1. Sostar manglea o Isus le Iehovas te lel sama pe pesche slujitori?

 ANDI riat angla so te merel, o Isus cărdea pesche Dadesche iech manglimos specialo. Vo manglea-les te lel sama pe lesche continuatori. (Ioan 17:15, 20) Si ciaces, o Iehova lea sama sea o timpo pe pesche slujitori hai ferisardea-le. Cu sea cadala, o Isus jianglea că o Satan avelas te așel zurales contra lesche discipoli, cadea sar ci mai cărdea-la niciechdata. Vo jianelas că trebulas lenghe o ajutorii le Iehovasco caște daștin te nachen părdal cadal bare zumaimata.

2. Cadea sar phenel-pe ando Psalmo 33:18-20, sostar ci trebul te daras cana nachas prin zumaimata?

² Aghies, i lumea cai si tela o zuralimos le Satanosco anel but pharimata opral le ciace creștini. Amen nachas prin zumaimata, cai daștin te peraven-ame sau chiar te zumaven amari loialitatea caring o Iehova. Cu sea cadala, cadea sar va avela te dichas mai dur, nai-ame sostar te daras. O Iehova lel sama pe amende. Vo dichel so pharimata si amen hai silo sea o timpo gata te del-ame iech vast caște ajutil-ame. Te dichas dui exemplea andai Biblia cai sicaven că o Iehova „dichel caring codola cai daran lestar”. (Citisar Psalmo 33:18-20.)

3. Cana daisaras te simțosaras-ame corcore?

³ Chiar cana cheras partea andai șucar familia le Iehovaschi, cai si amen but phrala hai pheia, poiechdata daștil-pe că simțosaras-ame corcore. Sar exemplo, le tărne daștinas te simțosaren-pe corcore cana trebun te den duma anda pengo pachiamos angla le colegi andai clasa sau cana jian ande aver congregația. Chichiva anda amende daisaras te simțosaras-ame perade hai pachias că trebul te nachas părdal cadal sentimentea corcore. Daștil-pe că încăras-ame parpale te das duma anda so simțosaras  hai ci pâtras amaro ilo, daratar că le coaver ci va hachiarena-ame. Daisaras chiar te pușas-ame dacă si varecon cai gândil-pe amende. Poiechdata, cana simțosaras-ame corcore, cadaia daștil te ciorel amari liniștea hai daștil te cherel-ame te pachias că ci si amen niciech ajutorii. O Iehova ci camel te simțosaras-ame cadea. Sostar daisaras te phenas cadaia?

4. Sostar phendea o profeto Ilie: „Numai me mai așilem.”?

⁴ Te dichas o exemplo ieche manușesco pherdo pachiamos, o Ilie. Nachlea mai but sar 40 ghiesa de cana o Ilie nașelas caște așel jiuvindo, pala so i Izabela solahardea că va mudarela-les. (1 Regi 19:1-9) Ji la urmă, ando timpo so sas-lo corcoro ande iech peștera, phendea le Iehovasche: „Numai me mai așilem [mașcar le profeți]”. (1 Regi 19:10) Tha mai sas vi aver profeți ando them; o Obadia daisardea te hastral 100 profeți andal vasta la Izabelache, cai camelas te mudarel-le. (1 Regi 18:7, 13) Atunci sostar simțosardea-pe o Ilie cadichi de corcoro? Pachiaia că le profeți hastrade catar o Obadia mule? Simțosardea-pe corcoro anda codoia că chonic ci astardea te slujil le Iehovasche pala sea so dichle po plain Carmel, cai o Iehova sicadea că si o corcoro ciacio Del? Sau pachialas că chonic ci jianelas chichi de baro sas o pericolo ande savo arachelas-pe? Sau pușlea-pe dacă gândil-pe varecon leste? Andai relatarea ci prinjianas sea so sas ando ilo cadale murșesco loialo. Tha, so jianas ciaces si că o Iehova hachiardea sostar simțosardea-pe corcoro o Ilie hai vo jianglea exacto sar te ajutil-les.

5. Sar cărdea prinjiando o Iehova le Iliesche că ci sas-lo corcoro?

⁵ O Iehova ajutisardea le Ilies ande mai but feluri. Sar exemplo, vo zuriardea-les te del duma hai pușlea-les dui-var: „So cheres cade?”. (1 Regi 19:9, 13) De fiesavi data cana o Ilie șiordea pesco ilo angla leste, o Iehova așundea-les atento. Pala codoia o Iehova sicadea că silo pașa leste hai sicadea pesco baro zuralimos. Sa cadea, cărdea lesche prinjiando că sas but aver închinători pherde pachiamos. (1 Regi 19:11, 12, 18) Si ciaces că o Ilie simțosardea sar cana lea-pe iech baro bar pa lesco ilo, pala so  pâtărdea-pe angla o Iehova hai așundea Lesco răspunso. Mai but, o Del dea-les te cherel chichiva buchia importanto: șiutea-les te machel le Hazaelos, rege opral i Siria, le Iehus, opral o Israelo, hai le Eliseos, profeto. (1 Regi 19:15, 16) Cana dea-les cadal buchia te cherel, o Iehova ajutisardea-les te încărel peschi goghi ca buchia lașe. Mai but, vo dea-les iech lașio amal, o Elisei. Sar daștil o Iehova te ajutil vi tut cana simțosares-tu corcoro?

