1. Cana gândisaras-ame co pachiamos le Avraamosco so daisaras te pușas-ame?

 BUT manușa așunde le Avraamostar, cu sea cadala ci jianen prea but buchia anda leschi viața. Tha, tu prinjianes but buchia anda leste. Sar exemplo, jianes că i Biblia phenel că o Avraam si „o dad sea codolengo cai silen pachiamos”. (Rom. 4:11) Tha, daștil-pe că pușes-tu: „Daștil te avel vi man iech pachiamos zuralo ando Iehova cadea sar sas le Avraamos?”. Da, daștis!

2. Sostar si importanto te sichioas anda o exemplo le Avraamosco? (Iacov 2:22, 23)

² Daisaras te bariaras iech pachiamos sar le Avraamosco, cana sichioas anda so phenel i Biblia anda leschi viața. O Avraam cărdea sea o timpo so phendea lesche o Del. Vo tiliardea dur pesche chărestar, beșlea but bărșa andel țărha hai sas-lo gata te del sar jertfa pesche cuci șiaves, le Isaacos. O Avraam cărdea sea cadal buchia anda codoia că sas-les iech pachiamos zuralo. Prin pesco pachiamos hai prin le buchia cai cărdea-le, o Avraam bucurisardea o ilo le Iehovasco hai arăslea lesco amal. (Citisar Iacov 2:22, 23.) O Iehova camel ca savoren mașcar amende, chiar vi tut, te aven amen cadal miștimata. Cadaia cărdea le Pavelos hai le Iacovos te scriin andi Biblia so daisaras te sichioas le Avraamostar. Mai dur, va avela te dichas o capitolo 4 anda Romani hai o capitolo 2 anda Iacov. Cade, phenel-pe vareso zurales importanto anda o Avraam.

3. So verseto importanto scriisarde sar citato ande penghe lila o Pavel hai o Iacov?

³ Vi o Pavel hai vi o Iacov, scriisarde ande penghe lila o citato anda Geneza 15:6 ande savo arachen-pe le dumes: „Le Avramos sas-les pachiamos ando Iehova hai, anda codoia, Vo arachlea- les orta”. O Iehova dichel ieche manușes orta sau bidoșaco, cana cherel so si mișto ande lesche iacha. Si cadea de șucar că iech manuș imperfecto hai păcătoso daștil te avel arachlo bidoșaco angla o Iehova! Si ciaces, vi tu cames cadaia. Caște dichas sar daisaras te arăsas te phenel-pe vi anda amende că sam orta, trebul te hachiaras mai anglal sostar phendea-pe anda o Avraam că sas iech manuș orta.

4. So așavel le manușen te aven arachle orta?

⁴ Ande pesco lil caring le romani, o Pavel phendea că sea le manușa sile păcătoși. (Rom. 3:23) Cadea că, sar daștil o Del te arachel-ame orta sau bidoșaco hai sar daisaras te arăsas cuci ande lesche iacha? Caște ajutil sea le creștinen le ileia ujo te arachen răspunso cadale pușimaste, o Pavel dea duma anda o exemplo le Avraamosco.

5. Sostar daisardea o Iehova te phenel anda o Avraam că sas iech manuș orta? (Romani 4:2, 4)

⁵ O Iehova phendea anda o Avraam că sas iech manuș orta cana cado beșelas ando them Canaan. Sostar daisardea o Iehova te phenel cadaia? Încărelas o Avraam ande iech modo perfecto i Legea mozaico? Nici (Rom. 4:13) I Legea mozaico sas dini caring i națiunea Israel pala so o Del phendea anda o Avraam că sas iech manuș orta, pala mai but sar 400 bărșa. Cadea că, ande pesco baro lașimos, o Iehova phendea că o Avraam sas iech manuș orta anda codoia că sas-les iech pachiamos zuralo. (Citisar Romani 4:2-4.)

