1, 2. Ce ilustrarea ajutil-ame te hachiaras le cuvintea anda 1 Petru 2:21?

TE IMAGINISAR amenghe că ande iech than mai bute manușența, phiras pe iech drom pherdo iv hai pericolea. Angla amende si iech ghido cai siles experiența. Lesche pânre mechen urme ando covlo iv. Anda iech data, ci mai dichas-les. Cu sea cadala, ame ci daras, tha das amari zor te uștaras chichi mai exacto pe lesche urme.

² Vi ame, sar ciace creștini, phiras pe iech drom cai si but pericolea, cadai lumea nasul ande savi traisaras. Tha ce mișto că o Iehova lea seama cai te avel-ame iech ghido perfecto, lesco Șiavo, o Isus Cristos, pe savesche urme daisaras te uștaras chichi mai exacto. (1 Pet. 2:21) Cadea sar phenel iech lucrarea de referință, o Petru phenel anda o Isus că silo sar iech ghido. Cadea sar le manușa cai sile ande iech drumeția uștaren pe le urme mechle catar lengo ghido, vi ame daisaras te uștaras pe le urme cai mechlea-le o Isus. Mai dur, va avela te arachas o răspunso ca le trin pușimata cai aven: So însemnol te uștaras pe le urme le Isusosche? Sostar trebul te cheras cadaia? Hai sar daisaras te uștaras pe lesche urme?

3. So însemnol te uștaras pe varecasche urme?

³ So însemnol te uștaras pe varecasche urme? Andi Biblia, le cuvintea „te uștaras” hai „pânro” referin-pe po iechdata ca o modo viațaco ieche manușesco. (Gen. 6:9; Prov. 4:26) O exemplo mechlo varecastar daștil te avel  comparime le urmența cai mechen-le lesche pânre. Cadea că, te uștaras pe varecasche urme însemnol te urmisaras lesco exemplo sau te imitisaras-les.

4. So însemnol te uștaras pe le urme le Isusosche?

⁴ Cadea că so însemnol te uștaras pe le urme le Isusosche? Te phenas simplo, însemnol te las-ame pala lesco exemplo. Ando verseto de bază le articolosco, o apostolo Petru sicavel i atenția caring o lașio exemplo le Isusosco cai suportisardea i suferința. Cu sea cadala, si mai but moduri ande save daisaras te imitisaras le Isusos. (1 Pet. 2:18-25) Si ciaces, sea leschi viața, sea so phendea hai cărdea vo, si iech exemplo anda amende caște urmisaras-les.

5. Daștin le manușa imperfecți te urmin o exemplo perfecto le Isusosco? Explichin.

⁵ Tha, sar manușa imperfecți, daisaras te urmisaras o exemplo le Isusosco? Sar te na! Anen tumenghe amintea so phendea amenghe o Petru te cheras, te uștaras pe lesche urme „chichi mai exacto”, na perfecto. Dacă uștaras pe le urme le Isusosche, das amari zor te imitisaras-les chichi mechel-ame amari starea imperfecto, va avela te ascultisaras le cuvintea cai phendea-le o Ioan: ‘Continuin te phiren cadea sar phirdea o Isus’. (1 Ioan 2:6)

6, 7. Sostar daisaras te phenas că cana urmisaras o exemplo le Isusosco, pașioas mai but le Iehovastar?

⁶ Cana uștaras pe le urme le Isusosche, pașioas mai but le Iehovastar. Sostar daisaras te phenas cadai buchi? Mai anglal, anda o șucar exemplo le Isusosco hachiaras sar te traisaras amari viața cadea sar camel o Del. (Ioan 8:29) Anda codoia, cana uștaras pe le urme le Isusosche, sam  cuci andel iacha le Iehovasche. Daisaras te avas siguri că amaro Dad cerisco va pașiola codolendar cai cheren bare eforturi caște aven lesche amala. (Iac. 4:8)

