1, 2. So si i răscumpărarea hai sostar trebul amenghe?

CANA o manuș perfecto Adam păcătuisardea, vo hasardea i posibilitatea te trail veșnico na numai anda peste tha vi anda lesche șiave cai urminas te aven-les. Anda codoia că vo camlea te păcătuil, les ci sas-les nici iech scuza anda so cărdea. Tha lesche șiave ci line parte ca cado păcato. (Rom. 5:12, 14) O iechto manuș meritisardea te merel. Tha daisardea te cherel o Iehova vareso anda le Adamosche urmași caște daștin te train veșnico? Pala soste o iechto manuș păcătuisardea, o Iehova sicadea țâra po țâra so avelas te cherel ca milioanea urmași le Adamosche te aven eliberime tela o armai le păcatosco hai le merimasco. (Gen. 3:15) Ca o timpo stabilime, o Iehova avelas te bișialel pesche Șiaves anda o cerii caște „del peschi viața sar răscumpărarea anda butende”. (Mar. 10:45; Ioan 6:51)

² Tha so si i răscumpărarea? Andel Scripturi grecisco creștino, i răscumpărarea referil-pe co prețo pochindo le Isusostar caște lel parpale so sas hasardo le Adamostar. (1 Cor. 15:22) Sostar trebul amenghe i răscumpărarea? Anda codoia că i Legea, cai sicavel o ortomos le Iehovasco, manghelas te avel dini iech viața anda viața. (Ex. 21:23, 24) O Adam hasardea i viața perfecto. Anda codoia caște cherel-pe cadea sar manghel o ortomos le Devlesco, o Isus trebuisardea te del peschi viața sar manuș perfecto. (Rom. 5:17) Cadea, vo cărdilea „Dad Eterno” anda sea codola cai sicaven pachiamos andi răscumpărarea. (Is. 9:6; Rom. 3:23, 24)

3. Cadea sar phenel-pe ando Ioan 14:31 hai 15:13, sostar acceptisardea o Isus te del peschi viața perfecto sar răscumpărarea?

³ Anda i iubirea anda lesco Dad cerisco hai anda amende,  o Isus acceptisardea te del peschi viața sar răscumpărarea. (Citisar Ioan 14:31; 15:13.) Anda codoia că sas-les cadai iubirea, vo sas-lo hotărâme te așel loialo ji co merimos hai te cherel i voința lesche Dadeschi. Cadea că, o scopo de mai anglal le Iehovasco ande soste priveal le manușa hai i phuv avelas te pherel-pe. Ande cado articolo, va avela te hachiaras sostar mechlea o Del ca o Isus te suferil cadichi de but angla so te merel. Sa cadea, va avela te dichas harnes o exemplo ieche scriitoresco la Bibliaco anda savo i răscumpărarea sas zurales cuci. Po sfârșito, va avela te dichas sar daisaras te sicavas recunoștința anda i răscumpărarea hai sar daisaras te bariaras amari aprecierea anda so cărdea o Iehova hai o Isus anda amende.

4. Phenen sar mulea o Isus.

⁴ Te imaginisaras amenghe o palutno ghies anda i viața le Isusoschi pi phuv. Chiar cana daștil te acharel ande pesco ajutorii mai but legiuni îngerenghe, vo mechel-pe astardo catar le soldați romani, cai maren-les zurales. (Mat. 26:52-54; Ioan 18:3; 19:1) Von den ande leste ieche bicioia, cai țârdel tele cotora masesche anda lesco corpo. Pala codoia, pe lesco dumo pherdo rat hai șindo șion iech pharo stâlpo anda cașt. Tela lesco pharimos, o Isus jial loches caring o than cai va avela mudardo, tha pala codoia iech manuș cai nachel othar silo oblighime te îngărel o stâlpo ande le Isusosco than. (Mat. 27:32) Cana o Isus arăsăl ca o than ande savo va merela, le soldați maren carfina ande lesche vasta hai ande lesche pânre. O pharimos lesche corposco buhliarel le răni cărde catar le carfina. Lesche amala duchade dichen caring leste, hai leschi dei rovel, tha le conducători religioși iudei prasan-les. (Luca 23:32-38; Ioan 19:25) I bari duch încărel but. Lesco ilo hai lesche plămâni sile chine; si lesche sea mai pharo te phurdel. Le zuralimaia cai mai așilea-les, phenel iech palutni rugăciunea le Iehovasche. Pala codoia mechel tele pesco șăro hai merel. (Mar. 15:37; Luca 23:46; Ioan 10:17, 18; 19:30) O merimos le Isusosco silo lento, zurales duchado hai lajiavuno!

