1. Cadea sar phenel-pe ando Matei 24:9, sostar ajucăras-ame te avas urâme le manușendar?

O IEHOVA cărdea-ame caște daisaras te iubisaras tha vi te avas iubime. Anda codoia, cana varecon urâl-ame, duchavel-ame but hai cherel-ame te daras. Sar exemplo, iech phei Georgina * cai beșel andi Europa phenel: „Cana sas-ma 14 bărș, mânri dei urâsardea-ma anda codoia că slujisardem le Iehovasche. Simțosardem-ma corcori hai pachiaiem că ci mai som lași chancesche.” Iech phral cai bușiol Danylo phenel: „Cana le soldați marde-ma, prasade-ma hai darade-ma că va cherena manghe nasul, anda codoia că som iech Martoro le Iehovasco, darailem hai simțosardem-ma zurales nasul. Chiar cana cadai ura anel amenghe but duch, ame ajucăras-ame te avas urâme le manușendar. O Isus phendea de mai anglal că i lumea va urâla-ame. (Citisar Matei 24:9.)

2, 3. Sostar sile urâme le continuatori le Isusosche?

² Le continuatori le Isusosche sile urâme le manușendar. Sostar? Anda codoia, că sar o Isus, von ‘ci cheren partea andai lumea’. (Ioan 15:17-19) Chiar cana sicavas respecto caring le guvernea le manușenghe, ame ci anas închinarea lenghe sau ca lenghe simboluri naționale. Ame anas închinarea numai le Iehovasche. Sa cadea, încăras o drepto le Iehovasco te conducil le manușen, o drepto cai o Satan hai lesche urmași camen te len-les lestar. (Gen. 3:1-5, 15) Mai but, ame phenas le manușenghe că o Regato le Devlesco va rezolvila sea lenghe pharimata hai că, na pa but timpo, vo va mudarela sea codolen cai si lesche dușmani. (Dan. 2:44; Rev. 19:19-21) Cadaia si iech vestea lași anda codola umili, tha si iech vestea nasul anda codola nasul. (Ps. 37:10, 11)

 ³ Ame sam urâme vi anda codoia că traisaras pala le ciace norme le Devlesche. Cadal norme si zurales diferime catar so pachian le manușa că si mișto sau nasul. Sar exemplo, but manușa phenen că si mișto te avel-le iech phiraimos imoralo, tha anda cado phiraimos sas distrugime i Sodoma hai i Gomora. (Iuda 7) Anda codoia că încăras ca le norme la Bibliache, but manușa asan amendar sau phenen că ame ci hachiaras averen. (1 Pet. 4:3, 4)

4. Ce calități ajutin-ame cana le manușa urân-ame?

⁴ So daștil te ajutil-ame cana le manușa urân-ame hai prasan-ame? Trebul te pachias zurales că o Iehova va ajutila-ame. Cadea sar iech scuto, amaro pachiamos daștil ‘te mudarel sea le săgeți astarde codolesche nasul’. (Ef. 6:16) Cu sea cadala ci arăsăl te avel-ame numai pachiamos. Trebul te avel-ame vi iubirea, anda codoia că i iubirea „ci holiarel-pe sigo”. Voi răbdil hai suportil orisavi buchi cai duchavel-ame. (1 Cor. 13:4-7, 13) Mai dur, va dichaia sar i iubirea anda o Iehova, anda amare phrala hai chiar anda amare dușmani ajutil-ame te nachas părdal i ura le manușenghi.

5. Sar zuriardea le Isusos i iubirea anda lesco Dad?

⁵ Angla ca lesche dușmani te mudaren-les, o Isus phendea pesche discipolenghe: „Me iubisarav le Dades [anda codoia] cherav cadea sar phendea manghe o Dad.” (Ioan 14:31) I iubirea anda o Iehova dea le Isusos o zuralimos te nachel părdal le zumaimata cai așenas angla leste. Amari iubirea anda o Iehova daștil te ajutil vi ame cana le manușa urân-ame.

