1, 2. Savo si o mai lașio modo ande savo te citis hai te sichios andai Biblia? Cher iech ilustrarea.

 TE PHENAS că cames te chines tuche iech chăr. Mai anglal te cheres iech alosarimos, arăsăl te diches numai iech fotografia anda sar dichiol-pe o chăr de avreal? Siguro că nici. O ciacimos si că cames te diches-les che iachența, vi de avreal tha vi de andral. Cames te jias andre te diches sea le camere hai sea so si ando chăr. Daștil-pe că cames te diches vi o proiecto caște hachiares sar sas-lo cărdo. Si normalo că cames te diches sea le buchia anda o chăr cai avelas te chines-les.

² Sa cadea daisaras te cheras vi amen cana citisaras hai sichioas andai Biblia. Iech manuș sicado phendea că o mesajo la Bibliaco si sar „iech bari clădirea, cai sila turnuri uce hai sila iech zurali fundația”. Cadea că, sar daisaras te jianas mai mișto sea so arachel-pe andi Biblia? Dacă citisaras-la sigo, va avela te prinjianas numai „le buchia de bază anda le dumes sfânto le Devlesche”, adică le ciacimata de bază. (Evr. 5:12) Tha, cadea sar trebul te jias andre ande iech chăr caște jianas mai but buchia anda leste, sa cadea trebul te sichioas atento andai Biblia caște hachiaras-la sea mai mișto. Daisaras te prinjianas mai but andai Biblia dacă dichas sar cherel-pe o phanglimos mașcar sea le sicaimata hai laco mesajo. Cana sichioas andai Biblia, te das amari zor na numai te hachiaras mai mișto so pachias, tha vi sostar pachias iech anumime sicaimos.

3. So zuriardea o apostolo Pavel le creștinen te cheren hai sostar? (Efeseni 3:14-19)

³ Caște hachiaras sea mai mișto o Lil le Devlesco, trebul te sichioas le ciacimata profundo. O apostolo Pavel zuriardea pesche phralen hai pheian te den penghi zor te sichion sea mai but anda o Lil le Devlesco caște hachiaren „o buhlimos, o lungimos, o ucimos hai i adâncimea” le ciacimasco. Cadea, von va  arăsăna „te astaren rădăcini hai te așen zurale” ando pachiamos. (Citisar Efeseni 3:14-19.) Vi amen trebul te cheras cadai buchi. Mai dur, va avela te dichas sar daisaras te rodas atento ando Lil le Devlesco caște hachiaras mai mișto le cuci sicaimata cai arachen-pe ande leste.

4. So daisaras te cheras caște pașioas mai but le Iehovastar? Den chichiva exemplea.

⁴ Amen sar slujitori le Iehovasche ci camas te hachiaras numai le ciacimata de bază andai Biblia. O spirito sfânto daștil te ajutil-ame te camas te hachiaras „chiar vi le buchia profundo le Devlesche”. (1 Cor. 2:9, 10) Daștias te șios tuche andi goghi te sichios mai but buchia cai ajutin-tu te pașios le Iehovastar? Sar exemplo, rode te diches sar sicadea vo peschi iubirea caring pesche slujitori andal puraimata caște hachiares sar sicavel vo peschi iubirea vi anda tute. Sa cadea, daștis te sichios anda sar camelas o Iehova ca le israeliți te anen lesche închinarea hai sar camel te anas lesche amen închinarea aghies. Sau daștis te rodes te hachiares mai mișto le profeții cai o Isus pherdea-le cana sas-lo pi phuv.

5. So cames te rodes te prinjianes mai mișto cana sichios corcoro anda o Iehova?

⁵ Chichiva phrala hai pheia cas ciaion-len te sichion andai Biblia, sas-le pușle so ciacimata anda o Lil le Devlesco camenas te hachiaren-le mai mișto. Daștis te diches chichiva buchia cai phende-len von ando chenarii „ So daisaras te rodas te prinjianas mai mișto cana sichioas corcore anda o Iehova”. Cadai buchi daștil te avel șucar anda tute dacă folosis o Indexo le publicațiengo Watch Tower sau o Ghido de cercetare anda le Martori le Iehovasche. Cana sichios profundo andai Biblia daștis te zuriares chio pachiamos hai cadaia ajutil-tu te araches „o prinjianimos anda o Del”. (Prov. 2:4, 5) Mai dur, va avela te dichas chichiva ciacimata profundo andai Biblia.