5. Savi sas i mai phari partea anda i suferința le Isusoschi?

⁵ Tha, anda o Isus, o modo sar sas-lo mudardo ci sas i mai phari partea anda leschi suferința. So duchadea-les o mai but sas i doș șiuti pe leste cai îngărdea ca lesco merimos. Sas-lo arachlo doșalo pe neciacimaste anda blasfemia, iech acuzația andini varecasche cai ci sicavel nici iech felo respecto caring o Del hai lesco anav. (Mat. 26:64-66) Numai o gândo că sas șiuti lesche cadai doș duchadea-les zurales but hai sperisardea că lesco Dad ci va avela te mechel te avel umilime cadea. (Mat. 26:38, 39, 42) Tha sostar mechlea o Iehova ca lesco Șiavo iubime te suferil hai te merel? Te dichas trin motivea.

6. Sostar trebuisardea o Isus te avel șiuto po stâlpo?

⁶ O iechto motivo. O Isus trebuisardea te avel șiuto po stâlpo caște eliberil le evreien catar iech armai. (Gal. 3:10, 13) Von andine pe pende cado armai anda codoia că ci încărde pengo țolaharimos te respectin i Legea le Devleschi. Cadea că, pașa o fapto, că sas-le condamine co merimos, anda codoia că sas le urmași le Adamosche, von andine pe pende vi cado armai. (Rom. 5:12) I Legea le Devleschi dini le Israelosche phenelas că iech manuș cai cherelas iech păcato anda savo meritilas te avel condamnime co merimos trebulas mudardo, hai  pala codoia, ande chichiva situații, lesco corpo sas-lo șiuto pe iech stâlpo. * (Deut. 21:22, 23; 27:26) Anda codoia că sas-lo șiuto po stâplo, o Isus cărdea posibilo ca vi i națiunea cai ci acceptosardea-les te țârdel miștimata anda lesco merimos.

7. Savo si o duito motivo anda savo o Del mechlea ca lesco Șiavo te suferil?

⁷ O duito motivo. O Del mechlea ca o Isus te suferil caște pregătil-les anda lesco rolo sar Baro Rașai. O Isus simțosardea chichi de pharo si te ascultis le Devlestar ande phare zumaimata. Cana simțosardea iech bari duch ando ilo, o Isus rughisardea-pe „hai dea cingar zurales asfența”. Anda codoia că nachlea personalo prin phare buchia, o Isus daștil te hachiarel-ame hai ‘te avel ande amaro ajutorii’ cana sam „zumade”. Sam zurales recunoscători le Iehovasche anda codoia că numisardea pe amende ieche Bare Rașaies îndurătorii, ‘cai hachiarel amare covlimata’! (Evr. 2:17, 18; 4:14-16; 5:7-10)

8. Savo si o trinto motivo anda savo o Del mechlea ca lesco Șiavo te avel zurales zumado?

⁸ O trinto motivo. O Iehova mechlea ca o Isus te suferil cadichi de but caște del răspunso ca iech pușimos importanto: Va așena le manușa loialo le Iehovasche chiar cana sile zurales zumade? O Satan phenel că nici hai mai phenel că le manușa slujin le Devlesche anda motivea egoisto hai că ci iubin-les, cadea sar lengo dad o Adam. (Iov 1:9-11; 2:4, 5) Anda codoia că o Iehova jianglea că o Isus va așela loialo, vo mechlea ca lesco Șiavo te avel zumado cadea de but. O Isus așilea loialo hai sicadea că o Satan silo iech hohamno.

