1. Sar sicadea iech șiavorro că siles pachiamos ando jiuvindimos?

 IECHE șiavorres po anav Matthew siles iech nasfalimos zurales pharo hai cărdea deja mai but operații. Cana sas-les efta bărșa, vo hai leschi familia dichenas i emisiunea anda fiesavo șion pa JW Broadcasting^®. Caring o sfârșito, von dichle o materialo video anda iech ghili cai sicavelas i bari bucuria cai va pherela savorenghe ile cana va dichena pale codolen drago cai mule. b Pala so i emisiunea phandadea-pe, o Matthew gălea pașa pesche dada, lea-len vastendar hai phendea lenghe: „Dichlean? Vi dacă avelas te merav, va avela te uștiav andal mule. Te ajucăren-ma. Sea le buchia va avena mișto”. Te gândisaras-ame chichi de zuriarde sas-le cadal dada cana dichle o baro pachiamos lenghe șiavesco ando jiuvindimos!

2, 3. Sostar cherel amenghe mișto te gândisaras-ame ca i promisiunea le jiuvindimaschi?

² Poiechdata, cherel amenghe mișto te gândisaras-ame ca i promisiunea biblico anda o jiuvindimos. (Ioan 5:28, 29) Sostar? Anda codoia că oricana daisaras te peras nasfale sau te hasaras varecas cuci ando merimos. (Ecl. 9:11; Iac. 4:13, 14) I speranța le jiuvindimaschi daștil te ajutil-ame cana nachas prin cadal pharimata. (1 Tes. 4:13) Andai Biblia hachiaras că amaro Dad cerisco prinjianel-ame ciaces hai iubil-ame anda sea o ilo. (Luca 12:7) Te gândisaras-ame chichi de mișto prinjianel-ame vo caște daștil te cherel-ame pale, sa cadea sar samas mai anglal, sa codole buchianța cai încărdeam-le ande amari goghi. O Iehova iubil-ame cadea de but, că del-ame i ocazia te traisaras anda sea o timpo hai chiar cana meras, vo camel anda sea o ilo te anel-ame parpale viațate.

 ³ Mai dur, va avela te dichas sostar daisaras te pachias ando jiuvindimos. Pala codoia, va avela te das duma anda i relatarea biblico cai arachas le dumes pe save bazol-pe cado articolo: „Chio phral va uștela andal mule”. (Ioan 11:23) Co sfârșito, va avela te hachiaras sar daisaras te încăras zurali i speranța le jiuvindimaschi ande amaro ilo.

4. So trebul te jianas caște pachias că iech promisiunea va pherela-pe? Cheren iech ilustrarea.

⁴ Caște arăsas te pachias ande iech promisiunea, trebul te jianas ciaces că codo cai cărdea-la camel hai siles vi o zuralimos te pherel-la. Te cheras iech ilustrarea. Gândisar-tu că chio chăr sas-lo zurales rimome pala iech baro brâșând. Iech amal avel tute hai promitil că va ajutila-tu te lașiares chio chăr. Jianes că vo ci hohavel hai că camel te ajutil-tu. Mai but, vo silo iech manuș cai jianel te cherel mișto peschi buchi hai siles vi le mai lașe instrumentea. Cadaia cherel-tu te pachias că les siles vi o zuralimos te ajutil-tu. Cadea că, daștis te pachias leschi promisiunea. Tha so daisaras te phenas anda i promisiunea le Devleschi anda o jiuvindimos? Camel vo ciaces te pherel-la hai siles o zuralimos te cherel cadaia?

5, 6. Sostar daisaras te pachias anda sea o ilo că o Iehova camel te anel parpale viațate codolen cai mule?

⁵ Daisaras te pachias că o Iehova camel te uștiavel andal mule le manușen. Vo cărdea mai bute manușen te scriin andi Biblia anda i promisiunea le jiuvindimaschi. (Is. 26:19; Os. 13:14; Rev. 20:11-13) Hai cana o Iehova cherel iech promisiunea, cadaia pherel-pe sea o timpo. (Ios. 23:14) Mai but, vo abia ajucărel te anel parpale viațate codolen cai mule. Sostar daisaras te phenas cadaia?

⁶ Te gândisaras-ame ca so phendea o Iov. Vo pachialas anda sea o ilo că vi cana avelas te merel, o Iehova abia ajucărelas te anel-les parpale viațate. (Iov 14:14, 15) Sa cadea, o Iehova camel te dichel pale sea pesche slujitoren cai mule. Vo abia ajucărel te anel-le parpale viațate hai te aven sasteveste hai fericime. Tha so va avela le bute manușența cai mule bi te daștin te prinjianen le Iehovas? Amaro lașio Del va uștiavela vi len andal mule. (Fap. 24:15) Vo va dela vi len i ocazia te cărdion lesche amala hai te train anda sea o timpo pi phuv. (Ioan 3:16) Si claro, o Iehova camel te jiuvindil codolen cai mule.

