Cana sas o Duito Războio Mondialo, mânre dada nașle anda Estonia hai găle andi Germania, cai năștisailem vi me. Cam sa atunci astarde te pregătin-pe caște tiliaras andi Canada. Mai anglal beșleam pașa o foro Ottawa, cai amaro dintuno chăr sas iech țâno colțo văruime anda iech than cai beșenas vi le chainia. Samas zurales ciore, tha măcar sas amen anre te has de teharin.

Ande iech ghies, le Martori le Iehovasche avile amende chăre hai citisarde mânra deiache i Revelația 21:3, 4. Cana așundea le dumes andal versetea, laco ilo sas cadea de pusado că ci mai daisardea te încărel-pe parpale hai astardea te rovel. O ciacimos bariolas sea mai but ando ilo mânre dadengo, cadea că von cărde paruimata sigo hai bolde-pe.

Mânre dada ci jianenas mișto i șib englezo, tha cadaia ci așiadea-le te slujin le Iehovasche anda sea o ilo. Cam ande fiesavo savato, mânro dad lelas man hai mânra pheia mai țâni, i Sylvia, hai îngărelas-ame andi predicarea, vi cana cherelas buchi sea i riat ande iech than cai bilavelas-pe o nichelo, anda o foro Sudbury (Ontario). Mai but, ande fiesavo curco sichileamas anda O Turno de veghe ande iech than sar familia. Mânre gule dada ajutisarde-ma te bariarav iech zurali iubirea anda o Del. Cadea că, ande 1956, ca numai deș bărșa, boldem-ma. Lenghi bari iubirea anda o Iehova zuriardea vi man te slujiv lesche anda sea o ilo.

Pala so terminisardem o liceo, sas chichiva buchia cai țârdine-ma catar o servicio le Iehovasco. Gândisarde-ma că dacă cherav o pionierato, ci daisardemas te chidav niciechdata love caște pherav mânro suno hai te dichav i lumea. Cadea că arachlem manghe buchi sar DJ ca iech posto de radio anda o foro, buchi cai placialas-ma zurales but. Tha trebulas te cherav buchi pi riat, cadea că ci mai daisardemas te jiav ca sea le întruniri hai beșlemas prea but timpo manușența cai ci iubinas le Iehovas. Mânri conștiința doșarelas-ma, cadea că ji la urmă, alosardem te mechav cadai buchi hai te cherav le paruimata cai trebunas.

Gălem te beșav ande Oshawa (Ontario), cai prinjiandem ieche tărnes cai bușiolas Ray Norman, lesca pheia Lesli hai avere pionieren. Savore cărde-ma te simțosarav-ma mișto. Cana dichlem so bari bucuria anelas lenghe i predicarea, gândisardem-ma ca so camlemas te cherav vi me andi viața. Von zuriarde-ma te astarav o pionierato, hai cadea cărdem, andi septembria 1966. Somas fericime hai sas-ma iech lași viața. Cu sea cadala, ajucărenas-ma chichiva paruimata cai nici na nachle prin mânri goghi.

Cana somas încă co liceo, cărdem iech cererea caște cherav buchi co Betelo anda Toronto (Canada). Mai târzio, cana somas deja pioniero somas achardo te slujisarav ștar bărșa co Betelo. Tha i Lesli pelea ca mânro ilo, hai darailem te jiav anda codoia că pachiaiem că ci mai avelas te dichav-la niciechdata. Pala so manglem-ma zurales but, alosardem ji la urmă te jiav co Betelo hai le ileia phagărdo lem manghe ghies lașio catar i Leslie.

Co Betelo cărdem buchi cai halavelas-pe o hureaimos, hai pala codoia sar secretaro. Ando timpo, i Lesli arăslea pioniera specialo hai sas-li bișialdi ande Gatineau (Québec). Gândisardem-ma butivar late hai pușlem-ma dacă alosardem mișto. Pala codoia întâmplosardea-pe vareso cai ci ajucărdemas-ma. O Ray, o phral la Lesliaco sas-lo achardo co Betelo. Vo arăslea te beșel manța andi camera hai cadea astardem pale te dav duma laia. Leam-ame ande 27 februaria 1971, o palutno ghies anda mânri repartiția de ștar bărșa.