6. Anda so daștis te manghes-tu le Iehovasche cana simțosares-tu corcoro? (Psalmo 62:8)

⁶ O Iehova acharel-tu te manghes-tu lesche. Vo dichel orisavo pharimos prin savo naches hai daștis te pachias că vo așunel-tu ciaces de fiesavi data. (1 Tes. 5:17) O Iehova bucuril-pe te așunel le manglimata cai cheren-le lesche slujitori. (Prov. 15:8) Anda so daștis te des duma le Iehovaia cana simțosares-tu corcoro? Daștis te șiores chio ilo angla leste, cadea sar cărdea o Ilie. (Citisar Psalmo 62:8.) De duma anda so si ande chio ilo, anda che phare gânduri hai mang-les te ajutil-tu te încăres-le tela controlo. Sar exemplo, dacă simțosares-tu corcoro hai daras anda codoia că trebul te des duma anda chio pachiamos angla le colegi andai clasa, mang-tu te avel-tu tromai caște daștis te șios mărturia hai te del-tu goghiaverimos caște des duma pherdo tacto. (Luca 21:14, 15) Sau, dacă san perado, mang le Iehovas te ajutil-tu te des duma ieche phraleia cai si zuralo spiritualo. Mang-les te ajutil vi le phrales te așunel-tu hai te hachiarel-tu. Pala so șiordean chio ilo le Iehovasche, av atento te diches sar del-tu răspunso ca che manglimata hai mech averen te ajutin-tu. Dacă cheres cadea, ci va avela te simțosares-tu cadea de corcoro.

7. So sichioas catar o Mauricio?

⁷ O Iehova dea fiesaves anda amende te cheras buchia cai anen amenghe but bucuria. Daștis te pachias că san zurales cuci ande lesche iacha anda codoia că vo dichel sea so cheres andi congregația, hai vi andi predicarea. (Ps. 110:3) Cana simțosares-tu corcoro, sar daștil te ajutil-tu o fapto te cheres mai but buchia ando servicio le Iehovasco? Te dichas o exemplo ieche phralesco tărno po anav Mauricio *. Ca țâra timpo pala so boldea-pe, iech anda lesche lașe amala mechlea le Iehovas. O Mauricio phenel: „Dichlem-les sar duriardea-pe le ciacimastar, hai cadaia cărdea-ma te hasarav mânro pachiamos ande mande. Astardem te pușav-ma dacă daștiv te așiav loialo le Iehovasche, hai dacă va avela te așiav ande leschi familia. Simțosardem-ma corcoro hai pachiaiem că chonic ci daștilas te hachiarel so si ande mânro ilo”. So ajutisardea le phrales Mauricio? Vo phenel: „Cărdem mai but andi lucrarea de predicare hai cadaia ajutisardea-ma te gândisarav-ma mai țâra mande hai te na așel mânri goghi ca o fapto că somas perado. Cana gălem ande iech  than averența andi predicarea, somas voime hai ci mai simțosardem-ma cadea de corcoro”. Chiar vi cana ci daisaras te avas ande iech than fizico avere phralența andi predicarea, amaro pachiamos silo zuriardo cana scriisaras lila hai predichisaras prin o telefono ande iech than lența. So aver vareso ajutisardea le phrales Mauricio? Vo mai phenel: „Alosardem te cherav mai but buchia vi andi congregația. Pregătisardem mișto le teme cai sas manghe dine hai dem mânri zor te încărav-le chichi mai mișto. Cadea, simțosardem că som cuci andel iacha le Iehovasche hai vi andel iacha le phralenghe”.

8. Sar daisaras te simțosaras-ame cana nachas prin zumaimata?

⁸ Anda codoia că traisaras andel ghiesa de palal, ajucăras-ame te nachas prin zumaimata. (2 Tim. 3:1) Cu sea cadala, daștil-pe că ci ajucăras-ame te nachas prin iech anumime zumaimos sau avel-pe amende ande iech timpo cana ci ajucăras-ame. De iech data, daștin te aven amen pharimata le lovența, te așunas că si amen iech nasfalimos pharo sau te merel amenghe varecon drago. Cana nachas prin cadala, daisaras te simțosaras-ame perade hai duchade, vi mai but dacă le zumaimata aven sigo iech pala aver sau mai but de iech data. Tha, te na bâstras că o Iehova silo pașa amende hai vo ajutil-ame te încăras amaro pachiamos zuralo prin orisavo zumaimos avelas te nachas.

