1, 2. So trebul te cheras ando timpo so ajucăras i lumea nevi?

 ANDA amende si zurales cuci i promisiunea le Iehovaschi că va paruvela cadai lumea nasul ande iech lumea nevi hai lași. (2 Pet. 3:13) Chiar cana ci jianas cana va avela i lumea nevi, si but buchia cai sicaven că ci mai trebul te ajucăras but. (Mat. 24:32-34, 36; Fap. 1:7)

² Ando timpo so ajucăras, savore anda amende trebul te zuriaras amaro pachiamos ande cadai promisiunea, indiferento de chichi timpo slujisaras le Iehovasche. Sostar? Anda codoia că vi iech pachiamos zuralo daștil te covliol. Mai but, o apostolo Pavel phendea că o fapto te na avel amen pachiamos si sar iech păcato „cai țârdel-ame cadea de ușoro”. (Evr. 12:1) Caște na arăsăl amaro pachiamos covlo, trebul te dichas pale mai butivar le buchia cai sicaven că i lumea nevi va avela ciaces na pa but timpo. (Evr. 11:1)

3. So va dichaia ande cado articolo?

³ Ande cado articolo va avela te das duma anda trin buchia cai daisaras te cheras-le caște zuriaras amaro pachiamos andi lumea nevi: 1) te gândisaras-ame ca i răscumpărarea, 2) te gândisaras-ame ca o zuralimos le Iehovasco hai 3) te cheras mai but buchia cai zuriaren amaro amalimos le Iehovaia. Pala codoia, va avela te dichas sar daștil te zuriarel vi amaro pachiamos o mesajo cai phendea-les o Iehova caring o Habacuc. Tha, mai anglal, te dichas cana trebul amenghe iech zuralo pachiamos andi lumea nevi promitime le Iehovastar.

 CANA TREBUL AMENGHE IECH PACHIAMOS ZURALO

4. Anda so alosarimata trebul amenghe iech pachiamos zuralo?

⁴ Ande fiesavo ghies, cheras alosarimata anda save trebul amenghe iech pachiamos zuralo. Sar exemplo, alosaras con te aven amare amala, so te dichas sau so ghilea te așunas, ca so școala te jias, cas te las de rromni sau de rrom, so te cheras le șiavența sau cai te jias ca i buchi. Cadea că, cheras mișto cana pușas-ame: „So sicaven anda mande le alosarimata cai cherav-le? Pachiav anda sea o ilo că cadai lumea nasul va nachela hai că va avela parudi la lumeaia nevi le Devleschi? Sau mechav-ma athado catar le manușa cai pachian că cadai viața si sea hai că trebul te train chichi mai mișto penghi viața ji co merimos?”. (Mat. 6:19, 20; Luca 12:16-21) Va avela te cheras le mai lașe alosarimata dacă zuriaras amaro pachiamos că i lumea nevi si zurales pașă.

5, 6. Sostar trebul amenghe iech pachiamos zuralo cana nachas prin pharimata? Cheren iech ilustrarea.

⁵ Trebul amenghe iech pachiamos zuralo vi cana nachas prin bare pharimata. Daștil-pe că nachas prin persecuții, iech nasfalimos cronico sau aver buchia cai daștin te peraven-ame. Mai anglal, daștil-pe că daisaras te așias zurale angla le pharimata. Tha cana încăren mai but, hai cadea si butivar le zumaimatanța, trebul amenghe iech pachiamos zuralo caște na mechas-ame hai te slujisaras pherde bucuria le Iehovasche. (Rom. 12:12; 1 Pet. 1:6, 7)

⁶ Cana nachas prin iech pharimos, daștil-pe că fal-ame că i lumea nevi ci va mai avela niciechdata. Sicavel cadaia că amaro pachiamos covlilea? Nici. Caște hachiaras mai mișto, te dichas iech ilustrarea. Cana si iech pharo ivend hai si zurales șâl, daștil te fal-ame că o milai ci va mai avela niciechdata. Sa cadea, cana sam zurales perade, daștil te fal-ame că i lumea nevi ci va mai avela. Tha, dacă amaro pachiamos silo zuralo, amen jianas că so phendea o Del că va cherela va pherela-pe. Cadea, daisaras te șioas vi mai dur i închinarea andini le Iehovasche po iechto than andi viața.

