1. Sar dichel o Iehova pesche slujitoren?

O IEHOVA DEL „arachel peschi plăcerea ande pesco poporo”. (Ps. 149:4) Cado ciacimos cherel-ame zurales fericime. O Iehova dichel amare calități, jianel ce felo manușa daisaras te avas hai țârdel-ame leste. Dacă sam lesche loiali, vo va așela pașa amende anda sea o timpo. (Ioan 6:44)

2. Sostar pachian unii că o Iehova ci iubil-le?

² Unii daștinas te phenen: „Jianav că o Iehova iubil pesche poporos sar întrego. Tha oare iubil vi man?”. I Oksana *, cai suferisardea but cana sas-li țâni, phenel: „Somas zurales bucurime cana boldem-ma hai începosardem o pionierato. Tha, pala 15 bărș, începosardem te anav manghe amintea le buchia nasul prin save nachlem cana somas țâni. Arăslem te pachiav că ci mai sas-ma i aprobarea le Iehovaschi hai că ci meritisardem leschi iubirea”. I Yua, iech pioniera cai nachlea vi voi prin pharimata cana sas-li țâni, phenel: „Dedichisardem mânri viața le Iehovasche anda codoia că camlem te bucurisarav lesco ilo. Tha pachiaiem că ci va daștila te iubil-ma niciechdata”.

3. So va dichaia ande cado articolo?

³ Cadea sar le pheia loialo anda save deam duma mai anglal, vi tu iubis le Iehovas anda ilo, tha daștil-pe că si tuche pharo te pachias că vi vo iubil-tu. Sostar trebul te pachias că o Iehova iubil-tu ciaces? Hai so daștil te ajutil-tu cana gândisares-tu că o Iehova ci iubil-tu? Mai dur, va avela te arachas o răspunso cadale pușimatande.

4. Sostar si periculoso te na pachias-ame andi iubirea cai si le Iehovas anda amende?

⁴ I iubirea cherel-ame te cheras buchia lașe. Dacă pachias că o Iehova iubil-ame hai că silo pașa amende, va avela te camas te slujisaras lesche anda ilo, chiar cana si ame pharimata. Tha, dacă ci pachias că o Iehova lel seama pe amende, amaro zuralimos va avela mai țâno. (Prov. 24:10) Hai atunci cana sam perade hai ci pachias-ame andi iubirea le Iehovaschi, sam mai covle angla la atacuri le Satanosche. (Ef. 6:16)

5. So întâmplosardea-pe unii phralența anda codoia că pachiaie că o Iehova ci iubil-le?

⁵ Unii creștini fideli de aghies începosarde te pachian că o Iehova ci iubil-le hai cadea lengo pachiamos ci mai sas cadea de zuralo. O James, iech phuro de congregație, phenel: „Chiar cana slujisardem co Betelo hai predichisardem, pherdo zelo ande iech teritorio de șib străino, pușlem-ma dacă o Iehova silo ciaces mulțumime le buchiandar cai cărdem-le. Arăslem chiar te pachiav că o Iehova ci ascultil mânre rugăciuni”. I Eva, cai slujil ando servicio cu timp integral, phenel: „Dichlem pe mânri morci chichi de periculoso si te arăsăs te pachias că o Iehova ci iubil-tu. Cado modo gândimasco afectil sea-l buchia anda chio servicio creștino, cherel chio zelo mai țâno andal buchia spiritualo hai ciorel tutar i bucuria te slujis le Iehovasche”. O Michael, iech pioniero regularo hai phuro de congregație, phenel: „Dacă ci pachias că o Iehova iubil-tu, va avela te duriares-tu lestar sea mai but”.