Me hai i Lesli samas bișialde ande iech congregația de șib francezo anda Québec. Pala chichiva bărșa, ci avelas manghe te pachiav că somas achardo te slujisarav sar supraveghetoro de circumscripție. Anda codoia că sas-ma numai 28 bărșa, pachiaiem că som prea tărno hai că ci si man experiența. Tha le dumes anda Ieremia 1:7, 8 zuriarde-ma but. Tha mai sas amen iech aver pharimos. I Leslie nachlea prin dui accidente la mașinasa hai sovelas mai phares. Cu sea cadala, i Leslie phendea: „Cana o Iehova acharel-ame te cheras iech buchi, ci trebulas te das măcar amari zor te cheras-la?”. Alosardeam te jias ande codoi repartiția, cai arachleam but bucuria andel 17 bărșa cai avile.

Sas man but buchia te cherav sar supraveghetoro de circumscripție hai butivar ci mai așelas-ma timpo anda i Leslie. Cadea că, trebuisardea te sichioav iech aver buchi importanto. Ande iech luine de teharin, mardea varecon co udar. Cana pâtărdem ci sas chonic, tha arachlem iech coșo habeneia. Ande leste sas iech pohtan anda meseili, fructea, chiral, manro, mol, tahtaia hai iech lilorro bi anavesco, pe savo scriilas: „Jia chia rromniaia avri ande iech șucar than caște han”. Ande codo ghies o cham pechelas șucar po cerii. Cu sea cadala, phendem caring i Lesli că ci daisaras te jias, anda codoia că trebulas te cherav mânre cuvântări. Voi hachiardea-ma, tha ci pelea lache mișto. Cana șiutem-ma ca i meseili, mânri conștiința doșarelas-ma. Avile ande mânri goghi le versetea anda Efeseni 5:28, 29. Sas sar cana o Iehova phenelas manghe că trebul te lav sama pe mânri rromni. Pala so cărdem iech manglimos, phendem caring i Leslie te jias, hai voi sas-li zurales voime. Găleam la mașinaia ji ca iech șucar than pașa iech len, șiuteam-ame tele hai sas-ame iech andal mai șucar ghiesa. Pala codoia daisardem vi te cherav mânre cuvântări.

Samas bișialde ande mai but circumscripții, andai Columbia Britanico ji ande Newfoundland, cadea că mânro suno te phirav ande mai but thana pherelas-pe.  Gândisardem-ma ca i Școala Galaad, tha ci camlem te avav bișialdo ande aver them sar misionaro. Anda mande le misionari sas manușa specialo, hai me ci dichlemas-ma cadea. Mai but, darailem că avelas te avav bișialdo ande iech them andai Africa, cai sas but nasfalimata hai marimata. Somas zurales fericime andi Canada.

Ando bărș 1992, cana pâtărdea-pe i predicarea andel thema cai cărde partea andai Uniunea Sovietico, samas pușle dacă camas te jias andi Estonia sar misionari. Ci ajucărdeam-ame, tha mangleam le Iehovas te ajutil-ame te alosaras so sas mai mișto. Vi atunci phendeam amenghe: „Cana o Iehova acharel-ame te cheras iech buchi, ci trebulas te das măcar amari zor te cheras-la?”. Alosardeam te jias hai samas bucurime că ci samas bișialde andi Africa.

Astardeam sigo te sichioas i șib estonă. Pala dui șiona de cana arăsleam code, samas bișialde sar supraveghetori andi circumscripția. Avelas te jias ande 46 congregații hai chichiva grupe anda Letonia, Lituania hai vi anda Kaliningrad (Rusia). Cadaia însemnolas te sichioas vi iech țâra le șiba anda cadal thema. Sas zurales pharo anda amende. Cu sea cadala, le phrala sas-le voime te dichen că das amari zor te sichioas cadal șiba hai camle te ajutin-ame. Ando bărș 1999, andi Estonia sas cărdi iech filiala, hai me somas achardo te slujiv ando comiteto ande iech than le phralența Toomas Edur, Lembit Reile hai Tommi Kauko.

