1. Mai anglal ca o Isus te merel, so phendea vo caring iech andal manușa nasul cai sas-lo șiute po stâlpo pașa leste? (Luca 23:39-43)

 O ISUS hai le dui manușa nasul cai sas-le șiute po stâlpo pașa leste, nachenas prin iech bari duch ando timpo so simțonas sar șiorel-pe i viața anda lende. (Luca 23:32, 33) Le dui manușa nasul dine duma jungales anda o Isus, tha iech anda lende parudea pesco phiraimos caring leste. (Mat. 27:44; Mar. 15:32) Vo phendea lesche: „Isus, an tuche amintea mandar cana arăsăs ande chio Regato!”. O Isus phendea lesche parpale: „Ciaces phenav tuche aghies: Va aveia manța ando Paradiso!”. (Citisar Luca 23:39-43.) Chiar cana daștil-pe că cado murș așundea anda o mesajo că „o Regato le cerurengo pașilea”, chanci ci sicavel că vo cărdilea iech discipolo le Cristososco. Hai o Isus ci phendea lesche că va arăsăla ando Regato ando cerii. (Mat. 4:17) O Isus dea duma anda iech Paradiso cai va avela pi phuv. Sostar daisaras te phenas cadaia?

2. So sicavel că o manuș nasul cai căisardea-pe daștil-pe că sas-lo evreo?

² Daștil-pe că o manuș nasul cai căisardea-pe sas-lo evreo. Vo phendea caring ocoaver manuș nasul: „Ci daras niciech țâra le Devlestar, acana, că primisardean sa codoi cris?”. (Luca 23:40) Le evrei anenas închinarea ieche corcore Devlesche, tha le manușa andal națiuni pachianas ande mai but devla. (Ex. 20:2, 3; 1 Cor. 8:5, 6) Dacă cadal dui manușa nasul avileas andal națiuni, o pușimos trebulas te avel vareso sar cadaia: „Ci daras niciech țâra le devlendar?”. Mai but, o Isus sas-lo bișialdo na ca le manușa andal națiuni, tha „ca le bacrea hasarde anda o chăr le Israelosco”. (Mat. 15:24) O Del sicadea le israelițenghe că vo avelas te uștiavel pale viațate codolen mule. Daștil-pe că cado manuș nasul cai căisardea-pe prinjianelas cado sicaimos anda o jiuvindimos. Cadea că vo hachiardea că o Iehova avelas te jiuvindil le Isusos caște rail ande Lesco Regato. Anda so fal-pe, cadale murșes sas-les i speranța că o Del avelas te uștiavel vi les andal mule.

3. So daștil-pe că avilea andi goghi le manușeschi nasul cai căisardea-pe cana o Isus dea duma anda o Paradiso? Explichin. (Geneza 2:15)

 ³ Sar evreo, o manuș nasul cai căisardea-pe trebulas te jianel anda o Adam hai i Eva, hai anda o Paradiso cai o Iehova cărdea-les anda lende. Cadea că, vo daisardea te hachiarel că o Paradiso anda savo dea duma o Isus avelas te avel iech șucar bar cade, pi phuv. (Citisar Geneza 2:15.)

4. Ca so cherel-ame te gândisaras-ame so phendea o Isus caring iech andal manușa nasul?

⁴ So phendea o Isus caring o manuș nasul trebulas te cherel vi amen te gândisaras-ame ca sar va avela i viața ando Paradiso. O traio pherdo pacea tela o raimos le regesco Solomon ajutil-ame te sichioas chichiva buchia anda o Paradiso. I Biblia sicavel că o Isus silo mai baro sar o Solomon, cadea că daisaras te ajucăras-ame ca o Isus, ande iech than codolența cai va raina leia, te cheren i phuv iech șucar Paradiso. (Mat. 12:42) Cadea că, hachiaras sostar ‘le coaver bacrea’ camen te jianen so trebun te cheren caște train anda sea o timpo ando Paradiso. (Ioan 10:16)

5. Sar ajucăres-tu te avel i viața ando Paradiso?

⁵ Sar pachias că va avela i viața ando Paradiso? Daștil-pe că gândisares-tu că o Paradiso va avela sar iech șucar parco, cadea sar sas i bar le Edenoschi. (Gen. 2:7-9) Daștil-pe că aven ande chi goghi le cuvintea cai phendea-le o Mica anda o poporo le Devlesco, că „fiesavo va beșela tela peschi răz hai tela pesco smochino”. (Mica 4:3, 4) I Biblia sicavel butivar că, andi lumea nevi, va avela but haben. (Ps. 72:16; Is. 65:21, 22) Cadea că, daștil-pe că diches-tu ande iech șucar bar, sar beșes ca iech meseli pherdi lașio haben. O aero chandel șucar catar le but lulughia. Peste sea pașa tute, așunes sar le jene anda chi familia, che amala hai vi codola jiuvindime asan hai bucurin-pe te beșen ande iech than. Cado ci si numai iech șucar suno. Daisaras te pachias ciaces că sea cadal buchia va avena cade pi phuv. Mai but, ando Paradiso va daisaraia vi te bucurisaras-ame catar i buchi amare vastenghi.