6. So daisaras te cheras cana ande amari goghi șiol-pe o gândo că o Iehova ci iubil-ame?

⁶ Le experiențea anda save deam duma mai anglal sicaven chichi de periculoso daștil te avel i gândirea nasul anda amaro pachiamos. Tha so daisaras te cheras cana o gândo că o Iehova ci iubil-ame șiol-pe ande amari goghi? Trebul te încalavas-les sigo avri. Te rughisaras le Iehovas te duriarel amendar „le gânduri nasul” hai te del-ame ‘leschi pacea, cai va ferila amaro ilo hai goghi’. (Ps. 139:23; Filip. 4:6, 7) Mai but, te na bâstras că vi avere phralen hai pheian sile cadal sentimentea negativo. Chiar vi unii slujitori le Iehovasche anda puraimata nachle prin cadal buchia. Iech anda lende sas o apostolo Pavel.

7. Prin ce pharimata nachlea o Pavel?

⁷ Simțosares po iechdata că le but responsabilități cai situ sile prea phare anda tute? Dacă da, daștil-pe că hachiares zurales mișto le Pavelos. Vo sas-lo îngrijorime na numai anda iech congregația, tha anda „sea-l congregații”. (2 Cor. 11:23-28) Situ iech nasfalimos cronico cai ciorel chi bucuria? Vi le Pavelos sas-les „iech canro ando mas”, daștil-pe iech nasfalimos cai încărdea but timpo, hai savestar camlea but te scăpil. (2 Cor. 12:7-10) San perado anda che imperfecțiuni? Vi o Pavel sas-lo po iechdata. Anda codoia că trebuisardea te luptil sea o timpo te cherel so si mișto, vo phendea anda peste că silo iech manuș ‘bibahtalo’. (Rom. 7:21-24)

8. So ajutisardea le Pavelos te perseveril chiar cana nachlea prin pharimata?

⁸ Chiar cana nachlea prin mai but zumaimata hai situații phare, o Pavel slujisardea mai dur le Iehovasche. So ajutisardea-les te perseveril? Chiar cana jianglea mișto save si lesche imperfecțiuni, les sas-les iech baro pachiamos andi răscumpărarea. Vo prinjiandea i promisiunea le Isusoschi cai phenel că ‘oricon sicavel pachiamos ande leste va avela-les viața veșnico’. (Ioan 3:16; Rom. 6:23) O Pavel sas-lo, ciaces, iech anda codola cai sicade pachiamos andi răscumpărarea. Vo pachialas că o Iehova iertil anda sea o ilo chiar vi codolen cai cheren bare păcatea, tha căin-pe. (Ps. 86:5)

9. So sichioas andal cuvintea le Pavelosche scriime ando Galateni 2:20?

⁹ Sa cadea, o Pavel pachiaia zurales andi iubirea le Devleschi cai sicadea-la prin i răscumpărarea. (Citisar Galateni 2:20.) Te dichas le cuvintea încurajatorii catar o sfârșito cadale versetosco: „O Șiav le Devlesco . . . iubisardea-ma hai dea-pe pes anda mande”. O Pavel ci pachiaia că silo cadichi de nasul ca o Del te na iubil-les, vo ci gândisardea-pe cadea: „Hachiarav sostar o Iehova iubil mânre phralen, tha man ci daștil te iubil-ma”. O Pavel andea amintea le creștinenghe anda i Roma: „Cana samas încă păcătoși, o Cristos mulea anda amende”. (Rom. 5:8) I iubirea le Devleschi si cadichi de bari că nai-la limite!

10. So sichioas anda Romani 8:38, 39?

¹⁰ Citisar Romani 8:38, 39. O Pavel jianglea chichi de zurali si i iubirea le Devleschi.  Vo phendea că chanci ‘ci va daștila te încărel-ame dur’ latar. O Pavel jianglea chichi de but răbdarea sicadea o Iehova caring i națiunea Israel. Hai jianglea că o Iehova sicadea vi lesche îndurarea. Cadea că o Pavel gândilas-pe cadea: „Anda codoia că o Iehova bișaldea pesche Șiaves caște merel anda mande, nai-ma nici iech motivo te na pachiav că ci sima Leschi iubirea”. (Rom. 8:32)

11. Sostar daisardea te avel siguro o Pavel că o Del iubilas-les chiar cana cărdea but păcatea cadea sar sicavel-pe ando 1 Timotei 1:12-15?

