1. So si „i pacea le Devleschi” hai sar ajutil-ame? (Filipeni 4:6, 7)

 SI IECH pacea cai le manușa anda cadai lumea ci prinjianen-la. Si „i pacea le Devleschi”, adică i pacea cai pherel amaro ilo anda codoia că si amen iech amalimos chidino amare Dadeia cerisco. Cana si amen i pacea le Devleschi, ci daras chancestar. (Citisar Filipeni 4:6, 7.) Voi ajutil-ame te aven amen șucar amalimata codolența cai iubin-les hai te bucurisaras-ame catar iech șucar amalimos le „Devleia la paceaco”! (1 Tes. 5:23) Cana prinjianas amare Dades cerisco, pachias-ame ande leste hai așunas lestar, leschi pacea ajutil-ame ca amaro ilo te avel liniștime cana nachas prin pharimata.

2. Sostar daisaras te pachias că daștil te avel amen i pacea le Devleschi?

² Daisaras ciaces te arachas pacea cana nachas prin situații phare, sar avenas nasfalimata, dezastrea naturalo, tulburări civilo sau persecuții? Cadal pharimata daștin te pheren amaro ilo daratar. Cu sea cadala, o Isus dea iech lașio sfato pesche continuatorenghe: „Te na îngrijoril-pe tumaro ilo, hai nici te na chidel-pe daratar”. (Ioan 14:27) Le creștini de aghies len-pe pala o sfato le Isusosco. Le ajutoroia le Iehovasco, von daștin te arachen pacea cana nachen prin bare pharimata.

3. Sar daștil te ciorel amari pacea iech nasfalimos?

³ Iech nasfalimos cai lel-pe sau iech nasfalimos cai pherel sea i phuv daștil te paruvel cu sea amari viața. Te gândisaras-ame sar parudea i pandemia de COVID-19 i viața bute manușenghi. Iech studio sicavel că mai but sar dipaș andal manușa cai line partea leste, phende că sas lenghe zurales pharo te soven andi pandemia. Cana astardea cado baro nasfalimos, barilea zurales but o număro le manușengo cai silen depresia, cai len droguri sau pien prea but, cai maren-pe andi familia hai cai camle te len penghi  viața. Dacă vi ando than cai beșes astarel iech nasfalimos, sar daștis te încăres tela controlo che îngrijorări hai te simțosares i pacea le Devleschi?

4. Sar ajutil-ame i profeția le Isusoschi andal palutne ghiesa te arachas pacea?

⁴ O Isus phendea de mai anglal că, andel ghiesa de palal, va avena nasfalimata „anda iech than ande aver”. (Luca 21:11) Sar ajutil-ame cadai profeția te arachas pacea? Amen ajucăras-ame te astaren bare nasfalimata pe sea i phuv, anda codoia că amen hachiaras că cadea pherel-pe so phendea o Isus. Cadea că, si amen sea le motivea te las-ame pala o sfato cai vo dea-les le creștinenghe cai avenas te train ande cadal palutne ghiesa: „Len sama te na daran”. (Mat. 24:6)

5. a) Cadea sar sicavel-pe ando Filipeni 4:8, 9, anda so trebulas te mangas-ame le Iehovasche dacă ando than cai beșas astarel iech baro nasfalimos? b) Sar daștin te ajutin-ame le înregistrări audio la Bibliache?

⁵ Cana bi te ajucăras-ame astarel iech baro nasfalimos, daisaras te simțosaras iech bari îngrijorarea ando ilo sau chiar te daras. Vi iech phei po anav Desi b nachlea prin cadaia. Pala so laco cac, laco văro hai chiar laco doctorii mule de COVID-19, voi daralas zurales te na perel vi voi nasfali hai te del o viruso vi pesca deiache cai sas phuri. Sa cadea, voi daralas te na așel bi buchiaco hai cadea te na mai aven-la love te lel sama po chăr hai te chinel haben. Cadal phare gânduri astarde te pheren lachi goghi cadea de but, că ci mai daștilas te sovel. Tha i Desi arachlea pale peschi pacea. Sar? Voi șiordea pesco ilo angla o Iehova ando manglimos. Voi manglea-les te ajutil-la te încărel peschi pacea ando ilo hai te pherel peschi goghi buchianța lașe. (Citisar Filipeni 4:8, 9.) I Desi așundea le Iehovas sar dea duma laia prin le înregistrări audio la Bibliache. Voi phenel: „I șucar vocea codolenghi cai citinas duriardea mânre phare gânduri hai andea manghe andi goghi că o Iehova lel sama pe mande”. (Ps. 94:19)

