1. Prin ce zumaimata daștinas te nachen le slujitori le Iehovasche?

NACHES acana prin iech baro zumaimos? Daștil-pe că varecon anda i congregația holiardea-tu. (Iac. 3:2) Sau che colegi catar i buchi sau catar i școala asan tutar că slujis le Iehovasche. (1 Pet. 4:3, 4) Sau unii jene anda chi familia camen te așaven-tu te na mai jias ca le întruniri sau te na mai des duma averența anda chio pachiamos. (Mat. 10:35, 36) Dacă naches prin iech zumaimos zurales pharo daștil-pe te pachias că avelas mai mișto te na mai slujis le Iehovasche. Tha, daștis te aves siguro că, prin orisave zumaimata naches, o Iehova va dela-tu vi i goghi vi o zuralimos caște naches părdal lende.

2. Cadea sar phenel-pe ando Romani 15:4, sar va ajutila-ame i citirea anda o Cuvânto le Devlesco?

² Ande lesco Cuvânto, o Iehova mechlea amenghe o exemplo lesche slujitorenghe imperfecți cai nachle prin phare zumaimata. Vo cărdea cadaia caște daisaras te sichioas lendar, cadea sar scriisardea vi o apostolo Pavel tela inspirația ando Romani 15:4. (Citisar.) Cadal relatări den-ame zuralimos hai speranța. Tha na-i destul numai te citisaras-le. Trebul te mechas ca i Biblia te cherel buchi ande amari goghi hai ande amaro ilo. Sar daisaras te arachas le sfaturi cai trebun-ame cana nachas prin pharimata? Cana cheras le ștar buchia cai aven: 1) Rughisar-tu, 2) Imaginisar tuche, 3) Meditosar hai 4) Aplichisar. Mai dur va avela te dichas cadal ștar buchia. * Pala codoia va avela te folosisaras-le caște sichioas anda so întâmplosardea-pe  andi viața le regeschi David hai le apostoloschi Pavel.

3. So trebul te cheres angla so te citisares anda i Biblia, hai sostar?

³ 1) Rughisar-tu. Angla so te citisares anda i Biblia, mang le Iehovas te ajutil-tu te hachiares sar daștis te țârdes miștimata anda so citisares. Sar exemplo, dacă ci jianes so te cheres cana san ande iech pharimos, mang o ajutorii le Iehovasco caște araches principii ande lesco Cuvânto cai daștin te ajutin-tu. (Filip. 4:6, 7; Iac. 1:5)

4. Sar daisaras te cheras ca iech relatarea biblico te astarel viața?

⁴ 2) Imaginisar tuche. O Iehova dea-ame iech șucar capacitatea, i imaginația. Ca iech relatarea biblico te astarel viața, încercosar te diches so întâmplol-pe hai te șios-tu ando than le manușesco anda savo citisares. Dich prin lesche sau lache iacha hai încercosar te simțosares so simțosarde von.

5. So si i meditarea hai sar daștis te meditosares?

⁵ 3) Meditosar. Te meditosares însemnol te gândisares-tu mișto soste citisares hai sar aplichil-pe tuche. I meditarea ajutil-tu te cheres o phanglimos mașcar le idei hai ajutil-tu te hachiares mai mișto iech subiecto. Cana citisares i Biblia bi te meditosares, si sar cana diches le piese catar iech puzzelo pe meseli bi te șios-le iech pașa aver. I meditarea si sar cana les cadal piese hai șios-le ca lengo than hai diches sea i imaginea. Caște meditosares daștis te pușes-tu: „So cărdea o manuș anda savo citisarav caște nachel părdal lesco pharimos? Sar ajutisardea-les o Iehova? Sar daștiv te folosisarav so sichilem cana nachav prin zumaimata?”.