⁷ I duito buchi cai hachiaras-la si, că o Isus sicadea ande iech modo perfecto le calități pesche Dadesche. Anda codoia, o Isus daisardea te phenel: „Con dichlea-ma man dichlea vi la Dades”. (Ioan 14:9) Cana imitisaras le calități le Isusosche hai sar phiradea-pe vo averența, sar exemplo leschi mila caring iech leproso, leschi empatia caring iech jiuvli zurales nasfali hai leschi compasiunea caring codola casche mulea varecon, imitisaras vi le Iehovas. (Mar. 1:40, 41; 5:25-34; Ioan 11:33-35) Chichi sicavas mai but le calități le Iehovasche, cadichi mai pașă va avaia lestar.

8. Sar ajutil-ame o exemplo le Isusosco ‘te biruisaras’ i lumea?

⁸ Cana uștaras pe le urme le Isusosche, ci mechas-ame țârdine catar i lumea nasul ande savi traisaras. Andi palutni riat anda leschi viața pi phuv, o Isus daisardea te phenel: „Me biruisardem i lumea”. (Ioan 16:33) Prin cadal cuvintea, vo camlea te phenel că vo ci lea-pe pala so cherenas, sar gândinas hai ce obiectivea sas le manușen ande pesco timpo. O Isus ci bâstărdea niciechdata sostar avilea pi phuv, hai cadaia sas te sfințosarel o anav le Iehovasco. Andi lumea ande savi traisaras, but buchia daștin te țârden-ame. Tha, dacă cadea sar o Isus șioas i voința le Iehovaschi po iechto than, vi ame va avela ‘te biruisaras’ i lumea. (1 Ioan 5:5)

9. So trebul te cheras caște așias po drom cai îngărel ca i viața veșnico?

⁹ Cana uștaras pe le urme le lsusosche, va avela-ame viața veșnico. Cana iech tărno barvalo pușlea-les so trebul te cherel caște avel-les viața veșnico, o Isus phendea lesche: „Av pala mande”. (Mat. 19:16-21) Chichiva iudeienghe cai ci pachianas ande leste că vo si o Cristoso, phendea lenghe: „Mânre bacrea . . . aven pala mande. Me dav-le viața veșnico”. (Ioan 10:24-29) Ieche jenesche anda Sanhedrino, o Nicodim, cas placianas-les but lesche sicaimata, phendea lesche că codola cai „sicaven pachiamos ande leste” va avela-le „viața veșnico”. (Ioan 3:16) Ame sicavas pachiamos ando Isus cana cheras cadea sar sicadea-ame vo hai cana urmisaras lesco exemplo. Cana cheras cadea, ame așias po drom cai îngărel ca i viața veșnico. (Mat. 7:14)

10. So însemnol te prinjianas mai mișto le Isusos?

¹⁰ Caște uștaras chichi mai mișto pe le urme le Isusosche, trebul ‘te arăsas te  prinjianas-les’. (Citisar Ioan 17:3.) Caște arăsas te prinjianas le Isusos trebul te sichioas sea o timpo, sea mai but buchia anda lesche calități, anda sar gândil vo hai anda lesche norme. Ci contil dacă sam de mai but timpo ando ciacimos sau de țâra timpo, trebul te continuisaras te prinjianas le Iehovas hai lesche Șiaves.

11. So arachas ande le ștar evanghelii?

¹¹ Anda codoia că iubil-ame hai camel te arăsas te prinjianas lesche Șiaves, o Iehova șiutea andel Scripturi le ștar evanghelii cai den duma anda i viața hai o servicio pa i phuv le Isusosco. Ande lende daisaras te dichas so phendea hai so cărdea vo, hai vi sar simțosardea-pe. Cadal ștar lila ajutin-ame ‘te dichas atento’ o exemplo le Isusosco. (Evr. 12:3) Mai but, ande lende arachas, te phenas cadea, le urme mechle catar le pânre le Isusosche. Cana studiisaras le evanghelii, arăsas te prinjianas sea mai mișto le Șiaves le Devlesco hai cadea daisaras te uștaras chichi mai mișto pe lesche urme.