¹¹ Citisar 1 Timotei 1:12-15. Daștil-pe că, po iechdata, o Pavel simțosardea-pe zurales nasul cana gândilas-pe ca le buchia cai cărdea-le angla so te avel creștino. Vo phendea anda peste că sas-lo „o mai păcătoso” hai ci miril-ame cadai buchi. Angla so te prinjianel o ciacimos anda o Cristos, vo persecutisardea sea o timpo le creștinen anda mai but forurea, șiudea-le ando phandaimos hai phendea te aven mudarde. (Fap. 26:10, 11) Te imaginisaras amenghe sar avileas te simțosarel-pe o Pavel te dichel ieche tărnes creștino savesche dada sas-le mudarde anda leschi cauza! Chiar cana falas-les pharo andal buchia nasul cai cărdea-le, o Pavel jianglea că ci daștil te paruvel so sas mai anglal. Anda codoia că jianglea siguro că o Isus dea peschi viața vi anda leste, o Pavel scriisardea: „Prin o lașimos nemeritime le Devlesco som so som”. (1 Cor. 15:3, 10) Cadea sar o Pavel, av vi tu siguro că o Isus dea peschi viața vi anda tute hai pâtărdea tuche o drom caring iech amalimos chidino le Iehovaia. (Fap. 3:19) So si cuci andel iacha le Iehovasche si so cheras aghies hai ando viitorii, na le buchia nasul cai cărdeam-le mai anglal,  indiferento că samas sau nici Martori le Iehovasche. (Is. 1:18)

12. Sar ajutin-ame le cuvintea anda 1 Ioan 3:19, 20 dacă simțosaras-ame că ci sam lașe chancesche sau ci daisaras te avas iubime?

¹² Daștil-pe că, atunci cana gândisares-tu că o Isus mulea caște pachiarel vi che păcatea, phenes tuche: „Ci som cadea de lașio te meritiv iech daro cadea de cuci”. O ilo imperfecto daștil te hohavel-ame hai te cherel-ame te pachias că ci sam lașe chancesche hai că ci daisaras te avas iubime. (Citisar 1 Ioan 3:19, 20.) Ande cadai situația te anas amenghe amintea că „o Del silo mai baro sar amaro ilo”. I iubirea amare Dadeschi cerisco hai leschi iertarea sile but mai zurale sar orisave sentimentea negativo cai sile ande amaro ilo. Trebul te sichioas te dichas-ame cadea sar dichel-ame o Iehova. Anda codoia, te cheras amenghe o obiceio te studiisaras lesco Cuvânto, te rughisaras-ame hai te beșas ande iech than codolența cai anen lesche închinarea.

13. Sar ajutil-ame cana studiisaras o Cuvânto le Devlesco? (Dich vi o chenarii: „ O Cuvânto le Devlesco, iech baro ajutorii”.)

¹³ Studiisar o Cuvânto le Devlesco ande fiesavo ghies hai va avela te prinjianes sea mai mișto i șucar personalitatea le Iehovaschi. Va avela te hachiares chichi de but iubisarel-tu vo. Cana meditosares ande fiesavo ghies ca iech cotor andai Biblia va avela te diches-tu cadea sar san ciaces hai ‘te ortosares le buchia’ ande chi goghi hai ande chio ilo. (2 Tim. 3:16) Iech phuro de congregație po anav Kevin, cai sas lesche lajiav lestar, phenel: „I meditarea co Psalmo 103 ajutisardea-ma te gândisarav mai mișto hai te hachiarav sar dichel-ma ciaces o Iehova”. I Eva, anda savi deam duma mai anglal phenel: „Co sfârșito le ghiesesco cherav manghe timpo caște meditosarav andi liniștea ca le gânduri le Iehovasche, cadaia sastiarel mânro ilo hai zuriarel mânro pachiamos”.

