1, 2. a) Cana o apostolo Pavel scriisardea le creștinenghe anda Iudeea, sar sas lenghi viața ande codo timpo? b) Sostar cado lil avilea co mai lașio timpo?

 PALA so o Isus mulea, le creștini evrei anda o Ierusalimo hai anda sea i Iudeea nachle prin phare ghiesa. Na pa but timpo pala so sas cărdi i congregația creștino, le manușa rodenas te cheren nasulimos le phralenghe. (Fap. 8:1) Pala cam 20 bărșa, von nachle prin bare pharimata anda codoia că ando them sas bochalimos hai ciorâmos. (Fap. 11:27-30) Ando bărș 61 a.e., von bucurisarde-pe catar iech timpo mai liniștime. Ande codo timpo lașio, o Iehova, prin o apostolo Pavel, bișaldea iech lil cai avelas te zuriarel le evreien anda le phare ghiesa cai avenas.

² O lil caring le evrei avilea co mai lașio timpo, anda codoia că i pacea ande savi traisarenas von ci avelas te mai încărel but. O Pavel dea le creștinen lașe sfaturi, cai avelas te ajutin-len andel pharimata cai ajucărenas-len. Cadea sar phendea vi o Isus de mai anglal, na pa but timpo, o sistemo iudaico avelas choslo. (Luca 21:20) Si ciaces, nici o Pavel hai nici le creștini anda Iudeea ci jianenas cana avelas te avel cadaia. Tha le creștini evrei daștinas te folosin o timpo cai mai așilea caște bariaren pengo pachiamos hai te sichion te așen zurale hai te na mechen-pe. (Evr. 10:25; 12:1, 2)

3. Sostar trebulas te avel importanto anda le creștini de aghies o Lil caring le evrei?

³ Na pa but timpo, vi amen va avela te nachas prin iech baro pharimos, but mai baro sar codo prin savo nachle le creștini evrei. (Mat. 24:21; Rev. 16:14, 16) Cadea că, avelas mișto te dichas chichiva buchia cai o Iehova phendea-len le evreienghe hai cai daștin te ajutin vi amen.

 „TE BARIOAS ANDO PACHIAMOS”

4. Prin so pharimata nachle le creștini evrei? (Dich vi i imaginea.)

⁴ Le evrei cai cărdile creștini trebunas te cheren bare paruimata hai cadaia ci sas ușoro anda lende. Von sas-le o poporo alosardo le Iehovasco. But bărșa, o Ierusalimo sas iech than zurales importanto. O rege alosardo le Iehovastar railas cothe hai le manușa cai camenas te anen închinarea le Iehovasche cărde cadaia co templo anda o Ierusalimo. Le evrei pherde pachiamos încărenas i Legea mozaico, cadea sar sicavenas-len le sicaitorea anda lengo timpo. Sas-len norme anda o haben, i circumcizia hai sar te phiraven-pe le manușența cai ci sas-le evrei. Tha, pala o merimos le Isusosco, i Legea mozaico sas-li chosli, hai o Iehova ci mai primisardea le jertfe cai sas-le andine pala i Legea. Cadea că, ci sas ușoro anda le evrei cai cărdile creștini te paruven i închinarea cai anenas-la le Iehovasche. (Evr. 10:1, 4, 10) Chiar vi anda le creștini cai sas-len iech pachiamos zuralo, sar avelas anda o apostolo Petru, sas pharo te cheren chichiva paruimata. (Fap. 10:9-14; Gal. 2:11-14) Anda codoia că le creștini pachianas cadal neve sicaimata, le bare sicaitoria evrei phirenas pala lende te cheren lenghe nasulimos.

5. Angla so pharimata trebunas te așen zurale le creștini evrei?

⁵ Le creștinen evrei sas-len pharimata anda dui riga: vi andai congregația, hai vi avreal i congregația. Pe iech rig, le bare sicaitori religioși phiravenas-pe lența sar cana mechle penghi religia. Pe aver rig, chichiva andai congregația phende că le creștini trebunas te încăren mai dur i Legea mozaico. Daștil-pe că von phende cadaia anda codoia că ci camenas te aven-len pharimata le manușența cai așenas lenghe contra. (Gal. 6:12) So daștilas te ajutil le creștinen te așen loialo le Iehovasche?