12. Sar daisaras te hachiaras mai mișto le evanghelii?

¹² Caște hachiaras mișto le evanghelii, trebul te cheras mai but sar numai te citisaras-le. Trebul te cheras amenghe timpo te studiisaras-le pherde atenția hai te meditosaras lende. (Dich vi Iosua 1:8, i nota de subsol.) Tha sar daisaras te meditosaras ca le relatări andal evanghelii hai te aplichisaras so citisaras? Ita dui buchia cai daisaras te cheras-le.

13. Sar daisaras te cheras ca le relatări andal evanghelii te astaren viața?

¹³ I iechto buchi, si te cheras ca le relatări andal evanghelii te astaren viața. Folosisar chi imaginația caște șios-tu ando than le manușengo anda save citisares, te așunes hai te diches so dichen von hai te simțosares so simțosaren von. Caște daștis te cheres cadaia rode mai but andel publicații dine catar i organizația  le Iehovaschi. Dich o contexto, adică so întâmplosardea-pe angla hai pala i relatarea cai studiisares-la. Rode informații anda o than cai întâmplosardea-pe hai andal manușa cai cheren partea anda i relatarea. Dich ande iech than i relatarea cai studiisares-la hai iech relatarea paralelo anda aver evanghelia. Po iechdata iech evanghelisto șiutea ande peschi relatarea detalii importanto cai aver evangheliști ci șiute-le.

14, 15. Sar daisaras te aplichisaras so sichioas andal evanghelii?

¹⁴ I duito buchi, si te șios andi practica so sichios andal evanghelii. (Ioan 13:17) Pala soste studiisardean atento iech relatarea, șiu tuche le pușimata: „So sichioav me catar? Sar daisarav te folosisarav so sichilem caște ajutiv aver varecas?”. Gândisar-tu varecaste cas daștil te ajutil cadal informații, alosar iech momento lașio, hai pherdo iubirea hai tacto, phen lesche i lecția cai sichilean-la.

¹⁵ Mai dur, va avela te aplichisaras cadal dui buchia caște dichas mai mișto i relatarea anda i ciori phivli cai dichlea-la o Isus co templo.

16. Phen so dichlean andi scena anda o Marcu 12:41.

¹⁶ Cher ca i relatarea te astarel viața. (Citisar Marcu 12:41.) Imaginisar tuche i scena. Si 11 nisan 33 a.e. Așilea mai țâra sar iech curco ji co merimos le Isusosco. Vo predichisardea iech bari partea anda o ghies co templo, tha le conducători religioși așile lesche contra. Mai anglal, unii anda lende ci pachiaie ande leschi autoritatea. Pala codoia, aver încercosarde te șion lesche pușimata savende von pachiaie că vo ci daștil te del răspunso. (Mar. 11:27-33; 12:13-34) Acana, o Isus silo ande iech aver partea le temploschi, daștil-pe că ande iech than numime I Bar le Jiuvleanghi, catar daștil te dichel le cutii cai șionas-pe le love cai sile pașa le ziduri andi bar. Beșel tele hai dichel codolen cai anen penghe contribuții. But manușa barvale aven hai șion but love. Daștil-pe că o Isus silo cadichi de pașă că așunel sar peren le love andel cutii.

17. So cărdea i ciori phivli anda savi del-pe duma ando Marcu 12:42?

¹⁷ Citisar Marcu 12:42. Pala iech timpo, o Isus dichel iecha jiuvlea. Voi si iech „ciori phivli”. (Luca 21:2) Lachi viața na-i ușoro. Daștil-pe că ande fiesavo ghies si lache pharo te avel-la so trebula caște trail. Cu sea cadala, voi jial caring iech andal cutii hai ci camel te dichela chonic cana șiol dui love cai, cana peren, bașon loches. O Isus jianel chichi șiutea: dui lepta, le mai țâne love cai folosinas-pe ande codoi vremea. Cadale lovența ci daisardea te chinel nici măcar iech țâni ciricli, cai sas i mai ieftino andal ciriclea bichinde sar hamos.