7. Ca so modo gândimasco trebul te las sama?

⁷ Sa cadea, trebul amenghe iech pachiamos zuralo vi cana cheras amari buchi anda i predicarea. But manușa casa das duma pachian că „i vestea lași” anda o Regato si prea șucar caște avel ciaci. (Mat. 24:14; Ezec. 33:32) Anda codoia trebul te las sama te na mechas-ame athade catar so pachian von. So trebulas te cheras? Te zuriaras sea o timpo amaro pachiamos. Te dichas trin buchia prin save daisaras te cheras cadaia.

TE GÂNDISARAS-AME CA I RĂSCUMPĂRAREA

8, 9. Sar zuriaras amaro pachiamos cana gândisaras-ame ca i răscumpărarea?

⁸ Cana cheras amenghe timpo te gândisaras-ame ca i răscumpărarea, amaro pachiamos zuriarel-pe. I răscumpărarea del-ame i asigurarea că sea le promisiuni le Devlesche va pherena-pe ciaces. Cana gândisaras-ame sostar sas dini i răscumpărarea hai so trebuisardea te cherel o Iehova caște chinel-ame parpale anda o păcato, pachias vi mai zurales că va avela te traisaras veșnico ande iech lumea mai lași, cadea sar phendea amenghe o Del.

⁹ So trebuisardea te cherel o Iehova caște chinel-ame parpale anda o păcato? O Iehova bișaldea pi phuv pesche cuci Șiaves, o mai pașardo jeno lestar, caște năștil-pe sar manuș perfecto. Cade, o Isus nachlea prin bare pharimata. Pala codoia sas-les iech merimos zurales duchado. So bari buchi cărdea o Iehova anda amende! Amaro lașio Del ci avileas te  mechel niciechdata ca lesco Șiavo te suferil hai te merel ca amen te avel amen iech viața mai lași numai anda iech țâra timpo. (Ioan 3:16; 1 Pet. 1:18, 19) Cadea că dacă o Iehova sas-lo gata te pochinel iech prețo cadea de baro, cadaia sicavel amenghe că daisaras te pachias ciaces că va anela i lumea nevi.

TE GÂNDISARAS-AME CA O ZURALIMOS LE IEHOVASCO

10. Cadea sar sicavel-pe ando Efeseni 3:20, so daștil te cherel o Iehova?

¹⁰ Daisaras te zuriaras amaro pachiamos vi cana gândisaras-ame ca o zuralimos le Iehovasco. Les siles o zuralimos te pherel sea le promisiuni cai cărdea-le. Si ciaces, andel iacha le manușenghe, i promisiunea anda iech viața veșnico ande iech lumea nevi, daștil te fal-pe iech buchi cai ci daștil te avel cărdi. Tha o Iehova promitisardea butivar că va cherela buchia cai le manușa ci daștinas te cheren-le niciechdata. Cu sea cadala,te na bâstras că vo silo O Mai Zuralo Del. (Iov 42:2; Mar. 10:27) Cadea că, sostar te na pachias cana o Iehova cherel promisiuni cadea de bare hai șucar? (Citisar Efeseni 3:20.)

11. Den exemplea anda chichiva promisiuni zurales bare, cai o Del cărdea-le andel puraimata. (Dich o chenarii „ Bare promisiuni cai pherdile-pe”.)