9. Ce exemplo mechlea amenghe o apostolo Ioan?

⁹ O pachiamos bute creștinenghe sas-lo zuriardo catar o sicaimos la răscumpărareaco. Von continuisarde te predichin, chiar cana but manușa așile lenghe contra hai perseverisarde andel zumaimata ji cana arăsle co phurimos. O apostolo Ioan sas iech anda lende. Vo predichisardea pherdo loialitatea o ciacimos anda o Cristos hai anda i răscumpărarea, daștil-pe, că mai but sar 60 bărșa. Cana sas-les cam 100 bărș, o Ioan sas-lo dichlo sar iech amenințarea cadichi de bari anda o Imperio Romano, că sas-lo îngărdo pe insula Patmos. Ce nasulimos cărdea? ‘Dea duma anda o Del hai șiutea mărturia anda o Isus.’ (Rev. 1:9) Ce baro exemplo de pachiamos hai perseverența!

10. Sar sicaven le scrieri le Ioanosche că anda leste sas cuci i răscumpărarea?

¹⁰ Ande lesche scrieri inspirime, o Ioan sicadea peschi bari iubirea anda o Isus hai peschi recunoștința anda i răscumpărarea. Vo dea duma anda i răscumpărarea sau anda lache miștimata mai but sar 100 var. Sar exemplo, o Ioan scriisardea: „Dacă varecon cherel iech păcato, si ame iech ajutorii co Dad: o Isus Cristos, codova orta”. (1 Ioan 2:1, 2) Mai but, o Ioan sicavel chichi de importanto si ‘i mărturia anda o Isus’. (Rev. 19:10) Si claro că anda o Ioan i răscumpărarea sas zurales cuci. Sar daisaras te sicavas vi ame cadai aprecierea?

11. Sar daisaras te așias contra i tentația te păcătuisaras?

¹¹ Te așias contra i tentația te păcătuisaras. Dacă si ciaces cuci anda amende  i răscumpărarea, ci va avela te gândisaras-ame: „Ci trebul te cherav cadichi de but eforturi caște na păcătuisarav. Daștiv te păcătuiv hai, pala codoia, te rughisarav le Iehovas te iertil-ma”. Tha, ando than te cheras cadea cana camas te cheras vareso greșime va avela te phenas amenghe: „Sar daștiv te cherav cadai buchi pala sea so cărde o Iehova hai o Isus anda mande?”. Mai but, va avela te mangas le Iehovas te del-ame zuralimos, hai va avela te rughisaras-ame zurales caște na peras ando zumaimos. (Mat. 6:13)

12. Sar daisaras te aplichisaras o sfato anda 1 Ioan 3:16-18?

¹² Te iubisaras amare phralen hai pheian. Cana sicavas iubirea caring lende sicavas vi că i răscumpărarea si cuci anda amende. Sostar? Anda codoia că o Isus dea peschi viața na numai anda amende, tha vi anda amare phrala. Cadea că si claro că von sile cuci ande lesche iacha. (Citisar 1 Ioan 3:16-18.) Sar daisaras te sicavas că iubisaras-le? Prin o modo sar phiravas-ame lența. (Ef. 4:29, 31–5:2) Sar exemplo, ajutisaras-le cana sile nasfale sau cana nachen prin phare zumaimata, sar avenas vi le dezastrea naturalo. Tha, sicavas mai dur iubirea vi cana iech phral holiarel-ame prin so phenel sau cherel?

