Nici. So scriisardea o David code sicavel că vo camelas anda sea o ilo te așarel le Devles.

Ando Psalmo 61:8, o David scriisardea: „Va avela te ghilabav așarimata che anavesche anda sea o timpo, hai va avela te pherav mânre promisiuni ghies pala ghies”. Hai ande aver versetea sar cadala vo scriisardea: „Așarav-tu, o, Iehova, mânro Del, sea mânre ileia, va avela te anav gloria che anavesche anda sea o timpo”. „Va avela te așarav chio anav anda sea o timpo, da, veșnico!” (Ps. 86:12; 145:1, 2)

Cana o David scriisardea cadala dumes vo ci pachiaia că ci va merela niciechdata. Vo jianelas că, pala o decreto dino le Iehovastar, o merimos avilea sar pedeapsa anda o păcato hai că vi vo sas-lo păcătoso. (Gen. 3:3, 17-19; Ps. 51:4, 5) Sa cadea, vo jianelas că nici chiar le slujitori loialo, sar sas o Avraam, o Isaac hai o Iacob, ci așile jiuvinde hai mule vi von. Mai but, vo dichelas sar leschi viața nachelas hai pașiolas sea mai but catar o merimos. (Ps. 37:25; 39:4) Tha le dumes cai arachen-pe ando Psalmo 61:8 sicaven că vo camelas anda sea o ilo te așarel le Devles anda sea o timpo, adică, ji ca lesco palutno phurdimos. (2 Sam. 7:12)

Ande chichiva anda lesche scrieri, o David dea duma anda peschi viața, cadea sar dichiol-pe anda o anteto catar le Psalmi 18, 51, hai 52. Ando Psalmo 23, o David cai sas-lo vi vo mai anglal iech păstorii, phenel anda o Iehova că silo sar iech păstorii cai sicavel, feril hai sastiarel. Cadea că vo camlea te slujil le Devlesche „ande sea le ghiesa” lesca viațache. (Ps. 23:6)

Cu sea cadala, te na bâstras că sea le dumes cai o David scriisardea-le andi Biblia avile le Devlestar. Ande lesche scrieri arachen-pe vi profeții anda so avelas te întâmplol-pe ando viitorii zurales duriardo. Sar exemplo, ando Psalmo 110, vo dea duma anda iech timpo cana lesco Rai avelas te beșel ca i ciaci rig le Iehovaschi ando cerii hai că avelas te primil iech baro zuralimos. Sostar? Caște șiol le dușmanen le Devlesche ca pesche pânre hai te cherel cris contra le națiuni pa i phuv. O David sas iech andal phure codolesche cai avelas te avel Rege ando cerii hai „rașai anda sea o timpo”, o Mesia. (Ps. 110:1-6) O Isus sicadea că i profeția anda o Psalmo 110 referil-pe leste hai că avelas te pherel-pe ando viitorii.

Si ciaces, o Iehova cărdea le Davidos te scriil vi anda pesco timpo hai vi anda iech timpo anda o viitorii, cana va avela uștiado andal mule hai va daștila te așarel le Devles anda sea o timpo. Cadaia ajutil-ame te dichas că o Psalmo 37:10, 11, 29 daștil te avel hachiardo că del duma anda i viața cai sas ando Israelo purano, tha daisaras vi te hachiaras că sicavel vi sar va avela i viața pi phuv cana o Iehova va pherela pesche promisiuni. (Dich o articolo „Va aveia manța ando Paradiso!”, anda cadai revista, paragrafo 8.)

Cadea că, o Psalmo 61:8 hai aver versetea sar cadala sicaven că o David camelas te anel pachiv le Iehovasche ando Israelo ji co sfârșito lesca viațaco. Sa cadea, von sicaven ciaces so va daștila te cherel vo ando viitorii, cana o Iehova va uștiavela-les andal mule.