¹¹ Te dichas acana chichiva promisiuni andal puraimata cărde le Iehovastar cai pherdile-pe, chiar cana falas-pe că ci daștin te aven cărde. Vo phendea caring o Avraam hai Sara că va avela-len iech șiavorro pe lengo phurimos. (Gen. 17:15-17) Mai but, vo phendea caring o Avraam că lesche șiave va moștenina o them Canaan. Ando timpo chichi le israeliți, le șiave le Avraamosche, sas-le ando Egipto sar sclavi, cadai promisiunea falas-pe că ci va pherela-pe niciechdata. Tha pherdilea-pe ciaces. Mai târzio, o Iehova phendea caring i Elisabeta, cai sas-li phuri, că va avela-la iech șiavorro. Sa cadea, phendea că i Maria, cai sas șei bari, avelas te năștil lesche Șiaves, anda savo o Iehova cărdea i profeția că va avela mii bărșența mai anglal andi bar Eden. (Gen. 3:15)

12. So pachiamos den-ame le dumes anda Iosua 23:14 hai anda Isaia 55:10, 11?

¹² Cana beșas hai gândisaras-ame ande amaro ilo ca sea le promisuni cai cărdea-le o Iehova hai sar pherdea vo cadala, hachiaras că les siles iech baro zuralimos. Cadea, amaro pachiamos andi promisiunea că va anela iech lumea nevi si vi mai zuralo. (Citisar Iosua 23:14; Isaia 55:10, 11.) Cana pachias anda sea o ilo cadai buchi, daisaras te ajutisaras vi averen te hachiaren că cadai promisiunea na-i numai iech paramici sau iech șucar suno. Chiar o Iehova zuriardea i promisiunea andal ceruri neve hai iech phuv nevi cana phendea: „Cadal cuvintea sile demno pachiamsche hai ciace!” (Rev. 21:1, 5)

PHER CHI VIAȚA BUCHIANȚA CAI ZURIAREN CHIO AMALIMOS LE IEHOVAIA

13. Sar zuriaren amaro pachiamos le întruniri la congregațiache? Explichin.

¹³ Zuriaras amaro pachiamos vi cana cheras buchia cai anen amen mai pașă le Iehovastar. Sar exemplo, te dichas sar ajutin-ame le întruniri. I Anna b, iech phei cai slujisardea but bărșa ande mai but forme andi buchi le Iehovaschi cu timp integral, phenel: „Le întruniri ajutin-ma te încărav zuralo mânro pachiamos. Chiar cana iech phral ci si o mai lașio ando sicaimos sau ci sicavel idei neve, sa arachav vareso ande leschi tema cai cherel-ma te hachiarav mai mișto o ciacimos andai Biblia. Cadea, mânro pachiamos silo zuriardo”. Tha na numai le teme zuriaren amaro pachiamos, vi le  răspunsuri cai den-le le coaver daștin te cheren cadaia. (Rom. 1:11, 12; 10:17)

14. Sar zuriarel amaro pachiamos i predicarea?

¹⁴ Amaro pachiamos silo zuriardo vi cana jias andi predicarea. (Evr. 10:23) I Barbara, cai slujil le Iehovasche de mai but sar 70 bărșa phenel: „Simțosardem sea o timpo că i predicarea zuriarel mânro pachiamos. Chichi dav duma mai but anda le șucar promisiuni le Iehovasche, cadichi mai but mânro pachiamos silo vi mai zuralo”.

15. Sar zuriaras amaro pachiamos cana sichioas corcore anda o Iehova? (Dich vi le imagini.)

¹⁵ Iech aver buchi cai zuriarel amaro pachiamos si te sichioas corcore anda o Iehova. I Susan pachial că trebul te cherel pesche iech plano anda cadaia. Voi phenel: „Ando ghies de curco pregătiv mânro articolo anda o studio anda o Turno cai va avela dichlo o curco cai avel. Andel ghiesa de luine hai marține pregătiv-ma anda i întrunirea anda o mașcar le curchesco, hai ande le coaver ghiesa rodav te prinjianav mai but buchia anda iech subiecto cai alosardem-les”. I Susan sili atento te încărel-pe catar cado programo hai cadaia ajutil-la te zuriarel pesco pachiamos. I Irene, cai slujil de but bărșa co sedio mondialo, pachial că o fapto te hachiarel mai mișto le profeții ajutil-la te avel-la iech pachiamos zuralo. Voi phenel: „Si zurales șucar sar pheren-pe le profeții le Iehovasche ji ande le mai țâne buchia!”. c

