neve phralen sar te cheren predicarea. Le phure de congregație silen but răbdarea cana sicaven le slujitoren auxiliari hai avere phralen bolde sar te cheren i buchi cai sas lenghe dini andi congregația. Sau le phrala hai le pheia save jianen te cheren mișto buchi andel construcții sicaven codolen cai ci jianen cadea de mișto.

13. Cana sicavas averen, sar daisaras te das buhle vastesa, sar o Iehova?

¹³ Cana sicavas averen, trebul te das buhle vastesa goghiaverimos, sar o Iehova. Cadea că, ci camas te așiavel amen chanci te phenas lenghe so jianas. Ci camas te garavas so jianas, anda codoia că pachias că, varecana, va ciorela amaro than. Mai but, ci camas te phenas: „Man ci sicadea man chonic. Mech-les te sichiol corcoro”. Le manușa le Iehovasche ci trebun te gândin cadea. Mai but, amen sam gata na numai te phenas lenghe so jianas, „tha vi te das amari viața anda [lende]”. (1 Tes. 2:8) Pala codoia, ajucăras că „va dena vi von penghi zor te sicaven averen”. (2 Tim. 2:1, 2) Cadea că, chichi das mai but buhle vastesa, cadichi va avasa mai voime, vi amen, hai vi codola cai sicavas-len.

CANA DAS BUHLE VASTESA HAI PACHIAS CĂ LE COAVER CI DICHEN

14. So cheren le mai but andal manușa cana sicavas lenghe lașimos?

¹⁴ Cana das sau cheras vareso anda aver, mai but anda amare phrala, butivar von mulțumin amenghe. Sar exemplo, von daștin te scriin amenghe iech lilorro sau daștin te mulțumin amenghe ande aver felo. (Col. 3:15) Cana von cheren cadaia, amari bucuria bariol vi mai but.

15. So trebul te anas amenghe amintea cana varecon ci sicavel că mulțumil amenghe?

¹⁵ Tha, poiechdata, le manușa ci mulțumin amenghe anda so cărdeam anda lende. Daștil-pe că deam anda amaro timpo, amaro zuralimos sau amare love hai, pala codoia, pușleam amen dacă dichlea ciaces so cărdeam anda leste. Dacă nachas prin cadaia, so daisaras te cheras caște na hasaras amari bucuria sau te na avas holiarde? Te anas amenghe amintea o verseto pe savo bazol-pe o articolo, Fapte 20:35. Codo cai del, daștil te avel bucurime chiar cana la coaver mulțumin lesche sau nici. Daisaras te avas fericime cana das, chiar cana fal-pe că le coaver ci dichen so cheras anda lende. So daștil te ajutil amen? Te dichas chichiva buchia.

16. So daștil te ajutil amen te das mai dur bucuriasa?

¹⁶ Le tut pala o Iehova. Vo del lașe buchia le manușenghe, chiar cana von sicaven că mulțumin lesche sau nici. (Mat. 5:43-48) O Iehova phenel ciaces că, cana das ‘bi te ajucăras vareso parpale’, amaro ‘pochinimos va avela baro’. (Luca 6:35) „Vareso” daștil te avel cana varecon sicavel că mulțumil. Chiar cana le coaver sicaven sau nici că mulțumin amenghe anda so cărdeam, o Iehova va pochinela amen parpale sea o timpo dacă cheras lașimos averenghe hai das bucuriasa. (Prov. 19:17; 2 Cor. 9:7)

17. So trebul te avel anda amaro ilo cana das averenghe? (Luca 14:12-14)

¹⁷ Aver buchi cai daisaras te cheras-la caște las amen pala o Iehova cana das, si te cheras so phendea o Isus ando Luca 14:12-14. (Citisar.) Na-i vareso nasul cana acharas varecas  ca i meseli sau sicavas lașimos caring codola cai daștin te cheren sa codoi buchi anda amende. Tha so daisaras te cheras cana dichas că amaro ilo țârdel amen te das vareso averenghe anda codoia că ajucăras te den amen vareso parpale? Daisaras te cheras so phendea o Isus. Daștis te des buhle vastesa varecasche cai ci daștil te cherel chanci parpale anda tute. Cadea, va avasa bucurime anda codoia că las amen pala o Iehova. Hai dacă ci ajucăras chanci parpale, amaro ilo va bariola bucuriatar de fiesavi data cana das averenghe, chiar cana von ci va mulțumina amenghe.

