1. Sostar das răspunsuri ca le întruniri?

 SOSTAR jias ca le întruniri? Ando iechto than amen cheras cadaia caște așaras le Iehovas. (Ps. 26:12; 111:1) Sa cadea amen jias ca le întruniri vi caște zuriaras-ame iech averes ande cadal phare ghiesa. (1 Tes. 5:11) Cana vazdas amaro vast hai das iech răspunso ca le întruniri, cheras cadal dui buchia.

2. Cana daisaras te das răspunsuri ca le întruniri?

² Ande fiesavo curco, daisaras te das răspunsuri cana jias ca le întruniri. Sar exemplo, co sfârșito le curchesco, daisaras te las partea co studio le Turnosco de veghe. Ca i întrunirea anda o mașcar le curchesco, daisaras te phenas so sichileam ca i tema Cuci sicaimata, co studio la Bibliaco andi congregația hai vi ca aver teme cai șion-pe pușimata.

3. So pharimata daștin te aven amen hai sar ajutil-ame o sfato anda Evrei 10:24, 25?

³ Savore camas te așaras le Iehovas hai te zuriaras amare phralen ca le întruniri. Tha, daștil-pe că si amenghe pharo te das iech răspunso anda codoia că sam lajiavune, sau ci sam șiute de fiesavi data cana vazdas o vast. Sar daisaras te nachas părdal cadal pharimata? Arachas o răspunso ando lil cai scriisardea-les o Pavel caring le evrei. Vo sicadea chichi de importanto si cana sam ca le întruniri „te zuriaras-ame iech averes”. (Citisar Evrei 10:24, 25.) Cana das amari sama că iech răspunso harno, prin savo sicavas amaro pachiamos, zuriarel averen, daștil te cherel-ame te vazdas o vast, chiar cana sam lajiavune. Hai cana ci sam șiute te das răspunsuri de fiesavi data cana camas, sam bucurime că vi aver jene daștin te sicaven  pengo pachiamos prin le răspunsuri cai den-le. (1 Pet. 3:8)

4. So va dichaia mai dur ande cado articolo?

⁴ Ande cado articolo, va avela te dichas mai anglal sar daisaras te zuriaras-ame iech averes ande iech congregația țâni cai ci si cadea de but jene cai te den răspunsuri. Pala codoia, va avela te das duma anda sar daisaras te zuriaras-ame iech averes ande iech congregația bari cai but jene vazden o vast. Hai co sfârșito va avela te dichas sar daisaras te zuriaras averen prin so phenas ande amare răspunsuri.

5. Sar daisaras te zuriaras-ame iech averes dacă sam ande iech congregația țâni?

⁵ Ande iech congregația țâni sau ande iech grupa si mai țâra jene cai den răspunsuri. Poiechdata, o phral cai încărel i întrunirea trebul te ajucărel mai but timpo ji cana varecon vazdel pesco vast. I întrunirea daștilas te fal-pe că nachel phares hai ci prea zuriarel le phralen. So daștis te cheres? Vazde chio vast te des răspunsuri mai butivar. Cadea, va avela te zuriares vi averen te den mai but răspunsuri.

6, 7. So daștis te cheres caște na marel cadea de zurales chio ilo cana des răspunsuri?

⁶ Vi numai o gândo că trebul te des iech răspunso cherel-tu te izdras? Ci san o corcoro, vi aver jene simțon-pe sa cadea. Tha caște daștis te zuriares che phralen hai pheian, de chi zor te naches părdal chi dar te des răspunsuri. Sar daștis te cheres cadaia?

⁷ Daștis te araches but lașe sfaturi andel numerea mai purane anda O Turno de veghe. b Ita chichiva anda lende: pregătisar-tu mișto. (Prov. 21:5) Chichi prinjianes mai mișto o materialo, cadichi mai ușoro va avela tuche te des răspunsuri. Sa cadea, de răspunsuri harne. (Prov. 15:23; 17:27) Cana des iech răspunso harno, chio ilo ci va mai marela cadea de zurales. Mai but, iech răspunso harno ande savo des duma numai anda iech sau dui buchia, silo mai ușoro hachiarimasco sar iech răspunso lungo cai del duma anda mai but sicaimata. Cana folosis che dumes caște des iech răspunso harno, cadaia va sicavela că san mișto pregătime hai că hachiardean ciaces o materialo.

