1. Cadea sar sicavel-pe ando 1 Tesaloniceni 5:11, ca so buchi las partea savore?

 LEAN partea vi tu, ande iech than la congregațiaia, cana vazdea-pe sau cărdea-pe buchi ca iech sala le Regatoschi? Dacă da, siguro așilea ande chi goghi i iechto întrunirea cai sas încărdi code. Sanas zurales recunoscătorii le Iehovasche. Daștil-pe că sanas cadea de bucurime, că che iacha pherdile-pe asfența hai sas tuche pharo te mai ghilabes i ghili cai pâtărdea o programo. Si ciaces, le săli le Regatosche mișto vazdine așaren le Iehovas. Tha așaras vi mai but le Iehovas cana cheras iech aver felo buchi anda o vazdimos. Cadai buchi si but mai cuci sar i buchi cana vazdel-pe iech clădirea. Si i duma anda o vazdimos le manușengo cai aven ande cadal thana andai închinarea. Andi goghi le apostoloschi Pavel sas chiar cadai buchi anda o vazdimos, cana scriisardea le cuvintea anda 1 Tesaloniceni 5:11, o verseto pe savo bazol-pe cado articolo. (Citisar.)

2. So va dichaia ande cado articolo?

² O apostolo Pavel jianglea sar te vazdel pesche phralen. Vo sicadea empatia caring lende. Ande cado articolo, va avela te dichas sar ajutisardea vo le phralen hai pheian 1) te na mechen-pe andel zumaimata, 2) te aven andi pacea iech avereia hai 3) te zuriaren pengo pachiamos ando Iehova. Sa cadea, va avela te dichas sar daisaras te las-ame pala lesco exemplo hai te zuriaras vi amen amare phralen hai pheian. (1 Cor. 11:1)

3. Sar dichlea o Pavel le buchia spiritualo hai le buchia fizico?

³ O Pavel iubisardea zurales but pesche phralen hai pheian. Vo jianelas sar si te naches prin zumaimata. Cadea, vo daisardea te sicavel compasiunea hai empatia caring codola cai nachenas  prin pharimata. Iech data, cana ci mai sas-les love, vo trebuisardea te cherel buchi caște lel sama pe peste hai pe codola cai sas-le ande iech than leia. (Fap. 20:34) O Pavel cherelas corturi. Ando Corint, vo cărdea buchi ande iech than codolența cai sas len sa codoi buchi, o Aquila hai i Priscila. Cu sea cadala, „ande fiesavo sabato”, les sas-les o obiceio te predichil le iudeienghe hai le grecenghe. Pala codoia, cana o Sila hai o Timotei avile, „o Pavel cărdea sea so daisardea andai predicarea le cuvântoschi”. (Fap. 18:2-5) O Pavel ci bâstărdea niciechdata savo sas o scopo lesca viațaco, codoia te slujil le Iehovasche. Anda codoia că o Pavel sas iech creștino vreanico hai cărdea phares buchi, vo daisardea te zuriarel pesche phralen hai pheian. Vo zuriardea-le te na mechen ca le pharimata la viațache hai o fapto te cheren buchi anda penghi familia te cheren-le te mechen de iech rig „le buchia mai importanto”, adică sea so cherelas partea ande lenghi închinarea andini le Iehovasche. (Filip. 1:10)

