Cana o Del poruncisardea le iechto manușenghe te ‘pheren i phuv hai te supunin-la’, o Iehova sicadea că camelas ca sea i phuv te avel iech paradiso. (Gen. 1:28) Cadai porunca de mai anglal ajucărel codolen cai va moștenina i phuv. Na cadea sar le iechto manușen, len ci va avela-len iech paradiso catar savo te astaren hai te îngăren-les mai dur pe sea i phuv, anda codoia că i bar le Edenoschi ci mai existil. Tha, pala o Armaghedono, von va trebuna te ujiaren le thana pa i phuv cai acana sile distrugime le manușendar. Si ciaces, va avela-len but buchi!

Cadaia anel ande amari goghi i buchi cai trebulas te cheren-la le israeliți cai risarde-pe anda Babilono. Nachle 70 bărșa de cana ande lengo them ci beșlea chonic. Tha, o Isaia phendea de mai anglal că le ajutoroia le Iehovasco, von avenas te vazden pale o them. Andi profeția phenelas-pe: „[Vo] va cherela lesco șuco than te avel sar o Edeno hai lesco șuco plai sar i bar le Iehovaschi”. (Is. 51:3) Le israeliți vazdine pale o them hai cărde-les te avel iech șucar than. Sa cadea, le ajutoroia  le Iehovasco, vi codola cai va moștenina i phuv va daștina te cheren i phuv iech paradiso hai te supunin-la. Sar daștis te sicaves încă de acanara că cames te les partea vi tu ca i buchi?

Sar exemplo, daștis te des chi zor te încăres uje chio chăr hai le thana de pașa leste. Na mech-tu perado cana diches că che vecini ci încăren o ujimos. Sa cadea, daștis te des chio vast te ajutis cana cherel-pe buchi sau ujimos ca i sala le Regatoschi sau ca i sala de congrese. Dacă chi situația mechel-tu, daștis te pheres iech cererea caște les partea ca le operațiuni anda ajutorii cana si iech dezastro. Cadea, sicaves că cames te ajutis che phralen. Șiu tuche o pușimos: „Daștiv te sichioav te cherav anumime buchia, caște folosisarav-le dacă o Iehova va dela-ma o baro miștimos te traisarav anda sea o timpo pi phuv?”.

Chiar pala so jiuvindisardea la șeia le Iairoschi, o Isus phendea codolenghe othar te den-la vareso te hal. (Mar. 5:42, 43) Daștil-pe că cadaia ci sas pharo anda lende că la șeia sas-la numai 12 bărșa. Tha te gândisaras-ame so bari buchi va avela amen, cana o Isus va pherela peschi promisiunea „sea codola andal mormintea va așunena lesco glaso hai va înclena avri”. (Ioan 5:28, 29) Chiar cana i Biblia ci del duma prea but anda cadaia, daisaras te pachias ciaces că codolen cai sas-le uștiade andal mule va trebuna lenghe haben, hureaimata hai iech than cai te beșen. Daștis te sicaves încă de acanara că san gata te cheres cadal buchia? Mai dur, va avela te dichas chichiva pușimata ca save te gândis-tu.

Cana așunes că va avela andi vizita o supraveghetoro de circumscripție, achares-les vi tu te han ande iech than? Cana slujitori speciali cu timp integral catar o Betelo sile bișialde ande iech nevi repartiția ando teritorio sau cana iech supraveghetoro de circumscripție phandavel peschi repartiția andi buchi intineranto, ajutis-le te arachen penghe iech than cai te beșen? Cana ando than cai beșes si iech congreso regionalo sau specialo, jias vi tu te ajutis angla hai pala o congreso sau jias te primisares codolen cai avile anda o congreso?

Cadea sar phenel-pe andel Fapte 24:15, amen ajucăras ca miliardea manușa te aven uștiade andal mule. But jene anda lende ci daisarde te prinjianen ciaces le Iehovas. Cana va avena jiuvindime, len va avela-len cadai șucar ocazia. a Le slujitori loialo le Iehovasche, cai silen experiența va dena penghi zor te sicaven-le. (Is. 11:9) I Charlotte, cai predichisardea andi Europa, America de Sud hai Africa, abia ajucărel codo timpo. Pherdi bucuria, voi phenel: „Abia ajucărav te sicavav codolen cai va uștena andal mule. Cana citisarav anda varecaste cai traisardea bute timpoia mai anglal, butivar phenav manghe: «Dacă daisardeas te prinjianel le Iehovas, leschi viața avileas cadea de diferime!». Som gata te dav duma codolența jiuvindime anda le buchia cai ci sas-len ocazia te prinjianen-le”.

Le slujitori le Iehovasche cai traisarde angla so o Isus te avel pi phuv vi len va avela-len but buchia te sichion. Te gândisaras-ame so bari bucuria va pherela amaro ilo hai so bari pachiv va avela amenghe dini te sicavas le Danielosche sar pherdile-pe le profeții cai scriisardea-le, tha ci hachiardea-le. Sau te sicavas le jiuvleanghe loialo Rut hai Naomi sar o Mesia avilea pe lenghi linia genealogico? Chichi de voime va avaia te las partea cadale programoste anda sicaimos cai va avela cărdo pe sea i phuv, bi te țârdel chanci amari atenția hai bi te aven le presiuni cadala lumeache nasul de aghies!

Sar daisaras te sicavas acana că sam gata te sicavas codolen jiuvindime? Cheras cadaia cana das amari zor te sicavas averen o ciacimos andai Biblia sea mai mișto hai cana jias andi predicarea, buchi cai aghies cherel-pe pe sea i phuv. (Mat. 24:14) Chiar cana, aghies, o phurimos sau amare pharimata ci mechen-ame te cheras cadea de but andi predicarea, amare eforturi sicaven că sam gata te sicavas codolen cai va avena uștiade andal mule.

Si zurales importanto te șios tuche le pușimata: „Som ciaces pregătime te moșteniv i phuv? Ajucărav te cheras i phuv iech paradiso, te ajutisarav codolen jiuvindime te arachen penghe iech chăr sau te sicavav-le?”. Daștis te sicaves că san gata te cheres cadal buchia dacă aghies des chi zor te les partea ca buchia sar codola cai ajucăren-tu andi lumea nevi, cana va avela te moștenis i phuv!