6. Cadea sar phenel-pe ando Romani 5:3-5, sar simțosaren-pe le slujitori le Iehovasche cana le manușa urân-le?

⁶ I iubirea anda o Del ajutisardea sea o timpo le slujitoren le Iehovasche te nachen părdal le persecuții. Sar exemplo, cana o mai baro tribunalo le iudeiengo poruncisardea le apostolenghe te na mai predichin, lenghi iubirea anda o Del cărdea-le ‘te ascultin mai but le Devlestar sar stăpânitorii sar le manușendar’. (Fap. 5:29; 1 Ioan 5:3) Vi aghies, cadai iubirea zuriarel amare phralen cai sile persecutime catar le guvernea zurale hai nasul. Cana le manușa urân-ame ando than te avas perade ame sam bucurime.(Fap. 5:41; citisar Romani 5:3-5)

7. So trebul te cheras cana amare neamuri sile contra amenghe?

⁷ Iech anda le mai bare zumaimata si cana amari familia si contra amenghe. Cana amare neamuri dichen că camas te sichioas anda o Iehova von daștin te pachian că sam athade sau că sam dile. (Dich vi Marcu 3:21.) Von daștinas te prasan-ame sau chiar te maren-ame. Daisaras te ajucăras-ame te phiraven-pe cadea amența. O Isus phendea: „Le manușesche dușmani va avena chiar codola anda lesco chăr”. (Mat. 10:36) Ciaces, orisar avelas te dichen-ame amare neamuri, ame ci va avela te phiravas-ame lența sar niște dușmanența. Mai but, cana amari iubirea anda o Iehova bariol, vi amari iubirea andal manușa va bariola. (Mat. 22:37-39) Cu sea cadala, ci va avela te uștaras niciechdata le principii biblico numai caște avas mișto le manușența.

8, 9. So ajutisardea iecha pheia te așel loialo cana lachi dei sas zurales contra lache?

⁸ I Georgina, anda savi deam duma mai anglal, așilea loialo le Iehovasche, chiar cana lachi dei sas zurales contra. Voi  phenel: „Me hai mânri dei începosardeam ande iech than te studiisaras i Biblia le Martorența le Iehovasche. Tha, pala șov șiona cana camlem te jiav ca le întruniri, mânri dei parudea-pe but caring mande. Voi prinjiandea mai but apostați hai delas duma anda lenghe idei. Prasalas-ma, țârdelas-ma balendar, tasadea-ma hai șiudea mânre publicații biblico. Pala soste pherdem 15 bărș bolde-ma. Mânri dei încercosardea te așiavel-ma caște na mai slujisarav le Iehovasche hai bișaldea-ma ande iech centro cai sas aver tărnea. Cadala tărnea lenas droguri hai cherenas buchia nasul. Si zurales pharo cana contra tuche si codola cai trebunas te iubin-tu hai te aven-le grija tutar”.

⁹ Sar nachlea părdal i Georgina cado pharimos? Voi phenel: „Chiar ando ghies cana mânri dei începosardea te avel manghe contra terminisardem te citisarav sea i Biblia. Pachiaiem zurales că arachlem o ciacimos hai simțosardem-ma zurales pașă le Iehovastar. Rughisarde-ma butivar hai vo așundea mânre rugăciuni. Cana somas ande codo centro, iech phei achardea-ma late chăre hai studiisardeam ande iech than i Biblia. Ande sea codo timpo le phrala hai le pheia zuriarde-ma ca le întruniri hai primisarde-ma anda ilo ande lenghi familia. Anda mânri experiența daisarav te phenav că o Iehova silo mai zuralo sar oricon avel contra amenghe”.

10. So jianas că va cherela o Iehova anda amende?

¹⁰ O apostolo Pavel scriisardea că chanci ci daștil „te încărel-ame dur catar i iubirea le Devleschi cai si ando Cristos Isus, amaro Rai”. (Rom. 8:38, 39) Chiar cana sam duchade iech timpo, ame jianas că o Iehova va avela sea o timpo pașa amende, va lela ame ande angali hai va zuriarela-ame. Cadea sar sicavel i experiența cai sas la Georgina, o Iehova va ajutila-ame vi prin amari cuci familia spiritualo.