4. Sar ajutisarde o Pavel hai o Timotei penghe phralen te așen zurale cana nachle prin persecuția?

⁴ Ca țâra timpo pala so sas cărdi i congregația anda Tesalonic, le phrala othar nachle prin bare persecuții. Iech data, but manușa nasul chidine ande iech than rodenas le Pavelos hai le Silas. Anda codoia că ci arachle-le, îngărde „chichiva phralen ca codola cai conducinas o foro” hai denas cingar: „Cadal manușa așen contra le decretea le Cezarosche”. (Fap. 17:6, 7) Te gândisaras-ame chichi de but daraile cadala neve creștini anda Tesalonic, cai sas-le bolde de țâra timpo, cana dichle că cadala manușa anda o foro astarde te așen lenghe contra! Von daisardeas te na mai cheren cadea de but buchia ando servicio le Iehovasco, tha o Pavel ci camlea te întâmplol-pe cadaia. Chiar cana trebuisarde te nașen anda o foro, vo hai o Sila line sama ca i congregația nevi cărdi te avel zuriardi. Vo phendea caring le tesaloniceni: „[Bișialav] le Timoteios, amaro phral … caște zuriarel tumen hai te sastiarel tumaro ilo, ca tumaro pachiamos te avel vazdino, ca chonic te na perel catar cadal pharimata”. (1 Tes. 3:2, 3) Si ciaces, o Timotei simțosardea pe peschi morci i persecuția ande pesco foro cai barilea, i Listra. Vo dichlea chichi de but dea peschi zor o Pavel caște zuriarel le phralen othar, hai vi sar sas-lo o Iehova pașa lende. Cadea că, o Timotei daisardea te zuriarel le jenen andai nevi congregația anda Tesalonic că sea le buchia va înclena mișto vi anda lende. (Fap. 14:8, 19-22; Evr. 12:2)

5. Sar sas-lo ajutime iech phral po anav Bryant ieche phurestar?

⁵ Sar mai zuriardea o Pavel pesche phralen? Cana avile parpale andi Listra, ando Iconium hai andi Antiohia, o Pavel hai o Barnaba „numisarde anda lende phure ande fiesavi congregația”. (Fap. 14:21-23) Si ciaces, cadal murșa numime zuriarde but le congregații, cadea sar cheren vi le phure de aghies. Te dichas so phendea iech phral po anav Bryant: „Cana pherdem 15 bărșa, mânro dad mechlea-ame hai mânri dei sas șiudini avri andai congregația. Simțosardem-ma corcoro hai somas zurales perado”. So ajutisardea le phrales Bryant te nachel părdal cado baro pharimos? Vo phenel: „Iech phuro po anav Tony cărdea pesche timpo te del duma manța ca le întruniri hai vi aver data. Dea manghe duma anda chichiva slujitori le Iehovasche cai ci hasarde penghi bucuria, chiar cana nachle prin zumaimata. Citisardea manghe o Psalmo 27:10 hai phenelas manghe butivar anda o Ezechia, cai așilo zuralo ando pachiamos, chiar cana lesco dad ci sas iech lașio exemplo”. Sar zuriardea le phrales Bryant cado ajutorii cai primisardea-les? Vo anel ande peschi goghi: „Somas zuriardo catar o Tony hai, cadea, astardem te cherav mai but ando servicio le Iehovasco”. Phure, aven atento te  dichen codolen cai, sar o Bryant, trebun te aven zuriarde hai silen nevoia catar „iech lașio cuvânto”! (Prov. 12:25)

6. Sar folosisardea o Pavel le relatări chichiva slujitorenghe loialo le Iehovasche caște zuriarel lesche phralen hai pheian?

⁶ O Pavel dea duma pesche phralența anda ‘iech noro baro de martori’ cai daisarde te nachen părdal but pharimata, anda codoia că o Iehova zuriardea-le. (Evr. 12:1) Vo jianglea că o exemplo cadale slujitorengo andal puraimata avelas te del tromai lesche phralen hai pheian hai avelas te ajutil-le te încăren pengo dichimos caring „o foro le Devlesco jiuvindo”. (Evr. 12:22) Si ciaces, vi aghies, savore sam zuriarde cana citisaras relatări anda o modo sar o Iehova ajutisardea manușen sar o Ghedeon, o Barac, o David, o Samuel hai vi but averen. (Evr. 11:32-35) Vi le exemplea pachiamasche anda amare ghiesa zuriaren-ame but. Co sedio mondialo, arăsăn lila ande save le phrala phenen sar sas zuriardo lengo pachiamos pala so citisarde relatări le slujitorengo de aghies cai așile pherde pachiamos.