6. So va avela te cheras ando Paradiso? (Dich i imaginea.)

⁶ O Iehova cărdea-ame cadea te arachas bucuria ande amari buchi. (Ecl. 2:24) Ando Raimos de Iech Mia Bărș le Cristososco, va avela-ame but buchia te cheras. Codolen cai va așena andi viața co Armaghedono, hai vi le milioanea manușen cai va avena uștiade andal mule, va avela-len nevoia catar haben, hureaimos hai iech chăr. Caște avel savoren cadal buchia, amen trebul te cheras but buchi, tha va avela te bucurisaras-ame te cheras cadaia. Cadea sar o Adam hai i Eva line sama catar i bar le Edenoschi, cai sas lengo chăr, vi amen va avela-ame i bari buchi te cheras i phuv iech Paradiso. Te gândisaras-ame so bari bucuria va pherela amaro ilo ando timpo so va avela te sicavas le milioanea manușen cai  va avena uștiade andal mule, hai cana va avela te ajutisaras-le te prinjianen mai but buchia anda o Iehova hai anda lesco scopo! Sa cadea, va trebula te ajutisaras vi le slujitoren loialo le Iehovasche cai traisarde bute timpoia mai anglal te avel o Isus, caște jianen so întâmplosardea-pe chichi timpo sas-le mule.

7. So daisaras te pachias hai sostar?

⁷ Daisaras te pachias ciaces că i viața ando Paradiso va avela pherdi pacea, va avela-ame sea so trebul amenghe hai va avela iech lași organizarea. Sostar daisaras te pachias cadaia? Anda codoia că o Iehova sicadea amenghe deja iech exemplo anda sar va avela i viața tela o raimos lesche Șiavesco. Daisaras te dichas cadaia anda i relatarea anda o raimos le regesco Solomon.

8. Sar pherdile-pe andel puraimata le dumes le regesche David cai arachen-pe ando Psalmo 37:10, 11, 29? (Dich vi o articolo „Pușimata catar amare cititori”, anda cadai revista.)

⁸ O rege David scriisardea tela inspirația anda sar va avela i viața tela o raimos ieche regesco lașio hai goghiaver. (Citisar Psalmo 37:10, 11, 29.) Cana das duma averența anda o Paradiso, butivar citisaras lenghe o verseto anda Psalmo 37:11, hai cadaia si zurales mișto, anda codoia că o Isus dea duma anda cado verseto ande leschi Predica pa i plain, hai sicadea că va pherela-pe ando viitorii. (Mat. 5:5) Tha so phendea o David sicadea vi sar avelas te avel i viața tela o raimos le regesche Solomon. Cana o Solomon railas ando Israelo, le Devlesche manușa bucurisarde-pe catar iech bari pacea hai but barvalimata ande iech them cai ‘thabdelas thud hai mierea’. O Del phendea: „Dacă va avela te phiren mai dur pala mânre legi … va avela te anav pacea ando them; va avela te șion tumen te soven hai chonic ci va cherela tumen te daran”. (Lev. 20:24; 26:3, 6) Cadal promisiuni pherdile-pe tela o raimos le regesco Solomon. (1 Cron. 22:9; 29:26-28) Sa cadea, o Iehova phendea că le manușa nasul cai anenas închinarea avere devlenghe „ci va mai avena”. (Ps. 37:10) Cadea că, le dumes cai arachas-le ando Psalmo 37:10, 11, 29 pherdile-pe vi andel puraimata, hai va pherena-pe vi ando viitorii.

9. So phendea i regina andai Șeba anda o raimos le regesco Solomon?

 ⁹ I regina andai Șeba așundea anda i pacea hai o barvalimos savendar bucurinas-pe le israeliți tela o raimos le Solomonosco. Voi avilea anda iech duriardo them co Ierusalimo caște dichel cadai buchi pesche iachența. (1 Regi 10:1) Pala so dichlea o regato le Solomonosco, voi phendea: „Ci phendea-pe manghe nici pe dipaș! … Fericime sile che manușa hai fericime sile che slujitori cai beșen sea o timpo angla tute hai așunen chio goghiaverimos!”. (1 Regi 10:6-8) Tha o lașio traio cai sas tela o raimos le Solomonosco si numai iech țâni partea anda le miștimata cai va anela-le o Iehova opral sea le manușa pa i phuv tela o raimos lesche Șiavesco, o Isus.

