1. So daștil te ajutil-ame te prinjianas le profeții cai arachen-pe andi Biblia?

 „CIAIOL-MAN te prinjianav le profeții cai sile andi Biblia”, phenel o Ben, iech tărno phral, anda savo deam duma ando articolo cai nachlea. Pachias vi tu sa cadea? Sau pachias că le profeții sile prea phare caște aven hachiarde hai chiniaren-tu? Cu sea cadala, cana hachiares sostar camlea o Iehova ca cadal profeții te aven andi Biblia, daștis te paruves o modo ande savo diches le buchia.

2. Anda so va dela-pe duma ande cado articolo?

² Ande cado articolo, va avela te hachiaras sostar si importanto te prinjianas le profeții biblico hai sar daisaras te rodas te hachiaras-le. Pala codoia, va avela te dichas dui profeții anda o lil Daniel hai sar o fapto te hachiaras-le ajutil-ame încă de acanara.

3. So trebul te cheras caște hachiaras le profeții?

³ Caște hachiaras le profeții biblico, trebul te mangas ajutoro. Gândisar-tu că jias ande iech than cai ci prinjianes-les hai manglean ieche amales cai jianel te phirel othar te jial tusa. Vo jianel mișto cai san hai cai îngărel fiesavo drom. Si ciaces, sanas voime cana chio amal camlea te jial tusa! Cadea sar cado amal, o Iehova jianel ande so timpo traisaras hai so mai ajucărel-ame po drom cai si angla amende. Cadea că, caște hachiaras le profeții biblico, trebul te mangas le Iehovas pherde umilința te ajutil-ame. (Dan. 2:28; 2 Pet. 1:19, 20)

4. Sostar lea sama o Iehova ca ande lesco Cuvânto te aven scriime le profeții? (Ieremia 29:11) (Dich vi i imaginea.)

⁴ Cadea sar iech lașio dad, o Iehova camel ca lesche șiaven te avel-len iech șucar viitorii. (Citisar Ieremia 29:11.) Tha, o Iehova, jianel mai mișto sar orisavo dad so va avela ando viitorii hai siles sea o timpo ciacimos. Vo camel ca vi amen le manușa  te jianas le buchia importanto cai va avena. Anda codoia, lea sama ca ande lesco Cuvânto te aven scriime le profeții. (Is. 46:10) Cadala si daruri cai sicaven i iubirea amare Dadeschi cerisco. Tha, sostar daisaras te pachias că le profeții va pherena-pe ciaces?

5. So daștil te sichiol iech tărno catar o Max?

⁵ Ca i școala, le tărne cai sile Martori train mașcar manușa cai ci sicaven pachiv caring i Biblia. Lengo phiraimos hai le buchia cai von phenen-le daștin te șion co zumaimos o pachiamos amare tărnengo. Prin cadaia nachlea vi iech phral, po anav Max. Vo phenel: „Cana somas tărno șiavo, astardem te pușav-man dacă i religia mânre dadenghi si i religia ciaci hai dacă i Biblia avel catar o Del”. So cărde lesche dada? O Max mai phenel: „Von dine duma manța pherde lașimos, chiar cana jianglem că sas-le zurales îngrijorime anda mande”. Le dada le phralesche Max sicade lesche andi Biblia le răspunsuri ca le pușimata cai sas-les. Tha, cărdea vi vo vareso. O Max anel pesche andi goghi: „Sichilem corcoro le profeții biblico hai dem duma vi avere tărnența cai sile Martori anda so sichilem. Cadea, zuriardem mânro pachiamos că i Biblia avel catar o Del”.

6. So trebul te cheres dacă astardean te pușes-tu dacă andi Biblia arachel-pe o ciacimos?

⁶ Dacă, cadea sar o Max, astardean te pușes-tu dacă andi Biblia arachel-pe o ciacimos, ci trebul te simțosares-tu doșalo. Tha si importanto te cheres vareso. Cado pușimos cai vazdel-pe ande chi goghi si sar i rugina. Cana meches-les code, daștil te rimosarel vareso zurales cuci. Caște duriares orisavi rugina cai zumavel chio pachiamos, trebul te pușes-tu: „Pachiav so phenel i Biblia anda o viitorii?”. Dacă ci pachias cadaia ande chio ilo, trebul te prinjianes mai mișto le profeții cai pherdile-pe deja. Sar daștis te cheres cadaia?