18. Cadea sar phenel-pe ando Marcu 12:43, 44, so phendea o Isus anda le love cai șiutea-le i phivli?

¹⁸ Citisar Marcu 12:43, 44. Cana dichlea cadala phivlea, le Isusosco ilo barilea, achardea peste le discipolen caște sicavel-la lenghe hai phendea: „Cadai ciori phivli șiutea mai but sar soavră”. Pala codoia phenel: „Soavră [vi mai but codola barvale] șiute anda lengo butimos, tha voi șiutea anda laco ciorâmos sea so mai sas-la caște trail”. Cana dea le ultimii țâne love cai mai sas-la, voi șiutea peschi viața andel vasta le Iehovasche, amaro Dad iubitorii. (Ps. 26:3)

19. So sichioas andal cuvintea le Isusosche anda i ciori phivli?

 ¹⁹ Șiu andi practica so sichilean. Șiu tuche o pușimos: „So daisarav te sichioav andal cuvintea le Isusosche anda i ciori phivli?”. Siguro că cadai phivli camlea te del mai but le Iehovas. Cu sea cadala, voi dea-les chichi daisardea, sea so sas-la mai lașio. O Isus jianglea că andel iacha le Iehovasche sas zurales cuci lachi contribuția. Ce șucar lecția anda amende: O Iehova bucuril-pe cana das-les sea so si ame mai lașio, iech servicio sacro cărdo sea le ileia hai sea le sufletoia! (Mat. 22:37; Col. 3:23) O Iehova bucuril-pe cana dichel că cheras sea so daisaras! Cado principio aplichil-pe ca o timpo hai co zuralimos cai das-les anda amari închinarea, sar avelas i lucrarea de predicare hai le întruniri.

20. Sar daisaras te aplichisaras so sichileam anda i relatarea anda i phivli? Den iech exemplo.

²⁰ Sar daisaras te aplichisaras so sichileam anda i relatarea anda i phivli? Gândisar-tu le manușende cai daștin te aven zuriarde dacă anes lenghe amintea că andel Iehovasche iacha sile cuci lenghe eforturi. Sar exemplo, prinjianes iecha pheia phuri cai simțosarel-pe doșali sau că ci mai sili lași chancesche, anda codoia că sili nasfali sau ci mai sila o zuralimos te slujil le Iehovasche cadea sar mai anglal? Sau prinjianes ieche phrales cai silo zurales nasfalo hai silo perado anda codoia că ci mai daștil te jial ca sea le întruniri catar i sala le Regatoschi? Phen lenghe „cuvintea lașe cai zuriaren”. (Ef. 4:29) Phen lenghe so sichilean anda i relatare anda i ciori phivli. Che șucar cuvintea daștin te zuriaren lengo pachiamos că o Iehova bucuril-pe de fiesavi data cana das-les sea so si ame mai lașio. (Prov. 15:23; 1 Tes. 5:11) Cana așaras averen anda lenghi buchi fidelo, ori chichi de țâni dichiolas-pe, uștaras sea mai mișto pe le urme le Isusosche.

21. So sam hotărâme te cheras?

²¹ Sam zurales recunoscători că andel evanghelii arachas mai but detalii anda i viața le Isusoschi. Cadea, daisaras te uștaras chichi mai mișto pe lesche urme. Avelas șucar te începosaras te studiisaras le evanghelii ca o studio personalo sau ca i închinarea andi familia. Te na bâstras că, caște avel-ame iech studio profundo, trebul te cheras ca le relatări te astaren viața hai te aplichisaras so sichileam. Si importanto te cheras so cărdea o Isus, tha vi te respectisaras so phendea amenghe vo. Ando articolo cai avel, va avela te dichas so daisaras te sichioas andal palutne cuvintea le Isusosche cai phendea-le angla so te merel.