6. So zuriardea o Pavel pesche phralen te cheren? (Evrei 5:14–6:1)

⁶ Ande pesco lil, o Pavel zuriardea le creștinen evrei te roden te hachiaren mai mișto  o Lil le Devlesco. (Citisar Evrei 5:14–6:1.) O Pavel sicadea lenghe anda le Scripturi ebraico că o creștinismo sas mai lașio sar o iudaismo. a O Pavel hachiardea chichi de importanto sas ca le creștini te jianen mai but buchia hai te hachiaren mai mișto o ciacimos. Sostar? Cadea, von daștinas te dichen le sicaimata hohamne hai te na pachian-pe ande lende, caște na duriaren-pe catar o ciacimos.

7. Prin so pharimata nachas aghies?

⁷ Cadea sar le creștini evrei, vi amen așunas buchia cai sile contra so phenel o Iehova că si ciacio hai orta. Chichiva manușa phenen anda le Martori le Iehovasche că ci cheren mișto cana așunen so phenel i Biblia anda le relații sexualo. O gândimos le manușengo duriarel-pe sea mai but catar o gândimos ciacio le Iehovasco. (Prov. 17:15) Cadea că, camas te hachiaras sea mai mișto cado gândimos nasul hai te na mechas chanicas hai chanci te ciorel amaro tromai hai te cherel amen te na mai slujisaras le Iehovasche. (Evr. 13:9)

8. So daștil te ajutil amen te bariaras amaro pachiamos?

⁸ O Pavel phendea caring le creștini evrei te bariaren pengo pachiamos. Vi amen trebul te cheras sa codoi buchi. Cheras cadaia cana prinjianas sea mai mișto o ciacimos hai cana astaras te gândisaras sar o Iehova. Trebul te cheras cadaia chiar vi pala so deam amari viața le Iehovasche hai boldeam amen. Chiar cana sam bolde de țâra sau mai but timpo, fiesaves mașcar amende trebul te avel-les iech timpo alosardo ande fiesavo curco caște sichiol anda o Lil le Devlesco. (Ps. 1:2) Cana sam sicade te beșas corcore le Iehovasa hai te sichioas anda leste, va avela te bariaras hai te zuriaras iech calitatea importanto anda savi o Pavel del duma ando Lil caring le evrei: o pachiamos. (Evr. 11:1, 6)

‘TE AVEL AMEN PACHIAMOS CAȘTE AȘIAS JIUVINDE’

9. Sostar le creștinen sas-len nevoia catar iech pachiamos zuralo caște așen andi viața?

⁹ Le creștinen evrei sas-len nevoia catar iech pachiamos zuralo caște așen jiuvinde ando baro necazo cai avelas andi Iudeea. (Evr. 10:37-39) O Isus phendea pesche manușenghe că, cana pașa o Ierusalimo va șiona penghe țărha le armate, von trebun te nașen. Hai phendea cadaia caring sea le creștini, chiar cana beșenas ando Ierusalimo sau andel gava de pașa o Ierusalimo. (Luca 21:20-24) Butivar, cana iech armata avelas te lel tela pesco zuralimos iech than, le manușa cai beșenas ande codo than garavenas-pe ando foro, anda codoia că le ziduri le forosche avenas te ferin-len. Vi o Ierusalimo sas iech foro cai sas-lo ferime catar bare ziduri. Cadea că, te nașen caring le plaina falas-pe iech dilimos hai trebulas lenghe but pachiamos caște cheren cadaia.

10. So avenas te cheren le creștini cai sas-len iech pachiamos zuralo? (Evrei 13:17)

¹⁰ Mai but, le creștini evrei trebunas te pachian-pe ande codola cai o Isus șiutea-len te aven angla i congregația. Daștil-pe că codola cai sas-le angla i congregația phende le phralenghe sar hai cana te nașen. (Citisar Evrei 13:17.) I duma grecisco anda Evrei 13:17 traducime prin „așunen” del duma anda varecaste cai camel te așunel anda codoia că pachial-pe ciaces ando manuș cai sicavel lesche so te cherel. Cadea că, si mai but sar te așunas varecastar cai siles autoritatea hai cai si șiuto te phenel amenghe so te cheras. Hachiaras  de catar că le creștini evrei trebunas te pachian-pe ande codola cai sas-le angla lende, angla te avel codo necazo. Dacă așunenas codolendar cai sas-le angla lende cana sas pacea, avileas te cheren cadaia mai ușoro cana avenas phare ghiesa.