11. Sar avelas te ajutil le discipolen i iubirea anda savi dea duma o Isus ando Ioan 15:12, 13? Den iech exemplo.

¹¹ Andi riat ji cai te merel, o Isus andea amintea le discipolenghe că trebul te iubin-pe iech averes. (Citisar Ioan 15:12, 13.) Vo jianglea că i iubirea pherdi sacrificio va ajutila-le te așen iech pașa aver hai te nachen părdal i ura le manușenghi. Te dichas iech exemplo. Încă de  cana sas cărdi i congregația anda Tesalonic, le creștini sas-le persecutime. Cu sea cadala, le phrala hai le pheia anda cado foro sile iech șucar exemplo cai sicade loialitatea hai iubirea. (1 Tes. 1:3, 6, 7) O Pavel phendea lenghe te sicaven iech iubirea „vi mai bari”. (1 Tes. 4:9, 10) Lenghi iubirea avelas te cherel-le te anen mângâierea codolenghe perade hai te zuriarel codolen covle. (1 Tes. 5:14) Anda codoia că le creștini cărde cadea, ande lesco duito lil cai scriisardea-les, cam pala iech bărș, o Pavel daisardea te phenel lenghe: „Tumari iubirea iech caring aver si sea mai bari ande fiesavo anda tumende”. (2 Tes. 1:3-5) Lenghi iubirea ajutisardea-le te nachen părdal le zumaimata hai i persecuția.

12. Sar sicade penghi iubirea le phrala hai le pheia anda iech them cai sas războio?

¹² Te dichas pale o exemplo le Danylosco, anda savo deam duma mai anglal. Cana ando foro cai beșenas sas războio vo hai leschi rromni găle mai dur ca le întruniri, predichisarde chichi de but daisarde hai dine anda lengo hamos vi lenghe phralen. Tha, ande iech ghies ando chăr le Danylosco avile soldați cai sas-le arme. O Danylo phenel: „Mangle mandar te mechav mânro pachiamos. Anda codoia că ci camlem, începosarde te maren-ma, cărde-pe că țârden ande mande hai țârde iech glonțo opral mânro șăro. Angla soste tiliarde phende manghe că va avena parpale hai că va marena penghe joco mânra rromniatar. Tha, le phrala șiute ame sigo ande iech treno caring aver foro. Ci va avela te bâstrav niciechdata i iubirea cai sicade-la cadal cuci phrala! Cana arăzleam code, le phrala andine amenghe hamos, ajutisarde-ame te arachas iech chăr hai man ajutisarde-ma te arachav manghe buchi. Cadea daisardeam vi ame te primisaras avere Martoren cai nașenas anda o than cai sas războio.” Cadal experiențea sicaven că i iubirea anda amare phrala daștil te ajutil-ame te nachas părdal i ura.

13. Sar ajutil-ame o spirito sfânto te perseverisaras ando servicio le Iehovasco chiar cana le manușa urân-ame?

¹³ O Isus phendea pesche continuatorenghe te iubin penghe dușmanen. (Mat. 5:44, 45) Chiar cana na-i ușoro te respectisaras cadai porunca, o spirito sfânto le Devlesco ajutil-ame te cheras cadaia. Anda  o rodo le spiritosco sfânto cherel partea vi i iubirea hai vi i răbdarea, i bunăvoința, i blândețea hai i stăpânirea de sine. (Gal. 5:22, 23) Cadal calități ajutin-ame te nachas părdal i ura. But anda codola cai sas-le contra, parude pengo phiraimos anda codoia că lengo rrom, lenghi rromni, lengo șiavo sau iech vecino sicade cadal calități. But anda lende chiar cărdile amare cuci phrala hai pheia. Dacă si amenghe pharo te iubisaras codolen cai urân-ame te mangas le Iehovastar andi rugăciunea spirito sfânto. (Luca 11:13) Te na bâstras că o drom le Iehovasco si sea o timpo o mai lașio drom. (Prov. 3:5-7)

14, 15. Sar ajutisarde la Yasmeena le verseta anda Romani 12:17-21 te sicavel iubirea caring laco rrom chiar cana sas-lo zurales contra lache?

¹⁴ Te dichas o exemplo iecha pheiaco, Yasmeen cai beșel ando Oriento Mjlocio. Cana boldea-pe sar Martora le Iehovasche laco rrom pachiaia că sas-li athadi hai încercosardea te cherel-la te na mai slujil le Iehovasche. Dea duma lasa nasul hai țârdea vi le neamuren pe late. Mai but, andea late ieche conducătores religioso hai ieche drabarnes cai phende că va cherena lache vareso nasul hai cărdela doșali că rimol pesca familia. Ca iech întrunirea vo phendea buchia nasul le phralenghe. Sea ande cado timpo, i Yasmeen șiordea but asfa.

