1, 2. Con daștil te ajutil ieche manușes cai studiil i Biblia te arăsăl co bolimos?

„PLACEAIA-MA but so sichilem anda o studio biblico”, phenel i Amy cai beșel ando Fiji. „Jianglem că cado sas o ciacimos. Tha, numai cana avilem ande iech than le phralența hai le pheianța dem mânri seama că trebulas te cherav paruimata hai te progresiv ji co bolimos.” Anda so phendea i Amy sichioas iech baro ciacimos. Iech manuș cai studiil daștil te cherel mai but progresea caring o bolimos cana silo ajutime averendar anda i congregația.

² Fiesavo vestitorii daștil te ajutil i congregația te bariol. (Ef. 4:16) Ita so phenel i Leilani, iech pioniera anda Vanuatu: „Iech proverbo phenel că ando bariarimos ieche șiavesco lel partea sea o gav. Pachiav că cadaia si ciaces vi cana cheres discipoli, butivar sea i congregația ajutil varecas te avel co ciacimos”. I familia, le amala hai le profesori, sea ajutin ieche șiaves te bariol. Von cheren cadaia prin o fapto că zuriaren-les hai sicaven-les buchia importanto. Sa cadea, le vestitori daștin te den sfaturi, te zuriaren hai te sicaven iech lașio exemplo codolenghe cai studiin i Biblia hai cadea ajutil-len te arăsăn co bolimos. (Prov. 15:22)

3. So daisaras te sichioas anda so phendea i Ana, o Dorin hai i Leilani?

³ Sostar trebulas ca iech vestitorii cai siles iech studio biblico te primil o ajutorii avere phralengo anda i congregația? Dichen so phenel i Ana, iech pioniera specialo anda Moldova: „Si zurales pharo ca iech corcoro manuș te lel seama pe sea-l necesități codolesche cai studiil i Biblia hai începosarel  te cherel progresea”. O Dorin, iech pioniero specialo cai slujil sea ande codo them, phenel: „Butivar, aver vestitori phenen vareso cai arăsăl ando ilo codolesche cai studiil, vareso cai me ci gândisarde-ma niciechdata te phenav”. I Leilani mai phenel iech aver motivo: „I iubirea cai sili sicadi caring iech manuș cai studiil, daștil te ajutil-les te dichel că cado si o poporo le Iehovasco”. (Ioan 13:35)

4. So va dichaia ande cado articolo?

⁴ Daștil-pe că pușes-tu: „Sar daștiv vi me te ajutiv ieche manușes cai studiil i Biblia te progresil, chiar cana ci som me codova cai încărel o studio?”. Te dichas so daisaras te cheras cana sam acharde ca iech studio biblico hai so daisaras te cheras cana iech manuș cai studiil începosarel te avel ca le întruniri. Va mai avela te dichas, sar daștin le phure te ajutin codolen cai studiin te progresin ji co bolimos.

5. Savo si chio rolo cana san achardo ca iech studio biblico?

⁵ Ca iech studio biblico, codo cai încărel-les trebul mai anglal te ajutil le manușes te hachiarel o Cuvânto le Devlesco. Dacă iech phral acharel-tu leia, tu trebul te aves lesco partenero hai te ajutis-les. (Ecl. 4:9, 10) Tha, so daștis te cheres tu caște aves iech lașio ajutorii ca iech studio biblico?

6. Cana jias ca iech studio biblico, sar daștis te aplichis o principio andal Proverbe 20:18?

⁶ Pregătisar-tu anda o studio biblico. Mai anglal, mang le phrales te phenel tuche chichiva buchia anda o manuș casa studiil. (Citisar Proverbe 20:18.) Daștis te pușes-les: Ande soste pachial o manuș? Chichi bărșa siles sau cai barilea? So va studiina leia? So camel te sicavel-les ca codo studio? Si vareso so trebulas sau so ci trebulas te phenes co studio? So daștilas te ajutil codoles cai studiil te progresil? Si ciaces, o phral ci va phenela tuche nici iech informația confidențialo. Tha, so phenel tuche daștil te ajutil-tu but. Iech misionara, po anav Joy, del duma anda cadala buchia codolența cai jian laia ca iech studio biblico. Voi phenel: „Cadal discuții ajutin codolen cai aven manța te sicaven intereso caring codola cai studiin hai te jianen so te phenen co studio”.

