O apostolo Pavel scriisardea le creștinenghe anda Tesalonic: „Cana varecon ci cherel so phendem tumenghe ande cado lil, te șion lesche iech semno” (2 Tes. 3:14). Mai anglal, le phure phenenas cana te cheras cadaia. Cana varecon ci camlea te cherel so phenel i Biblia chiar cana sas lesche dine sfaturi mai butivar, le phure daștinas te încăren iech cuvântarea caște jianel te lel sama i congregația. Pala codoia fiesavo vestitoro, trebulas te na așel codole manușesa avreal le întruniri hai i predicarea.

Cu sea cadala, cadai buchi trebul te paruvel-pe. Acana hachiaras că so phendea o Pavel te cheras, si iech buchi cai trebul fiesavo creștino te alosarel-la corcoro pala so jianel mișto i situația. Cadea că, le phure ci trebun te încăren iech cuvântarea caște lel sama i congregația. Sostar parudea-pe cado hachiarimos? Te dichas anda so dea duma o Pavel cana dea cado sfato anda 2 Tesaloniceni 3:14.

O Pavel dichlea că chichiva anda cadai congregația „ci phiraven-pe pachivales.” Vo dea-len sfaturi anda o Lil le Devlesco, tha von ci camle te așunen. Cana sas mai anglal lende, vo phendea: „Cana varecon ci camel te cherel buchi, nici te na hal”. Cu sea cadala, chichiva ci camle te cheren buchi caște avel-len so trebul-len chiar cana daisarde te cheren buchi. Mai but, von șionas-pe ande averenghe buchia. Sar trebunas le creștini te phiraven-pe le manușența sar cadala? (2 Tes. 3:6, 10-12).

„Te șion lesche iech semno” phendea o Pavel. I duma grecisco camel te phenel că trebul das amari sama con si cadal manușa hai te na mechas-len te cheren amen te gândisaras sar lende. O Pavel phendea cadal buchia sea la congregațiache na numai le phurenghe. (2 Tes. 1:1; 3:6) Cadea că, fiesavo creștino trebulas te dichel codolen cai ci camen te așunen catar le sfaturi anda o Lil le Devlesco hai te alosarel corcoro ‘te na mai avel amal’ codolesa cai ci phiravel-pe pachivales.

Trebul te hachiaras că le phrala phirade-pe lesa sar varecasa cai sas duriardo andai congregația? Na, o Pavel mai phendea: „na așiaven tumen te den lesche sfaturi sar ieche phralesche.” Cadea că fiesavo creștino va dela duma lesa andi predicarea hai co întruniri tha va alosarela te na cherel aver buchia lesa. Sostar? „Caște avel lesche lajiav”, cadea sar phendea o Pavel. Cana ci mai așias cadale phralesa, daștil-pe că va avela lesche lajiav le buchiandar cai cherel-len hai va paruvela-pe. (2 Tes. 3:14, 15).

Sar daștin le creștini aghies te cheren so phendea o Pavel? Mai anglal trebul te jianas ciaces dacă codo manuș ‘ci phiravel-pe pachivales’ pala sar phendea o Pavel. Vo ci dea duma anda codola cai alosaren diferime amendar pala lenghi conștiința hai cai alosaren le buchia cai ciaion-len. Hai vo ci dea duma nici anda codola cai duchade amaro ilo. Mai sigo vo gândisardea-pe codolende cai alosarde corcore te na așunen catar le sfaturi dine le Devlestar.

Aghies, cana dichas ieche creștinos cai ci așunel le Iehovastar, a amen va avela te alosaras te na avas mai dur amala lesa adică te na beșas lesa avreal le întruniri hai i predicarea. Anda codoia că si amaro alosarimos, ci camas te das duma averența anda cadal buchia, numai codolența anda amari familia. Hai, va avela te das duma lesa mai dur ca le întruniri hai andi predicarea. Cana va paruvela pesco phiraimos, va avela te avas pale amala lesa.