9. Phenen chichiva andal zumaimata prin save nachlea o Iov.

⁹ Te dichas sar ajutisardea o Iehova pesche slujitoros, o Iov. Ande iech harno timpo, vo nachlea prin mai but zumaimata phare. Ande iech corcoro ghies, vo așundea că hasardea sea so sas-les, lesche buchia hai lesche slujitori, hai so duchadea vi mai but lesco ilo sas că mule vi lesche șiave. (Iov 1:13-19) Ca țâra timpo pala codoia, cana încă lesco ilo sas-lo phagărdo catar cadal buchia, o Iov cărdilea zurales nasfalo catar iech nasfalimos cai andea lesche but duch. (Iov 2:7) Anda codoia că leschi situația sas cadea de nasul, o Iov phendea: „Urâv mânri viața, ci mai camav te traisarav”. (Iov 7:16)

10. Sar dea o Iehova le Iovos o ajutoro cai trebulas lesche? (Dich i imaginea pa i coperta.)

¹⁰ O Iehova lea sama po Iov. Anda codoia că sas lesche cuci, vo dea-les o ajutorii cai trebulas lesche caște daștil te nachel părdal le zumaimata. O Iehova dea duma leia, andea lesche amintea că Lesco goghiaverimos silo zurales baro hai că vo lel sama pherdo iubirea pe lesche creaturi. Vo dea lesche duma vi anda but animalea specialo. (Iov 38:1, 2; 39:9, 13, 19, 27; 40:15; 41:1, 2) O Iehova folosisardea ieche tărne murșes, po anav Elihu, caște zuriarel o ilo le Iovosco. O Elihu phendea lesche că daștilas te pachial că o Iehova pochinel sea o timpo pesche slujitoren cana ci mechen-pe andel zumaimata. Sea prin o Elihu, o Iehova dea-les chichiva sfaturi pherde iubirea. O Elihu ajutisardea le Iovos te na mai gândil-pe cadea de but peste hai ajutisardea-les te hachiarel chichi de țâno sas-lo pașa o Iehova, o Creatoro le universosco. (Iov 37:14) O Iehova dea le Iovos vi iech buchi te cherel. Vo phendea lesche te manghel-pe anda lesche trin amala cai păcătuisarde. (Iov 42:8-10) Tha sar ajutil vi amen o Iehova cana nachas prin phare zumaimata?

11. Sar ajutil-ame i Biblia cana nachas prin zumaimata?

¹¹ Aghies, o Iehova ci del duma directo amența, cadea sar cărdea le Iovoia, tha vo cherel cadaia prin pesco Cuvânto, i Biblia. (Rom. 15:4) Vo zuriarel amaro ilo prin leste, anda codoia că del-ame iech speranța anda o viitorii. Te dichas chichiva sicaimata cai daștin te zuriaren-ame cana nachas prin zumaimata.  O Iehova phenel amenghe că chanci, nici o mai pharo zumaimos, ‘ci daștil te încărel-ame dur catar leschi iubirea’. (Rom. 8:38, 39) Sa cadea, vo promitil amenghe că va avela „pașă sea codolendar cai acharen-les” ando manglimos. (Ps. 145:18) Dacă șioas amaro pachiamos ande leste, daisaras te nachas părdal orisavo zumaimos hai chiar te simțosaras bucuria ando ilo, chiar cana sam duchade. (1 Cor. 10:13; Iac. 1:2, 12) Lesco Cuvânto anel ande amari goghi că le zumaimata nachen hai încăren țâra timpo, pașa le miștimata veșnico cai o Iehova va dela-le amenghe. (2 Cor. 4:16-18) Sa cadea, andi Biblia, o Iehova promitil amenghe că vo va chosela ciaces le Satanos o Beng, codo cai cherel amenghe le pharimata, hai vi codolen cai așen de leschi partea. (Ps. 37:10) Dean chi zor te încăres ande chi goghi versetea biblico cai te ajutin-tu te naches părdal le zumaimata cai va avena?