7. Sostar si o Daniel iech lașio exemplo anda sar te prinjianas mai mișto le profeții? (Daniel 12:10) (Dich vi i imaginea.)

⁷ O Daniel si iech lașio exemplo anda sar te prinjianas mai mișto le profeții. Vo cărdea cadaia ieche ileia ujo, caște prinjianel o ciacimos. Sa cadea, vo sas-lo umilo hai jianglea că o Iehova ajutil te hachiaren ciaces le profeții numai codolen cai prinjianen-les hai așunen lestar. (Dan. 2:27, 28; citisar Daniel 12:10) O Daniel sicadea umilința vi anda codoia că rodea o ajutorii le Iehovasco ando manglimos. (Dan. 2:18) Mai but, o Daniel sichilea atento le profeții. Vo rodea te prinjianel sea mai mișto le Lila Sfânto cai arachenas-pe ande lesche ghiesa. (Ier. 25:11, 12; Dan. 9:2) Sar daștis te les-tu pala o Daniel?

8. Sostar roden chichiva manușa te prinjianen le profeții, tha so trebul te cheras amen?

⁸ Gândisar-tu sostar cames te prinjianes le profeții. Dacă cames te jianes mai but andal profeții anda codoia că rodes te prinjianes o ciacimos, daștis te pachias că o Iehova va ajutila-tu te hachiares-le. (Ioan 4:23, 24; 14:16, 17) Cu sea cadala, si manușa cai roden te prinjianen le profeții caște arachen vareso  cai sicavel că i Biblia ci avel le Devlestar. Cadea, von arăsăn te pachian că silen o drepto te alosaren von corcore so si mișto hai so si nasul caște train penghi viața cadea sar camen. Tha, amen trebul te das amari zor te hachiaras le profeții ieche ileia ujo. Avreal cadaia mai trebul amenghe vareso.

9. So va ajutil-ame te hachiaras le profeții biblico? Explichin.

⁹ Av umilo. O Iehova phenel că va ajutila codolen cai sile umilo. (Iac. 4:6) Cadea că, trebul te mangas lesco ajutorii caște hachiaras le profeții biblico. Sa cadea, trebul amenghe umilința caște hachiaras că o Iehova alosardea te del-ame haben spiritualo co timpo potrivime prin pesco sclavo fidelo. (Luca 12:42) O Iehova si iech Del cai ciaiol-les i ordinea, cadea că daisaras te pachias ciaces că vo folosil iech corcori sursa caște ajutil-ame te hachiaras le ciacimata cai arachas-le ande lesco Cuvânto. (1 Cor. 14:33; Ef. 4:4-6)

10. So sichioas catar i Esther?

¹⁰ Rode atento te prinjianes mai but. Alosar iech profeția savi cames te hachiares-la hai rode mai but buchia anda late. Cadea cărdea vi i Esther, iech phei anda savi deam duma ando articolo cai nachlea. Voi camelas te prinjianel mai mișto le profeții cai sicavenas cana trebulas te avel o Mesia. I Esther phenel: „Cana sas-man 15 bărșa, astardem te rodav buchia cai sicaven că cadal profeții sas-le scriime angla te avel o Isus pi phuv”. So citisardea andal Suluri catar i Marea Muli zuriarde laco pachiamos ande cado ciacimos. I Esther phenel: „Chichiva anda cadal suluri sas-le scriime angla o Cristos, cadea că, le profeții scriime code aven ciaces catar o Del”. I phei mai phenel: „Trebuisardea te citiv mai butivar chichiva buchia caște hachiarav-le”. Tha voi sili voime că dea peschi zor te cherel cadaia. Pala so rodea atento te prinjianel mai but profeții, voi phenel: „Daisardem te dichav mânre iachența că sea so phenel-pe andi Biblia si ciaces”.