6. Sostar trebul te aplichisaras so sichioas?

⁶ 4) Aplichisar. O Isus phendea că, dacă ci aplichisaras so sichioas, sam sar iech manuș cai vazdel pesco chăr pe chișai. Vo cherel buchi phares, tha de ivea. Sostar? Anda codoia că lesco chăr va perela cana va avela o baro brișind. (Mat. 7:24- 27) Sa cadea, dacă rughisaras-ame, imaginisaras amenghe hai meditosaras, tha ci aplichisaras so sichileam, sea amare eforturi sile de ivea. Cana nachas prin zumaimata sau persecuții, amaro pachiamos ci va avela zuralo. Tha, dacă studiisaras hai aplichisaras so sichileam, las mai lașe decizii, si amen mai but pacea hai zuriaras amaro pachiamos. (Is. 48:17, 18) Cadale ștar buchianța andi goghi, te dichas mai dur iech situația anda i viața le regeschi David.

7. Anda ce relatarea biblico das duma mai dur?

⁷ Daștil-pe că iech amal sau iech jeno anda chi familia cărdea-tu te hasares chio pachiamos ande leste. Ande cadai situația, va ajutila-tu but te diches i relatarea anda o Absalom, o șiavo le regesco David, cai athadea pesche dades hai încercosardea te ciorel lestar o regato. (2 Sam. 15:5-14, 31; 18:6- 14)

8. So daștis te cheres caște avel-tu o ajutorii le Iehovasco?

⁸ 1) Rughisar-tu. Ando timpo so gândisares-tu ca i relatarea, phen le Iehovasche sar simțosares-tu anda codoia că aver phirade-pe tusa nasul. (Ps. 6:6-9) Phen sea so simțosares. Pala codoia, mang le Iehovas te ajutil-tu te diches le principii cai sicaven tuche so te cheres caște naches părdal cado pharimos.

9. So întâmplosardea-pe mașcar o David hai o Absalom?

⁹ 2) Imaginisar tuche. Gândisar-tu so întâmplosardea-pe ande cadai relatarea hai imaginisar tuche sar simțosardea-pe o  rege David. De chichiva bărșa, o Absalom încercosarel te țârdel de peschi partea le poporos. (2 Sam. 15:7) Cana pachiaia că si o mai lașio momento, o Absalom bișealel mesageri anda sea o Israelo caște cherel le poporos te acceptil-les sar rege. Vo țârdel de peschi partea vi le Ahitofelos, o mai lașio amal hai sfătuitoro le Davidosco. O Absalom cherel-pe corcoro rege hai pala codoia camel te astarel hai te mudarel le Davidos, cai daștil-pe că silo zurales nasfalo. (Ps. 41:1-9) O David așunel anda so cărdea o Absalom, lesco șiavo hai nașel anda o Ierusalimo. Ji la urmă, o Absalom hai leschi armata aven contra i armata le Davidoschi, tha o Absalom hasarel i lupta hai silo mudardo.

10. So daisardeas te cherel o rege David?

¹⁰ Imaginisar tuche sar simțosardea-pe o David ande sea cado timpo. Vo iubisardea le Absalomos hai sas-les pachiamos ando Ahitofel. Tha, le dui athade-les. Von duchade-les zurales hai chiar camle te mudaren-les. O David daisardeas te hasarel pesco pachiamos vi ande lesche coaver amala, hai te pachial că vi von așile pașa o Absalom. Sa cadea, daisardeas te gândisarel-pe numai peste hai te nașel corcoro anda o them. Sau daisardeas te avel zurales perado. Tha, o David ci cărdea cadaia, mai but vo așilea zuralo angla cado baro zumaimos. So ajutisardea-les?

11. So cărdea o David andi situația phari ande savi sas-lo?

¹¹ 3) Meditosar. Ce principii daștis te sichios anda cadai relatarea? Încercosar te des o răspunso ca o pușimos: „So cărdea o David caște nachel părdal lesco pharimos?”. O David ci mechlea te mudarel-les i dar hai ci lea decizii bi te gândil-pe. Vo ci darailea cadea de but te na jianel so te cherel, tha manglea o ajutorii le Iehovasco andi rugăciunea. Sa cadea, vo manglea ajutorii vi catar lesche amala. Mai but, vo aplichisardea sigo le decizii cai lea-le. Chiar cana, sas-lo zurales duchado, o David ci hasardea pesco pachiamos ande aver hai ci încărdea holi ande pesco ilo. Les sas-les mai dur pachiamos ando Iehova hai ande lesche amala.