6. Sar daștin te ajutin-ame o studio personalo hai le întruniri la congregațiache?

⁶ Si ciaces, cana si iech nasfalimos peste sea, na-i sea o timpo ușoro te cheras le buchia cai cărdeam-le mai anglal. Tha te na mechas niciechdata ca cadai buchi te cherel-ame te na mai studiisaras personalo sau te na jias ca le întruniri. Le experiențea cai sile sicade ande amare publicații hai materialea video, anen ande amari goghi că amare phrala hai pheia așen zurale ando pachiamos, chiar cana nachen prin pharimata sar cadala. (1 Pet. 5:9) Le întruniri la congregațiache daștin te ajutin-ame te pheras amari goghi buchianța lașe andai Biblia. Sa ca le întruniri, daisaras te zuriaras averen hai te avas zuriarde. (Rom. 1:11, 12) Cana gândisaras-ame sar ajutisardea o Iehova pesche  slujitoren cana sas-le nasfale, darade sau corcore, amaro pachiamos zuriarel-pe că vo va avela vi pașa amende cana nachas prin pharimata hai va ajutila-ame.

7. So daisaras te sichioas catar o apostolo Ioan?

⁷ De chi zor te încăres o phanglimos che phralența hai pheianța andai congregația. Cana astarel iech nasfalimos cai lel-pe, daștil-pe că trebul te așias dur vi catar amare phrala. Daisares te simțosares-tu cadea sar o apostolo Ioan, cai camelas te dichel pesche amales o Gaius hai te beșen ande iech than. (3 Ioan 13, 14) Cu sea cadala, o Ioan hachiardea că, iech timpo, ci daștilas te dichel le Gaiusos. Tha vo ci mechlea-pe perado hai cărdea sea so daisardea andi situația ande savo sas-lo: vo scriisardea caring o Gaius iech lil. Dacă ci daștis te jias te diches che phralen hai pheian, de chi zor te des duma lența prin o telefono, apeluri video sau prin mesajea. Cadea, ci va avela te simțosares-tu corcoro hai va avela tut mai but pacea. Dacă chi goghi sili pherdi phare gânduri, de duma le phurența hai mech-len te zuriaren-tu. (Is. 32:1, 2)

8. Sar daștil iech dezastro naturalo te ciorel amari pacea?

⁸ Dacă nachlean vroiechdata prin iech dezastro naturalo, sar avelas iech inundația, iech izdraimos phuveaco sau iech iag, daștil-pe că sanas darado anda mai but timpo. Dacă hasardean varecas drago ando merimos sau hasardean che buchia ande codo dezastro, daștil-pe că simțosardean iech bari duch ando ilo, sanas bi speranțaco hai chiar sanas holiardo. Tha cadaia ci sicavel că san iech manuș cai iubil le love sau că hasardean chio pachiamos. Si normalo te simțosares-tu cadea cana naches prin iech situația cadea de phari. (Iov 1:11) Cu sea cadala, daștis te araches pale pacea. Sar?

9. Sar pregătin-ame le dumes cai phendea-le o Isus caște daisaras te nachas părdal le dezastrea naturalo?

⁹ Te na bâstras so profeția cărdea o Isus. Na cadea sar le manușa andai lumea, cai pachian că iech dezastro ci va afectila len personalo niciechdata, amen ajucăras-ame te aven sea mai but dezastrea hai vi amen te nachas prin lende. O Isus phendea de mai anglal pesche continuatorenghe că, angla so te avel o sfârșito, va avena bare „izdraimata phuveache” hai aver dezastrea. (Luca 21:11) Sa cadea, vo cărdea i profeția că „o nasulimos va bariola”, hai cadaia dichiol-pe aghies anda o fapto că le manușa maren-pe, mudaren-pe hai si atacuri teroristo. (Mat. 24:12) Tha o Isus ci phendea niciechdata că cadal pharimata avenas te aven numai pe codola cai o Iehova mechlea-le. O ciacimos si că but slujitori loialo le Iehovasche nachle prin dezastrea. (Is. 57:1; 2 Cor. 11:25) O Iehova ci feril-ame prin iech miracolo catar sea le dezastrea, tha vo ajutil-ame te avel amen pacea ando ilo hai te așias liniștime.

