1. So cărde but anda le slujitori le Iehovasche caște cheren mai but ande lesco servicio?

 SI AMEN but buchi te cheras ando servicio le Iehovasco ando timpo so o sfârșito cadale sistemosco pașiol. (Mat. 24:14; Luca 10:2; 1 Pet. 5:2) Savore camas te das le Iehovasche sea so si amen mai lașio. Anda codoia but jene camen te cheren mai but buchi ando servicio le Iehovasco. Chichiva camen te slujin sar pionieri, aver camen te slujin co Betelo sau andel proiectea de construcții. Sa cadea, but phrala den sea penghi zor caște arăsăn slujitori auxiliari sau phure de congregație. (1 Tim. 3:1, 8) O Iehova si zurales bucurime te dichel că lesco poporo camel te cherel sea mai but ande lesco servicio! (Ps. 110:3; Is. 6:8)

2. Sar daisaras te simțosaras-ame cana ci arăsas ca anumime obiectivea spiritualo?

² Daisaras te simțosaras-ame perade cana nachlea mai but timpo hai amen încă ci daisardeam te arăsas ca amare obiectivea spiritualo. Mai daisaras te avas perade vi cana arăsleam prea phure sau cana amari situația ci mai mechel-ame te mai primisaras anumime privilegii. (Prov. 13:12) Cadaia întâmplosardea-pe vi la Melissache *, cai camelas zurales but te slujil co Betelo sau te lel partea ca i școala andal Evanghelizatori le Regatosche. Voi phenel: „Som prea phuri caște avel-ma cadal privilegii hai așen anda mande numai iech suno. Anda codoia, po iechdata, simțosarav-ma peradi”.

3. So trebul te cheren unii creștini caște primisaren anumime privilegii?

³ Codola cai sile tărne hai sasteveste trebun te barion spiritualo hai te aven-le anumime calități angla so te daștin te primin  vi aver privilegii. Pe iech partea poate că sile goghiaver hai camen zurales te slujisaren, tha, pe aver partea, trebun te sichion te aven mai răbdători. Te cheren mișto penghi buchi hai te sicaven mai but respecto averenghe. Dacă cheres sea so daștis caște bariares le calități cai trebun tut, daștilas te primis iech privilegio bi te ajucăres tut. Te dichas i experiența ieche phraleschi po anav Nick. Cana sas-les biș bărșa, vo sas zurales perado anda codoia că ci sas numime slujitorii auxiliaro. Vo phenel: „Pachiaiem că vareso ci sas mișto manța”. Tha, o Nick ci mechlea-pe hai dea peschi zor te cherel mișto le buchia andi congregația hai andi predicarea. Aghies, vo slujil sar membro anda o Comiteto iecha Filialaco.

4. So va dichaia ande cado articolo?

⁴ San perado anda codoia că ci arăslean ca iech anumime obiectivo spiritualo? Dacă da, de duma le Iehovaia anda che pharimata. (Ps. 37:5-7) Mai but, mang le phralen maturi te phenen tuche sar daștis te cheres mai mișto chio servicio anda o Del hai pala codoia, de chi zor te cheres so phende tuche von. Cadea, va avela te primis o privilegio cai cames-les hai te arăsăs co obiectivo cai șiutean-les tuche. Tha, dacă ci daștis te primis iech privilegio, cadea sar i Melissa anda savi deam duma mai anglal, sar daștis te încăres chi bucuria? Caște arachas o răspunso cadale pușimaste, ande cado articolo va dichaia: 1) So daștil te anel tuche bucuria? 2) Sar daștis te bariares chi bucuria? hai 3) So obiectivea trebul te șios tuche caște avel tut mai but bucuria?