11. Sostar le creștinen de aghies silen nevoia catar iech pachiamos zuralo?

¹¹ Cadea sar le creștinen evrei, vi amen si amen nevoia catar iech pachiamos zuralo. Aghies, le mai but manușa ci pachian că cadai lumea nasul va avela chosli cu sea. Sa cadea, von asan amendar anda codoia că pachias cadaia. (2 Pet. 3:3, 4) Hai, chiar cana i Biblia phenel chichiva buchia anda sar va avela o baro necazo, si but buchia cai ci prinjianas-len. Trebul te avel amen iech pachiamos zuralo că cadai lumea nasul va avela chosli cu sea le Iehovastar co timpo alosardo hai că vo va lela sama amendar. (Hab. 2:3)

12. So va ajutila amen te așias andi viața ando baro necazo?

¹² Trebul te zuriaras amaro pachiamos ando „sclavo fidelo hai prevăzătorii”, prin savo o Iehova sicavel amen so te cheras. (Mat. 24:45) Cadea sar le evreienghe sas phendo so te cheren cana le romani avile contra lenghe, cana va astarela o baro necazo, daștil-pe că va avela te phenel-pe vi amenghe so hai sar te cheras te ferisaras amari viața. Anda codoia, încă de acanara trebul te zuriaras amaro pachiamos ande codola cai si angla i organizația le Iehovaschi. Dacă acana ci așunas pherde pachiamos so phenen amenghe von te cheras, si pharo te pachias că va avela te cheras cadaia ando baro necazo.

13. Sostar sas lașio andal creștini o sfato anda Evrei 13:5?

¹³ Ando timpo so ajucărenas te tiliaren anda o Ierusalimo caște nașen co plaina, le creștini evrei trebunas te avel-len iech viața simplo hai te na arăsăn ‘te iubin le love’. (Citisar Evrei 13:5.) Chichiva anda lende nachle prin ciorâmos hai bochalimos. (Evr. 10:32-34) Tha, camle te cheren cadaia anda o drago la vesteachi lași. Cu sea cadala, chichiva anda lende astarde de den penghi zor te cheren love caște ferin-len catar le pericolea hai o ciorâmos. Tha le love ci daștinas te încăren-len jiuvinde cana avelas te avel iech baro pharimos ando Ierusalimo. (Iac. 5:3) Jianas ciaces că, anda codola cai iubinas le love, avelas mai pharo te nașen hai te mechen palal penghe chăra hai barvalimata.

14. Sar daștil iech pachiamos zuralo te ajutil amen te jianas pe savo than trebul te șioas le love ande amari viața?

¹⁴ Dacă si amen iech pachiamos zuralo că o Iehova, na pa but timpo, va chosela cadai lumea nasul, ci va avela te gândisaras amen te avel amen mai but love sau că o barvalimos si i mai importanto buchi. Le manușa „va avena te șiuden pengo rup po drom” anda codoia că von va hachiarena că „nici lengo rup hai nici lengo sumancai ci va daștina te salvin-len catar o ghies la holiaco le Iehovasco”. (Ezec. 7:19) Ando than te das amari zor te cheras mai but love, avelas mai mișto te cheras lașe alosarimata cai ajutin amen te îngăras iech viața simplo hai, cadea, amen hai amare familii te daisaras te slujisaras mai but le Iehovasche. Trebul te avas goghiaver hai te na has mai but love sar si amen sau te na hasaras prea but anda amaro timpo caște las sama le buchiandar cai si amen. Sa cadea, trebul te las sama ca le barvalimata te na arăsăn i mai importanto buchi anda amari viața. (Mat. 6:19, 24) Sar pașioas sea mai but catar o ghies cana o Iehova va chosela cu sea cadai lumea nasul, va trebula te alosaras ande soste pachias amen: ando Iehova sau ande le buchia cai si amen.

 „TREBUL TE NA MECHEN TUMEN”

15. Sostar trebunas le creștini evrei te așen zurale hai te na mechen-pe?

¹⁵ Anda le creștini evrei, le ghiesa anda Iudeea sas-le sea mai phare. Cadea că, von trebunas te na mechen-pe hai te așen zurale ando pachiamos. (Evr. 10:36) Chiar cana chichiva creștinen evrei sas-len pharimata anda codoia că le manușa așile lenghe contra, but anda lende cărdile creștini cana sas pacea. Anda codoia, o Pavel phendea lenghe te aven pregătime te nachen prin pharimata vi mai bare hai te aven gata te așen zurale ji co merimos, cadea sar o Isus. (Evr. 12:4) Anda codoia că sea mai but manușa cărdile creștini, but evrei sas-le holiarde hai rodenas te cheren nasulimos le creștinenghe. Numai chichiva bărșența mai anglal, cana o Pavel predichilas ando Ierusalimo, but manușa vazdine-pe contra lesche caște mudaren-les. Mai but sar 40 evrei phende: „Solahardeam ciaces că ci va avela te has chanci ji cana ci mudaras le Pavelos”. (Fap. 22:22; 23:12-14) Chiar cana le creștini avenas urâme hai le manușa rodenas te cheren lenghe nasulimos, von trebunas te jian mai dur ca le întruniri, te phenen i vestea lași hai te încăren zuralo pengo pachiamos.

