Ande cado bărș, i organizația cărdea chichiva paruimata cai ajutisarde ca mașcar le Studenți andi Biblia te avel mai but unitatea andi închinarea. Ando Turno de veghe astarde te aven publichime comentarii cai sicavenas sar trebunas hachiarde le versetea catar i Întrunirea anda manglimos, așarimos hai mărturia, cai încărelas-pe ande fiesavo curco. Mai but, le Studenți andi Biblia cărde iech calendaro cai sas sicado câte iech verseto anda fiesavo curco, hai vi iech ghili cai daștilas te avel ghilabadi cana le phrala lenas i Biblia caște sichion corcore sau cana cherenas i închinarea andi familia.

Ca lenghe întruniri, le Studenți andi Biblia cherenas „mărturisiri”, adică phenenas chichiva experiențea cai sas-len andi predicarea, anenas mulțumiri le Iehovasche, ghilabanas chichiva ghilea sau chiar phenenas manglimata. I Eva Barney, cai boldea-pe ando bărș 1923, cana sas-la 15 bărșa, anel pesche andi goghi: „Dacă camleanas te cheres iech «mărturisirea», trebulas te vazdes-tu ande pânrănde hai te phenes: «Camav te phenav nais le Raiesche anda sea o lașimos cai sicadea-les manghe»”. Chichiva phralen ciaiolas-le zurales but te phenen so sas-len ando ilo. I phei Barney phenel mai dur: „Amaro drago phral Godwin sas-lo phuro hai delas duma but, anda codoia că sas-les but buchia anda save te naisarel le Raiesche. Tha cana i rromni le phraleschi dichelas că o președinte la întrunireaco astarelas te avel neliniștime, voi țârdelas-les hureaimastar hai atunci vo beșelas tele”.

Iechdata po șion, fiesavi clasa (cai acana bușiol congregația) încărelas iech Întrunirea specialo anda manglimos, așarimos hai mărturia. O Turno de veghe anda 1 aprilia 1923 phenelas anda cadai întrunirea: „Dipaș andai întrunirea trebulas te avel andal experiențea andai predicarea hai ca le vestitori te aven zuriarde. . . . Pachias că cadai unitatea va ajutila le phralen te pașion iech averestar”.

O Charles Martin, iech vestitoro 19 bărșengo anda Vancouver (Canada), țârdea but miștimata anda cadal întruniri. Mai târzio, vo andea pesche andi goghi: „Cade așundem i dintuni data so trebulas te phenav ca le udara le manușenghe. Butivar, cana varecon phenelas iech experiența andai predicarea chăr chărestar, sichilem so te phenav hai sar te dav duma șucar cana o manuș phenelas vareso caște phandavel i discuția”.

Le ghiesa anda i predicarea zuriarde vi von i unitatea andi organizația. Ando Turno de veghe anda 1 aprilia 1923 phendea-pe: „Caște avas unime andi buchi, . . . o ghies de marține, 1 mai 1923, va avela anda i predicarea. Sa cadea va așena le buchia de acanara angle ando dintuno ghies de marține anda fiesavo șion . . . Fiesavo vestitoro anda fiesavi clasa trebulas te lel partea cadala buchiate”.

Vi le tărne Studenți andi Biblia jianas andi predicarea. I Hazel Burford, cas atunci sas-la numai 16 bărșa, phendea: „Andi publicația Buletino a arachenas-pe prezentări anda soste te das duma andi predicarea, cai trebulas te încăras-le ande amari goghi. Ande iech than mânre papoia, cărdeam buchi pherde zelo andi predicarea”. Cu sea cadala, i phei Burford sas-li uimime te așunel so pachialas iech phral anda o fapto că voi predichilas. Voi phenel: „Iech phral mai phuro pachialas că me ci trebulas te predichiv le manușenghe. Ande codo timpo, sas jene cai hachiarenas că na savore Studenți andi Biblia, sar avenas le «tărne murșa hai le tărne jiuvlea», trebunas te așaren amare Bare Creatoros”. (Ps. 148:12, 13) Tha, i phei Burford ci mechlea-pe. Pala codoia, voi arăslea te cherel partea anda i duito clasa anda i Școala Galaad hai slujisardea sar misionara andi Panama. Ando timpo, cadal phrala parude penghi atitudinea caring le tărne cai cherenas predicarea.

Vi le congresea localo hai regionalo cărde ca mașcar le phrala te avel unitatea. Ca but anda cadal congresea sas vi ghiesa andai predicarea. Sar exemplo, co congreso anda Winnipeg (Canada) savore phrala sas-le acharde ando ghies de 31 martia, te cheren iech campania andai predicarea, cai bușiolas „Bombardamento specialo ando Winnipeg”. Cadal ghiesa specialo andai predicarea cărde ca ando viitorii te bariol o teritorio. Ando 5 augusto, cărdea-pe iech aver congreso ande Winnipeg, saveste găle 7 000 manușa, iech baro număro ande codo timpo andi Canada.

Ando bărș 1923, o mai importanto congreso anda o poporo le Iehovasco sas-lo încărdo ando  Los Angeles, California, mașcar le ghiesa 18-26 augusto. Andel curche angla o congreso, sas scriime andel ziarea anda cado evenimento, hai le Studenți andi Biblia dine mai but sar 500 000 invitații. Pe le tramvaie hai le mașini personalo sas șiute afișe anda cado congreso.

