1. Sostar ajucărdea mai dur o Avraam iech șiavo?

 O IEHOVA cărdea iech bari promisiunea pesche amalesche, o Avraam, că prin lesco șiavo va avena binecuvântime sea le națiuni la phuveache. (Gen. 15:5; 22:18) Anda codoia că le Avraamos sas-les iech pachiamos zuralo ando Del vo pachialas anda sea o ilo că leschi promisiunea va pherdiola-pe. Tha, cana sas-les cam 100 bărș, hai lesca rromnia, 90 bărșa, len încă ci sas-len iech șiavo. (Gen. 21:1-7) Cu sea cadala, i Biblia phenel: „Prin speranța, les sas-les pachiamos că va avela o dad bute națiunengo, cadea sar sas phendo”. (Rom. 4:18) Cadea sar jianas leschi speranța pherdilea-pe cana năștisailo lesco șiavo but ajucărdo, o Isaac. So ajutisardea le Avraamos te ajucărel pherdo pachiamos te pherel-pe i promisiunea?

2. Sostar pachialas o Avraam că i promisiunea le Iehovaschi va pherela-pe?

² Anda codoia că o Avraam prinjianelas mișto le Iehovas, vo „pachialas zurales că [o Del] daștilas te cherel so promitisardea”. (Rom. 4:21) O Iehova dichlea lașe iachența le Avraamos hai arachlea-les orta anda codoia că sas-les iech zuralo pachiamos. (Iac. 2:23) Cadea sar sicavel-pe ando Romani 4:18 o pachiamos le Avraamosco hai leschi speranța sas-le phangle mașcar pende. Mai dur, va avela te dichas so phendea o apostolo Pavel anda i speranța ando Romani, capitolo 5.

3. So phendea o Pavel anda i speranța?

³ O Pavel phendea sostar daisaras te pachias ciaces că „[amari] speranța ci cherel amen te ajucăras de ivea”. (Rom.  5:5) Sa cadea, ajutil-ame te hachiaras că amari speranța daștil te cărdiol sea mai zurali. Ando Romani 5:1-5, vo dea duma anda le paruimata prin save nachel iech creștino. Cana dichas cadal versetea, te gândisaras-ame sar cărdilea amari speranța sea mai zurali ando timpo. Sa cadea, te dichas so daisaras te cheras ca voi te bariol vi mai but. Mai anglal, te dichas sostar amari șucar speranța va pherela-pe ciaces.

4. Anda so dea duma o Pavel ando Romani 5:1, 2?

⁴ Citisar Romani 5:1, 2. O Pavel scriisardea cadal dumes caring i congregația anda Roma. Le phrala hai le pheia de cothar sichile but buchia anda o Iehova hai anda o Isus, sicade pachiamos hai cărdile creștini. Von ’sas-le arachle orta prin lengo pachiamos’ hai sas-le machle spiritoia sfânto. Cadea că, von daștinas te pachian anda sea o ilo că lenghi șucar speranța va pherela-pe ciaces.

5. So spernța si le creștinen machle?

⁵ Pala codoia, o Pavel scriisardea anda i speranța vi le creștinenghe machle anda Efes. Vo phendea lenghe că avenas te primin vi ’iech moștenirea’. (Ef. 1:18) Tha cai avelas te pherel-pe lenghi speranța? Ando lil caring le coloseni, o Pavel phendea că cadaia sas lenghe șiuti de iech rig „ando cerii”. (Col. 1:4, 5) Cadea că, le creștinen machle silen i speranța te aven uștiade viațate veșnico ando cerii, cai va raina ande iech than le Cristosoia. (1 Tes. 4:13-17; Rev. 20:6)

6. So phendea iech phral machlo anda peschi speranța?

⁶ Le creștini machle dichen cuci cadai speranța. Iech anda lende, o phral Frederick Franz, phendea anda sea o ilo: „Amari speranța si ciaci hai va pherdiola-pe cu sea anda fiesavo mașcar amende le 144 000 jene anda i țâni turma. Amaro pochinimos va avela but mai lașio sar gândisardeam-ame”. Ando bărș 1991, pala so slujisardea but timpo loialo le Iehovasche, vo phendea: „[Anda amende]  cadai speranța ci hasardea peschi valoarea. . . . Chichi ajucăras-la mai but, cadichi va avela mai cuci ande amare iacha. Meritil te ajucăras-la vi chiar iech miliono bărșa. Dichav amari speranța mai șucar sar oricana”.

7, 8. So speranța si le mai bute jenen cai anen închinarea le Iehovasche? (Romani 8:20, 21)

⁷ Le mai but jene cai anen închinarea le Iehovasche aghies ajucăren te pherdiol-pe iech aver speranța. Si sa codoi speranța cai sas vi le Avraamos, te traisaren anda sea o timpo pi phuv tela o raimos le Regatosco le Devlesco. (Evr. 11:8-10, 13) Anda codoia că o Del dea-ame iech șucar speranța, si amen but șucar buchia te ajucăras. (Citisar Romani 8:20, 21) Cana așundean i dintuni data so promitil i Biblia anda o viitorii, so ciailea-tu o mai but? Că va avela te aves perfecto, hai ci va mai avela te păcătuisares? Sau barilea chio ilo cana hachiardean că le mule va avena pale uștiade viațate ando Paradiso pi phuv? Cadala sile numai chichiva miștimata cai daștis te ajucăres-le „pi baza la speranțachi”.

