1, 2. So cherel le manușen le Iehovasche te aven bucurime? (Iacov 1:22-25)

 O IEHOVA hai lesco Șiavo camen te avel amen iech viața fericime. Ando Psalmo 119:2 phenel-pe: „Voime si codola cai încăren le buchia cai o Iehova anel-len amintea, codola cai roden-les anda sea o ilo”. Mai but, o Isus phendea: „Fericime si codola cai așunen i duma le Devleschi hai train pala late!”. (Luca 11:28)

² Sar manușa le Iehovasche, amen sam iech poporo bucurime. Sostar? Si amen but motivea, tha iech importanto si că citisaras ande fiesavo ghies anda o Lil le Devlesco hai cheras so sichioas. (Citisar Iacov 1:22-25.)

3. So miștimata si amen cana cheras so citisaras ando Lil le Devlesco?

³ So miștimata si codolen cai „cheren so phenel o cuvânto”? Sar exemplo, cana cheras so phenel o Lil le Devlesco, sam mișto dichle le Iehovastar hai cadaia cherel amen voime. (Ecl. 12:13) Sa cadea, si amen iech familia fericime hai iech amalimos chidino amare phralența hai pheianța. Mai but, ci nachas prin le pharimata cai nachen codola cai ci așunen le Devlestar. Le dumes cai phendea-len o rege David sile zurales ciace. Ande iech psalmo, vo phendea că cana încăras i legea le Iehovaschi, lesche porunci hai lesche hotărâri judecătorești, si amen „iech baro pochinimos”. (Ps. 19:7-11)

4. Sostar daștil te avel pharo te cheras so phenel-pe ando Cuvânto le Devlesco?

⁴ Si ciaces că na-i sea o timpo ușoro te cheras so phenel o Cuvânto le Devlesco. Savoren si amen but buchia te cheras.  Cadea că, daștil te avel amenghe pharo te cheras amenghe timpo te citisaras hai te sichioas andai Biblia caște hachiaras mai mișto so camel o Iehova te cheras. Anda codoia, va avela te dichas chichiva buchia cai va ajutina amen te citisaras ande fiesavo ghies anda o Lil le Devlesco. Sa cadea, va avela te dichas so daștil te ajutil amen te gândisaras amen ca so citisardeam hai te traisaras amari viața pala i Biblia.

ALOSAR TUCHE IECH TIMPO CANA TE CITIS ANDAI BIBLIA

5. Save si chichiva buchia cai len amendar but timpo?

⁵ Le Iehovasche manușen silen but buchia te cheren. Das but timpo caște cheras le buchia cai i Biblia phenel că sile importanto. Sar exemplo, but anda amende cheras buchi caște las sama amendar hai amara familiatar. (1 Tim. 5:8) But phrala hai pheia trebun te len sama pe penghe neamurea cai sile nasfale sau phure. Hai fiesavo anda amende trebul te las sama vi pe amaro sastimos. Cadaia lel amendar but timpo. Cu sea cadala, trebul te cheras vi le buchia cai sas amenghe dine andi congregația. Sar exemplo, iech buchi importanto andi amari viața si te phenas i vestea lași le manușenghe. Cadala si numai chichiva buchia cai trebul te cheras-len. Tha, sar daisaras te arachas amenghe timpo te citisaras ande fiesavo ghies andai Biblia, te gândisaras amen ca so citisardeam hai vi te cheras so phenel o Lil le Devlesco?

6. Sar daștis te șios po iechto than o citimos la Bibliaco? (Dich vi i imaginea.)

⁶ I citirea la Bibliachi si iech anda le ‘mai importanto‘ buchia, anda codoia, trebul te șioas-la po iechto than andi amari viața. (Filip. 1:10) Ando dintuno psalmo phenel-pe anda iech manuș cai arachlea i fericirea: „Ciaiol-les i legea le Iehovaschi hai ghies hai riat citil locăs anda leschi legea”. (Ps. 1:1, 2) Ciaces, ande cadal dumes hachiaras că trebul te cheras amenghe timpo caște citisaras andai Biblia. Tha cana si o mai lașio timpo te citisaras andai Biblia? Anda fiesavo daștil te avel aver timpo o mai lașio. Tha caște daștis te citis andai biblia ande fiesavo ghies, trebul te  alosares iech timpo ande savo ci așiavel tut chanci te citis andai Biblia. Iech phral po anav Victor phenel: „Ciaiol man te citiv de teharin andai Biblia. Chiar dacă ci som iech manuș cai uștel teharin, ande cadal ceasurea ci cherel man chanci te așiavav man anda o citimos la Bibliaco. Mânri goghi si uji hai daștiv te hachiarav mai mișto”. San vi tu sa cadea? Puș tut: „Cana si anda mande mai mișto caște citiv andai Biblia?”.

