Pușlean-tume?
Sostar daisarde te slujin vi murșa neisraelito andi armata le regeschi David?
MAȘCAR le murșa neisraelito cai marenas-pe andi armata le Davidoschi sas vi o Țelec, o amonito, o Urie, o hetito, hai o Itma, o moabito. a (1 Cron. 11:39, 41, 46) Andi armata le Davidoschi sas vi cheretiți, peletiți hai gatiți. (2 Sam. 15:18) Fal-pe că le peletiți hai le cheretiți sas-le neamuri pașarde le filistenența. (Ezec. 25:16) Hai le gatiți țârdenas-pe anda o foro filisteano Gat. (Ios. 13:2, 3; 1 Sam. 6:17, 18)
Sostar mechlea o David cadale murșen străino te aven ande leschi armata? Vo pachialas anda sea o ilo că von sas-le loialo lesche, tha vi mai importanto, le Iehovasche. Ande iech lil phenel-pe andal cheretiți hai peletiți: „Von așile loialo le Davidosche ande le mai bare pharimata prin save nachlea ande pesco raimos”. (The New Interpreter’s Dictionary of the Bible) Sar sicade von penghi loialitatea? Cana „sea le murșa le Israelosche” mechle le reges David caște jian pala o Șeba, „iech manuș nasul, cai țârdelas opre le manușen te han-pe”, le cheretiți hai le peletiți așile de i rig le regeschi hai ajutisarde-les te așiavel i revolta astardi catar o Șeba. (2 Sam. 20:1, 2, 7) Aver data, o Adonia, o șiav le Davidosco, camlea te lel lestar o trono. Vi de cadai data, le cheretiți hai le peletiți așile loialo le Davidosche hai ajutisarde-les te șiol po trono le Solomonos, codo cas alosardea-les o Iehova te avel rege pala leste. (1 Regi 1:24-27, 38, 39)
O Itai, o gatito, sas iech aver murș neisraelito cai sicadea peschi loialitatea caring o David. O Itai hai lesche 600 murșa zurale așile pașa o rege David cana o Absalom, lesco șiavo, vazdea-pe contra lesche hai țârdea de peschi rig le murșen le Israelosche. Mai anglal, o David phendea caring o Itai că ci trebulas ca vi vo te marel-pe, anda codoia că sas-lo străino. Tha o Itai phendea lesche parpale: „Jiuvindo si o Iehova hai jiuvindo si mânro rai hai rege că oricai va jiala mânro rai hai rege code va avela vi chio slujitoro, ori caște trail ori caște merel!”. (2 Sam. 15:6, 18-21)
O Itai sas-lo loialo le Davidosche, o rege machlo le Iehovastar
Chiar cana le cheretiți, le peletiți hai le gatiți ci sas-le israelito, von jianenas ande pengo ilo că o Iehova si o ciacio Del, hai că o David si Lesco machlo. Daisaras te pachias ciaces, că o David sas-lo zurales voime că cadal murșa loialo așile pașa leste!
a Pala i legea le Devleschi scriime ando Deuteronomo 23:3-6, le amoniți hai le moabiți ci sas-le mechle te cheren partea anda i congregația le Israeloschi. Cu sea cadala, fal-pe că cadai legea referilas-pe ca o fapto te aven jene andai națiunea hai te aven-len sa codol drepturi sar le israelițen. Tha, cadal manușa neisraelito daștinas te chiden-pe ande iech than le manușența le Devlesche sau te beșen mașcar lende.