7. Sostar trebul te pregătis-tu cana jias ca averengo studio biblico?

⁷ Dacă san achardo ca iech studio biblico, avelas mișto te pregătis o materialo anda savo va dena duma. (Ezra 7:10) O Dorin, o phral de mai anglal, phenel: „Som bucurime cana mânro partenero pregătil-pe anda o studio, cadea vi vo daștil te cherel mișto peschi partea”. Mai but, o  manuș cai studiil va dichela că le dui anda tumende san mișto pregătime hai cadaia si iech lașio exemplo anda leste. Chiar cana ci daștis te pregătis mișto o materialo, cher tuche timpo te încăres andi goghi măcar le idei importanto anda i lecția.

8. So trebul te cheres caște phenes rugăciuni concreto ca le studii biblico?

⁸ I rugăciunea si iech partea importanto anda iech studio biblico. Cadea că, gândisar-tu de mai anglal so va aveia te phenes ande late cana va trebula te rughis-tu. Cadea, chi rugăciunea va avela mai concreto. (Ps. 141:2) I Hanae, cai beșel andi Japonia, încă anel pesche amintea le rugăciuni phende catar iech phei cai avelas ca laco studio biblico. Voi phenel: „Dichlem ce zuralo amalimos sas-la le Iehovaia hai camlem vi me te avav sar voi. Mai but, simțosardem lachi iubirea cana phenelas mânro anav ande lache rugăciuni”.

9. Cadea sar phenel-pe ando Iacov 1:19, sar daștis te aves iech lașio partenero ca iech studio biblico?

⁹ Av iech ajutorii anda codova cai încărel o studio. „Iech lașio partenero ascultil atento o studio”, phenel iech pioniera specialo anda Nigeria. „Vo cherel șucar comentarii, tha ci del duma prea but, hai del peschi seama că na vo încărel o studio.” Sar daștis te jianes cana hai sar te des duma ca iech studio biblico? (Prov. 25:11) Ascultisar atento ando timpo so codova cai încărel hai o manuș cai studiil den duma. (Citisar Iacov 1:19.) Numai, pala codoia daștis te phenes vi tu vareso. Ciaces, trebul te folosisares chi goghi angla so te des duma. Sar exemplo, ci trebulas te des duma prea but, te așiaves codoles cai încărel o studio ando timpo so explichil vareso sau te paruves o subiecto. Tha, daștis te ajutis ca o subiecto te avel mai mișto hachiardo prin iech comentario harno, iech ilustrarea sau iech pușimos. Po iechdata, daștil-pe că ci daștis te phenes prea but anda iech anumime subiecto. Tha, so daștis te cheres si te așares le manușes cai studiil hai te sicaves lesche intereso personalo. Cadaia va ajutila-les but te cherel progresea.

10. Sostar si mișto te phenes codolesche cai studiil chichiva buchia prin save nachlean?

¹⁰ De duma anda chichiva buchia prin save nachlean. Dacă si mișto, daștis te phenes harnes codolesche cai studiil, sar prinjiandean o ciacimos, sar nachlean părdal iech pharimos sau sar dichlean o vast le Iehovasco ande chi viața. (Ps. 78:4, 7) Cadaia daștil te avel exacto so trebul te așunel codo cai studiil. Daștil te zuriarel lesco pachiamos sau te ajutil-les te progresil mai dur ji co bolimos. Mai daștil te sicavel lesche, sar te nachel părdal iech zumaimos. (1 Pet. 5:9) O Gabriel, cai beșel andi Brazilia, hai acana slujil sar pionierii, anel pesche  amintea ce miștimata sas-les cana începosardea te studiil i Biblia, vo phenel: „Cana așundem prin ce buchia nachle le phrala, sichilem că o Iehova dichel le pharimata cai si ame. Hai dacă von daisarde te nachen părdal lende, vi me daștiv”.

11, 12. Sostar trebul te primisaras anda ilo ieche manușes cai studiil hai avel ca le întruniri?