18. So ci trebul te cheras hai sostar?

¹⁸ Te na gândisaras nasul anda aver. (1 Cor. 13:7) Cana le coaver ci sicaven că mulțumin amenghe, daisaras te pușias amen: „Sile ciacimasa manușa cai ci mulțumin, sau numai bâstărde te cheren cadaia?”. Sostar ci sicade von că mulțumin amenghe, cadea sar ajucărdeam amen? Anda chichiva, daștil te avel iech bari buchi so cărdeam anda lende, tha daștil te avel vi pharo te sicaven cadaia. Anda aver, daștil te avel lenghe lajiav cana sile ajutime, anda codoia că, mai anglal, von sas codola cai ajutinas averen. Tha, dacă iubisaras ciaces amare phralen hai pheian, ci va avela te gândisaras nasul anda lende hai va avela te das mai dur buhle vastesa averenghe, pherde bucuria. (Ef. 4:2)

19, 20. So miștimata si amen dacă sam răbdători cana cheras lașe buchia anda aver? (Dich vi le imagini.)

¹⁹ Av răbdătorii. Cana gândisardea-pe că trebul te das buhle vastesa, o goghiaver rege Solomon scriisardea: „Șiude chio manro pe le paia, că pala but ghiesa va avela te araches-les pale”. (Ecl. 11:1) De cathar hachiaras că chichiva daștinas te mulțumin amenghe anda so cărdeam anda lende „pala but ghiesa”. Te dichas iech experiența cai sicavel că cadai buchi si ciaci.

²⁰ Acana but bărșa, i rromni ieche phraleschi cai vizitil le congregații scriisardea iech lilorro caring iech phei cai boldea-pe de țâra timpo. Ando lilorro, zuriardea-la te na mechel  le Iehovas. Pala cam ohto bărșa, i phei bișaldea lache parpale iech lilorro. Voi scriisardea: „Camlem anda sea o ilo te scriisarav tuche hai te phenav tuche chichi de but ajutisardea man chio lilorro andel bărșa cai nachle, chiar dacă tu ci jianglean chanci. . . . [Che dumes] sas-le pherde lașimos hai ci bâstărdem niciechdata o verseto cai phendean-les manghe”. a Pala so scriisardea prin so pharimata nachlea, i phei phendea mai dur: „Sas ghiesa ande save camlem te mechav man – te mechav o ciacimos, te mechav so sas manghe dino te cherav, te mechav sea. Tha, o verseto cai scriisardean-les manghe arăslea ande mânro ilo hai așilea cothe ande sea cadal bărșa, . . . ajutisardea man te jiav mai dur”. Voi mai phendea: „Chanci ci daisardea te ajutil man mai but ande cadal bărșa”. Chichi de bucurime sas i rromni le phraleschi cai vizitil le congregații cana primisardea cado lilorro, chiar cana nachle „but ghiesa”! Vi amenghe, le coaver daștin te sicaven că mulțumin amenghe pala but timpo de cana ajutisardeam-len.

21. Sostar cames anda sea o ilo te des buhle vastesa, sar o Iehova?

²¹ Cadea sar dichleam, si șucar că o Iehova șiutea ande amare ile te avas mai bucurime cana das sar cana primisaras! Simțosaras amen mișto cana daisaras te ajutisaras amare phralen. Hai amaro ilo bariol bucuriatar cana von sicaven că mulțumin amenghe! Tha, chiar cana von cheren sau nici cadaia, amen daisaras te avas bucurime anda codoia că jianas că cărdeam so si mișto. Te na bâstras că, orichichi de but das averenghe, ‘o Iehova daștil te del amen but mai but sar cadaia’. (2 Cron. 25:9) Vo va dela tut mai but sar daștis te des tu averenghe. Hai na-i bucuria mai bari sar te avas pochinde le Iehovastar! Cadea că, te camas anda sea o ilo te das buhle vastesa, cadea sar amaro Dad andal ceruri.