14. Sar ajutil-ame i rugăciunea?

¹⁴ Rughisar-tu butivar. (1 Tes. 5:17) Caște avel-tu iech amalimos chidino ieche manușeia trebul te des duma leia butivar hai te phenes lesche sea so si ande chio ilo. Cadai buchi si ciaces vi ande amaro amalimos le Iehovaia. Cana phenas lesche andi rugăciunea sea so simțosaras, so gândisaras hai so îngrijoril-ame, sicavas că si ame pachiamos ande leste hai că jianas că vo iubil-ame. (Ps. 94:17-19; 1 Ioan 5:14, 15) I Yua, anda savi deam duma mai anglal phenel: „Cana dav duma le Iehovaia, ci phenav lesche numai so întâmplosardea-pe ande codo ghies sar cana dav lesche iech raporto, tha pâtrav mânro ilo angla leste hai phenav lesche mânre garade gânduri hai  sentimentea. Cadea arăslem te dichav le Iehovas sar ieche Dades cai iubil ciaces pesche șiaven, na sar ieche șefos”. (Dich o chenarii „ Citisardean o lil?”.)

15. Sar sicavel amenghe o Iehova iech baro intereso?

¹⁵ Beș ande iech than che lașe amalența; von sile iech daro le Iehovastar. (Iac. 1:17) Amaro Dad cerisco sicavel amenghe iech baro intereso prin o fapto că dea-ame iech familia spiritualo phralența hai pheianța cai sicaven iubirea „sea o timpo”. (Prov. 17:17) Ande pesco lil caring le creștini anda Colose, o Pavel phendea anda chichiva creștini cai sas-le pașa leste, că ‘andine lesche but mângâierea’. (Col. 4:10, 11) Vi le Isusos sas-les nevoia ajutorostar hai anda leste sas zurales cuci o ajutorii cai primisardea-les catar lesche amala, cai sas vi ingeri hai vi manușa. (Luca 22:28, 43)

16. Sar daștin te ajutin-ame amare lașe amala te pașioas mai but le Iehovastar?

¹⁶ Rodes hai acceptis o ajutorii che lașe amalengo anda i congregația? Caște pâtres chio ilo angla iech amal maturo si iech protecția, na iech covlimos. O James, anda savo deam duma mai anglal, phenel: „O amalimos le phralența maturi si sar iech ancora cana naches prin iech baro brișind. Cana aven ande mânri goghi but gânduri nasul, cadala cuci amala ascultin-ma pherde răbdarea hai phenen manghe că iubin-ma. Prin lende, simțosarav că o Iehova sicavel manghe iubirea hai lel seama pe mande”. Anda codoia si zurales importanto te aven-ame amalimata chidine amare phralența hai te las seama pe lende!

17, 18. Castar trebul te ascultisaras hai sostar?

¹⁷ O Satan camel te mechas-ame hai te na cheras so si mișto. Vo camel te cherel-ame te pachias că o Iehova ci iubil-ame hai că ci meritisaras te avas salvime. Tha cadea sar dichleam, cadaia na-i ciaces!

¹⁸ O Iehova iubil-tu. San zurales cuci ande lesche iacha. Dacă ascultis lestar, ‘va avela te așes ande leschi iubirea’ anda sea o timpo, cadea sar o Isus. (Ioan 15:10) Anda codoia, na ascultisar pala o glaso le Satanosco hai nici pala o glaso che ilesco, cai doșarel-tu. Ascultisar pala o glaso le Iehovasco cai dichel so si lașio ande fiesavo anda amende. Av siguro că o Iehova „arachel peschi plăcerea ande pesco poporo”, cadea că vi ande tute.