¹¹ Ca iech manuș cai studiil i Biblia te arăsăl ji co bolimos, vo trebul te avel sea o timpo ca le întruniri la congregațiache hai te țârdel miștimata anda lende. (Evr. 10:24, 25) Si ciaces, codo cai studiil leia acharel-les ca i întrunirea. Tha, cana va avela i iechto data, sea anda amende daisaras te zuriaras-les te avel mai dur ca i sala le Regatoschi. Ita so daisaras te cheras.

¹² Primisar anda ilo codoles cai studiil. (Rom. 15:7) Dacă cheras codoles cai studiil te simțosarel-pe mișto ca le întruniri vo va camela te mai avel ca i sala le Regatoschi. Bi te exageris, salutisar-les sar ieche amales hai cher lesche prinjianimos vi averența. Dacă o phral casa studiil ci avilea încă sau siles vareso te cherel, na mech-les corcoro, de duma leia. Av atento soste phenel vo hai sicav că interesis-tu lestar. Sar daștil te ajutil codoles cai studiil, o fapto că primisares-les anda ilo? Te dichas i experiența le phraleschi Dimitrii, cai boldea-pe de chichiva bărșa hai acana silo slujitorii auxiliaro. Vo anel pesche amintea anda leschi iechto întrunirea hai phenel: „Iech phral dichlea-ma că ajucărav pherdo emoții avri pașa i sala le Regatoschi hai achardea-ma andre. But jene avile mande te salutin-ma, ci ajucărdem-ma. Placeaia-ma cadichi de but, că camlem te aven întruniri ande fiesavo ghies. Simțosardem vareso cai ci simțosardem ande nici iech aver than!”.

13. Sar daștil chio phiraimos te ajutil codolen cai studiin?

¹³ Sicav iech lașio exemplo. Chio phiraimos, daștil te ajutil codoles cai studiil te avel siguro că arachlea o ciacimos. (Mat. 5:16) O Vitalii, cai slujil sar pioniero andi Moldova, phenel: „Dichlem sar trainas, gândinas hai phiravenas-pe codola andai congregația, cadaia cărdea-ma te pachiav că le Martori le Iehovasche phiren ciaces le Devleia”.

14. Sar daștil chio exemplo te ajutil varecas te cherel mai dur progresea?

¹⁴ Caște arăsăl co bolimos, codo cai studiil i Biblia, trebul te aplichil so sichiol, cadaia na-i sea o timpo ușoro. Tha, dacă codo cai studiil dichel ce miștimata anel tuche o fapto că aplichis le principii biblico, vi vo va camela te cherel sa cadea. (1 Cor. 11:1) I Hanae, anda savi deam duma  mai anglal, phenel: „Le phrala hai le pheia cherenas deja le buchia cai sichilem-le. Dichlem sar daisarav vi me te avav încurajatorii hai iertătorii hai sar te sicavav iubirea. Von denas duma de fiesavi data șucar iech anda aver. Hai camlem vi me te cherav sa cadea”.

15. Cadea sar phenel-pe andel Proverbe 27:17, sostar trebul te cărdioas amala codolența cai studiin hai aven cu regularitate ca le întruniri?

¹⁵ Cher-tu amal codoleia cai studiil. Ca le întruniri încercosar te pașios lestar hai te prinjianes-les mai mișto. (Filip. 2:4) Daștis te așares-les anda le paruimata cai cărdea-le hai te des duma leia, bi te șios lesche pușimata prea personalo, anda lesco studio biblico, anda leschi familia hai anda leschi buchi. Cana cărdios amal codoleia cai studiil ajutis-les te progresil ji co bolimos. (Citisar Proverbe 27:17.) I Hanae, cai acana slujil sar pioniera regularo, anel pesche amintea cana începosardea te jial ca le întruniri, voi phenel: „Cana cărdem manghe amala andi congregația, abia ajucărdem te jiav ca le întruniri hai gălem chiar cana somas chini. Placeaia-ma te avav ande iech than mânre neve amalența, hai cadaia ajutisardea-ma te șinav o amalimos codolența cai ci slujinas le Iehovasche. Camlem te pașioav vi mai but le Iehovastar hai le phralendar, anda codoia lem i decizia te bolav-ma”.

16. So mai daștis te cheres caște ajutis ieche manușes cai studiil i Biblia te simțosarel-pe că cherel partea anda i congregația?