Savatone, 25 augusto, o phral Rutherford încărdea i cuvântarea „Bacrea hai buznea”, ande savi sicadea claro că „le bacrea” si le manușa le ileia ujo, cai va traina veșnico ando paradiso pi phuv. Sa cadea, citisardea iech rezoluția cai bușiolas „Iech avertismento”, ande savi doșarelas i creștinătatea hai zuriarelas codolen le ileia ujo te înclen anda „O Babilono o Baro”. (Rev. 18:2, 4) Pala codoia, le Studenți andi Biblia zeloși pa sea i phuv avenas te den milioanea exemplarea anda cadai rezoluția.

Ando palutno ghies le congresosco, mai but sar 30 000 manușa așunde le phrales Rutherford sar încărdea i cuvântarea „Sea le națiuni jian angle caring o Armaghedono, tha milioanea manușa cai train acana ci va merena niciechdata”. Anda codoia că ajucărde-pe te aven but manușa, le Studenți andi Biblia line andi chiria o mai nevo stadiono vazdino, o Los Angeles Coliseum. Ca savore manușa te daștin te așunen o programo, le phrala folosisarde o sistemo andai sonorizarea le stadionosco, iech tehnologia nevi ande codo timpo. Sa cadea, aver but jene așunde o programo co radio.

Ando bărș 1923, i predicarea arăslea te cherel-pe sea mai but andi Africa, America de Sud, Europa hai India. Chiar cana trebulas te lel sama pesca rromniatar hai pesche șiov șiavendar, o phral Adavimannathu Joseph, andai India, cherelas buchi vi caște cărdion publicații andel șiba hindi, tamil, telugu hai urdu.

Ande Sierra Leone, le Studenți andi Biblia Alfred Joseph hai Leonard Blackman scriisarde co sedio mondialo, anda Brooklyn, New York, caște manghen ajutorii. Ande 14 aprilia 1923, sas lenghe dino iech răspunso. „Ande iech ghies de savato pi riat”, phenel o phral Alfred, „bi te ajucăras-ame primisardeam iech telefono”. Iech vocea zurali pușlea-les: „Tu san codo cai scriisardean ca i Societatea Watch Tower caște bișialel tumende predicatori?”. „Da”, phendea lesche o phral Alfred. „Te jianes, că man bișialde man”. I vocea zurali sas le phraleschi William Brown. Vo arăslea ande sa codo ghies andal Caraibe ande iech than pesca rromniaia, Antonia, hai lenghe șeianța, Louise hai Lucy. Le phrala ci mai trebuisarde te ajucăren but timpo ji cana te prinjianen-le.

O Alfred phendea mai dur: „Andi teharin cai avilea, ando timpo so me hai o Leonard studisardeamas andai Biblia, ca amaro udar mardea iech murș zurales ucio. Sas o William Brown, iech phral zurales zeloso, cai camlea te încărel iech cuvântare  publico chiar o duito ghies. Ande mai țâra sar iech șion, o phral Brown dea sea le publicații cai andea-le peia. Pala codoia, primisardea aver 5 000 lila, hai na pala but timpo trebunas amenghe vi mai but. Cu sea cadala, o phral Brown ci cărdea-pe prinjiando sar iech manuș cai bichinelas lila. Ande le but bărșa ande save cărdea buchi sar slujitoro loialo le Iehovasco, vo delas duma sea o timpo andal Scripturi cana încărelas pesche cuvântări. Anda codoia, lesche sas dino iech nevo anav, Brown „Biblia”.

Ande cado timpo, i filiala anda Barmen (Germania) arăslea te avel prea pherdi, hai le phrala așunde că i armata francezo camelas te lel tela pesco zuralimos o foro. Le Studenți andi Biblia arachle iech complexo cărdo anda mai but clădiri ando foro Magdeburg, cai falas-pe perfecto caște avel tipărime i literatura. Ande 19 iunia, le phrala terminisarde te chiden o echipamento andai tipărirea hai aver buchia cai trebunas lenghe hai muchisai-le ando nevo Betelo anda Magdeburg. O ghies pala so le phrala phende caring o sedio mondialo că muchisai-le cu sea, le ziarea scriisarde că i Franța lea tela pesco zuralimos o foro Barmen. Le phrala hachiarde că cado sas ciaces o vast le Iehovasco hai că vo lea sama pe lende.

Andi Brazilia, o phral George Young, cai phirdea ande but thana caște îngărel mai dur i vestea lași, șiutea le baze anda iech nevi filiala hai astardea te publichil O Turno de veghe andi șib portughezo. Ande numai chichiva șiona, vo dea mai but sar 7 000 publicații. I Sarah Ferguson sas-li zurales bucurime cana o phral Young gălea lende chăre. Voi citilas i revista O Turno de veghe încă anda o bărș 1899, tha ci sas-la i ocazia te sicavel că dea peschi viața le Iehovasche prin o bolimos ando pai. Pala chichiva șiona, i phei Ferguson hai lache ștar șiave daisarde, ji la urmă, te cheren cado baro paso.

I revista O Turno de veghe anda 15 decembria 1923 phenelas so miștimata andea andal Studenți andi Biblia i unitatea andi închinarea: „Dichiol-pe claro că le phralen silen iech pachiamos zuralo . . . Cadea că, te las pe amende i armura spiritualo hai, ieche zeloia neviardo te avas hotărâme te slujisaras mai dur pherde bucuria le Devlesche vi ando bărș cai avel”.

Si ciaces, pala cado bărș avelas te astarel iech nevo bărș zurales importanto andal Studenți andi Biblia. Le phrala catar o Betelo cherenas buchi deja de chichiva șiona ca iech cotor phuv anda Staten Island, na dur catar o sedio mondialo anda Brooklyn. Le clădiri anda o nevo than sas-le gata cana astardea o bărș 1924 hai cărde te bariol i unitatea andai organizația hai ajutisarde te avel îngărdi mai dur i vestea lași le manușenghe ande moduri nemaidichle ji atunci.