GÂNDISAR TUT CA SO CITISARDEAN

7, 8. Cana ci țârdas miștimata anda so citisardeam? Phenen iech ilustrarea.

⁷ O ciacimos si că daisaras te citisaras but buchia, tha bi te hachiaras ciaces so citisaras. Citisardean vroiechdata vareso hai, pala iech țâra timpo, andean tuche amintea prea țâra buchia? Fiesavo anda amende cărdeam cadaia. Poiechdata, cheras cadaia vi cana citisaras andai Biblia. Daștil-pe că șiuteam amenghe ande goghi te citisaras chichiva capitolea ande fiesavo ghies. Cadaia si iech buchi zurales lași. Trebul te șioas amenghe andi goghi buchia cai camas te cheras-len hai vi te das amari zor te cheras-len. (1 Cor. 9:26) Cu sea cadala, chiar cana si mișto că astaras te citisaras anda o Lil le Devlesco, dacă camas te avel amen miștimata anda leste trebul te cheras mai but.

⁸ Te gândisaras amen: dacă ci delas o brâșând, i ciar avelas te merel. Cu sea cadala, cana del o brâșând prea but ande iech țâra timpo, o pai ci jial andre andi phuv cadea sar trebul. Si mai mișto cana o brâșând del locăs, anda codoia că o pai daștil te jial andi phuv hai i ciar te bariol. Sa cadea, ci trebul te sighiaras cana citisaras andai Biblia. Cana cheras cadaia, ci daisaras te țârdas miștimata hai te anas amenghe amintea so citisardeam. (Iac. 1:24)

9. So daisaras te cheras dacă citisaras prea sigo andai Biblia?

⁹ Sighiardean vi tu cana citisardean andai Biblia? Dacă da, trebul te citis mai locăs. De chi zor caște gândis tut ca so citis sau citisardean. Cadai buchi ci trebul te avel anda tute phari. Sea so trebul te cheres si te gândis tut  ca so citisardean. Daștis te cheres tuche mai but timpo cana sichios, caște avel tut vi cana te gândis tut. Sau daștis te citis mai țâra, hai, ando timpo so așel tuche, te gândisares tut ca so citisardean. O Victor, anda savo deam duma mai anglal, phenel: „Ci citisarav but. Daștil-pe iech capitolo. Anda codoia că citiv i Biblia de teharin, sar nachel o ghies, daștiv te gândiv man ca so citisardem”. Daștis te alosares sode but te citis, tha si importanto te citis cadea de locăs caște daștis vi te gândis tut ca so citisardean. (Ps. 119:97; dich vi o chenarii „ So daștis te pușes tut cana citis andai Biblia?”.)

10. Sicav prin iech exemplo sar daștis te cheres so citis. (1 Tesaloniceni 5:17, 18)

¹⁰ Cana citis andai Biblia, gândisar tut sar daștis te cheres so citisardean. Sar exemplo, cana citis andai Biblia, puș tut: „Sar daștiv te astarav te cherav cadaia acana sau andel ghiesa cai va avena?”. Te phenas că arăslean te citis andai Biblia le versetea anda 1 Tesaloniceni 5:17, 18. (Citisar.) Pala so citis cadal dui versetea, daștis te așes iech țâra hai te pușes tut: „Sode var mangav man le Iehovasche? Hai chichi de but pâtrav mânro ilo angla leste?”. Sa cadea, daștis te gândis tut anda soste cames te mulțumis le Iehovasche. Daștil-pe că cames te mulțumis lesche anda trin buchia cai cărdea-len anda tute. Pala numai chichiva minutea ande save beșleam hai gândisardeam amen mai but ca chichiva versetea andai Biblia, jianas mai mișto sar daisaras te așunas hai te cheras so phenel-pe ando Lil le Devlesco. Daștis te cheres cadaia ande fiesavo ghies cana citis andai Biblia. Sar nachen le ghiesa, va avela te cărdios sea mai but iech manuș pala o ilo le Iehovasco. Tha so daștis te cheres cana diches că trebul te paruves prea but buchia tute?

ȘIU TUCHE ANDI GOGHI BUCHIA CAI DAȘTIS TE CHERES-LEN

11. Sostar daisaras, poiechdata, te simțosaras amen perade? Den iech exemplo.

¹¹ Cana citis andai Biblia, daștis te simțosares tut perado cana diches chichi de but buchia trebul te paruves. Sar exemplo, gândisar tut că ande iech ghies, citis andai Biblia că ci trebul te des pachiv ieche manușesche mai but sar averenghe. (Iac. 2:1-8) Des chi sama că trebul te phiraves tut mai șucar averența. Cadea că, cames te paruves tut. Si șucar că cames te cheres cadaia! Tha tehara citis aver versetea, cai sicaven că trebul te les sama sar des duma. (Iac. 3:1-12) Des chi sama că, poiechdata, des duma nasul anda aver. Cadea că, șios tuche andi goghi te diches mișto le buchia hai te zuriares averen. O trinto ghies cana citis andai Biblia, araches iech verseto  cai sicavel că ci trebul te aves amal codolența andai lumea. (Iac. 4:4-12) Vi acana, des chi sama că trebul te alosares mai mișto so citis, so diches sau so așunes. Daștil-pe că ando ștarto ghies san perado cana diches sode but paruimata trebul te cheres.