12. Sar ajutisardea o Iehova le Davidos?

¹² Sar ajutisardea o Iehova le Davidos? Dacă rodes mai mișto andi Biblia, va avela te diches că o Iehova dea le Davidos o zuralimos te nachel părdal cado zumaimos. (Ps. 3:1-8 vi o anteto) O Iehova binecuvântisardea le decizii cai lea-le o David. Mai but, vo ajutisardea lesche amalen loiali cana marde-pe caște len seama pe pengo rege.

13. Sar daisaras te imitisaras le Davidos cana varecon duchavel-ame but? (Matei 18:15-17)

¹³ 4) Aplichisar. Șiu tuche o pușimos: „Sar daștiv te imitisarav le Davidos?”. Cher sigo vareso caște rezolvis i problema. Pala chi situația, daștis te cheres le pași cai phendea-le o Isus ando Matei capitolo 18, sau te aplichisares le principii anda cadal versetea. (Citisar Matei 18:15- 17.) Na le tut pala che sentimentea hai na le decizii cana san holiarico. Mang le Iehovas te del-tu iech ilo liniștime hai înțelepciunea te jianes so te cheres. Na hasar chio pachiamos ande che amala, tha mech te ajutin-tu. (Prov. 17:17) Încăr andi goghi că i mai importanto buchi si te cheres so phenel tuche o Iehova ande lesco Cuvânto. (Prov. 3:5, 6)

14. Ande ce situații daștin te ajutin-tu le versetea anda 2 Timotei 1:12-16 hai 4:6-11, 17-22?

¹⁴ Chi familia așel tuche contra anda codoia că slujis le Iehovasche? Beșes ande  iech them cai le autorități așade iech partea sau sea i lucrarea le Martorenghi le Iehovasche? Dacă da, daștin te zuriaren-tu le versetea anda 2 Timotei 1:12-16 hai 4:6-11, 17-22. * O Pavel scriisardea cadal versetea cana sas-lo ando phandaimos.

15. So daștis te phenes andi rugăciunea?

¹⁵ 1) Rughisar-tu. Angla so te citisares cadal versetea, de duma le Iehovaia anda chio pharimos hai anda so si ande chio ilo, phen lesche sea so simțosares. Cana studiisares le relatări anda le zumaimata le Pavelosche, mang le Iehovas te ajutil-tu te hachiares le principii cai sicaven tuche so te cheres ande chi situația.

16. So întâmplosardea-pe le Paveloia?

¹⁶ 2) Imaginisar tuche. Șiu-tu ando than le Pavelosco. Vo silo andel lanțuri ande iech phandaimos anda Roma. Chiar cana mai sas-lo phandado, acana vo jianel că va avela mudardo. Simțosarel-pe bi zoraco hai chichiva anda le phrala casa predichisardea mechle-les. (2 Tim. 1:15)

17. So daisardeas te cherel o Pavel?

¹⁷ O Pavel daisardeas te gândil-pe că dacă lineas aver decizii ando trecuto, leschi situația avelas aver. Vo daisardeas te încărel holi ande pesco ilo caring le murșa anda i provincia Asia cai mechle-les hai daisardeas te hasarel pesco pachiamos ande lesche coaver amala. Tha, o Pavel ci cărdea cadaia. So ajutisardea-les te zuriarel mai dur pesco pachiamos hai speranța?

18. So cărdea o Pavel andi situația phari ande savi sas-lo?

¹⁸ 3) Meditosar. Încercosar te des răspunso ca o pușimos: „So cărdea o Pavel ande peschi situația?”. Chiar cana jianglea că na pa but timpo va merela, o Pavel ci bâstărdea i mai importanto buchi: i glorificarea le Iehovaschi. Vo rodea mai dur sar te zuriarel averen. Șiutea pesco pachiamos ando Iehova hai rughisardea-pe butivar. (2 Tim. 1:3) O Pavel ci gândisardea-pe prea but codolende cai mechle-les. Tha, anda leste sas zurales cuci o ajutorii hai i iubirea cai sicade-la lesche amala loiali. Mai but, vo studiisardea mai dur o Cuvânto le Devlesco. (2 Tim. 3:16, 17; 4:13) Hai, o mai importanto sas că vo jianglea că o Iehova hai o Isus iubinas-les. Von ci mechle-les, hai avelas te pochinen-les anda lesco servico fidelo.