⁸ Indiferento că va avela te traisaras ando cerii sau pi phuv, savoren si amen iech șucar speranța, cai pherel amaro ilo bucuriatar. Hai cadai speranța daștil te bariol vi mai but. Cadea sar va avela te dichas mai dur, o Pavel phendea sar daștil te întâmplol-pe cadaia. Lesche dumes, va ajutina-ame te pachias vi mai but că amari speranța ci cherel-ame te ajucăras de ivea.

9, 10. Cadea sar o Pavel, prin so pharimata nachen aghies le creștini? (Romani 5:3) (Dich vi le imagini.)

⁹ Citisar Romani 5:3, 4. O Pavel phendea că cana nachas prin pharimata, amari speranța daștil te cărdiol sea mai zurali. Anda amende na-i vareso nevo, anda codoia că o Isus phendea că sea codola cai camen te jian pala leste trebun te ajucăren-pe te nachen prin pharimata. O exemplo le Pavelosco sicavel cadaia. Vo phendea caring le creștini anda Tesalonic: „Cana samas tumența, phendeam tumenghe de mai anglal că va avela te nachas prin pharimata hai sar jianen mișto,  chiar cadea sas”. (1 Tes. 3:4) Hai caring le creștini anda Corint vo scriisardea: „Ci camas te na prinjianen, phralale, o pharimos prin savo nachleam . . . Ci mai jiangleam barem dacă mai așias andi viața”. (2 Cor. 1:8; 11:23-27)

¹⁰ Vi le creștini de aghies ajucăren-pe te nachen prin pharimata. (2 Tim. 3:12) Sanas vi tu persecutime anda codoia că les-tu pala o Isus? Daștil-pe că che amala hai che neamuri prasan-tu sau chiar așen tuche contra. Si tut pharimata ca i buchi anda codoia că phiraves-tu pachivales? (Evr. 13:18) San persecutime catar le autorități anda codoia că des duma averența anda chi speranța? Indiferento prin so pharimata nachas, o Pavel phendea că trebul te avas voime. Sostar?

11. Sostar si importanto te așias zurale bi te mechas-ame cana nachas prin pharimata?

¹¹ Daisaras te așias bucurime vi cana nachas prin pharimata anda codoia că va ajutila-ame te bariaras vareso zurales importanto. Ando Romani 5:3, o Pavel phendea că „o pharimos anel perseverența”. Sea le creștini va nachena prin pharimata, anda codoia trebul te avas hotărâme te așias zurale bi te mechas-ame oriso va avela. Numai cadea va dichaia sar va pherdiola-pe amari speranța. Ci camas te avas sar le manușa anda save o Isus phendea că sile sar le semințea cai peren pe iech than bute barența. Von bucurisarde-pe cana așunde o mesajo, tha pala so avile le pharimata hai le persecuții von mechle-pe perade. (Mat. 13:5, 6, 20, 21) Si ciaces, le pharimata hai le persecuții ci ciaion-ame, tha va avena amen but miștimata cana nachas părdal lende zurale ando pachiamos hai slujisaras mai dur le Iehovasche.

12. So miștimos si amen cana așias zurale bi te mechas-ame andel pharimata?

¹² O discipolo Iacov phendea iech anda le miștimata cai anel amenghe o fapto te așias zurale andel pharimata. Vo scriisardea: „Tha mechen ca o zuralimos cai încărel tumen ande pânrende te cherel cu sea peschi buchi, caște aven cadea sar trebul hai sasteveste ande sea, hai te na lipsol tumenghe chanci”. (Iac. 1:2-4) O Iacov phenel că o fapto te așias zurale bi te mechas-ame si iech calitatea savea sila iech buchi te cherel sau iech scopo. Cadaia ajutil-ame te sicavas mai but răbdarea, pachiamos hai te mechas-ame andel vasta le Devlesche. O Pavel mai phendea vi aver miștimos cai anel amenghe o fapto te așias zurale bi te mechas-ame.

13, 14. So miștimata mai anel amenghe o fapto te așias zurale hai sar bariarel cadaia amari speranța? (Romani 5:4)

¹³ Citisar Romani 5:4. O Pavel phendea că cana așias zurale si amen: „i aprobarea le Devleschi”. Cadaia ci însemnol că o Iehova bucuril-pe cana nachas prin zumaimata sau prin pharimata. Tha vo silo bucurime anda codoia că dichel că așias zurale pherde pachiamos. Zuriarel-ame but te jianas că dacă cheras cadaia, o ilo le Iehovasco bariol bucuriatar. (Ps. 5:12)

¹⁴ O Avraam așilea zuralo andel pharimata hai bucurisardea-pe catar i aprobarea le Iehovaschi. O Del arachlea-les sar iech manuș orta hai phendea că si lesco amal. (Gen. 15:6; Rom. 4:13, 22) Sa cadea, așen le buchia vi aghies. I aprobarea le Iehovaschi ci încărel catar le privilegii cai si amen sau catar chichi de but cheras ande leschi buchi tha, voi încărel catar o fapto te așias zurale ando pachiamos. Cado sicaimos zuriarel-ame anda codoia că savore daisaras te așias zurale bi te mechas-ame indiferento le bărșendar cai si amen, amara situațiatar sau le buchiandar cai jianas te cheras-le. Naches chiar acana pherdo pachiamos  prin iech pharimos? Dacă da, gândisar-tu că si tut i aprobarea le Iehovaschi. Cana das amari sama că o Iehova dichel-ame lașe iachența, amari speranța cărdiol sea mai zurali.