7, 8. Sostar daisaras te pachias anda sea o ilo că le Iehovas siles o zuralimos te uștiavel le mulen?

⁷ Daisaras te pachias că le Iehovas siles vi o zuralimos te uștiavel le mulen, anda codoia că vo silo „O Mai Zuralo”. (Rev. 1:8) Vo daștil te chosel orisavo dușmano, chiar vi o merimos. (1 Cor. 15:26) Cana hachiaras cadaia, astaras zuralimos hai iech bari pacea pherel amaro ilo. Te dichas i experiența la pheiachi Emma Arnold. Ando Duito Războio Mondialo, voi hai lachi familia nachle prin bare pharimata. Caște zuriarel pesca șeia, anda codoia că hasardea bute manușen andel lagăre nazisto, i Emma phendea lache: „Dacă o merimos astarelas sea o timpo le manușen ande lesche vasta, vo avelas mai zuralo sar o Del”. Tha o ciacimos si că chanci hai chonic na-i mai zuralo sar o Iehova! O Del O Mai Zuralo, cai dea savoren viața, daștil te del-la parpale codolenghe cai mule.

⁸ Iech aver buchi cai cherel-ame te pachias că le Devles siles o zuralimos te jiuvindil codolen cai mule si că leschi goghi ci perel-pe niciechdata hai daștil te încărel ande late sea le buchia. Vo acharel fiesavi cerhai pala laco anav. (Is. 40:26) Sa cadea, vo încărel ande peschi goghi codolen cai mule. (Iov 14:13; Luca 20:37, 38) O Iehova anel pesche amintea chiar vi le mai țâne buchia anda lende, vi sar sicavenas, so felo manușa sas-le, prin so nachle ande lenghi viața, hai vi sea lenghe amintiri.

9. So aver buchi cherel-ame te pachias că o Iehova va jiuvindila le mulen?

 ⁹ O ciacimos si că amen daisaras te pachias andi promisiunea cai cărdea-la o Iehova anda o jiuvindimos, anda codoia că amen jianas că vo camel hai daștil te pherel-la. Iech aver buchi cai cherel-ame te pachias că va avela iech jiuvindimos si că Iehova mai uștiadea manușen andal mule. Andel ghiesa biblico, vo dea chichiva murșen loialo hai vi le Isusos o zuralimos te anel parpale viațate le mulen. Te dichas mai dur i relatarea anda Ioan, capitolo 11, cai sicavel iech jiuvindimos cai cărdea-les o Isus.

10. So întâmplosardea-pe andi Betania cana o Isus predichilas de i coaver rig le Iordanoschi hai so alosardea vo te cherel? (Ioan 11:1-3)

¹⁰ Citisar Ioan 11:1-3. Te gândisaras-ame că sam andi Betania, caring o sfârșito le bărșesco 32 a.e. Le Isusos siles lașe amala ande cado gav, o Lazăr hai lesche dui pheia, i Maria hai i Marta. (Luca 10:38-42) Ande iech ghies o Lazăr perel nasfalo hai lesche pheia sile zurales darade, cadea că von bișialen iech mesajo caring o Isus, cai silo de i coaver rig de Iordanoschi, cam ca dui ghiesa dur catar i Betania. (Ioan 10:40) Tha o Lazăr merel cam sa ande codo timpo cana i vestea că silo nasfalo arăsăl co Isus. Chiar cana o Isus jianel că lesco lașio amal mulea, vo așel cai silo încă dui ghiesa, hai numai pala codoia jial caring i Betania. Cadea că cana arăsăl code, o Lazăr silo mulo de ștar ghiesa. Mai dur, o Isus cherel vareso cai anel parpale i bucuria ando ilo lesche amalengo, hai del pachiv le Devlesche. (Ioan 11:4, 6, 11, 17)

11. So sichioas anda o amalimos anda cadai relatarea?

¹¹ Anda cadai relatarea sichioas iech șucar buchi anda o amalimos. Dichas că i Maria hai i Marta ci mangle le Isusostar te avel andi Betania. Von phende lesche numai că lesco cuci amal silo nasfalo. (Ioan 11:3) Pala codoia, cana o Lazăr mulea, o Isus daisardeas te uștiavel-les andal mule chiar cana sas-lo dur lestar. Tha, vo alosarel te jial ca Betania, caște avel pașa pesche amalea, i Maria hai i Marta. Iech amal cai del-tu iech vast angla so te manghes lestar te cherel cadaia si iech lașio amal anda „o ghies le pharimasco”. (Prov. 17:17) Cadea sar o Isus, vi amen camas te avas lașe amala anda le coaver! Tha acana te jias parpale ca i relatarea hai te dichas so sas mai dur.