7. So sichios anda o sfato le Pavelosco anda Romani 14:19-21?

⁷ Cana rodas i pacea andi congregația, zuriaras amare phralen. Ci camas ca o modo diferime ande savo gândisaras te duriarel-ame iech averestar. Sa cadea, ci camas te încăras ca amare drepturi cana ci si i duma anda iech principio biblico. Te dichas iech exemplo. Andi congregația anda Roma, sas vi creștini evrei, hai vi creștini neevrei. Cana i Legea mozaico sas-li chosli, ci mai trebunas încărde le legi ande soste priveal o fapto te na han anumime habena. (Mar. 7:19) Cadea că, chichiva creștini evrei simțosarde-pe libero te han orisavo haben. Cu sea cadala, aver creștini evrei ci pachianas că sas mișto te cheren cadea. Cadea că, i congregația arăslea huladi. O Pavel sicadea chichi de importanto si ca le jene andai congregația te încăren i pacea hai phendea: „Si mai mișto te na has mas, te na pies mol hai te na cheres niciech aver buchi ande savi chio phral poticnil-pe”. (Citisar Romani 14:19-21.) Cadea, o Pavel ajutisardea-le te hachiaren chichi de nasul sas cadal nehachiarimata andal phrala, tha vi anda sea i congregația. Chiar vi vo pachiaia că si mișto te paruvel pesco phiraimos caște na peravel averen. (1 Cor. 9:19-22) Vi amen daisaras te vazdas le coaveren hai te rodas i pacea dacă ci încăras ca so pachias amen, ande buchia cai daștin te aven alosarde catar fiesavo creștino.

8. So cărdea o Pavel cana iech bari problema rimosardea i pacea andai congregația?

⁸ O Pavel mechlea amenghe iech lașio exemplo, anda codoia că rodea i pacea vi cana ci dichelas le buchia cadea sar le coaver. Sar exemplo, chichiva jene andai congregația anda o iechto secolo phenenas că le neevrei cai cărdile creștini trebunas te cheren i circumcizia. Cadea, daștil-pe că von camenas te na arăsăn te aven prasade catar le coaver evrei. (Gal. 6:12) Chiar cana o Pavel ci pachialas că si mișto te cheren cadaia, vo ci încărdea ca le buchia te cheren-pe cadea sar camelas vo, tha, pherdo umilința, rodea o ajutorii le apostolengo hai le phurengo anda o Ierusalimo. (Fap. 15:1, 2) Prin o modo sar phiradea-pe, o Pavel ajutisardea cadale creștinen te na hasaren penghi bucuria hai te încăren i pacea andi congregația. (Fap. 15:30, 31)

9. Sar daisaras te las-ame pala o exemplo le Pavelosco?

⁹ Dacă arăsăl te avel amen iech baro nehachiarimos averența, sicavas că rodas i pacea cana rodas i îndrumarea codolenghi cai sile alosarde le Iehovastar te len sama pe i congregația. Butivar, arachas sfaturi lașe hai goghiaver  ande le publicații bazome pi Biblia sau andel instrucțiuni cai den-le amenghe i organizația. Dacă va avela te las-ame pala lende hai ci va așela amari goghi numai ca o modo sar dichas amen le buchia, va avela te încăras i pacea andi congregația.

10. So aver vareso cărdea o Pavel caște rodel i pacea andi congregația?

¹⁰ O apostolo Pavel rodea i pacea mașcar le phrala cana dea duma anda so sas lașio ande lende, na anda so sas nasul. Sar exemplo, cana phandadea pesco lil cai scriisardea-les caring i congregația anda Roma, vo phendea le anava bute phralenghe, hai butivar phendea vi vareso șucar anda lende. Daisaras te las-ame pala o exemplo le Pavelosco cana ci încăras-ame parpale te das duma anda le șucar buchia cai dichas-le ca amare phrala hai pheia. Cana cheras cadea, le phrala andai congregația va pașiona vi mai but iech averestar, hai cadaia va cherela te bariol i iubirea andi congregația.

