1. So si o paradiso spiritualo ande savo anas închinarea le Iehovasche hai so sam hotărâme te cheras?

 AGHIES si but manușa cai anen închinarea le Iehovasche ande iech than hai cheren but lașe buchia. Von cheren partea anda i organizația le Devleschi, cai milioanea manușa bucurin-pe catar iech ciaci pacea. Codola cai slujin le Iehovasche sile hotărâme ande pengo ilo te na mechen niciechdata i închinarea andini lesche. Sa cadea, von camen ca chichi mai but manușa te bucurin-pe catar iech amalimos chidino le Iehovasa hai vi avere manușența. Anda codoia, von acharen-len te aven pașa lende ande iech than unico. Anda so than si i duma? Anda o paradiso spiritualo!

2. Sostar daisaras te phenas că si iech bari buchi o șucar than cai cărdea-les o Iehova anda pesche manușa?

² I lumea le Satanoschi sili pherdi nasulimos, pericolea hai holi. (1 Ioan 5:19; Rev. 12:12) Tha, ando mașcar cadala lumeaco, o Iehova cărdea iech șucar than simbolico cai lesche manușa te anen lesche închinarea andi pacea hai chidines phangle iech averestar. Amaro lașio Del dichel chichi de but daștil cadai lumea te rimol le manușen, anda codoia vo cărdea cado than siguro cai daisaras te lulughioas hai te barioas ando pachiamos. Andi Biblia phenel-pe anda o paradiso spiritualo că si sar iech „garaimos” hai sar iech „bar mișto chinghiardi”. (Is. 4:6; 58:11) Ande cadal phare ghiesa, le manușa le Iehovasche sile zuriarde hai daștin te jian angle lesche ajutorosa. (Is. 54:14; 2 Tim. 3:1)

3. Sar pherdile-pe le dumes anda Isaia capitolo 65 andel ghiesa purane?

³ Prin o profeto Isaia, o Iehova sicadea so șucar traio va avela codolen cai beșen ando paradiso spiritualo. Cadai profeția anda Isaia o capitolo 65 pherdilea-pe i dintuni data ando bărș 537 a.a.e. Atunci le evrei cai sicade căința hai camle te anen pale închinarea le Iehovasche sas-le dine drom anda o Babilono  hai risaile ande pengo them. O Iehova sas-lo pașa pesche manușa hai ajutisardea-len te cheren anda o Ierusalimo o șucar than cai sas-lo mai anglal hai cărde ca o templo te avel pale o than ande savo anelas-pe închinarea uji le Iehovasche. (Is. 51:11; Zah. 8:3)

4. Sar pherel-pe ande amare ghiesa i profeția anda Isaia, capitolo 65?

⁴ I profeția anda Isaia astardea te pherel-pe i duito data ando bărș 1919 cana le manușa le Iehovasche andal ghiesa mai neve sas-le dine drom anda o Babilono o Baro. Pala codoia, astardea te avel cărdo o paradiso spiritualo cai zinghiardea-pe țâra po țâra pe sea i phuv. Sas cărde but congregații hai le manușa le Iehovasche sicade prin pengo phiraimos că o spirito sfânto cherelas buchi ande lenghi viața. Murșa hai jiuvlea saven mai anglal sas-len iech phiraimos nasul hai marenas-pe, line pe pende „i nevi personalitatea cai sas cărdi pala sar camel o Del”. (Ef. 4:24) Si ciaces, le mai but miștimata anda save dea duma o Isaia va pherena-pe cu sea andi lumea nevi. Tha, vi acana si amen bare miștimata. Te dichas save si chichiva anda lende hai sostar ci trebul te mechas cado șucar than cai anas închinarea le Iehovasche.

LE MIȘTIMATA CAI SI AMEN ANDO PARADISO SPIRITUALO

5. Cadea sar phenel-pe ando Isaia 65:13, so miștimata si amen ando paradiso spiritualo?

⁵ Sam sasteveste hai zuriarde ando pachiamos. O Isaia sicadea mișto so bari diferența si mașcar codola cai anen închinarea le Iehovasche ando paradiso spiritualo hai le manușa anda i lumea le Satanoschi. O Iehova lel sama ca lesche manușen te aven-len sea so trebul lenghe caște așen pașă lestar. (Citisar Isaia 65:13.) Vo del amen pesco spirito sfânto, pesco Lil hai but materialea bazome pi Biblia. Cadea amen ‘has, pias hai bucurisaras amen’. (Dich vi Revelația 22:17.) Tha codola cai nai-le ando paradiso spiritualo sile ‘bochale, trușale hai sile cărde lajiavestar’. Von ci prinjianen le Devles hai nai-len iech amalimos lesa. (Am. 8:11)

6. Cadea sar phenel-pe ando Ioel 2:21-24 save si chichiva buchia cai del amen o Iehova hai sar daisaras te țârdas miștimata anda lende?