12. So phendea o Isus la Martache că va cherela hai sostar daisardea voi te pachial-les? (Ioan 11:23-26)

¹² Citisar Ioan 11:23-26. I Marta așunel că o Isus silo pașa i Betania. Cadea că, nașel angla leste hai phenel lesche: „Raia, dacă avileanas cade, mânro phral ci merelas”. (Ioan 11:21) Si ciaces, vo daisardeas te sastiarel le Lazaros, tha o Isus camel te cherel vareso but mai baro. Vo phenel lache: „Chio phral va uștela andal mule”. Caște cherel la Marta te pachial ande leschi promisiunea vo mai phenel: „Me som o jiuvindimos hai i viața”. Da, o Del dea-les zuralimos opral i viața hai o merimos. Mai anglal, vo uștadea andal mule iecha șeiorra, ca țâra timpo pala so mulea, hai ieche tărne murșes, pala  so fal-pe, chiar ando ghies cana mulea. (Luca 7:11-15; 8:49-55) Tha daștilas vo te anel parpale viațate varecas cai sas-lo mulo de ștar ghiesa hai astardea deja te cărniol?

13. Cadea sar phenel-pe ando Ioan 11:32-35, so cherel o Isus cana dichel la Maria hai le coaveren că roven? (Dich vi i imaginea)

¹³ Citisar Ioan 11:32-35. Te gândisaras-ame so sas mai dur. I Maria, i coaver phei le Lazăroschi, jial vi voi angla o Isus hai phenel sa codol buchia cai phendea-le i Marta: „Raia, dacă avileanas cade, mânro phral ci merelas”. Voi hai sea le manușa de pașa late sile zurales duchade. Cana dichel lenghe asfa hai așunel sar roven, o ilo le Isusosco pherel-pe duchatar. I bari mila cai simțosarel-la caring pesche amala, cherel vi les te rovel. O Isus hachiarel i bari duch cai anel-la o merimos varecasco drago. Vo abia ajucărel te duriarel lenghe asfa.

14. So sichioas catar o Iehova anda so cărdea o Isus cana dichlea i duch la Mariachi?

¹⁴ I bari mila cai pherdea o ilo le Isusosco cana dichlea la Maria că rovel ajutil-ame te hachiaras că o Iehova si o Del la barea milaco. Sostar daisaras te phenas cadaia? Cadea sar dichleam ando articolo cai nachlea, o Isus sicavel ande iech modo perfecto sar gândil hai so si ande lesche Dadesco ilo. (Ioan 12:45) Cadea că, cana citisaras că le Isusos șindea-les o roimos cana dichlea i bari duch lesche amalenghi, sichioas că o Iehova silo zurales duchado cana dichel le asfa cai șioras-le, anda codoia că amaro ilo silo calo duchatar. (Ps. 56:8) Ci cherel-ame cadaia te camas te pașioas vi mai but amare lașe Devlestar?

15. Cadea sar phenel-pe ando Ioan 11:41-44, so cărdea o Isus co mormânto le Lazărosco? (Dich vi i imaginea.)

¹⁵ Citisar Ioan 11:41-44. O Isus arăsăl co than cai silo prahome o Lazăr hai manghel te avel dino de iech rig o bar cai silo angla o mormânto. I Marta ci camel te mechel-les hai phenel lesche: „Raia, si te chandel deja”. Tha o Isus phenel lache parpale: „Ci phendem tuche că, dacă va avela te pachias, va dicheia i gloria le Devleschi?”. (Ioan 11:39, 40) Pala codoia, vo vazdel pesche iacha caring o cerii hai manghel-pe angla savore. Vo camel ca le Iehovasche te avel dini sea i pachiv anda o miracolo cai cherel-les mai dur. Mai dur, o Isus del cingar  zurales: „Lazăr, av avri!”. Hai o Lazăr înclel anda o mormânto. O Isus daisardea te cherel vareso cai le manușa pachianas că ci daștil te avel cărdo niciechdata. c