5. Soste trebul te gândisaras-ame caște avas bucuroși? (Eclesiasto 6:9)

⁵ Cadea sar phenel-pe ando Eclesiasto 6:9, daisaras te arachas bucuria dacă rodas-la ando than potrivime. (Citisar.) Iech manuș cai bucuril-pe catar so dichen lesche iacha silo mulțimime soia siles ande leschi situația. Tha, iech manuș cai phirel pala le buchia cai camel len rodel vareso cai ci va avela-les niciechdata hai ci arachel bucuria. So sichioas catar? Caște arachas bucuria, trebul te gândisaras-ame ca so si amen hai te șioas amenghe obiectivea savende daisaras te arăsas.

6. So ilustrarea va avela te dichas mai dur hai so va avela te sichioas anda late?

⁶ Daisaras te avas bucuroși soia si amen acana, chiar cana placial-ame te sichioas te cheras buchia neve? Da, daisaras ciaces te bucurisaras-ame le buchiandar cai ‘dichen-le amare iacha’. So ajutil-ame te cheras cadaia? Daisaras te arachas o răspunso cana gândisaras-ame ca i ilustrarea le Isusoschi andal talanți anda Matei 25:14-30. Va avela te dichas sar daștil te ajutil-ame cadai ilustrarea te arachas mai but bucuria ande amari situația.

7. Den duma harnes anda i ilustrarea le Isusoschi andal talanți.

⁷ Andi ilustrarea le Isusoschi, iech manuș cai trebulas te tiliarel dur achardea pesche sclaven hai dea len talanți caște bichinen hai te chinen lența. * O manuș jianelas so daștil te cherel fiesavo sclavo. Anda codoia ieche sclavos dea-les panji talanți, le coaveres dui hai o trinto sclavo primisardea iech talanto. Le dintune dui sclavi folosisarde mișto le talanți hai cărde mai but love lenghe raiesche. Tha, o trinto sclavo ci cărdea chanci le lovența cai sas lesche dine hai sas dino avri anda i buchi lesche raieschi.

8. Sostar daisardea te avel bucurime o iechto sclavo?

 ⁸ Sam siguri că o iechto sclavo simțosardea că si iech baro privilegio te avel lesche dine panji talanți catar pesco rai. Cadala sas but love hai cadaia sicavelas chichi de but pachiamos sas lesche raies ande leste. O duito sclavo daștilas te avel perado anda codoia că ci primisardea sa cadea de but talanți sar o iechto. Tha, so cărdea vo?

9. Cadea sar sicavel i ilustrarea, so ci cărdea o duito sclavo? (Matei 25:22, 23)

⁹ Citisar Matei 25:22, 23. O Isus ci phendea că o duito sclavo holiardea-pe sau că încărdea holi ande pesco ilo anda codoia că primisardea numai dui talanți. O Isus ci phendea că o sclavo rovardea-pe: „Sostar dea-ma mânro rai cadichi de țâra love? Som sa cadea de lașio sar o sclavo cai dea-les panji talanți. Dacă mânro rai ci dichel cuci so cherav, o mai mișto avelas te șioav andi phuv le dui talanți hai te dichav mânra buchiatar”.

10. So cărdea o duito sclavo le lovența?

¹⁰ Cadea sar o iechto sclavo, o duito hachiardea că so dea-les lesco rai te cherel sas zurales importanto hai cărdea phares buchi caște slujil lesche. Cadea că vo cărdea dui-var mai but anda le talanți. Leschi lași buchi hai o fapto că dea sea peschi zor andea lesche iech baro pochinimos. Lesco rai sas zurales bucurime hai chiar dea-les te cherel mai but buchia.