⁶ Ande peschi profeția o Ioel dea duma anda chichiva buchia cai trebun ieche manușesche caște trail, sar avelas o ghiv, i mol hai o uleio de măsline. Cadaia sicavel că o Iehova del buhle vastesa pesche manușenghe sea so trebul lenghe caște avel-len iech pachiamos zuralo. (Ioel 2:21-24) O haben spiritualo si amenghe dino prin i Biblia hai amare publicații bazome pi Biblia, amaro site-o, le întruniri hai le congresea. Daisaras te țârdas miștimata anda cado haben spiritualo ande fiesavo ghies, cadea că, amen sam sasteveste hai zuriarde ando pachiamos.

7. So pherel amaro ilo bucuriatar? (Isaia 65:14)

⁷ Sam fericime hai mulțumime. Le manușa le Devlesche ‘den cingar’ bucuriatar anda codoia că von dichen cuci sea so cherel o Iehova anda lende. (Citisar Isaia 65:14.) Le șucar ciacimata hai promisiuni anda o Lil le Devlesco tha vi amari zurali speranța cai si amen anda codoia că o Cristos mulea anda amende, pherel amare ile bucuriatar. Cana das duma amare phralența hai pheianța anda cadal buchia, sam ciaces fericime! (Ps. 34:8; 133:1-3)

8. Save si dui buchia importanto anda o paradiso spiritualo?

⁸ I iubirea hai o phanglimos zuralo cai si mașcar le manușa le Iehovasche, si dui buchia importanto anda o paradiso spiritualo. Cado ‘phanglimos cai încărel amen chidine’, ajutil amen te hachiaras mai mișto sar va avela i viața andi lumea nevi. (Col. 3:14) Code i iubirea hai o phanglimos cai si mașcar amende va avela vi mai zuralo sar si acana. Iech phei phenel so țârdea lachi atenția ca le Martori le  Iehovasche cana dichlea-len i iechto data: „Ci arachlemas i fericirea nici barem ande mânri familia. I dintuni data cana dichlem sar sicavel-pe i iubirea sas mașcar le Martori le Iehovasche”. Oricon camel te avel ciaces fericime hai mulțumime trebul te anel închinarea le Iehovasche pașa lesche manușa ando paradiso spiritualo. Oriso pachialas i lumea andal manușa le Iehovasche, len silen iech lașio anav angla o Iehova hai angla leschi familia. (Is. 65:15)

9. Cadea sar phenel-pe ando Isaia 65:16, 17 so va avela le buchianța cai duchaven amen acana?

⁹ Sam liniștime ande amaro ilo. Ando Isaia 65:14, sicavel-pe că codola cai alosaren te așen avri anda o paradiso spiritualo ‘den cingar anda codoia că lengo ilo silo duchado hai rovaren-pe că lengo spirito silo phagărdo’. Vi le manușa le Iehovasche nachen prin pharimata cai duchavel-len. Tha amen jianas că, ji la urmă, cadala buchia ‘va avena bâstărde hai va avena garade angla le iacha le Devlesche’. (Citisar Isaia 65:16, 17.) O Iehova va chosela sea amare pharimata hai ando timpo i duch cai andine-la amenghe cadala ci va mai pusavela amaro ilo.

10. Sostar pachias că si iech baro miștimos te cheres partea anda i organizația le Iehovaschi? (Dich vi i imaginea.)

¹⁰ Chiar vi acana, daisaras te simțosaras iech bari liniștea ando ilo cana jias ca amare întruniri. Code amaro ilo silo zuriardo hai simțosaras că mechas palal le pharimata anda cadai lumea nasul. Daisaras te ajutisaras amare phralen hai pheian te avel-len cadai liniștea ando ilo cana sicavas iubirea, bucuria, pacea, lașimos, blândețea hai aver calități cai aven anda o rodo le spiritosco le Devlesco. (Gal. 5:22, 23) Te na bâstras niciechdata so baro miștimos si te cheras partea anda i organizația le Iehovaschi! Codola cai așen ando paradiso spiritualo, va dichena sar ando viitorii va pherela-pe cu sea i promisiunea le Devleschi că va cherela „ceruri neve hai iech phuv nevi”.