„VA PHERDIOLA-PE CIACES”

16. Sostar daisaras te phenas că le dumes cai phendea-le o Iehova caring o Habacuc zuriaren vi amen? (Evrei 10:36, 37)

¹⁶ Chichiva slujitori le Iehovasche ajucăren de but timpo te nachel cadai lumea nasul. Andel iacha le manușenghe, daștilas te fal-pe că o Del ci sighiarel te pherel peschi promisiunea. O Iehova hachiarel că le manușa daștinas te pachian cadai buchi. Anda codoia, vo  phendea caring o Habacuc: „I viziunea ajucărel încă pesco timpo alosardo. Jial angle sigo te pherdiol-pe hai ci va hohavela. Chiar cana falas-pe că ci avel, ajucăr-la vi mai dur, anda codoia că va pherdiola-pe ciaces. Ci va arăsăla târzio!”. (Hab. 2:3) Camlea o Iehova te zuriarel numai le Habacucos prin cadal dumes? Sau zuriaren cadala vi amen? Tela inspirația le Devlestar, o apostolo Pavel phendea că cadal dumes sile lașe vi anda le creștini, cai abia ajucăren te avel i lumea nevi. (Citisar Evrei 10:36, 37.) Daisaras te pachias ciaces că, chiar cana fal-pe că i promisiunea le Iehovaschi te hastravel amen ci avel cadea de sigo, cadaia „va pherela-pe ciaces. Ci va arăsăla târzio!”.

17. Sar lea-pe iech phei pala o sfato anda Habacuc 2:3?

¹⁷ But slujitori le Iehovasche încăren andi goghi o sfato ‘te ajucăren mai dur’. Hai chichiva anda lende cheren cadaia de but bărșa. Sar exemplo, i Louise slujil le Iehovasche anda 1939. Voi phenel: „Ande codo timpo, pachiaiem că o Armaghedono va avela angla so te terminiv i școala. Tha ci avilea. Andel bărșa cai nachle, so ajutisardea-ma o mai but sas te citiv anda sar phenav lenghe me «relatări anda o ajucărimos», adică le relatări anda o Noe, o Avraam, o Iosif hai aver cai trebuisarde te ajucăren but timpo angla so te primin o pochinimos promitime le Iehovastar. Anda codoia că ajucărdeam mai dur, vi me hai vi aver pachias anda sea o ilo că i lumea nevi si zurales pașă”. Vi aver phrala cai slujin le Iehovasche de mai but timpo dichen sa cadea le buchia.

18. Sar zuriarel-pe amaro pachiamos andi lumea nevi cana dichas le buchia de pașa amende?

¹⁸ Si ciaces, i lumea nevi ci avilea încă, tha cadaia ci sicavel că ci va avela niciechdata. Te gândisaras-ame ca chichiva buchia anda save ci daisaras te phenas că ci existin ciaces sar avenas le cerhaia, le cașta, le animalea, hai le manușa. Cu sea cadala, sas iech timpo cana cadala ci existinas. Cadala sas-le cărde le Iehovastar. (Gen. 1:1, 26, 27) Amaro lașio Del phenel amenghe că va cherela vi iech lumea nevi, promisiunea cai va pherela-la ciaces. Atunci le manușa va traina veșnico hai va avena sasteveste. Co timpo alosardo le Devlestar, i lumea nevi va avel sa cadea de ciaci sar sea le buchia cai si pașa amende. (Is. 65:17; Rev. 21:3, 4)

19. Sar daștis te zuriares chio pachiamos?

¹⁹ Ji atunci, folosisar chio timpo caște zuriares chio pachiamos. Sicav mai but recunoștința că sanas chindo parpale anda păcato prin i răscumpărarea. Gândisar-tu ca o baro zuralimos le Iehovasco. Cher mai but buchia cai zuriaren chio amalimos le Devleia. Cadea, va aveia vi tu mașcar codola cai „prin pachiamos hai răbdarea, moștenin le promisiuni”. (Evr. 6:11, 12; Rom. 5:5)