11. So miștimata si amen cana dichas amare iachența că sea so phenel i Biblia si ciaces?

¹¹ Cana dichas sar chichiva profeții anda o Cuvânto le Devlesco pherdile-pe deja, zuriarel-pe amaro pachiamos ando Iehova hai andi îndrumarea cai avel lestar. Sa cadea, le profeții ajutin-ame te dichas pherde pachiamos caring amari șucar speranța anda o viitorii, chiar cana aghies nachas prin pharimata. Mai dur, va avela te dichas harnes dui andal profeții scriime catar o Daniel, cai pheren-pe tela amare iacha. Cana hachiaras-len daisaras te alosaras goghiaver so te cheras.

12. Cas reprezentin le naia catar le pânre anda ‘o sastr hamisardo phuveaia covli’? (Daniel 2:41-43)

¹² Citisar Daniel 2:41-43. Ando suno cai o Daniel cărdea-les prinjiando le regesche Nebucadnețar, le naia le pânrenghe catar i statuia sas-le anda ‘sastr hamisardo phuveaia covli’. Dacă cheras o phanglimos mașcar cadai profeția hai vi aver profeții anda o lil Daniel hai Revelația, hachiaras că le naia catar le  pânre reprezentin o zuralimos anglo-americano, o mai baro zuralimos cai rail aghies. Cana del duma anda cado regato, o Daniel phenel că „va avela pe iech partea zuralo hai pe iech partea covlo”. Tha, sostar si pe iech partea covlo? Anda codoia că le manușa simplo, cai reprezentin i phuv covli, covliaren lesco zuralimos hai ci mai mechen-les te avel cadea sar o sastr. b

13. So bare ciacimata daisaras te sichioas anda cadai profeția?

¹³ Prin so phendea o Daniel anda i statuia cai dichlea-la o rege Nebucadnețar ando suno, tha vi anda le naia catar le pânre, sichioas chichiva bare ciacimata. Ando iechto than, o zuralimos anglo-americano sicadea prin mai but buchia că silo zuralo. Sar exemplo, cado zuralimos sas-lo mașcar le națiuni cai câștighisarde le dui războaia mondialo. Cu sea cadala, laco zuralimos sas hai va avela vi mai dur covliardo anda codoia că le manușa cai beșen code maren-pe mașcar pende hai contra o guverno. Ando duito than, cado si o palutno zuralimos mondialo. Na pa but timpo, o Regato le Devlesco va chosela sea le guvernea le manușenghe. Chiar cana, aver națiuni maren-pe poiechdata le Zuralimaia Mondialo Anglo-Americano, von ci va daștina te len lesco than. Tha, catar jianas cadai buchi? I Biblia phenel, că le naia catar le pânre – o zuralimos anglo-americano – va avela nichiardo catar o Regato le Devlesco, reprezentime prin iech „bar”, hai na catar aver zuralimos. (Dan. 2:34, 35, 44, 45)

14. Sar ajutil-ame i profeția le Danieloschi te alosaras goghiaver so te cheras?

¹⁴ Pachias că i profeția le Danieloschi anda le naia catar le pânre anda sastr hai andai phuv covli si demno pachiamaschi? Dacă da, cadaia va dichiola-pe anda sar alosares te trais chi viața. Ci va avela te des chi zor te cheres sea mai but love sau te chides barvalimata anda codoia că jianes că na pa but timpo cadai lumea nasul va nachela. (Luca 12:16-21; 1 Ioan 2:15-17)Sa cadea, va ajutila-tu vi te hachiares chichi de importanto si te phenes hai te sicaves le manușenghe i vestea lași. (Mat. 6:33; 28:18-20) Pala so sichilean mai mișto cadai profeția, daștis te pușes-tu: „Sicaven le buchia cai alosarav-le ande mânri viața că pachiav anda sea o ilo că o Regato le Devlesco va chosela sea le guvernea le manușenghe?”.