8. Sar san andel iacha le Iehovasche cana dichel că des sea chi zor te des răspunsuri?

⁸ Tha so daștis te cheres dacă lean-tu pala cadal sfaturi hai vi cadea si tuche pharo te des mai but sar iech sau dui răspunsuri? Daștis te pachias anda ilo că anda o Iehova san zurales cuci cana dichel că des sea chi zor. (Luca 21:1-4) Te des sea so si tut mai lașio ci însemnol te șios pe chio dumo iech pharimos cai ci daștis te îngăres-les. (Filip. 4:5) Rode te diches so daștis te cheres, de chi zor te cheres cadaia hai mang le Iehovas te del-tu iech ilo liniștime. Mai anglal, daștis te șios tuche andi goghi te des iech răspunso harno.

9. Prin so pharimos daștinas te nachen codola cai sile ande iech congregația bari?

⁹ Dacă ande chi congregația si but phrala, daștis te naches prin iech aver pharimos. Daștil-pe că si cadea de but phrala hai pheia cai camen te den răspunsuri că ci arăsăs te des vi tu iech răspunso, chiar cana vazdes o vast mai butivar. Prin cadaia nachlea vi i Daniela c,  iech phei savea placeaia-la sea o timpo te del răspunsuri ca le întruniri. Voi dichel cadala sar partea anda i închinarea cai anel-la le Iehovasche, sar iech modo prin savo daștil te zuriarel averen hai te încărel ande peschi goghi mai mișto le ciacimata biblico. Tha, pala so gălea ande iech congregația mai bari, ci mai daisardea te del răspunsuri cadea de but; poiechdata, ci daștilas te del niciech răspunso sea i întrunirea. Voi phenel: „Somas holiardi ande mânro ilo. Sas sar cana hasardem iech privilegio. Hai cana întâmplol-pe tuche mai butivar cadaia, astares te gândis-tu că le phrala ci camen ciaces te șion-tu”.

10. So daisaras te cheras caște arăsas te das răspunsuri ca le întruniri?

¹⁰ Nachlean vi tu prin iech situația sar cadaia? Dacă da, daștil-pe că gândisardean-tu te na mai des răspunsuri hai numai te așunes i întrunirea. Tha na mech-tu! So mai daștis te cheres? De chi zor te cheres tuche mai but răspunsuri ca fiesavi întrunirea. Cadea, dacă ci san șiuto te des răspunso co începuto, va avena tut aver ocazii ji co sfârșito la întrunireaco. Cana pregătis-tu anda o studio anda O Turno de veghe, gândisar-tu sar arachel-pe i tema le articoloschi ande fiesavo paragrafo. Cadea, va daștia te des răspunsuri sea o timpo chichi încărel o studio. Mai but, daștis te pregătis iech răspunso ca le paragrafea ande save arachen-pe ciacimata mai phare hachiarimasco. (1 Cor. 2:10) Anda codoia că sile mai phare, va avena mai țâra răspunsuri, hai, cadea, va daștia mai sigo te des iech răspunso. Tha so daștis te cheres dacă, chiar cana cărdean sea cadala, vi pala chichiva întruniri diches că încă ci sanas șiuto te des iech răspunso? Mang le phrales cai încărel i întrunirea te șiol-tu te des răspunso ca iech anumime paragrafo.

11. So zuriarel-ame te cheras o verseto anda Filipeni 2:4?

¹¹ Citisar Filipeni 2:4. Tela inspirația le Devleschi, o apostolo Pavel zuriardea le creștinen te gândin-pe vi ca averengo miștimos. Sar daisaras te cheras cadaia cana sam ca le întruniri? Cana încăras ande amari goghi că vi aver camen te den răspunsuri.

12. Savo si o mai lașio modo te zuriaras amare phralen?

¹² Te gândisaras-ame: cana das duma amare  amalența, das duma numai amen corcore hai len ci mechas-le? Nici! Camas ca vi von te den duma amența. Sa cadea, ca le întruniri camas te mechas ca sea mai but phrala te sicaven pengo pachiamos prin le răspunsuri cai den-le. O ciacimos si, că cado si o mai lașio modo te zuriaras amare phralen. (1 Cor. 10:24) Te dichas sar daisaras te cheras cadaia.

13. So daisaras te cheras caște mechas chichi mai bute phralen te den răspunsuri?

¹³ I iechto buchi cai daisaras te cheras-la si te das răspunsuri harne. Cadea va așela timpo vi anda aver răspunsuri. Le phure de congregație hai aver phrala hai pheia cai sile de mai but timpo co ciacimos trebun te aven iech lașio exemplo. I duito buchi si, că chiar cana das răspunsuri harne, te na das duma anda prea but idei. Dacă va avela te phenas sea le sicaimata anda iech paragrafo, le coaveren ci va mai avela-len so te răspunzon. Sar exemplo, ande cado paragrafo si dine dui sfaturi: te das răspunsuri harne hai te na das duma anda prea but idei. Cadea că, o iechto jeno cai va dela răspunso daștilas te phenel numai iech anda cadal dui sfaturi.