12. Sostar ci trebul te meches tut perado cana citis andai Biblia, hai diches că trebul te cheres chichiva paruimata? (Dich vi i nota de telal.)

¹² Dacă diches că trebul te cheres mai but paruimata sau te lașiares chichiva buchia, na mech tut perado. Cana cames te cheres paruimata, sicaves că san iech manuș umilo hai că cames te cheres le buchia mișto. Iech manuș umilo citisarel andai Biblia hai rodel te dichel so daștil te lașiarel peste. a Sa cadea, vo ci bâstrel că, caște ‘neviarel o manuș cai si de andral’, trebul te cherel vareso sea o timpo. (Col. 3:10) So va ajutila tut te cheres vi mai dur so phenel o Lil le Devlesco?

13. Sar daștis te cheres mai sigo so șiutean tuche andi goghi? (Dich vi le imagini.)

¹³ Ando than te cheres sea le paruimata de iech data, gândisar tut chichi de but buchia daștis te cheres acana. (Prov. 11:2) Avelas mișto te cheres tuche iech lista le buchianța cai cames te cheres-len. Pala codoia, alosar iech sau dui buchia cai cames te lașiares-len, ca, pala iech timpo, te daștis te lașiares vi le coaver. Tha, daștil-pe că acana pușes tut save buchianța te astares?

14. Save buchianța cai cames te paruves-len daștis te astares?

¹⁴ Daștis te astares te paruves vareso cai si tuche mai ușoro te cheres. Sau daștis te alosares te cheres paruimata cothe cai diches că trebul te lașiares mai but buchia. Cana alosardean sosa cames te astares, rode ande amare  publcații, sar avelas, ando Indexo le publicațiengo Watch Tower sau ando Ghido de cercetare andal Martori le Iehovasche. Mang le Iehovas anda so șiutean tuche andi goghi hai phen lesche te ajutil tut ‘te cames hai vi te del tut o zuralimos te cheres’ cadaia. (Filip. 2:13) Pala codoia, cher so sichios. Cana diches că daisardean te cheres iech paruimos, va zuriarela tut te lașiares vi aver buchia. Pala so cărdean cadaia daștil-pe că va avela tuche mai ușoro te cheres vi aver paruimata.

MECH CA O LIL LE DEVLESCO ‘TE CHEREL BUCHI ANDE TUTE’

15. So diferența si mașcar le Martori le Iehovasche hai le manușa cai citin i Biblia? (1 Tesaloniceni 2:13)

¹⁵ But manușa phenen că citisarde i Biblia butivar. Tha pachian von ciaces le buchia cai sicaven-pe andi Biblia? Cărde von so phenel-pe andi Biblia sau mechle-la te paruvel lenghi viața? Le mai but manușa ci len-pe pala so phenel i Biblia. So bari diferența si mașcar lende hai le manușa le Iehovasche! Cadea sar le creștini anda o iechto secolo, von i Biblia, ‘cadea sar si voi ciaces, sar o cuvânto le Devlesco’. Mai but, prin sea so cheren, sicaven că cadaia ‘cherel buchi ande lende’, adică că paruvel lenghi viața. (Citisar 1 Tesaloniceni 2:13.)

16. So daștil te ajutil amen te avas anda codola „cai cheren so phenel o cuvânto”?

¹⁶ Na-i sea o timpo ușoro te citisaras hai te cheras so phenel-pe ando Lil le Devlesco. Si pharo vi te arachas timpo caște citisaras. Sau daștil-pe că citisaras i Biblia prea sigo hai ci mai si amen timpo te beșas te gândisaras amen ca so citisardeam. Sau daștil-pe că sam perade cana dichas sea le paruimata cai trebul te cheras-len. Tha orisavo avelas amaro pharimos, daisaras te pachias anda sea o ilo că si amen o ajutorii le Iehovasco. Te camas ciaces te na avas sar codola manușa cai așunen hai bâstren sigo, tha te avas anda codola „cai cheren so phenel o cuvânto”. Jianas mișto că chichi mai but citisaras o Lil le Devlesco hai cheras so sicavel amen, va avela te avas vi mai fericime! (Iac. 1:25)