16. Sar zuriarel amaro pachiamos ando jiuvindimos i relatarea anda Ioan, o capitolo 11?

¹⁶ I relatarea cai arachas-la ando Ioan o capitolo 11 zuriarel amaro pachiamos ando jiuvindimos. Sostar? Te anas amenghe andi goghi că o Isus phendea caring i Marta: „Chio phral va uștela andal mule”. (Ioan 11:23) Cadea sar pesco Dad, o Isus camel hai siles o zuralimos te pherel cadai promisiunea. Lesche asfa sicade că o Isus camel anda sea o ilo te chosel cu sea o merimos hai i duch cai cado anel-la. Hai cana o Lazăr avilea avri anda o mormânto, savore daisarde te dichen că le Isusos siles o zuralimos te uștavel le mulen. Sa cadea, amaro pachiamos ando jiuvindimos silo zuriardo vi catar le dumes cai o Isus phendea-le la Martache: „Ci phendem tuche că, dacă va avela te pachias, va dicheia i gloria le Devleschi?” (Ioan 11:40) Cadea că daisaras te pachias ciaces andi promisiunea le Devleschi anda o jiuvindimos. Tha, so daisaras te cheras caște încăras zurali ande amaro ilo cadai speranța?

17. So trebul te cheras cana citisaras andal jiuvindimata cai arachas-le andi Biblia?

¹⁷ Citisar hai gândisar-tu ca le jiuvindimata andal puraimata. I Biblia del duma anda ohto manușa cai sas-le uștiade parpale viațate pi phuv. d Daștis te cheres tuche timpo caște rodes te prinjianes mai but buchia anda fiesavo anda cadala? Cana cheres cadaia, na bâstăr că le murșa, le jiuvlea hai le șiave anda save del-pe duma code traisarde ciaces. De chi zor te hachiares so daștis te sichios anda cadal relatări. Șiu tuche o pușimos: „Sar sicavel fiesavo exemplo  că o Iehova camel hai siles o zuralimos te jiuvindil le mulen?”. Hai mai opral sar oriso, gândisar-tu ca o mai baro jiuvindimos, codo le Isusosco. An tuche andi goghi că șăla manușa dichle le Isusos jiuvindime, hai cadaia si iech zurali baza anda amaro pachiamos. (1 Cor. 15:3-6, 20-22)

18. Sar daisaras te zuriaras amaro pachiamos prin le ghilea cai den duma anda i speranța le jiuvindimaschi? (Dich vi i nota de subsol.)

¹⁸ Zuriar chio pachiamos le „ghileanța spiritualo” cai den duma anda i speranța le jiuvindimaschi. e (Ef. 5:19) Cadal ghilea va cherena ca o jiuvindimos te avel vi mai zuralo ande amaro ilo hai va bariarena amaro pachiamos ande cadai cuci speranța. Cadea că te așunas-le, te ghilabas-le, hai te rodas te hachiaras mai mișto le dumes anda lende ca i închinarea andi familia. Te das amari zor te încăras ande amari goghi le dumes anda cadal ghilea hai te șioas-le ande amaro ilo. Pala codoia, cana va avela te nachas prin iech pharimos ande savo sam pașă te meras, sau hasaras varecas drago ando merimos, o spirito sfânto le Iehovasco va ajutila-ame te anas ande amari goghi cadal ghilea hai cadea te astaras zuralimos prin lende.

19. Sar daisaras te dichas-ame deja andi lumea nevi, cana va avela o jiuvindimos? (Dich o chenaro: „ So avelas te pușes-le?”)

¹⁹ Dich-tu deja andi lumea nevi. O Iehova dea amen o daro te daisaras te dichas-ame andi lumea nevi. Iech phei phenel: „Beșlem cadea de but hai gândisardem-ma ca i viața andi lumea nevi, că iech data dichlem-ma sar cana som deja code, hai sungav so șucar chanden le lulughia ando Paradiso.” Gândisar-tu sar va avela cana va avela te prinjanes le murșen hai le jiuvlean cai slujisarde le Iehovasche andel puraimata. Tu cas ajucăres te prinjianes? So va avela te pușes codole jenes? Pala codoia, de chi zor te gândis-tu vi co ghies cana va avela te diches pale codolen cuci tuche cai mule. Gândisar-tu so va avela te phenes lenghe, sar va avela te des-le angali, hai sar va avela te roven ande iech than bucuriatar.

20. So camas anda sea o ilo te cheras?

²⁰ Sam recunoscători le Iehovasche că dea amen i șucar speranța le jiuvindimaschi! Daisaras te pachias ande late, anda codoia că jianas că o Iehova camel hai siles vi o zuralimos te pherel-la. Cadea că camas anda sea o ilo te zuriaras vi mai dur amaro pachiamos ande cadai șucar speranța. Cana cheras cadea, va avela te pașioas vi mai but amare Devlestar, cai phenel fiesavesche anda amende: „Codola cuci tuche va uștena andal mule”.