10. Sar si o Isus iech conducătorii mai lașio sar o Solomon?

¹⁰ O Isus si iech conducătorii but mai lașio sar o Solomon. O Solomon sas iech manuș imperfecto, cai cărdea-pe doșalo anda buchia zurales nasul hai cai andine but pharimata opral le Devlesche manușa. Tha o Isus silo perfecto hai ci cherel niciechdata greșeli. (Luca 1:32; Evr. 4:14, 15) Vo așilea loialo le Iehovasche, chiar cana o Satan cărdea-les te nachel prin bare zumaimata. Cadea, o Cristos sicadea că ci va cherela-pe doșalo niciechdata anda vroiech păcato hai că ci va cherela chanci nasul, cai te duchavel le manușen loialo opral save va raila. Si ciaces iech bari pachiv te avel amen iech Rege sar vo.

11. Con va cherela buchi ande iech than le Isusoia?

¹¹ O Isus va cherela buchi ande iech than codolența 144 000 caște lel sama pe le manușa hai caște pherel o scopo le Iehovasco anda i phuv. (Rev. 14:1-3) Cadala murșa hai jiuvlea cai va raina ande iech than le Isusoia nachle prin but pharimata hai ducha cana traisarde sar manușa, cadea că von va daștina te hachiaren le pharimata codolenghe pa i phuv. Tha so va cherena von mai exacto?

12. So buchi va dela o Iehova codolenghe 144 000?

¹² I buchi dini le Isusosche hai codolenghe cai va raina ande iech than leia si but mai bari sar codoia cai sas dini le Solomonosche. O Solomon trebuisardea te lel sama catar milioanea manușa anda iech corcoro them. Tha codola cai va raina ando Regato le Devlesco va trebuna te len sama catar miliardea manușa cai va traina pe sea i phuv. So baro privilegio dea o Iehova codolen 144 000!

13. So șucar buchi va cherena codola cai va raina ande iech than le Isusoia?

¹³ Cadea sar o Isus, codola 144 000 va avena regi hai rașaia. (Rev. 5:10) Tela i Legea mozaico, le rașaia lenas sama ca le manușen te avel-len iech sastimos lașio hai te așen pașă le Iehovastar. Anda codoia că i Legea sas „iech ucial le buchianghe lașe cai va avena”, hachiaras că codola cai va raina ande iech than le Isusoia va ajutina le manușen le Devlesche te aven sasteveste hai te așen pașă le Iehovastar. (Evr. 10:1) Sar va dena duma von le manușența pa i phuv, opral save va raila o Regato? Va trebula te ajucăras hai te dichas. Orisar va alosarela o Iehova te cherel cadai buchi, amen daisaras te pachias ciaces că, ando Paradiso cai va avela, sea le manușa va primina i îndrumarea cai trebul lenghe. (Rev. 21:3, 4)

14. So phanglimos si mașcar „le aver bacrea” hai le phrala le Cristososche?

¹⁴ O Isus phendea anda codola cai va raina ande iech than leia că sile iech „țâni turma”. (Luca 12:32) Tha vo dea duma vi anda iech grupo anda savo phendea că si „le aver bacrea”. Cadal dui grupuri sile iech corcori turma, cai sili chidines phangli. (Ioan 10:16) Le dui grupuri cheren deja buchi ande iech than hai va cherena cadaia vi mai dur ando timpo so o Paradiso va  pherela sea i phuv. Si ciaces, atunci, ‘i țâni turma’ va avela ando cerii, hai ‘le aver bacrean’ silen i speranța te train veșnico pi phuv. Tha so trebun te cheren încă de acanara „le aver bacrea” caște daștin te train ando Paradiso?

15. a) Sar daștin te cheren buchi ande iech than „le aver bacrea” le phralența le Cristososche? b) Sar daisaras te las-ame pala o exemplo le phralesco andai imaginea?