6. Sar daștil o Iehova te arachel orta ieche manușes păcătoso?

⁶ O Pavel mai phendea că cana iech manuș pachial-pe ando Del, „lesco pachiamos cherel-les orta”. (Rom. 4:5) Hai mai phenel: „Cadea sar vi o David del duma anda i fericirea le manușeschi cas o Del arachel-les orta, tha na anda le buchia cai cărdea-le: «Fericime sile codola savenghe buchia nasul sas-le iertime hai savenghe păcatea sas-le pachiarde»”. (Rom. 4:6-8; Ps. 32:1, 2) O Del iertil sau pachiarel le păcatea codolenghe cai sicaven pachiamos ande leste. Vo iertil-len cu sea hai ci mai încărel conto catar lenghe păcatea. Andel iacha le Iehovasche, cadala manușa sile bidoșaco hai orta, anda codoia că sicaven pachiamos.

7. Sostar daisaras te phenas că le manușa le Devlesche andal puraimata sas-le arachle orta?

⁷ Chiar cana o Avraam, o David hai vi aver manușa loialo le Iehovasche sas-le arachle orta, von încă sas-le imperfecți hai păcătoși. Tha, anda codoia că sas-len pachiamos, o Del arachlea-len bidoșaco, vi mai but cana cărdea-pe comparația mașcar lende hai codola cai ci anenas lesche închinarea. (Ef. 2:12) Ande pesco lil, o Pavel sicadea că trebul amenghe iech pachiamos zuralo caște avel amen iech amalimos chidino le Devleia. Cadea sar o Avraam hai o David, vi amen daisaras te avas amala le Devleia prin amaro pachiamos ande leste.

8, 9. Sar hachiarde chichiva manușa le dumes le Pavelosche hai le Iacovosche hai sostar?

⁸ Mai but șăla bărșa, le conducători religioși hale-pe anda so si mai importanto o pachiamos sau so cheras. Chichiva mașcar lende sicaven le manușen că sea so trebun te cheren caște aven salvime si te pachian ando Rai Isus Cristos. Daștil-pe că mai așundean le dumes: „Primisar le Isusos ande chio ilo hai va avela te aves salvime!”. Von chiar daștinas te phenen că sichle cadaia catar o Pavel, cana phendea: „O Del arachel-les orta, tha na anda le buchia cai cărdea-le”. (Rom. 4:6) Cu sea cadala, aver  pachian că daștin te aven salvime cana jian andel thana cai von pachian că sile sfânto hai cana cheren lașe buchia cai mangle-le lendar i changheri. Caște sicaven că silen ciacimos, von daștin te phenen le dumes anda Iacov 2:24: „Iech manuș daștil te avel arachlo orta prin so cherel, na numai prin lesco pachiamos”.

⁹ Anda codoia că arăslea-pe ca sicaimata cadea de diferime, chichiva manușa sicade andel teme religioso, arăsle te phenen că o Pavel hai o Iacov ci pachianas sa codol buchia. Chichiva pachian că o Pavel camlea te phenel că iech manuș daștilas te avel arachlo orta numai prin pesco pachiamos, na prin so cherel, hai că o Iacov pachilas că si zurales importanto ca iech manuș te cherel vareso caște avel mișto dichlo le Devlestar. Iech profesoro anda religia phendea anda cadaia: „O Iacov ci hachiardea sostar o Pavel phendea că trebul te avel-tut numai pachiamos caște aves dichlo orta”. Tha, te na bâstras că o Iehova sicadea vi le Pavelosche hai vi le Iacovosche so te scriin. (2 Tim. 3:16) Cadea că, trebul te avel iech explicația ușoro hachiarimasco anda le diferențea cai fal-pe că si mașcar so phende von. Daisaras te arachas-la cana dichas lenghe dumes ando phanglimos le versetența anda lenghe lila.