6. a) Savi si i diferența mașcar iech plano hai iech scopo? b) Sostar daisaras te phenas că o scopo le Iehovasco anda o manuș hai i phuv silo „veșnico”? (Efeseni 3:11)

⁶ Te dichas so phenel i Biblia anda o scopo le Devlesco. Mai anglal, si importanto te  hachiaras i diferența mașcar iech plano hai iech scopo. Iech plano si sar iech drom mișto alosardo, cai daștil te îngărel-ame cai camas te arăsas. Tha daștil-pe că amaro plano ci înclel dacă o drom silo phandado hai ci mai daisaras te jias angle. Tha, o scopo si sar o than exacto cai camas te arăsas. O than silo alosardo, tha daisaras te jias caring leste prin mai but droma. Dacă trebul, daisaras te paruvas o drom. Sa cadea așen le buchia vi anda o scopo le Devlesco anda o manuș hai i phuv. Ande iech felo sau aver, cado va pherela-pe anda codoia că Vo „cărdea ca orisavi buchi te pherel lesco scopo”. (Prov. 16:4) Mai but, i Biblia phenel că o scopo le Iehovasco silo „veșnico”. (Ef. 3:11) Sostar? Anda codoia că sea so cherel o Iehova va încărela anda sea o timpo. Tha, savo si o scopo le Iehovasco hai so paruimata cărdea caște pherel-les?

7. Sar parudea o Iehova o modo ande savo pherdea pesco scopo pala so le dintune manușa alosarde te vazden-pe contra lesche? (Matei 25:34)

⁷ O Iehova sicadea le manușenghe savo si lesco scopo anda lende. Vo phendea lenghe: „Aven roditori, butiaon tumen hai pheren i phuv, supunin-la; hai stăpânin . . . pa sea-l creaturi juvinde cai mișchin-pe pi phuv!”. (Gen. 1:28) Cana o Adam hai i Eva vazdine-pe contra le Iehovasche hai cărde ca o păcato te nachel mai dur ca sea le manușa, o scopo le Iehovasco ci parudea-pe. Vo parudea numai o modo ande savo avenas te cărdion-pe le buchia. O Iehova alosardea pe thaneste te cherel iech Regato cerisco caște pherel pesco scopo anda le manușa hai i phuv. (Citisar Matei 25:34.) Co timpo alosardo, o Iehova bișaldea pherdo iubirea pesche Șiaves unico năștime pi phuv. O Isus sicadea le manușen anda o Regato hai dea peschi viața caște hastravel-ame anda o păcato hai o merimos. Pala codoia, vo sas-lo uștiado andal mule caște rail sar Rege ando Regato cerisco le Devlesco. Tha mai si vi aver buchia cai trebul te prinjianas-le anda o scopo le Devlesco.

8. a) Savi si i mai importanto buchi anda savi del-pe duma andi Biblia? b) Cadea sar phenel-pe ando Efeseni 1:8-11, savo si o scopo finalo le Iehovasco? (Dich vi i imaginea pa i coperta.)

⁸ I mai importanto buchi anda savi del-pe duma andi Biblia si că o anav le Iehovasco va avela ujiardo prin o Regato cai si tela o zuralimos le Cristososco. O Regato va pherela o scopo le Devlesco anda i phuv, hai cado ci daștil te avel parudo. (Is. 46:10, 11, n.s.; Evr. 6:17, 18) Ando timpo, i phuv va arăsăla iech paradiso ande savo va beșena manușa perfecto, cai aven anda o Adam hai i Eva. Von va bucurina-pe catar i „viața anda sea o timpo”. (Ps. 22:26) Tha o Iehova camel te cherel vi mai but. Lesco scopo finalo si ca mașcar le manușa pa i phuv hai le creaturi spiritualo anda o cerii te avel iech phanglimos chidino. Atunci, savore va așunena le Iehovastar hai va dichena-les sar lengo Conducătoro. (Citisar Efeseni 1:8-11.) So si ande chio ilo cana gândisares-tu ca sea le șucar buchia cai cherel-le o Iehova caște pherel pesco scopo?