14. So daștil te ajutil-ame te alosaras chichi-var vazdas o vast caște das răspunsuri? (Dich vi le imagini.)

¹⁴ Te avas goghiaver cana alosaras chichi-var vazdas o vast caște das răspunsuri. Dacă cheras cadaia prea butivar, o phral cai încărel i tema daștilas te simțol-pe oblighime te șiol-ame mai butivar, chiar cana aver phrala ci daisarde încă te den iech răspunso. Cadaia daștilas te peravel le coaveren hai te cherel-le te na mai vazden o vast. (Ecl. 3:7)

15. a) Sar trebulas te phiravas-ame dacă ci sam șiute te das răspunsuri? b) Sar daștin le phrala cai încăren teme ande save den-pe răspunsuri te sicaven lașimos caring savore? (Dich o chenarii „ Anda codola cai încăren teme cai si pușimata hai răspunsuri”.)

¹⁵ Cana mai but phrala vazden o vast caște den răspunsuri, daștil-pe că ci va avela te avas șiute te das răspunso de fiesavi data cana camas. Poiechdata, o phral cai încărel i tema ci  va daștila te șiol-ame nici măcar iechdata. Chiar cana cadaia daștilas te peravel-ame, te na pachias că le phrales siles vareso amența. (Ecl. 7:9)

16. Sar daisaras te zuriaras codolen cai den răspunsuri?

¹⁶ Dacă ci arăsas te das răspunsuri cadea de but sar camas amen, te așunas atento le răspunsuri cai den-le le coaver, hai pala i întrunirea, te așaras-le. Che șucar dumes phende anda sea o ilo daștin te zuriaren che phralen hai pheian sa cadea de but sar le răspunsuri cai daisardeanas te des-le. (Prov. 10:21) Cana așaras averen si iech aver modo prin savo zuriaras-ame iech averes.

17. a) Sar daștin le dada te ajutin penghe șiaven te pregătin răspunsuri potrivime lenghe bărșenghe? b) Cadea sar sicavel o materialo video, save si le ștar buchia cai trebul te cheras-le cana pregătisaras iech răspunso? (Dich i nota de subsol.)

¹⁷ Sar mai daisaras te zuriaras-ame iech averes ca amare întruniri? Dacă san dei sau dad, ajutisar che șiaven te pregătin răspunsuri potrivime lenghe bărșenghe. (Mat. 21:16) Poiechdata, ca le întruniri, del-pe duma anda buchia cai încăren catar le bare manușa, sar avenas pharimata andi căsătoria sau anda moralitatea. Tha, daștil-pe că va  avela iech paragrafo sau dui savende vi le șiave daștin te den răspunso. Sa cadea, ajutin tumare șiaven te hachiaren că ci va avena șiute te den răspunso de fiesavi data cana vazden o vast. Cadea, ci va avena perade cana va dichena că ci sile șiute te den răspunsuri. (1 Tim. 6:18) d

18. So daisaras te cheras caște na țârdas i atenția caring amende cana das răspunsuri? (Proverbe 27:2)

¹⁸ Savore anda amende daisaras te pregătisar răspunsuri cai așaren le Iehovas hai zuriaren amare phralen. (Prov. 25:11) Poiechdata, daisaras te phenas harnes vi prin so nachleam amen, tha trebul te las sama te na das duma prea but anda amende. (Citisar Proverbe 27:2; 2 Cor. 10:18) Mai mișto avelas, te ortosaras i atenția caring o Iehova, lesco Cuvânto hai lesco poporo. (Rev. 4:11) Si ciaces, dacă o pușimos catar o paragrafo manghel amendar te das iech răspunso personalo, ci trebul te încăras-ame parpale te cheras cadaia. Iech exemplo si o pușimos catar o paragrafo cai avel.

19. a) So miștimata si amen cana sicavas lașimos iech caring aver ca le întruniri? (Romani 1:11, 12) b) Sostar si cuci anda tute o privilegio te des răspunsuri?

¹⁹ Chiar cana ci si amen reguli anda so te phenas cana das răspunsuri ca le întruniri, savore trebul te das amari zor te zuriaras-ame iech averes. Cadaia însemnol te das răspunsuri mai butivar sau te avas mulțumime vi cana arăsas te das numai chichiva răspunsuri hai te bucurisaras-ame că vi aver daștin te sicaven pengo pachiamos. Dacă va avela te gândisaras-ame mai but ca o miștimos le coaverengo sar ca amaro, savore daisaras ‘te zuriaras-ame iech averes’ ca le întruniri. (Citisar Romani 1:11, 12.)