¹⁶ Cana iech manuș cai studiil i Biblia cherel mai dur progresea hai paruimata, ajutisar-les te simțosarel că cherel partea anda i congregația. Daștis te cheres cadaia cana sicaves lesche ospitalitatea. (Evr. 13:2) O Denis, cai beșel andi Moldova, anel pesche amintea anda o timpo cana studiilas i Biblia hai phenel: „Butivar, me hai mânri rromni samas acharde te așias ande iech than le phralența. Von phende amenge sar dichle o vast le Iehovasco ande lenghi viața hai cadaia zuriardea-ame. Cadal ocazii ajutisarde-ame te camas te slujisaras le Iehovasche hai cadea te avel-ame iech viața șucar”. Cana codo cai studiil cărdiol iech vestitoro, daștis te achares-les vi andi predicarea. O Diego, iech vestitoro anda Brazilia, phenel: „But phrala acharde-ma lența andi predicarea, cado sas o mai lașio modo te prinjianav-le mai mișto. Sichilem but buchia lendar hai simțosardem-ma mai pașe le Iehovastar hai le Isusostar”.

17. Sar daștin le phure te ajutin codolen cai studiin?

¹⁷ Cheren tumenghe timpo anda codola cai studiin i Biblia. Phure, cana sicaven iubirea  hai intereso codolenghe cai studiin daștin te ajutin-le te progresin ji co bolimos. Den duma lența mai butivar ca le întruniri. Von va dichena vi mai but tumaro intereso dacă anen tumenghe amintea lenghe anava cana începosaren te den răspunsuri. Cheren tumenghe timpo te jian ca lengo studio biblico, chiar cana si tumen but buchia te cheren. Tumaro ajutorii si zurales cuci anda codola cai studiin i Biblia! Iech pioniera po anav Jackie, cai beșel andi Nigeria, phenel: „Bute jenenghe cai studiinas, ci avilea lenghe te pachian că o phral cai avilea manța ca lengo studio sas iech phuro de congregație. Iech anda lende phendea: «Mânro pastoro ci cherelas cadai buchi niciechdata. Vo jial numai codolende cai sile barvale hai numai dacă pochinen-les»”. Cado manuș avel acana ca le întruniri.

18. Cadea sar phenel-pe andel Fapte 20:28, sar daștin le phure te cheren penghi responsabilitatea cai sas lenghe dini?

¹⁸ Sicaven hai zuriaren codolen cai silen studii biblice. Phure, tumen si tume iech bari responsabilitatea, te ajutin le phralen te aven mai lașe andi predicarea hai vi ca lenghe studii biblice. (Citisar Fapte 20:28.) Dacă o vestitoro silo prea lajiavuno te încărel o studio biblico cana san cothe, încăr-les tu. I Jackie, anda savi deam duma mai anglal, phenel: „Le phure pușen-ma butivar anda mânre studii biblice. Dacă sima pharimata cana încărav iech studio biblico, von ajutin-ma hai den-ma lașe sfaturi”. Le phure daștin te zuriaren but le phralen cai si len studii biblice caște perseverin. (1 Tes. 5:11) I Jackie mai phenel: „Placial-ma cana le phure phenen manghe chichi de cuci si mânri phari buchi. Lenghe șucar cuvintea zuriaren-ma sar iech paharo șudre paieia ande iech thabardo ghies. Lenghe laude ajutin-ma te simțosarav că cherav iech lași buchi ca mânre studii biblice hai bariarel mânri bucuria”. (Prov. 25:25)

19. Ce bucuria daștil te avel fiesaves anda amende?

¹⁹ Chiar cana na-i ame iech studio biblico, daisaras te ajutisaras varecas te bariol spiritualo. Bi te das duma prea but, daisaras prin amare comentarii mișto pregătime te ajutisaras codoles cai încărel o studio. Daisaras te cărdioas amala codolența cai studiin hai aven ca i sala le Regatoschi hai te sicavas lenghe iech șucar exemplo. Le phure daștin te zuriaren vi codolen cai studiin, cana cheren penghe timpo anda lende, hai vi codolen cai încăren o studio, cana sicaven-le hai așaren-le. Sam zurales bucurime cana jianas că daisaras te cheras vi ame vareso caște ajutisaras ieche manușes te iubil hai te slujil amare Dadesche, Iehova!