¹⁵ O manuș nasul cai căisardea-pe mulea angla so te daștil te sicavel peschi recunoștința anda so cărdea o Cristos anda leste. Tha amen, „le aver bacrea”, si amen but ocazii te sicavas chichi de cuci si anda amende o Isus. Sar exemplo, sicavas amari iubirea anda leste prin o modo sar phiravas-ame caring lesche phrala machle. O Isus phendea că vo va judechila le bacrean pala o modo sar phiraven-pe lesche phralența. (Mat. 25:31-40) Daisaras te sicavas că așias pașa le phrala le Cristososche cana ajutisaras-le pherde zelo andi predicarea hai andi buchi te cheren discipoli. (Mat. 28:18-20) Anda codoia, amen camas te folosisaras mișto le ajutoarea cai si amenghe dine anda o studio la Bibliaco, sar avelas o lil Bucurisar-tu viațatar anda sea o timpo!. Dacă ci încăres încă iech studio biblico varecasa, daștis te șios tuche o obiectivo te phenes sea mai bute manușenghe te astaren te studiin i Biblia tuia.

16. So daisaras te cheras caște pregătisaras-ame anda i viața andi lumea nevi?

¹⁶ Ci trebul te ajucăras ji cana va avela te traisaras ando Paradiso caște avas le manușa cai o Iehova camel-le code. Încă de acanara, trebul te das amari zor te avas pachivale ande so phenas hai ande amaro phiraimos hai te avel amen iech limita ande sea so cheras. Sa cadea, trebul te avas loialo le Iehovasche, amare rromesche sau rromniache hai amare phralenghe. Dacă cheras sea so daisaras caște încăras le norme le Iehovasche ando timpo so traisaras ande cadai lumea nasul, va avela amenghe mai ușoro te încăras-le ando Paradiso. Mai but, daisaras te sichioas te cheras diferime buchia hai te bariaras calități caște sicavas că pregătisaras-ame te traisaras andi lumea nevi. Dich o articolo „San pregătime «te moștenis i phuv»?”, cai arachel-pe ande cadai revista.

17. Trebulas te avas perade sea o timpo anda le păcatea cai cărdeam-le mai anglal? Explichin.

¹⁷ Sa cadea, camas te das amari zor te na mai doșaras-ame anda le bare păcatea cai cărdeam- le mai anglal. Si ciaces, ci trebulas te folosisaras niciechdata i jertfa de răscumpărare sar scuza te păcătuisaras mai butivar. (Evr. 10:26-31) Tha daisaras te pachias ciaces că, pala so căisardeam-ame anda sea o ilo, mangleam o ajutorii le Iehovasco hai le phurengo hai cărdeam le paruimata cai trebunas, vo iertisardea amare păcatea cu sea. (Is. 55:7; Fap. 3:19) Te anas ande amari goghi că o Isus phendea caring le farisei: „Ci avilem te acharav codolen orta, tha codolen păcătoși”. (Mat. 9:13) Te na bâstras că i jertfa de răscumpărare daștil te pachiarel sea amare păcatea.

18. So cameias te pușes le manușes nasul cai mulea pașa o Isus?

¹⁸ Gândisar-tu că san ando Paradiso hai că des duma le manușeia nasul cai sicadea căința. Si ciaces că vi tu hai vi vo va avena zurales recunoscători le Isusosche anda codoia că vo dea peschi viața andal manușa! Daștil-pe că tu va avela te pușes-les anda sar sas le palutne ceasurea anda i viața le Isusoschi pi phuv, sau va cameia te jianes so sas ando ilo codole manușesche nasul cana o Isus dea răspunso ca lesco manglimos. Tha vi o manuș nasul daștilas te pușel-tu sar sas te trais andel palutne ghiesa anda o sistemo le Satanosco. Va avela iech bari pachiv anda amende te sichioas anda o Cuvânto le Devlesco manușența sar cado murș! (Ef. 4:22-24)

19. Sostar daisaras te phenas că i viața ando Paradiso va avela zurales șucar? (Dich i imaginea pa i coperta.)

¹⁹ I viața ando Paradiso va avela zurales șucar. Va avela amen sea o timpo so te cheras, va avela te prinjianas manușen zurales interesanto hai i buchi cai va avela te cheras-la va pherela amaro ilo bucuriatar. Tha i mai bari bucuria va avela codoia te prinjianas sea mai mișto amare Dades andal ceruri ando timpo so vo va dela-ame but miștimata. Sea o timpo va avela amen so te sichioas anda o Iehova. Va avela te prinjianas hai te dichas leschi șucar creația. Chichi va avela te traisaras mai but, cadichi mai but va avela te bariol amari iubirea anda o Iehova. Sam zurales recunoscători le Iehovasche hai le Isusosche că dine-ame i promisiunea că daisaras te traisaras anda sea o timpo ando Paradiso!