11. Sar daisaras te bariaras amari bucuria?

¹¹ Sa cadea, daștis te bariares chi bucuria cana cheres orisavi buchi cai si tuche dini ando servicio le Iehovasco. ‘Cher sea so  daștis’ andi lucrarea de predicare hai de sea chi zor andel buchia cai cheres-le andi congregația. (Fap. 18:5; Evr. 10:24, 25) Pregătisar-tu mișto anda le întruniri la congregațiache hai de răspunsuri cai zuriaren le coaveren. Dich sar iech buchi zurales importanto fiesavi tema cai si tuche dini andi întrunirea catar o mașcar le curchesco. Dacă si tuche dini iech buchi andi congregația, av punctualo hai demno pachiamasco. Ci trebul te pachias că iech buchi cai situche dini ci si cadea de importanto hai că ci meritil te des chio timpo anda late. Tha, de sea chi zor te aves vi mai lașio ande so cheres. (Prov. 22:29) Chichi va avela te cheres mai but buchia ando servicio le Iehovasco, cadichi va avela te barios mai but spiritualo hai va aveia vi mai bucurime. (Gal. 6:4) Sa cadea, va avela tuche mai ușoro te bucuris-tu codolența cai primin iech privilegio cai cames-les vi tu. (Rom. 12:15; Gal. 5:26)

12. So cărde i Melissa hai o Nick caște bariaren penghi bucuria?

¹² I Melissa, anda savi deam duma mai anglal, cai camelas te slujisarel co Betelo sau te jial ca i Școala andal Evanghelizatori le Regatosche, tha ci daisardea anda codoia că si prea phuri, phenel: „Cherav sea so daștiv ande mânro pionierato hai dav sea mânri zor te lav partea ca sea le forme andi predicarea. Cadaia anel manghe iech bari bucuria”. So ajutisardea le phrales Nick te nachel părdal le sentimentea cai cherenas-les te avel perado cana ci sas-lo numime slujitorii auxiliaro? „Lem sama te cherav mișto le privilegii cai sas-ma deja, sar avelas i predicarea hai te dav răspunsuri cai zuriaren ca le întruniri. Sa cadea, cărdem iech cererea anda o servicio co Betelo hai somas achardo te slujiv cade chiar ando bărș cai avilo.”

13. So miștimata va avena tut cana cheres sea so daștis ande le buchia cai si tuche dine aghies?

¹³ Dacă cheres mișto le buchia cai si tuche dine acana, va avela te primis aver mai bare ando viitorii. Cadai buchi daștilas te întâmplol-pe cadea sar sa vi le phraleia Nick. Tha, dacă nici, cadea sar i Melissa, daștil te avel tut mai but bucuria cana cheres sea so daștis ando servicio le Iehovasco. (Citisar Eclesiasto 2:24.) Hai mai but, va aveia zurales bucurime te jianes că anda amaro Rai, Isus Cristos, si zurales cuci sea so cheres.

14. So trebul te încăras ande amari goghi cana șioas amenghe obiectivea spiritualo?

¹⁴ Dacă cheras sea so daisaras ando servicio le Iehovasco acana, însemnol cadaia că ci trebulas te rodas te cheras mai but anda leste? Nici. Daisaras hai chiar trebul te șioas amenghe obiectivea spiritualo cai va cherena-ame te avas mai lașe andi predicarea hai va avela te ajutisaras mai but amare phralen hai pheian. Va avela te arăsas te cheras cadal obiectivea cana sam goghiaver hai sicavas modestia prin o fapto că șioas le coaveren mai opral de amende. (Prov. 11:2; Fap. 20:35)

15. Save si chichiva obiectivea cai daștin te ajutin tut te bariares chi bucuria?

¹⁵ So obiectivea daștias te șios tuche? Mang le Iehovas te ajutil tut te diches dacă daștis te arăsăs lende. (Prov. 16:3; Iac. 1:5) Daștias te gândis tut ca unele anda le obiectivea cai sas-le sicade ando  iechto paragrafo anda cado articolo, sar avelas: o pionierato auxiliaro sau regularo, o servicio co Betelo ori te les partea ca le proiectea de construcție. Sau daștias te sichios iech aver șib hai chiar te jias te predichis i vestea lași ande aver thana. Anda  mai but informații daștis te diches pale o capitolo 10 le lilesco: Organizime caște cheras i voința le Iehovaschi, hai de duma le phurența anda chi congregația. * Dacă des sea chi zor te arăsăs te cheres cadal obiectivea, chio progreso va dichiola-pe hai chi bucuria va bariola.

