Sostar phendea o Isus le cuvintea le Davidosche anda Psalmo 22:1 chiar angla so te merel?

Mașcar le cuvintea cai phendea-le o Isus angla so te merel si vi codola scriime ando Matei 27:46: „Mânro Del, Mânro Del, sostar mechlean-ma?”. Cadea o Isus pherdea le cuvintea le Davidosche anda Psalmo 22:1. (Mar. 15:34) Avelas greșime te țârdas i concluzia că o Isus phendea cadala cuvintea anda codoia că sas-lo perado sau că lesco pachiamos ci mai sas cadea de zuralo. O Isus hachiardea mișto sostar trebuisardea te merel hai sas-lo gata te del peschi viața sar răscumpărarea. (Mat. 16:21; 20:28) Sa cadea, jianglea că atunci cana avelas te merel, o Iehova trebulas te lel de iech partea „orisavo bar cai feril les” de pașa leste. (Iov 1:10) Cadea, o Iehova dea-les i ocazia te sicavel ciaces peschi loialitatea, indiferento chichi de pharo avelas te avel lesco merimos. (Mar. 14:35, 36)

Atunci sostar phendea o Isus cadal cuvintea? Chiar cana ci jianas siguro o răspunso, te dichas save daștin te aven chichiva motivea. *

Camlea o Isus te phenel că, atunci cana va merela, o Iehova ci va avela te ajutil-les? O Isus trebuisardea te pochinel i răscumpărarea bi te ajutil-les o Iehova. Sar manuș, vo trebuisardea te merel caște „zumavel o merimos anda fiesavo manuș”. (Evr. 2:9)

 Cana phendea chichiva cuvintea anda o Psalmo 22:1, camlea o Isus te țârdel i atenția caring sea o psalmo? Ande codol timpuri, le evrei sas-le sicade te încăren ande penghi goghi but psalmi. Cana anelas-pe lenghe amintea iech verseto anda iech psalmo, von gândinas-pe ca sea o psalmo. Dacă o Isus camlea te cherel cadai buchi, atunci vo ajutisardea pesche continuatoren evrei te anen penghe amintea but profeții anda o Psalmo 22, cai denas duma anda unele evenimentea ande soste priveal lesco merimos. (Ps. 22:7, 8, 15, 16, 18, 24) Mai but, von daștinas te anen penghe amintea vi că, co sfârșito le psalmosco, si prezentime i victoria le Iehovaschi sar Rege pe sea i phuv. (Ps. 22:27-31)

Camlea o Isus te sicavel că silo bidoșalo? Angla so te merel, o Isus trebuisardea te nachel prin iech proceso ilegalo hai sas-lo arachlo doșalo de blasfemia. (Mat. 26:65, 66) O Sanhedrino chidinea-pe ande iech than sigo, andi riat târzio, hai o proceso ci sas legalo. (Mat. 26:59; Mar. 14:56-59) Cana phendea le cuvintea le Davidosche, sar iech pușimos retorico, daștil-pe că, o Isus sicadea că silo bidoșalo hai că ci meritilas te avel mudardo.

Camlea o Isus te phenel că, cadea sar o David, o scriitorii cadale psalmosco, ci hasardea i aprobarea le Iehovaschi? Chiar cana o Iehova mechlea ca o David te suferil, cadaia ci sicadea că hasardea Leschi aprobarea. O pușimos le Davidosco ci sicadea că nas-les pachiamos. Pala soste șiutea cado pușimos, o David sicadea pesco pachiamos ando zuralimos salvatorii le Devlesco, hai o Iehova binecuvântisardea-les mai dur. (Ps. 22:23, 24, 27) Sa cadea, chiar cana o Isus, „o Șiav le Davidosco”, suferilas po stâlpo de tortură, cadaia ci sicadea că hasardea i aprobarea le Iehovaschi. (Mat. 21:9)

Sas o Isus zurales duchado anda codoia că o Iehova trebuisardea te țârdel lestar peschi protecția ca vo te sicavel cu sea peschi integritatea? O scopo de mai anglal le Iehovasco ci sas ca lesco Șiavo te suferil hai te merel. Cadai buchi trebuisardea te întâmplol-pe numai pala i răzvrătirea anda Eden. O Isus ci cărdea chanci nasul, tha trebuisardea te suferil hai te merel caște del răspunso ca le pușimata vazdine le Satanostar hai te del o prețo de răscumpărarea caște lel parpale sea so hasardea o iechto manuș. (Mar. 8:31; 1 Pet. 2:21-24) Cadai buchi daisardeas te avel cărdi numai dacă o Iehova ci ferilas iech timpo le Isusos, anda i iechto data andi viața lesche Șiaveschi.

Camlea o Isus te ajutil pesche continuatoren te hachiaren sostar mechlea o Iehova ca vo te merel ande codo modo? * O Isus jianglea că lesco merimos sar iech manuș nasul șiuto po stâlpo avelas te peravel bute jenen. (1 Cor. 1:23) Lesche continuatori daisarde te hachiaren ciaces so însemnolas lesco merimos numai dacă meditonas ca o ciacio motivo sostar mulea vo. (Gal. 3:13, 14) Cadea, von daisarde te dichen ande leste iech salvatorii, na iech manuș nasul.

Indiferento savo sas o motivo sostar o Isus phendea cadal cuvintea, vo hachiardea că, prin lesco merimos po stâlpo de tortură, cărdea i voința le Iehovaschi. Ca țâra timpo pala soste phendea le cuvintea anda cado psalmo, o Isus phendea: „Pherdilea-pe!”. (Ioan 19:30; Luca 22:37) Anda codoia că o Iehova țârdea lestar peschi ocrotirea iech țâra timpo, o Isus daisardea te cherel i buchi anda savi sas-lo bișialdo pi phuv. Mai but, vo daisardea te pherel sea le buchia scriime anda leste „andi legea le Moiseschi, andel Profeți hai andel Psalmi”. (Luca 24:44)