10. Sar sicavas că si amen pachiamos cana pregătisaras-ame încă de acanara anda iech dezastro? (Proverbele 22:3)

¹⁰ Va avela amenghe mai ușoro te așias liniștime ande iech situația phari dacă cărdeam amenghe timpo te pregătisaras-ame anda late. Tha, dacă pregătisaras-ame, sicavas că ci pachias-ame ando Iehova? Nici. Mai but, cana cheras cadea, sicavas că si amen pachiamos ande lesco zuralimos te lel sama pe amende. O Cuvânto le Devlesco del-ame o sfato te pregătisaras-ame andal dezastrea naturalo cai daștinas te aven. (Citisar Proverbele 22:3.) Prin amare publicații, le întruniri la congregațiache hai le anunțuri, i organizația le Devleschi phendea amenghe butivar te pregătisaras-ame andal situații de urgență. c Pachias-ame ando Iehova?  Dacă da, va avela te las-ame pala leschi îndrumarea acana – angla so te avel iech dezastro.

11. So sichioas catar i Margaret?

¹¹ Te dichas i experiența iecha pheiachi po anav Margaret. Ando than cai beșelas, astardea iech bari iag veșeschi, hai le autorități phende le manușenghe te tiliaren anda codo than. Anda codoia că but manușa camenas, ande sa codo timpo, te nașen othar, le droma sas-le pherde mașini hai ci mai daștinas te jian caring angle. O baro calo thuv sas peste sea ando aero, cadea că i Margaret ci mai daisardea te del-pe tele iech timpo andai mașina. Tha voi așilea jiuvindi anda codoia că sas-li pregătime. Voi încărelas ande peschi geanta iech harta, cai ajutisardea-la te arachel iech aver drom caște daștil te nachel othar. Mai but, voi gălea mai anglal pe cado drom caște avel pregătime dacă avelas iech urgența. Anda codoia că sas-li pregătime, i Margaret daisardea te așel andi viața pala cado dezastro.

12. Sostar las-ame pala le îndrumări andai siguranța?

¹² Caște ferin-ame hai te încăren i ordinea, le autorități daștinas te șion restricții hai te phenen le manușenghe te tiliaren anda pengo chăr sau daștinas te den-ame vi aver instrucțiuni. Chichiva manușa ci așunen catar cadal instrucțiuni hai ci sighiaren te tiliaren othar, anda codoia că ci camen te mechen penghe buchia materialo. Tha so daisaras te phenas andal slujitori le Iehovasche? I Biblia zuriarel-ame: „Anda o drago le Raiesco, așunen catar orisavi autoritatea le manușenghi: așunen vi catar o rege, cai silo opral tumende, hai vi catar le guvernatori, cai sile bișialde lestar”. (1 Pet. 2:13, 14) I organizația le Iehovaschi del-ame chichiva îndrumări lașe anda codoia că camel te avas andi siguranța. Anel-pe amenghe butivar andi goghi te das le phurenghe amare numerea de telefon hai o than cai beșas, caște daștin te arachen-ame dacă si vroiech urgența. Tu cărdean cadai buchi? Daștil-pe că va avena amenghe dine instrucțiuni vi anda cai va avela te garavas-ame, anda sar va avela te tiliaras anda o than cai astarel iech dezastro hai sar te primisaras ajutoarea. Sa cadea, si amenghe phendo cana hai sar daisaras te ajutisaras averen. Dacă ci las-ame pala cadal îndrumări, daisaras te șioas ando pericolo vi amari viața, hai vi le phurenghi. Te na bâstras că cadal murșa loialo len sama pe amende. (Evr. 13:17) I Margaret phendea: „Pachiav anda sea o ilo că așilem jiuvindi numai anda codoia că lem-ma pala i îndrumarea le phurenghi hai la organizațiachi”.

13. Sar arachle bucuria hai pacea but phrala cai trebuisarde te mechen penghe chăra?

 ¹³ But phrala cai trebuisarde te mechen penghe chăra anda codoia că nachle prin iech dezastro, războio sau iech marimos civilo, dine penghi zor te adaptin-pe ca i nevi situația hai te cheren pale chichi mai sigo penghi buchi anda o Iehova. Cadea sar le creștini anda o iechto secolo, cai sas-le hulade peste sea catar le persecuții, von phenen mai dur „i vestea lași anda o cuvânto”. (Fap. 8:4) I predicarea ajutil-le te așel lenghi goghi ca o Regato, na ca i situația phari ande savi sile. Cadea, von daștin te aven bucurime hai te avel-len pacea.