11. Cadea sar phenel-pe ando Isaia 65:18, 19, sar cherel amen te simțosaras amen o paradiso spiritualo cai cărdea-les o Iehova?

¹¹ Sam bucurime hai sicavas că si cuci anda amende so cărdea o Iehova. O Isaia phenel mai dur sostar daisaras ‘te avas voime hai te bucurisaras amen’ ande amaro paradiso spiritualo. Cado than simbolico sas-lo cărdo le Iehovastar. (Citisar Isaia 65:18, 19.) Cadea că, hachiaras sostar o Iehova camel te ajutisarel le manușen te înclen andal organizații cadala lumeache, cai ci sicavel-len o ciacimos anda i Biblia hai te anel-len ande amaro șucar paradiso spiritualo. I bari bucuria cai si amen ando ilo cherel amen te das duma vi averența anda le  miștimata cai si amen anda codoia că prinjianas o ciacimos. (Ier. 31:12)

12. So si ande chio ilo cana gândis tut ca le promisiuni anda Isaia 65:20-24 hai sostar?

¹² Sa cadea, i speranța cai si amen anda codoia că sam ando paradiso spiritualo si zurales cuci anda amende hai pherel amaro ilo bucuriasa. Te das amari zor te gândisaras amen ca le buchia cai va avela te dichas-len hai te cheras-len andi lumea nevi! I Biblia promitil amenghe: „Ci va mai avela . . . șiavorro cai piel thud savo te trail numai chichiva ghiesa, nici phuro manuș cai te na pherel pesche ghiesa”. Mai phenel că va avela te cheras amenghe chăra hai va avela te beșas ande lende, că va avela te șioas andi phuv răza hai va avela te has lengo rodo. Ci va avela te chinioas de ivea, anda codoia că va avela te avas binecuvântime le Iehovastar. Vo phenel amenghe că va avela te beșas andi siguranța, va avela te avas voime hai va avela amen iech ciacio scopo andi viața. O Iehova jianel so trebul lesche manușenghe „angla ca von te den cingar” hai va dela-len „sea so camel lengo ilo”. (Is. 65:20-24; Ps. 145:16)

13. Sar phenel-pe ando Isaia 65:25 că si le paruimata cai cheren-len le manușa cana astaren te slujin le Iehovasche?

¹³ Sam andi siguranța hai pacea. O spirito sfânto ajutisardea bute manușen cai sas-len iech phiraimos jiungalo te paruven cu sea penghi viața. (Citisar Isaia 65:25.) Von dine penghi zor te mechen palal sea le buchia nasul anda lende. (Rom. 12:2; Ef. 4:22-24) Si ciaces, le manușa le Iehovasche sile imperfecți cadea că poiechdata mai cheren greșeli. Cu sea cadala, o Iehova chidea ande iech than „manușa de orisavo felo” ande iech phanglimos zuralo pherdo iubirea hai pacea, cai ci daștil te avel rimosardo. (Tit 2:11) Numai amaro Del o mai zuralo daisardea te cherel cadai bari buchi!

14. Sar sicade-pe ciace le dumes anda Isaia 65:25 anda iech phral?

¹⁴ Tha, daștin le manușa te paruven-pe ciaces? Te dichas so viața sas ieche tărnes. Ji co 20 bărșa vo sas-lo phandado mai butivar. Vo cherelas but buchia nasul hai sas-les iech phiraimos imoralo. Vo sas-lo phandado anda codoia că ciorelas mașini, phagărelas hai cherelas vi aver buchia jiungale. Sas-lo gata te lel-pe co marimos oricasa. Cana așundea i dintuni data o ciacimos andai Biblia hai astardea te jial ca le întruniri le Martorenghe le Iehovasche, dea peschi sama că siles sostar te trail – te anel închinarea le Iehovasche ando paradiso spiritualo. Pala o bolimos gândisardea-pe butivar co verseto anda Isaia 65:25 hai arachlea-pe ande leste. Vo parudea-pe anda iech manuș cai marelas-pe hai sas-lo nasul sar iech ruv, ande iech manuș lașio sar iech bacro.