12. So ajucărel o Iehova amendar te cheras caște țârdas chichi mai but miștimata anda lesco Cuvânto?

¹² O Iehova ajucărel amendar te cheras amenghe timpo caște las i Biblia hai te prinjianas-les mai mișto, hai te gândisaras-ame ca so citisardeam. Cana cheras so sichileam, amaro pachiamos bariol hai silo mai zuralo, hai pașioas mai but amare Dadestar cerisco. Cadea, arăsas te avas mai zurale caște daisaras te nachas părdal le pharimata. O Iehova del pesco spirito sfânto codolenghe cai șion pengo pachiamos ande lesco Cuvânto. Sea prin o spirito, primisaras „i zor cai nachel orisavi buchi” caște daisaras te nachas părdal le zumaimata. (2 Cor. 4:7-10)

13. Sar ajutil-ame o haben spiritualo cai del-les amenghe o scalvo fidelo hai prevăzătorii te na mechas-ame cana nachas prin zumaimata?

¹³ Le ajutoroia le Iehovasco, „o scalvo fidelo hai prevăzătorii” cherel but articolea, materialea video hai ghilea, cai ajutin-ame te zuriaras amaro pachiamos hai te așias pașa o Iehova. (Mat. 24:45) Trebul te das amari zor te țârdas chichi mai but miștimata anda sea so del-ame o Iehova exacto cana si amen nevoia. Iech phei andal Statele Unite phendea chichi de cuci si anda late cado haben spiritualo. Voi phenel: „Andel 40 bărșa ande save slujisardem le Iehovasche, mânro pachiamos sas-lo șiuto co zumaimos mai butivar”. Voi nachlea prin phare zumaimata: laco papo sas-lo mudardo catar iech șoferii mato, lache dada mule anda iech nasfalimos nasul hai voi sas-li nasfali dui-var de cancero. So ajutisardea-la te na mechel-pe ande cadal situații phare? Voi phenel: „O Iehova lea sama sea o timpo pe mande. O haben  spiritualo cai dea-les manghe prin o sclavo fidelo hai prevăzătorii ajutisardea-ma te jiav angle. Cado haben spiritualo zuriardea mânro ilo zurales but. Cadea că, simțosarav cadea sar o Iov, cai phendea: «Ji ca o palutno phurdimos, ci va avela te mechav mânro pachiamos!»”. (Iov 27:5)

14. Sar folosil o Iehova amare phralen hai pheian caște ajutin-ame cana nachas prin pharimata? (1 Tesaloniceni 4:9)

¹⁴ O Iehova phenel amenghe te sicavas iubirea iech caring aver hai te zuriaras-ame andel timpuri phare. (2 Cor. 1:3, 4; citisar 1 Tesaloniceni 4:9.) Cadea sar o Elihu, le phrala hai le pheia sile gata te ajutin-ame te așias zurale ando pachiamos cana nachas prin pharimata. (Fap. 14:22) Cadea așile le buchia vi anda i Diane. Cana laco rrom pelea zurales nasfalo, i congregația ajutisardea-la te încărel zuralo pesco pachiamos. Voi phenel: „Sas zurales pharo, tha simțosardeam sar o Iehova lesche zurale vastența hai pherde iubirea dea-ame angali ande cadal phare șiona. Le phrala andai congregația cărde sigo vareso caște ajutin-ame. Von avile amende, sunisarde-ame hai dinea-ame angali, hai cadaia sas sea so trebulas amenghe caște jias mai dur. Anda codoia că ci jianglem te tradav i mașina, le phrala line sama te arăsav ca le întruniri hai te jiav andi predicarea”. So baro miștimos si că cheras partea anda iech familia spiritualo cadea de iubitorii!

15. Sostar pachias că daisaras te nachas părdal le zumaimata?

¹⁵ Savore va avela te nachas prin zumaimata. Cu sea cadala, cadea sar dichleam, ci trebul te nachas prin lende corcore. Cadea sar iech lașio Dad, o Iehova lel sama sea o timpo pe amende. Vo silo pașa amende, silo gata te așunel amare manglimata hai te zuriarel-ame. (Is. 43:2) Si amen o zuralo pachiamos că daisaras te nachas părdal orisavo zumaimos anda codoia că o Iehova del-ame buhlimaia sea so trebul amenghe caște na mechas-ame. Vo dea-ame o daro te mangas-ame lesche, lesco Cuvânto – i Biblia, but haben spiritualo hai iech șucar familia phralența cai iubin-ame.

16. Sar daisaras te așias tela i grija iubitorii le Iehovaschi?

¹⁶ Sam zurales recunoscători că si amen iech Dad ando cerii cai lel sama pe amende! „Amaro ilo bucuril-pe ande leste.” (Ps. 33:21) Daisaras te sicavas le Iehovasche că anda amende si cuci leschi grija iubitorii cana țârdas miștimata anda sea so del-ame vo caște ajutil-ame. Sa cadea, trebul te cheras sea so încărel amendar caște așias tela leschi grija. Aver varesar phendo, dacă va avela te das amari zor vi mai dur te așunas le Iehovastar hai te cheras so si cuci ande lesche iacha, vo va lela sama pe amende sea o timpo! (1 Pet. 3:12)