14. Sar daisaras te hasaras amari pacea cana sam persecutime?

¹⁴ Cana sam persecutime, daisaras te hasaras but buchia cai mai anglal ajutisardea-ame te avel amen pacea ando ilo. Chichi de bucurime sam cana jias ca le întruniri hai predichisaras libero, hai cheras le buchia de fiesavo ghies bi te daras că va avela te avas phandade! Tha, cana hasaras amari libertatea, daisaras te simțosaras-ame neliniștime hai te daras anda so daștilas te întâmplol-pe. Cadal sentimentea sile normalo, tha trebul te las sama anda codoia că o Isus sicadea că i persecuția daștil te cherel chichivan anda lesche discipoli te peren. (Ioan 16:1, 2) Cadea că, sar daisaras te încăras amari pacea cana nachas prin persecuții?

15. Sostar ci trebul te daras catar le persecuții? (Ioan 15:20; 16:33)

¹⁵ O Cuvânto le Devlesco phenel amenghe: „Sea codola cai camen te train andi devoțiunea sfânto ando phanglimos le Isus Cristosoia va avena vi von persecutime”. (2 Tim. 3:12) Iech phral po anav Andrei hachiardea phares cado ciacimos, pala so i buchi anda o Iehova sas-li așadi ande lesco them. Vo phenelas pesche: „Si prea but Martori cade. Ci daștin te phandaven savoren anda amende”. Tha, ando than ca cadaia te anel lesche pacea, cado gândimos cărdea-les te avel neliniștime. Tha aver phrala, cai mechle le buchia andel vasta le Iehovasche hai hachiarde că daștinas te aven phandade, sas-le mai liniștime sar o Andrei. Cadea că, o Andrei alosardea te lel-pe pala lende hai șiutea vi vo pesco pachiamos ando Iehova, cadea sar von. Cadea că, na pala but timpo, vo astardea te simțosarel pacea hai acana arachel bucuria, chiar cana nachel prin pharimata. Vi amen daisaras  te arachas bucuria hai pacea andel zumaimata. O Isus phendea amenghe că trebul te ajucăras-ame te nachas prin persecuții, tha sa vo phendea amenghe că daisaras te așias zurale ando pachiamos. (Citisar Ioan 15:20; 16:33.)

16. Pala so îndrumări trebul te las-ame cana si persecuții?

¹⁶ Cana amari buchi anda o Iehova sili așadi sau ci daisaras te cheras-la libero ande iech măsura mai bari, daștil-pe că primisaras instrucțiuni catar i filiala hai catar le phure. Cadala sile cărde caște ferin-ame, te ajutin-ame te primisaras haben spiritualo hai te predichisaras chichi daisaras. Cher sea so daștis caște les-tu pala cadal îndrumări, chiar cana ci hachiares cu sea sostar sas-le dine. (Iac. 3:17) Sa cadea, na phen niciechdata le buchia cai prinjianes-le anda che phrala hai pheia sau anda i buchi la congregațiachi, codolenghe cai ci silen o drepto te prinjianen-le. (Ecl. 3:7)

17. Cadea sar le apostoli anda o iechto secolo, so camas te cheras vi amen?

¹⁷ O Satan marel-pe contra le manușa le Devlesche anda codoia că jianel că lenghe sas dini „i buchi caște șion mărturia anda o Isus”. (Rev. 12:17) Tha ci trebul te mechas-ame darade catar o Satan hai leschi lumea. I lucrarea de predicare hai sicaimos anel amenghe bucuria hai pacea cana nachas prin persecuții. Ando iechto secolo, cana le autorități iudaico poruncisarde le apostolenghe te na mai predichin, von alosarde te așunen le Devlestar hai predichisarde mai dur, hai cadaia andea lenghe but bucuria ando ilo. (Fap. 5:27-29, 41, 42) Si ciaces, dacă amari predicarea sili așadi, trebul te sicavas goghiaverimos cana predichisaras. (Mat. 10:16) Tha, dacă cheras sea so așel ande amaro zuralimos, va avela te simțosaras i ciaci pacea anda codoia că sam cuci andel iacha le Iehovasche hai phenas iech mesajo cai hastravel vieți.

18. Castar avel i ciaci pacea?

¹⁸ Daisaras te pachias ciaces că, vi andel mai bare pharimata, daștil te avel amen pacea ando ilo. Ande codol momentea, te na bâstras că trebul amenghe i pacea le Devleschi, adică codoi pacea cai numai o Iehova daștil te del-la amenghe. Te șioas amaro pachiamos ande leste cana nachas prin bare nasfalimata, dezastrea naturalo sau persecuții. Sa cadea, te așias pașa i organizația le Iehovaschi hai te dichas caring o șucar viitorii cai ajucărel-ame. Cadea, ‘o Del la paceaco va avela amența’. (Filip. 4:9) Ando articolo cai avel, va avela te dichas sar daisaras te ajutisaras le phralen cai nachen prin pharimata te avel-len i pacea le Devleschi.