11. Sar daisaras te avas pale andi pacea amare phralența cana si amen nehachiarimata?

¹¹ Poiechdata, vi mașcar le creștini zurale spiritualo daștin te aven nehachiarimata anda so pachian sau so phenen. O Pavel hai lesco lașio amal o Barnaba nachle prin iech pharimos sar cado. Ando timpo so pregătinas-pe te jian andi călătoria misionaro cai avelas, mașcar lende astardea-pe iech bari holi anda codoia că ci hachiarde-pe dacă te len pența le Marcos sau nici. Pala so astardea-pe cadai „bari holi”, le dui ci mai găle pe iech drom. (Fap. 15:37-39) Tha o Pavel, o Barnaba hai o Marcu lașiarde le buchia mașcar pende hai sas-le pale amala, hai cadea sicade că anda lende sas zurales cuci i pacea hai i unitatea andi congregația. Pala codoia, o Pavel dea duma șucar anda o Barnaba hai o Marcu. (1 Cor. 9:6; Col. 4:10) Vi amen camas te rezolvisaras amare nehachiarimata cai daștin te aven amen amare phralența andai congregația, hai te dichas so si lașio ande lende. Cadea, va avela te rodas i pacea hai i unitatea. (Ef. 4:3)

12. Prin so pharimata nachen amare phrala hai pheia?

¹² Vazdas amare phralen hai pheian cana zuriaras lengo pachiamos ando Iehova. Chichiva anda lende sile prasade catar lenghe neamuri, catar le colegi catar i buchi sau catar i școala. Aver sile zurales nasfale sau sile perade hai den penghi zor te sastiaren penghi duch anda o ilo. Hai aver, cai sile bolde sar creștini de but bărșa, ajucăren de but timpo te dichen sar va nachela cadai lumea nasul ande savi traisaras. Sea cadal pharimata daștin te zumaven o pachiamos ieche creștinosco. Le jene andai congregația anda o iechto secolo nachle vi von prin zumaimata sar cadala. So cărdea o Pavel caște zuriarel lengo pachiamos?

13. Sar ajutisardea o Pavel le phralen cai sas-le prasade anda lengo pachiamos?

¹³ O Pavel folosisardea le Scripturi caște zuriarel o pachiamos lesche phralengo. Sar exemplo, le creștini evrei daștil-pe că simțosarde-pe hasarde anda codoia că ci jianenas so te phenen lenghe neamurenghe cai phenenas că o iudaismo silo opral o creștinismo. Tha o lil le Pavelosco caring le evrei zuriardea ciaces o pachiamos cadale creștinengo. (Evr. 1:5, 6; 2:2, 3; 9:24, 25) Von daștinas te folosin le argumentea zurale cai phendea-le o Pavel, caște jianen so te phenen codolenghe cai așenas lenghe contra. Aghies, amen daisaras te ajutisaras amare phralen cai sile prasade te folosisaren amare publicații bazome pi Biblia caște sicaven ande soste pachian. Sar exemplo, dacă le tărne sile prasade anda codoia că pachian andi creația, daisaras te ajutisaras-le te arachen sicaimata andel broșuri I viața – Sas cărdi ieche Creatorostar? hai Catar avel i viața – Panji pușimata cai trebun te aven dichle, caște sicaven sostar pachian că i viața sas cărdi.

14. So cărdea o Pavel, chiar cana sas-les but buchia te cherel andi predicarea hai te sicavel averen?

 ¹⁴ O Pavel zuriardea pesche phralen hai pheian te sicaven iubirea prin ‘buchia lașe’. (Evr. 10:24) Vo ajutisardea-le na numai prin so phendea, tha vi prin so cărdea. Sar exemplo, cana le phrala anda Iudeea nachle prin iech bari boch, o Pavel andea lenghe le buchia cai trebunas lenghe. (Fap. 11:27-30) Chiar cana sas-les but buchia te cherel andi predicarea hai te sicavel averen, vo rodea sea o timpo moduri caște ajutil codolen cai sas-le andi nevoia. (Gal. 2:10) Cana cărdea cadea, o Pavel zuriardea o pachiamos pesche phralengo că o Iehova lel sama lendar. Vi amen daisaras te zuriaras o pachiamos amare phralengo hai pheiango cana folosisaras amaro timpo, zuralimos hai sea so jianas te cheras caște ajutisaras codolen cai nachen prin dezastrea. Sa cadea, daisaras te cheras donații anda i buchi cai cherel-pe pe sea i phuv. Cadala si numai chichiva moduri prin save daisaras te ajutisaras le phralen te daștin te pachian-pe ando Iehova, că vo ci va mechela-le niciechdata.