15. Sostar acharas vi averen te aven amența ando Paradiso spiritualo hai sar daisaras te cheras cadaia?

¹⁵ O verseto anda Isaia 65:13 astarel prin le dumes: „Cadea phenel o Rai Suverano Iehova”, hai o verseto 25 phandavel-pe cadea: „phenel o Iehova”. Cadea sar jianas le dumes le Iehovasche pheren-pe sea o timpo. (Is. 55:10, 11) O paradiso spiritualo silo deja iech ciacimos. Amaro Del dea amen iech familia phralența hai pheianța sar ci mai arachas ande aver than. Ande cadai familia, amen arachas pacea hai sam andi siguranța, chichi daștil-pe ande cadai lumea nasul. (Ps. 72:7) Anda codoia, camas te ajutisaras sea mai bute manușen te aven ande amari șucar familia creștino. Daisaras te cheras cadaia cana das sea amari zor te cheras discipoli. (Mat. 28:19, 20)

SAR DAISARAS TE ȚÂRDAS LE MANUȘEN TE AVEN ANDO PARADISO SPIRITUALO?

16. Sar sile țârdine le manușa ando paradiso spiritualo?

¹⁶ Fiesavo mașcar amende daștil te cherel mai șucar amaro paradiso spiritualo, ca le manușa  te camen te aven ande leste. Daisaras te cheras cadai buchi cana las amen pala o Iehova. Vo ci oblighil chanicas te avel ande leschi organizația. Tha, vo „țârdel” le manușen lașimasa peste. (Ioan 6:44; Ier. 31:3) Cana le manușa le ilesa lașio sichion anda sar silo ciaces o Iehova, von simțon-pe țârdine leste pe thaneste. Tha sar daisaras vi amen prin amare calități hai lașio phiraimos te țârdas le manușen ando paradiso spiritualo?

17. Sar daisaras te țârdas vi averen te aven ande amaro paradiso spiritualo?

¹⁷ Daisaras te țârdas le manușen te aven ando paradiso spiritualo cana phiravas amen lașimasa hai pherde iubirea amare phralența. Cana aven neve manușa ca amare întruniri, camas te arăsăn te hachiaren sa codoi buchi sar chichiva jene cai, daștil-pe că, găle ca le întruniri ando Corinto purano. Von phende: „O Del si ciaces mașcar tumende”. (1 Cor. 14:24, 25; Zah. 8:23) Cadea că, trebul te las amen mai dur pala o sfato cai phenel te avas „andi pacea iech averesa”. (1 Tes. 5:13)

18. So daștilas te țârdel le manușen ande amari organizația?

¹⁸ Trebul te das amari zor sea o timpo te dichas amare phralen hai pheian cadea sar dichel-len o Iehova. Daisaras te cheras cadaia cana alosaras te dichas mai but le lașe buchia cai cheren-len, ando than te dichas lenghe covlimata save, ji la urmă, ci va mai avena. Daisaras te lașiaras orisavo nehachiarimos cai si mașcar amende cana sicavas iubirea, cana sam sea o timpo ‘lașe iech averesa, pherde mila hai cana iertisaras amen iech averes anda sea o ilo’. (Ef. 4:32) Cadea, amaro paradiso spiritualo va țârdela le manușen cai camen te simțosaren cadai bari iubirea. a

 AȘ ANDO PARADISO SPIRITUALO

19. a) Pala sar dichas ando chenaro „ Von avile parpale ando paradiso spiritualo”, so phende chichiva jene cana risaile andi congregația creștino? b) So camas anda sea o ilo te cheras? (Dich vi i imaginea.)

¹⁹ Fiesavo mașcar amende dichas zurales cuci amaro Paradiso spiritualo. Vo ci sas-lo niciechdata cadea de șucar sar aghies hai ande leste si mai but manușa cai slujin le Iehovasche sar oricana. Camas te sicavas sea o timpo că dichas cuci cado șucar than cai cherdea-les o Iehova anda amende. Oricon camel te avel andi pacea, andi siguranța, mulțumime hai zuriardo ando pachiamos, trebul te avel ando paradiso spiritualo hai te na mechel-les niciechdata! Te na bâstras că o Satan cherel sea so daștil caște arăsas te mechas cado șucar than. (1 Pet. 5:8; Rev. 12:9) Tha, dacă așias lesche contra, vo ci va daștila te athavel amen. Cadea că, te cheras sea so încărel amendar caște las sama catar o șucarimos, o ujimos hai i pacea cai sile ande amaro paradiso spiritualo.