¹⁵ Ca i sala le Regatoschi, voi primisardea mângâierea hai zuralimos catar lachi familia spiritualo. Le phure phende lache te aplichil le cuvintea anda Romani 12:17-21. (Citisar.) I Yasmeen phenel: „Ci sas manghe ușoro, tha manglem le Iehovas te ajutil-ma hai dem sea mânri zor te cherav so phenel i Biblia. Cadea că, cana mânro rrom anda nasulimos șiudea tele melalimos andi bucătăria, me chosem-les. Cana delas duma manța nasul, me demas duma lesa șucar, hai cana sas-lo nasfalo, lem sama pe leste”.

16, 17. So sichioas anda i experiența la pheiachi, Yasmeen?

¹⁶ I Yasmeen sas-li binecuvântime anda i iubirea cai sicadea-la caring laco rrom. Voi phenel: „Mânre rromes începosardea te avel-les mai but pachiamos ande mande anda codoia că jianelas că phenav o ciacimos. Mai but, începosardea te ascultil-ma pherdo respecto cana demas duma leia anda subiectea biblico hai dea vi vo peschi zor te avel pacea ando chăr. Acana vo phenel manghe te jiav ca le întruniri. Aghies, ande amari familia si pacea hai  amari relația si but mai lași. Mânri speranța si că mânro rrom va acceptila o ciacimos hai că va avela te slujisaras ande iech than le Iehovasche”.

¹⁷ O exemplo la Yasmeenaco sicavel că i iubirea „răbdil sea . . . speril sea, suportil sea”. (1 Cor. 13:4, 7) I ura si iech sentimento zuralo cai duchavel, tha i iubirea si vi mai zurali hai daștil te covliarel ile. Mai but, cana sicavas iubirea bucurisaras o ilo le Iehovasco. Chiar cana codola cai sile contra amenghe urân-ame mai dur, daisaras te avas fericime.

18. Sostar daisaras te avas fericime cana le manușa urân-ame?

¹⁸ O Isus phendea: „Fericime san tume cana le manușa urân tume”. (Luca 6:22) Ame ci camas te avas urâme le manușendar tha nici te avas martiri. Atunci sostar daisaras te avas fericime cana sam urâme? Ita trin motivea. Iech: I perseverența anel amenghe i aprobarea le Devleschi. (1 Pet. 4:13, 14) Dui: Amaro pachiamos cărdiol mai cuci hai mai zuralo. (1 Pet. 1:7) Hai trin: Va avela te primisaras iech baro pochinimos: i viața veșnico. (Rom. 2:6, 7)

19. Sostar sas le apostoli fericime chiar cana sas-le marde?

¹⁹ Ca țâra timpo pala o jiuvindimos le Isusosco, le apostoli simțosarde i fericirea anda savi dea duma vo. Chiar cana sas-le marde hai sas lenghe phendo te na mai predichin, von sas-le bucurime. Sostar? Anda codoia că „sas-le dichle demno te aven cărde lajiavestar anda o anav” le Isusosco. (Fapte 5:40-42) I iubirea anda lengo Stăpâno sas mai zurali sar i dar anda lenghe dușmani. Von sicade cadai iubirea prin o fapto că phende i vestea lași sea o timpo. Aghies, but anda amare phrala slujin loialo le Iehovasche, chiar cana sile pharimata. Von jianen că o Iehova ci va bâstrela lenghi buchi hai i iubirea cai sicade-la anda lesco anav. (Evr. 6:10)

20. So va dichaia ando articolo cai avel?

²⁰ I lumea va urâla-ame chichi timpo va încărela cado sistemo. (Ioan 15:19) Tha ci trebul te daras. Cadea sar va dichaia ando articolo cai avel, o Iehova ‘va zuriarela hai va ferila’ codolen loiali lesche. (2 Tes. 3:3) Cadea că, te iubisaras mai dur le Iehovas, te iubisaras amare phralen hai te iubisaras chiar vi amare dușmanen. Dacă cheras cadea, va așaia unime hai zurale spiritualo, va avela te anas pachiv le Iehovasche hai va avela te sicavas că i iubirea sili mai zurali sar i ura.