16. So daștis te cheres dacă acana ci daștis te șios tuche iech anumime obiectivo?

¹⁶ Tha, dacă ci daștis te șios tuche iech andal obiectivea sicade mai opre? Șiu tuche iech obiectivo saveste daștis te arăsăs. Mai dur va avela te dichas chichiva obiectivea cai daștin te ajutin tut.

17. Cadea sar phenel-pe ando 1 Timotei 4:13, 15, so daștil te cherel iech phral caște avel iech sicaitorii mai lașio?

¹⁷ Citisar 1 Timotei 4:13, 15. Dacă san iech phral, daștis te cheres buchi caște des duma mai șucar hai te sicaves mai mișto. Cana meches tut „astardo” catar o fapto te citisares mai mișto, te des duma mai șucar hai te sicaves, cadaia va avela iech binecuvântarea anda codola cai așunen tut. Studiisar hai șiu andi aplicarea fiesavi calitatea sicadi andi broșura Dedichisar-tu te citisares hai te sicaves. Studiisar fiesavi calitatea, iech po iech hai cher so sichilean cana încăres teme. Mang sfaturia catar o consilierii sau le coavere phurendar cai „cheren buchi phares anda o cuvânto hai anda o sicaimos”. * (1 Tim. 5:17) Cher eforturi na numai te sichios i lecția andai broșura, tha ajutisar vi codolen cai așunen tut te zuriaren pengo pachiamos  hai te cheres len te nachen ca acțiunea. Cadea, vi chi bucuria hai vi lenghi va bariola.

18. So daștil te ajutil-ame te arăsas ca amare obiectivea andi lucrarea de predicare?

¹⁸ Savoren si amen i responsabilitatea te predichisaras hai te cheras discipoli. (Mat. 28:19, 20; Rom. 10:14) Placialas tut te aves mai lașio ande cadai buchi importanto? Studiisar i broșura Citirea hai Sicaimos, hai șiu tuche obiectivea savende daștis te arăsăs hai pala codoia de chi zor te arăsăs lende. Daștis te sichios but buchia vi anda O Caieto anda i întrunirea „Viața creștino hai predicarea” hai andal materialea video sicade andi întrunirea anda o mașcar le curchesco, cai dichas sar te das duma andi predicarea. Șiu andi practica mai but buchia cai sichilean-le caște diches save si le mai lașe ande chio teritorio. Cana cheres so sichilean, va aveia bucurime te aves iech sicaitorii mai lașio. (2 Tim. 4:5)

19. Sar daștis te bariares calități creștino?

¹⁹ Te na bâstras că iech anda le mai importante obiective cai daisaras te șioas-le amenghe si te bariaras calități creștino. (Gal. 5:22, 23; Col. 3:12; 2 Pet. 1:5-8) Te phenas că cames te avel tut iech pachiamos mai zuralo. Caște arăsăs te cheres cadai buchi, daștis te citis le articolea anda amare publicații cai sicaven sar te zuriares chio pachiamos. Sa cadea, daștias te diches unele părți andai emisiunea JW Broadcasting^®, cai sicavel o exemplo pachiamasco ieche phralenghe hai pheianghe. Pala codoia gândisar-tu sar daștis te les tut pala lengo exemplo.

20. So daisaras te cheras caște bariaras amari bucuria hai ca le sentimentea cai cheren-ame te avas perade te na mai aven cadea de bare?

²⁰ Savore camas te cheras mai but anda o Iehova de sar cheras aghies. Andi lumea nevi va avela te slujisaras lesche sea amare zuralimaia. Ji atunci, dacă cheras sea so daisaras caște slujisaras le Iehovasche, amari bucuria va bariola, hai le sentimentea cai cheren-ame te avas perade ci va mai avena cadea de bare. Hai mai but sar orisoste, va avela te anas pachiv hai te așaras le Iehovas amaro ‘fericime Del’. (1 Tim. 1:11) Cadea că, te arachas bucuria ande le buchia cai daisaras te cheras-le ando servicio le Iehovasco!