19. Sar ajutisardea o Iehova le Pavelos?

¹⁹ O Iehova phendea le Pavelosche că sar creștino avelas te nachel prin persecuții. (Fap. 21:11-13) Tha sar ajutisardea vo le Pavelos? O Iehova răspunzosardea ca lesche rugăciuni hai sea o timpo dea-les zuralimos. (2 Tim. 4:17) Sa cadea, o Iehova phendea lesche că va primila o pochinimos anda i phari buchi cai cărdea-la anda leste. Mai but, vo cărdea le amalen loialo le Pavelosche te den-les ajutorii practico.

20. a) Cadea sar phenel-pe ando Romani 8:38, 39, sostar daisardea o Pavel te nachel părdal le zumaimata? b) Sar daisaras te imitisaras le Pavelos?

²⁰ 4) Aplichisar. Șiu tuche o pușimos: „Sar daștiv te imitisarav le Pavelos?”. Cadea sar o Pavel, vi ame daisaras te ajucăras-ame te avas persecutime anda amaro pachiamos. (Mar. 10:29, 30) Caște așias fideli andel zumaimata, trebul te mangas o ajutorii le Iehovasco andi rugăciunea hai te cheras amenghe o obiceio te studiisaras anda lesco Cuvânto. Te na bâstras că i mai importanto buchi cai daisaras te cheras-la si te anas gloria le Iehovasche. Daisaras te avas siguri că o Iehova ci va mechela-ame niciechdata hai că chonic ci daștil te cherel- les te na mai iubil-ame. (Citisar Romani 8:38, 39; Evr. 13:5, 6)

21. So ajutisardea la Aya hai le Hectoros te nachen părdal le pharimata cai sas-le?

²¹ Le relatări biblico daștin te ajutin-ame cana nachas prin orisavo zumaimos. Sar exemplo, i Aya, iech pioniera anda Japonia, phenel că i relatarea anda Iona, ajutisardea-la te nachel părdal lachi dar te jial ca i mărturia publico. O Hector, iech tărno anda Indonezia, casche dada nai-le Martori, phenel că o exemplo cai sicadea-les i Rut ajutisardea-les te camel te sichiol mai but anda o Iehova hai te slujil lesche.

22. Sar daștin te ajutin-ame le drame biblico hai le articolea „Imitin lengo pachiamos”?

²² Cai daștis te araches exemplea biblico cai zuriaren-tu? Le materialea video, le drame audio hai le articolea „Imitin lengo pachiamos” cheren ca le relatări biblico te astaren viața. * Angla so te diches, te așunes sau te citisares cadal materialea mișto pregătime, rughisar-tu le Iehovasche te araches sicaimata cai daștis te aplichis-le. Imaginisar tuche că san ando than le manușesco anda savo citisares. Meditosar soste cărde cadal slujitori loiali le Iehovasche hai sar ajutisardea-le vo te nachen părdal le zumaimata. Pala codoia aplichisar tute so sichilean. Mulțumisar le Iehovasche anda o ajutorii cai del-les tuche deja. Sicav aprecierea hai rode ocazii caște zuriares hai te ajutis averen.

23. Cadea sar phenel-pe ande Isaia 41:10, 13, so promitisarel o Iehova că va cherela anda amende?

²³ I viața ande cadai lumea conducime le Satanostar daștil te avel zurales phari, hai po iechdata ci jianas so te cheras. (2 Tim. 3:1) Tha, ci trebul te avas perade sau te daras, anda codoia că o Iehova jianel prin so nachas. (Citisar Isaia 41:10, 13.) Cana peras, vo promitil amenghe că astarel-ame pesche zurale ciace vasteia. Prin orisavo zumaimos nachas, daisaras te avas siguri că o Iehova va ajutila-ame hai că va avela te primisaras zuralimos andal Scripturi.