Daisardeam te prinjianas bute Martoren cai sas-le îngărde zuralimaia andi Siberia. Chiar cana sas-le phandade but bărșa hai sas lenghe pharo te așen dur catar lenghe familii, von ci mechle ca lengo ilo te pherel-pe holiaia. Von ci hasarde penghi bucuria hai zelo andi predicarea. Cadaia ajutisardea vi amen te hachiaras că daisaras te avas bucurime hai te așias zurale vi cana nachas prin pharimata.

But bărșa iech pala aver, cărdeam buchi phares hai leam amenghe țâra ghiesa libero, cadea că i Lesli astardea te avel chini sea o timpo. Mai anglal, ci deam amari sama că o chinimos daștil te avel catar iech nasfalimos cai bușiol fibromialgia. Nachlea prin amari goghi te jias parpale andi Canada. Cana samas acharde ca i Școala anda le Membri andal Comitea de Filială hai lenghe Rromnia, cai încărel-pe co Patterson (New York, SUA), ci pachiaiam că va daisaraia te jias. Cu sea cadala, pala so mangleam-ame but, alosardeam te jias, hai o Iehova dea-ame but miștimata. Cana samas ca i școala, arachlea-pe ji la urmă so nasfalimos sas la Leslia hai sas lache dino o ajutorii medicalo cai trebulas lache. Cadea că, daisardeam te cheras mai dur amare buchia.

Ande iech riat anda o bărș 2008, cana samas andi Estonia, primisardeam iech telefono catar o sedio mondialo hai samas pușle dacă camas te jias ando Congo. Ci mai jianglem so te phenav, vi mai but cana hachiardem că trebulas te das iech răspunso ocoaver ghies. Mai anglal, ci phendem chanci caring i Leslie anda codoia că jianglem că ci avelas te sovel sea i riat. Tha me somas codo cai ci sutem anda codoia că dem duma le Iehovaia ando manglimos anda mânre daraimata cai sas-man te slujiv andi Africa.

 O ghies cai avilea, pala so phendem caring i Lesli so pușle-ame le phrala, phendeam: „O Iehova acharel-ame te jias andi Africa. Na-i catar te jianas sar si code dacă ci jias te dichas amare iachența”. Cadea că, pala 16 bărșa andi Estonia, tiliardeam le avionosa caring i Kinshasa (Congo). I filiala arachelas-pe ande iech than șucar hai zeleno. Iech anda le dintune buchia cai i Lesli șiutea-le ande amari camera sas iech țâno lil cai încărdea-les de cana tiliardeam anda Canada. Pe leste scriilas: „Lulughio code cai sanas șiuto”. Cana prinjiandeam le phralen, încărdeam studii biblico hai dichleam sar si ciaces i viața sar misionaro, amari bucuria barilea vi mai but. Andel bărșa cai avile, sas amen i șucar buchi te cheras vizite ca le 13 filiale anda aver thema africano. Cadea daisardeam te prinjianas mai but feluri manușa hai te dichas lengo șucarimos. Le daraimata cai sas man mai anglal chosle-pe hai naisardeam le Iehovasche că bișialdea-ame te slujisaras andi Africa.

Ando Congo, sas șiute angla amende mai but feluri habena, sar avenas insectea, anda save ci pachiaiem vroiechdata că avelas te hav. Tha, cana dichlem so mișto hanas-le amare phrala, alosardeam te zumavas-le vi amen hai ci falea amenghe nasul.

Ande codo timpo, le trupe de gherilă avenas opral le gava anda o esto le themesco hai cherenas nasul le jiuvleanghe hai le șiavenghe. Daisardeam te jias ande codo than caște zuriaras le phralen hai te îngăras lenghe le buchia cai trebunas lenghe. Code le mai but phrala sas-le ciore, tha sas-len iech pachiamos zuralo ando jiuvindimos, iubinas zurales but le Iehovas hai așenas loialo pașa i organizația. Cana dichleam lengo pachiamos, samas vi amen zuriarde te gândisaras-ame sostar slujisaras le Iehovasche hai sar daisaras te zuriaras amaro pachiamos ande leste. Chichiva anda le phrala hasarde penghe chăra hai le recolte. Hachiardem încă iech data că daisaras sigo te hasaras amare buchia materialo hai că amaro ciacio barvalimos si amaro amalimos le Iehovaia. Chiar cana nachenas prin bare pharimata, le phrala ci rovarenas-pe. Lengo phiraimos zuriardea vi amen te nachas părdal amare pharimata hai nasfalimata pherde tromai.