15, 16. So daisaras te cheras anda codola savengo pachiamos ci mai si cadea de zuralo?

¹⁵ O Pavel ci mechlea codolen savengo pachiamos ci mai sas cadea de zuralo, hai ajutisardea-le mai dur. Vo sicadea lenghe compasiunea hai dea duma lența șucar hai anda sea o ilo. (Evr. 6:9; 10:39) Sar exemplo, ando lil cai scriisardea-les caring le evrei, vo folosisardea butivar o cuvânto „amen”, hai cadea sicadea că vi vo trebulas te aplichil le sfaturi cai dea-le. (Evr. 2:1, 3) Cadea sar o Pavel, nici amen ci mechas codolen savengo pachiamos ci mai si cadea de zuralo. Tha das amari zor te zuriaras-le hai te sicavas lenghe că sam ciaces interesime lendar. Cadea, sicavas chichi de but iubisaras-len. Caște vazdas amare phralen hai pheian, si zurales importanto te alosaras atento so phenas, tha,  sa cadea de importanto si te das duma lența șucar, sar niște amala.

¹⁶ O Pavel andea amintea pesche phralenghe că o Iehova jianelas mișto le buchia lașe cai cărde-le. (Evr. 10:32-34) Sa cadea daisaras te cheras vi amen cana o pachiamos ieche phralesco ci mai si cadea de zuralo. Daisaras te mangas-les te phenel amenghe sar prinjiandea o ciacimos sau te zuriaras-les te anel pesche amintea ande so situații simțosardea o vast le Iehovasco. Cadal ocazii daștin te zuriaren lesco pachiamos că o Iehova ci bâstărdea sea so cărdea caște sicavel lesche iubirea, hai că vo ci va mechela-les niciechdata. (Evr. 6:10; 13:6) Cana das duma lența anda cadal buchia, daisaras te zuriaras amare cuci phralen te slujin mai dur le Iehovasche.

17. So trebul te cheras sea mai mișto?

¹⁷ Cadea sar iech manuș cai vazdel chăra sichiol te cherel peschi buchi sea mai mișto ando timpo, vi amen daisaras te avas sea mai lașe cana vazdas amare phralen. Daisaras te ajutisaras averen te așen zurale cana nachen prin pharimata, cana das duma lența anda o exemplo codolengo andal puraimata, cai ci mechle-pe andel zumaimata. Daisaras te rodas i pacea cana dichas so si lașio ande aver hai cana das duma șucar anda lende. Daisaras te încăras i pacea cana si pașă te avel hasardi hai daisaras te avas pale andi pacea amare phralența, cana arăsăn te aven amen nehachiarimata. Daisaras te zuriaras mai dur o pachiamos amare phralengo cana das duma lența anda șucar sicaimata andai Biblia, cheras vareso practico anda lende hai așias pașa lende cana lengo pachiamos ci mai silo cadea de zuralo.

18. So san hotărâme te cheres?

¹⁸ Codola cai cheren buchi caște vazden-pe le clădiri teocratico sile zurales bucurime hai mulțumime. Vi amaro ilo daștil te avel pherdo bucuriatar cana las partea ca i buchi te vazdas le phralen andai congregația. Na cadea sar iech clădirea fizico, cai daștil te rimol-pe ando timpo, i buchi cai cheras-la caște zuriaras amare phralen daștil te încărel veșnico! Cadaia cherel-ame te camas sea o timpo te ‘zuriaras-ame mai dur iech averes hai te vazdas-ame iech averes’! (1 Tes. 5:11)