16. Sar ajutil amen o lil caring le evrei te dichas so miștimata si amen cana ci mechas amen andel pharimata? (Evrei 12:7)

¹⁶ Tha so ajutisardea le creștinen evrei te așen zurale hai te na mechen-pe andel pharimata? O Pavel camlea te ajutil le creștinen te dichen le miștimata cai si-len cana ci mechen-pe andel pharimata. Vo phendea că prin cadala, o Del daștil te ajutil-len te aven sicade hai ortosarde caște aven creștini mai lașe.(Citisar Evrei 12:7.) Cadaia ajutilas-len te bariaren hai te lașiaren calități cai ciaion le Iehovas. Cana încărenas penghi goghi ca le miștimata cai sas-len, andal creștini evrei ci sas cadea de pharo te așen zurale hai te na mechen-pe. (Evr. 12:11)

17. So sichilea o Pavel cana nachlea prin pharimata?

¹⁷ O Pavel zuriardea le creștinen evrei te nachen  prin le pharimata pherde tromai hai te na mechen-pe. O apostolo Pavel jianelas mișto so phenelas lenghe. Angla te cărdiol creștino, vo cărdea but nasulimos le creștinenghe hai jianelas chichi de nasul phirade-pe aver lența. Sa cadea, vo simțosardea pe peschi morci so însemnol ca le coaver te așen tuche contra. Pala so cărdilea creștino, o Pavel nachlea prin diferime pharimata anda codoia că le coaver rodenas te cheren lesche nasulimos. (2 Cor. 11:23-25) Cadea că, o Pavel jianelas mișto so trebulas te cherel iech creștino caște așel zuralo andel pharimata. Vo andea lenghe andi goghi că, caște așen zurale hai te na mechen-pe, trebunas te na șion pengo pachiamos ande pende, tha ando Iehova. O Pavel daisardea te phenel pherdo tromai: „O Iehova si mânro ajutorii; ci va avela te darav”. (Evr. 13:6)

18. So va avela sea le manușența le Iehovasche ando viitorii hai so trebul te cheras acana ?

¹⁸ Chichiva mașcar amare phrala nachen chiar acana prin pharimata anda codoia că le manușa roden te cheren lenghe nasulimos. Trebul te sicavas amari iubirea caring cadal phrala. Sar? Daisaras te cheras cadaia cana mangas amen anda lende hai cana ajutisaras-len sosa si-len nevoia. (Evr. 10:33) Cu sea cadala, i Biblia mechel te hachiarel-pe mișto că „sea codola cai camen te slujin ciacimasa le Devlesche ando phanglimos le Isus Cristososa va avena vi von persecutime”. (2 Tim. 3:12) Anda codoia, savore trebul te pregătisaras amen anda le phare ghiesa cai va avena. Trebul te șioas sea amaro pachiamos ando Iehova hai ande lesco zuralimos hai te pachias ciaces că vo daștil te ajutil amen te nachas prin orisavo pharimos. Co timpo alosardo, o Iehova va ‘lela o pharimos pa o ilo‘ sea pesche manușenghe cai sile pherde pachiamos. (2 Tes. 1:7, 8)

19. So trebul te cheras caște avas pregătime anda o baro necazo? (Dich vi i imaginea.)

¹⁹ Si ciaces, o lil le Pavelosco caring le evrei ajutisardea le creștinen te jianen so te cheren ande le phare ghiesa cai ajucărenas-len. Vo zuriardea-len te prinjianen mai but hai te hachiaren mai mișto o Lil le Devlesco. Cadea, von daștinas te dichen hai te duriaren pendar le sicaimata hohamne cai daștinas te covliaren lengo pachiamos. Sa cadea, vo phendea lenghe te zuriaren pengo pachiamos caște așunen le Isusostar hai codolendar cai sas-le șiute angla lende. Ajutisardea le creștinen vi te sichion te așen zurale hai te na mechen-pe andel phare ghiesa, tha vi te dichen le pharimata sar iech ocazia cana daștinas te zuriaren pengo pachiamos. Cadal sfaturi cai aven le Devlestar daștin te ajutin vi amen. Dacă las amen pala lende, va avela te așias zurale hai te na mechas amen ji co sfârșito cadale ghiesengo nasul. (Evr. 3:14)