9. Cana citisaras i Biblia, chichi de dur daisaras te dichas ando viitorii?

⁹ Te dichas i profeția anda Geneza 3:15, phendi le Iehovastar andi bar le Edenoschi. b I profeția sicavel so buchia va întâmplona-pe caște pherel-pe lesco scopo, tha cadaia avelas te avel numai pala mii bărșa. Sar exemplo, o Del phendea le Avraamosche că pala mai but bărșa, iech șiavo anda lesco neamo va avela o Mesia. (Gen. 22:15-18) Pala codoia, ando bărș  33 a.e., le Isusosco călcâio sas-lo nichiardo, cadea sar phenelas i profeția. (Fap. 3:13-15) Cana o șăro le Satanosco va avela nichiardo pala mai but sar 1 000 bărșa va pherela-pe i palutni buchi anda i profeția (Rev. 20:7-10) Tha i Biblia sicavel vi mai but buchia anda so va avela cana i dușmănia mașcar o sistemo le Satanosco hai i organizația le Iehovaschi va arăsăla co sfârșito.

10. a) So bare buchia va avena na pa but timpo? b) Sar daisaras te pregătisaras amaro ilo hai amari goghi? (Dich vi i nota de telal.)

¹⁰ Gândisaren tumen ca so bare buchia phenel i Biblia că va avena. Ando iechto than, le națiuni va phenena „Pacea hai securitatea!”. (1 Tes. 5:2, 3) O baro necazo va astarela ‘neajucărdo’, cana le națiuni va atachina le religii neciace. (Rev. 17:16) Pala codoia, va avela o Șiav le manușesco „pe le cerosche nori zuralimaia hai bare gloriaia”, hai cado evenimento daștil-pe că va avela supranaturalo. (Mat. 24:30) Vo va cherela cris opral le manușa, hai va hulavela le bacrean catar le buznea. (Mat. 25:31-33, 46) Ande codo timpo, o Satan astardo holiatar va camela te așel vi mai dur contra le Iehovasche. Anda codoia că vo urâl cadea de but le manușen le Devlesche va cherela ca mai but națiuni chidine ande iech than – anda save i Biblia phenel că sile „o Gog anda o them le Magogosco” – te atachin codolen cai anen închinarea le Iehovasche. (Ezec. 38:2, 10, 11) Co momento alosardo, codola machle cai mai așile pi phuv va avena vazdine co cerii caște aven pașa o Isus hai leschi armata cerisco caște maren-pe ando războio Armaghedon, o sfârșito le bare necazosco. c (Mat. 24:31; Rev. 16:14, 16) Atunci, va astarela opral sea i phuv o Raimos de Iech Mia Bărș le Isusosco. (Rev. 20:6)

11. So însemnol anda tute i promisiunea anda i viața veșnico? (Dich vi le imagini.)

¹¹ Tha so ajucărel-ame ando viitorii pala o Raimos de Iech Mia Bărș? I Biblia phenel că o Iehova „șiutea i veșnicia ando ilo le manușengo”. (Ecl. 3:11) Te gândisaras-ame sar va avela amari viața, tha vi amaro amalimos le Iehovaia. O lil Te pașioas le Iehovastar,  ca i pagina 319, ajutil-ame te gândisaras-ame sar va avela amari viața ando viitorii prin le dumes: „Pala so va avela te traisaras șăla, mii, milioanea sau chiar miliardea bărșa, va avela te jianas but mai but buchia anda o Iehova sar jianas acana. Tha vi atunci va avela te das amari sama că mai si but aver șucar buchia cai daisaras te sichioas-le anda leste. . . . I viața veșnico ando paradiso va avela iech viața barvali hai șucar, pherdi lașe buchianța. Hai te daisaras te pașioas sea mai but le Iehovastar va avela sea o timpo o mai lașio pochinimos”. Tha ji atunci, ando timpo so citisaras anda o Lil le Devlesco, so aver buchia daisaras te mai sichioas?