13. Sostar trebul te iertisaras?

¹³ Si tuche pharo po iechdata te na încăres holi ande chio ilo caring che phrala? (Lev. 19:18) Dacă da, le tut pala cado sfato: „Continuin te suportin tume iech averes hai te iertin tume anda sea o ilo iech averes, vi cana varecas siles iech motivo te rovarel-pe contra averesche. Cadea sar iertisardea tume o Iehova anda sea o ilo, cadea te cheren vi tume”. (Col. 3:13) De fiesavi data cana iertisaras amare phralen, sicavas amare Dadesche cerisco că anda amende si cuci i răscumpărarea. Sar daisaras te bariaras mai dur amari aprecierea caring cado daro le Devlestar?

14. Sar daisaras te bariaras amari aprecierea anda i răscumpărarea?

¹⁴ Mulțumisar le Iehovasche anda i răscumpărarea. I Joanna, iech phei de 83 bărș anda India, phenel: „Pachiav că si zurales importanto ca andel rugăciuni cai phenav-le ande fiesavo ghies, te mulțumisarav le Iehovasche anda i răscumpărarea”. Cana rughis-tu, phen le Iehovasche  ce greșeli cărdean ande codo ghies hai mang-les te iertil-tu. Si ciaces, dacă cărdean iech baro păcato, si tut nevoia catar o ajutorii le phurengo. Von va ascultina-tu hai va dena-tu sfaturi pherde iubirea anda o Cuvânto le Devlesco. Von va rughina-pe tusa hai va manghena le Iehovas te iertil-tu pi baza la jertfachi le Isusoschi ‘caște aves sastiardo’ spiritualo. (Iac. 5:14-16)

15. Sostar si i răscumpărarea iech lașio subiecto anda o studio hai meditarea?

¹⁵ Meditosar ca i răscumpărarea. I Rajamani, iech phei de 73 bărș, phenel: „Cana citisarav anda i duch le Isusoschi mânre iacha pherdion-pe asfența”. Daștil-pe că vi tu san duchado hai si tuche pharo te meditosares ca i bari duch prin savi nachlea o Isus. Tha, chichi va avela te meditosares mai but ca leschi jertfa, cadichi mai but va avela te iubisares le Isusos hai lesche Dades. Daștias te sichios co studio personalo mai but buchia anda i răscumpărarea?

16. Ce miștimata anel amenghe o fapto că sicavas averen anda i răscumpărarea? (Dich i imaginea pa i coperta.)

¹⁶ De duma averența anda i răscumpărarea. De fiesavi data cana das duma le manușența anda cado sicaimos, bariaras amari aprecierea vi mai but. Si ame lașe instrumentea anda o sicaimos, cai ajutin-ame te phenas averenghe sostar dea o Isus peschi viața sar jertfa. Sar exemplo, daisaras te folosisaras i lecția 4 anda i broșura I vestea lași le Devlestar, „Con si o Isus Cristos?”, sau daisaras te folosisaras o capitolo 5 anda o lil So sicavel ame i Biblia?, „I Răscumpărarea o mai prețioso daro le Devlestar”. Sa cadea, ande fiesavo bărș ame bariaras amari aprecierea anda i răscumpărarea cana jias ca i Comemorarea le merimaschi le Isusoschi hai acharas vi averen te aven ande iech than amența. O Iehova dea-ame o șucar privilegio te sicavas averen anda lesco Șiavo.

17. Sostar si i răscumpărarea o mai cuci daro dino le Devlestar le manușenghe?

¹⁷ Si ciaces, si ame sea le motivea te bariaras amari aprecierea anda i răscumpărarea hai te na hasaras-la niciechdata. Daștil te avel-ame iech amalimos chidino le Iehovaia, chiar cana sam imperfecți. Prin i răscumpărarea, le buchia le Diavolosche va avena chosle cu sea. Hai, sea prin i răscumpărarea, o scopo de mai anglal le Iehovasco la phuveaia va pherdiola-pe. Sea i phuv va avela iech paradiso, cai va traina numai le manușa cai iubin le Iehovas hai va slujina lesche. Cadea că, te sicavas ande fiesavo ghies amari recunoștința anda i răscumpărarea, o mai cuci daro dino le Devlestar le manușenghe.