15. So mai phendea o Pavel hai sostar daștinas lesche dumes te fan-pe phare hachiarimasche?

¹⁵ Cadea sar sicadea vi o Pavel, si amen i aprobarea le Iehovaschi cana așias zurale andel pharimata. Vo phendea mai dur: „i aprobarea [îngărel ca] i speranța; hai i speranța ci cherel amen te ajucăras de ivea”. (Rom. 5:4, 5) Cadal dumes daștinas te fan-pe phare hachiarimasche. Sostar? Anda codoia că, mai anglal, cadea sar si scriime ando Romani 5:2 o Pavel phendea că le creștinen anda Roma sas-len deja iech speranța, ‘i speranța că va avela te primisaren pachiv le Devlestar’. Cadea că, chichiva daștinas te pușen-pe: „Dacă codole creștinen sas-len deja iech speranța, sostar dea duma pale o Pavel mai târzio anda i speranța?”.

16. Sar astarel te bariol i speranța ande iech manuș? (Dich vi le imagini.)

¹⁶ Daisaras te hachiaras so phendea o Pavel dacă încăras andi goghi o fapto că amari speranța daștil te bariol. Sar exemplo, anes tuche andi goghi cana așundean i dintuni data anda i șucar speranța anda o Lil le Devlesco? Daștil-pe că gândisardean-tu că avelas prea șucar te trais ando paradiso pi phuv anda sea o timpo. Tha, ando timpo so sichilean mai but anda o Iehova hai anda lesche promisiuni, pachiaian sea mai but că cadaia si iech speranța cai va pherela-pe ciaces.

17. Sar bariol vi mai dur chi speranța pala so dean chi viața le Iehovasche hai boldean-tu?

¹⁷ Pala so dean chi viața le Iehovasche hai boldean-tu, chi speranța barilea vi mai but ando timpo so prinjiandean sea mai mișto le Iehovas. (Evr. 5:13–6:1) Daștil-pe că vi tu nachlean prin so phenel-pe ando Romani 5:2-4. Sas-tut mai but pharimata, tha așilean zuralo ando pachiamos hai simțosardean i aprobarea le Iehovaschi. Cana jianes că  si tut leschi aprobarea san mai zuriardo te ajucăres ca lesche promisiuni te pheren-pe. Acana, chi speranța si mai zurali sar co începuto hai vi mai ciaci anda tute. Paruvel-tu sea mai but hai cherel buchi ande sea chi viața. Sar exemplo, dichiol-pe ande sar phiraves-tu le jenența anda chi familia, ande che alosarimata hai chiar ande sar folosis chio timpo.

18. So garanția del-ame o Iehova?

¹⁸ Cana del duma anda i speranța cai si ieche creștinos pala so primil i aprobarea le Devleschi, vo mai phenel iech buchi importanto. Vo zuriarel le creștinen că cadaia va pherela-pe. Sostar daștis te pachias cadaia? O Del cărdea le Pavelos te scriil i garanția cai avel: „I speranța ci cherel amen te ajucăras de ivea, anda codoia că i iubirea le Devleschi sas șiordi ande amare ile prin o spirito sfânto, cai sas amenghe dino”. (Rom. 5:5) Cadea că, daștis te pachias ciaces cadai speranța, chi speranța!

19. So daisaras te pachias ciaces anda amari speranța?

¹⁹ Te gândisaras-ame ca i promisiunea cai cărdea-la o Iehova le Avraamosche, sar vo sas-lo arachlo orta le Devlestar hai dichlo sar lesco amal. I speranța le Avraamoschi ci sas de ivea. I Biblia phenel: „Pala so o Avraam sicadea răbdarea, vo primisardea cadai promisiunea”. (Evr. 6:15; 11:9, 18; Rom. 4:20-22) Anda codoia că vo ajucărdea, primisardea pesco pochinimos. Dacă vi amen așias zurale cadea sar o Avraam, va avela te primisaras o pochinimos but ajucărdo. Amari speranța si cadea de ciaci! Voi anel amenghe bucuria anda codoia că jianas anda sea o ilo că va pherela-pe. (Rom. 12:12) O Pavel scrisardea: „O Del cai del speranța te cherel ca tumare ile te aven pherde bucuria hai pacea anda codoia că pachian tumen ande leste hai, cadea, te avel tumen but speranța prin o zuralimos le spiritosco sfânto”. (Rom. 15:13)