15. Con si „o rege le nordosco” hai „o rege le sudosco” ande amare ghiesa? (Daniel 11:40)

¹⁵ Citisar Daniel 11:40. Ando Daniel, o capitolo 11, del-pe duma anda dui regi, sau zuralimata politico, cai maren-pe iech avereia anda con te avel o mai baro. Dacă cheras o phanglimos mașcar cadai profeția hai aver andai Biblia, daisaras te hachiaras că „o rege le nordosco” si i Rusia hai codola cai sile de lachi rig, hai „o rege le sudosco”, si o Zuralimos Mondialo Anglo-Americano. c

16. Prin so pharimata nachen codola cai beșen andel thema cai rail „o rege le nordosco”?

¹⁶ „O rege le nordosco” așel zurales contra le slujitorenghe le Iehovasche cai sile tela lesco raimos. Chichiva sas-le marde hai chiar phandade anda lengo pachiamos. Tha, ando than te aven darade catar so cherel „o rege le nordosco”, von zuriarde pengo pachiamos ando Iehova hai ande lesco Cuvânto. Sostar? Anda codoia, că von jianen că o fapto că așel lenghe contra pherel i profeția cai cărdea-la  o Daniel. d (Dan. 11:41) Cadaia zuriarel-ame te dichas vi mai ciaci amari speranța hai te așias loialo le Iehovasche.

17. Prin so pharimata nachen le slujitori le Iehovasche cai train code cai rail „o rege le sudosco”?

¹⁷ Andel puraimata, vi „o rege le sudosco” așilea contra le slujitorenghe le Iehovasche. Andi dintuni partea anda o secolo 20, but phrala sas-le phandade anda codoia că ci camle te jian ando războio. Sa cadea, chichiva șiave Martori sas-le șiudine avri andal școli anda codoia că ci salutisarde o drapelo. Tha andel palutne bărșa, le slujitori le Iehovasche cai train tela o zuralimos cadale regesco, nachen prin aver zumaimata garade. Sar exemplo, cana si campanii politico, iech creștino daștilas te avel athado te încărel ca iech partido politico sau ca iech jeno cai trebulas alosardo. Daștil-pe că ci va arăsăla cadea de dur caște jial co voto, tha ande leschi goghi sau ilo, vo daștilas te încărel ca iech partido. Cadea că, si importanto te na hamisaras-ame  andi politica na numai prin so cheras, tha vi prin so gândisaras hai simțosaras. (Ioan 15:18, 19; 18:36)

18. So si ande amaro ilo cana dichas o marimos mașcar „o rege le nordosco” hai lesco dușmano? (Dich vi le imagini.)

¹⁸ Codola cai ci pachian andel profeții biblico daștinas te aven darade cana dichen că ‘o rege le sudosco pusavel-pe le regeia le nordosco’. (Dan. 11:40, n.s.) Le duien silen cadea de but arme nuclearo că daștinas te chosen sea so si pi phuv. Tha jianas că o Iehova ci va mechela-len te cheren cadaia. (Is. 45:18) Cadea că, le marimata cai si mașcar cadal dui regi ci daraven-ame, tha zuriaren amaro pachiamos. So si aghies andi lumea sicavel că o sfârșito cadale sistemosco si pașă.

19. So trebul te hachiaras cana si duma andal profeții biblico?

¹⁹ Aghies, încă ci jianas sar va pherena-pe chichiva profeții biblico. Nici chiar o profeto Daniel ci hachiardea sea le dumes cai scriisardea-le. (Dan. 12:8, 9) Tha o fapto că amen ci hachiaras cu sea iech profeția, ci însemnol că cadaia ci va pherela-pe. Daisaras te pachias că o Iehova va sicavela amenghe so trebul te jianas co mai lașio timpo, cadea sar cărdea vi andel puraimata. (Am. 3:7)

20. So bare profeții biblico va pherena-pe na pa but timpo hai so trebulas te cheras vi mai dur?

²⁰ Na pa but timpo, le națiuni va phenena „pacea hai securitatea”. (1 Tes. 5:3) Atunci, le zuralimata politico la lumeache va risarena-pe contra i religia neciaci hai va chosena-la cu sea. (Rev. 17:16, 17) Pala codoia, von va atachina vi o poporo le Devlesco. (Ezec. 38:18, 19) Cadal buchia va cherena te astarel o palutno războio, o Armaghedono. (Rev. 16:14, 16) Daisaras te pachias că cadal buchia sile zurales pașă. Ji atunci, te sicavas mai dur amari recunoștința caring amaro Dad cerisco, te încăras amaro dichimos caring le profeții biblico hai te ajutisaras vi averen te cheren sa cadea.