Ande amari viața avilea iech aver buchi neajucărdi. Manghlea-pe amendar te jias ca i filiala anda Hong Kong. Nici na nachlea prin amari goghi că va avela te traisaras vroiechdata andi Asia! Tha, anda codoia că  dichleam o vast le Iehovasco ande sea le coaver repartiții, alosardeam te jias. Ando bărș 2013, le iachența pherde asfa, mechleam palal amare cuci amalen hai le șucar thana andai Africa, bi te jianas so ajucărelas-ame mai dur.

Sas iech baro paruimos te traisaras ando Hong Kong, iech baro foro pherdo manușența anda sea i lumea. I șib chinezo cantoneză sas iech aver pharimos anda amende. Tha dichleam o baro lașimos le phralengo hai o haben de othar placiaia-ame but. Cherelas-pe sea mai but buchi ca i filiala, tha vi le proprietăți bichinenas-pe sea mai cuci. Anda codoia, o Corpo de Guvernare alosardea te bichinel i mai bari partea andal proprietăți la filialache. Ca țâra timpo pala codoia, ando bărș 2015, găleam te beșas ande Coreea de Sud, cai slujisaras vi aghies. Vi cade, sas amenghe pharo te sichioas i șib. Tha, chiar cana ci das duma nici acana mișto i șib, le phrala hai le pheia zuriaren-ame hai așaren-ame cana dichen că das amari zor te sichioas-la.

Ci sas amenghe sea o timpo ușoro te cheras amenghe amala, tha hachiardeam că dacă acharas amende le phralen caște has sau te beșas ande iech than, daisaras te prinjianas-le mai sigo. Dichleam că le phrala amean zurales but hai că ci sile prea diferime iech averestar, hai că o Iehova cărdea-ame cadea te pâtras amaro ilo hai te sicavas iubirea caring sea mai but amala. (2 Cor. 6:11)

Hachiardeam că si șucar te dichas le manușen cadea sar dichel-le o Iehova hai te rodas te dichas i iubirea le Iehovaschi hai sar sicavel amenghe vo o drom pe savo trebul te phiras andi viața. De fiesavi data cana samas perade sau pușleamas-ame dacă amare phralen ciaiolas-le amendar, citisardeamas pale le lila catar amare amala. O Iehova dea răspunso ca amare manglimata hai sicadea amenghe peschi iubirea prin o fapto că dea-ame o zuralimos te jias mai dur.

Andel bărșa cai nachle, me hai i Lesli sichileam că si mișto te cheras amenghe timpo iech anda aver, chiar cana si amen but buchia te cheras. Arăsleam vi te hachiaras că trebul te jianas te asas amendar, vi mai but cana sichileamas iech nevi șib. Hai deam amari zor ca, ande fiesavi riat, te mulțumisaras le Iehovasche anda iech buchi cai andea amenghe bucuria ande codo ghies.

Te phenav ciaces, pachiaiem că i viața sar misionaro na-i anda mande hai că ci daștiv te traisarav ande aver thema. Tha, hachiardem că le ajutoroia le Iehovasco daștin te aven cărde sea le buchia. Aven ande mânri goghi le dumes cai phendea-le o profeto Ieremia: „Athadean-ma, o, Iehova”. (Ier. 20:7) O Iehova, amaro dad cerisco, dea-ame but șucar buchia cai nici na nachle prin amari goghi hai dea-ame vi but miștimata neajucărde. Vo chiar pherdea mânro suno te jiav le avionosa. Gălem ande mai but thana sar dem sune cana somas șiavorro hai cărdem vizite ca filiale pa panji continentea. Sa cadea, mânro ilo silo pherdo bucuria că i Lesli sas-li pașa mande hai ajutisardea-ma ande sea le repartiții.

Anas ande amari goghi sea o timpo casche slujisaras hai sostar. Le miștimata cai o Iehova del-le amenghe aghies sicaven so șucar va avela i viața andi lumea nevi, cana vo ‘va pâtrela pesco vast hai va dela codolenghe jiuvinde sea so camel lengo ilo’. (Ps. 145:16)