12. Sar daisaras te dichas opre andel ceruri? Den iech exemplo.

¹² O Lil le Devlesco ajutil-ame te hachiaras iech țâra mai mișto anda sar silo o Iehova „opre ando ucimos”. (Is. 33:5) I Biblia sicavel but șucar buchia anda o Iehova hai leschi organizația cerisco. (Is. 6:1-4; Dan. 7:9, 10; Rev. 4:1-6) Sar exemplo, daisaras te citisaras anda le șucar buchia cai dichlea-le o Ezechiel cana „le ceruri pâtărde-pe” hai astarde te aven-les „viziuni catar o Del”. (Ezec. 1:1)

13. So si ande chio ilo cana diches so cherel o Isus ando cerii, cadea sar sicavel-pe ando Evrei 4:14-16?

¹³ Te gândisaras-ame vi ca so cherel o Isus ando cerii sar Rege hai Baro Rașai pherdo iubirea. Prin leste daisaras te pașioas ando manglimos „le tronostar le lașimasco nemeritime” le Devlesco hai te mangas mila hai ajutorii „co momento potrivime”. (Citisar Evrei 4:14-16.) Te na mechas te nachel niciech ghies bi te beșas hai te gândisaras-ame ca so cărde hai cheren vi mai dur anda amende o Iehova hai o Isus anda le ceruri! I iubirea cai von sicaven-la caring amende trebul te arăsăl ande amaro ilo hai te încărel jiuvindo amaro  zelo ando timpo so slujisaras le Iehovasche. (2 Cor. 5:14, 15)

14. Phenen iech buchi prin savi daisaras te sicavas că naisaras anda sea so cărde o Iehova hai o Isus anda amende. (Dich vi le imagini.)

¹⁴ I mai lași buchi cai daisaras te cheras-la caște naisaras anda sea so cărde o Iehova hai lesco șiavo anda amende, si te ajutisaras averen te cărdion Martori le Iehovasche hai discipoli le Isusoche. (Mat. 28:19, 20) Cadai buchi cărdea-la vi o apostolo Pavel caște sicavel peschi recunoștința caring o Del hai o Isus. Vo jianglea că o Iehova camel ca „orisavo felo manușengo te aven hastrame hai te arăsăn ca iech prinjianimos exacto le ciacimasco”. (1 Tim. 2:3, 4) Cadea că, vo cărdea phares buchi caște del duma sea mai bute manușența hai ‘cărdea sea o posibilo’ caște hastravel-le. (1 Cor. 9:22, 23)

15. Cadea sar phenel-pe ando Psalmul 1:2, so anel amenghe fericirea?

¹⁵ O psalmisto phendea că iech manuș daștil te avel voime hai te jial lesche mișto dacă „arachel peschi plăcerea andi Legea le Iehovaschi” hai gândisarel-pe late ghies hai riat. (Ps. 1:1-3, n.s.) Ando lil Studies in the Psalms, o Joseph Rotherham, iech traducătoro la Bibliaco phendea anda cadal versetea că iech manuș „cai arachel peschi plăcerea andi îndrumarea le Devleschi trebul te cherel sea so daștil caște rodel-la, te sichiol anda late hai te gândil-pe but timpo late”. Vo mai phendea că iech cititoro la Bibliaco trebul „te dichel hasardo fiesavo ghies ande savo ci încărdea peschi goghi ca laco goghiaverimos”. Daisaras te arachas amari plăcerea cana sichioas chichi mai but buchia andai Biblia hai cana dichas sar cherel-pe O phanglimos mașcar lache sicaimata. Si iech bari bucuria cana rodas te hachiaras sea mai mișto o Lil le Devlesco!

16. So va avela te dichas ando articolo cai avel?

¹⁶ Savore daisaras te hachiaras le șucar ciacimata cai arachen-pe ando Lil le Devlesco. Iech anda cadala si o baro templo spiritualo le Iehovasco, anda savo dea duma o Pavel ande pesco lil caring le evrei. Ando articolo cai avel, va avela te hachiaras mai mișto cado ciacimos hai pachias ciaces că cado va anela amenghe iech bari bucuria.