10. Anda so „buchia” dea duma mai but o apostolo Pavel? (Romani 3:21, 28)

¹⁰ Anda so buchia dea duma o Pavel ando Romani, le capitolea 3 hai 4? Ando iechto than, vo dea duma anda „le buchia la legeache”, i legea cai sas dini le Moisesche po plain Sinai. (Citisar Romani 3:21, 28.) Pala so fal-pe, andel ghiesa le Pavelosche, anda chichiva creștini evrei sas pharo te hachiaren că ci mai trebunas te încăren i Legea mozaico hai te cheren le buchia cai manghelas-le voi. Cadea că, o Pavel sicadea prin o exemplo le Avraamosco, că ieche manușes trebul te  avel-les mai anglal pachiamos caște avel arachlo orta hai că ci trebul te încărel „le buchia la legeache”. Cadai buchi zuriarel-ame anda codoia că sichioas că dacă si amen pachiamos ando Del hai ando Isus, daisaras te avas arachle orta andel iacha le Devlesche.

11. Anda save „buchia” dea duma o Iacov?

¹¹ Tha, „le buchia”, cai phendea-le o Iacov ando capitolo 2 ci sile „le buchia la Legeache” anda save dea duma o Pavel. O Iacov del duma anda le buchia cai cherel-le iech creștino ande fiesavo ghies. Cadala sicaven dacă les siles iech ciacio pachiamos sau nici. Acana, te dichas dui exemplea sicade le Iacovostar.

12. Sar cărdea o Iacov o phanglimos mașcar o pachiamos hai le buchia cai cheras-le? (Dich vi le imagini.)

¹² Ando dintuno exemplo, o Iacov sicadea că le creștini ci trebun te cheren diferențea mașcar le manușa. Vo sicadea cadaia prin iech situația ande savi iech murș sicadea lașimos caring iech manuș barvalo tha dichel tele ieche manușes cioro. O Iacov sicadea că iech manuș sar codo pachial că siles pachiamos, tha vo ci sicavel cadaia prin so cherel. (Iac. 2:1-5, 9) Ando duito exemplo, o Iacov dea duma anda varecon cai dichel ieche phrales sau iecha pheia saven „ci silen sosa te hureaven-pe hai nai-le o haben fiesave ghiesesco”, tha ci cherel chanci anda lende caște ajutil-le. Chiar cana codo manuș phenel că siles pachiamos, si de ivea, anda codoia că ci sicavel cadaia prin so cherel. Cadea că, o Iacov phendea iech baro ciacimos: „O pachiamos cai nai-lo sicado prin le buchia cărde, silo mulo”. (Iac. 2:14-17)

13. So exemplo dea o Iacov caște ajutil-ame te hachiaras că trebul te sicavas amaro pachiamos prin so cheras? (Iacov 2:25, 26)

¹³ O Iacov phendea anda i Rahav că si iech exemplo anda sar te sicaves chio pachiamos  prin so cheres. (Citisar Iacov 2:25, 26.) Voi așundea le Iehovastar hai hachiardea că Vo sas pașa le israeliți. (Ios. 2:9-11) Voi sicadea pesco pachiamos prin so cărdea. I Rahav, lea sama catar dui spioni israeliți cana lenghi viața sas ando pericolo. Cadea că, cadai jiuvli imperfecto hai cai ci sas-li israelita, sas arachli orta andel iacha le Devlesche, cadea sar o Avraam. Catar i Rahav sichioas că si zurales importanto te sicavas amaro pachiamos prin so cheras.

14. Sostar daisaras te phenas că o Pavel hai o Iacov ci dichenas le buchia diferime ?

¹⁴ Cadea că, o Pavel hai o Iacov dine duma anda chichi de importanto si o pachiamos hai le buchia cai cheras-le anda dui riga diferime. O Pavel phendea le creștinenghe evrei că ci va daștina niciechdata te aven mișto dichle andel iacha le Iehovasche numai dacă încărenas i Legea mozaico. O Iacov sicadea că sea le creștini trebun te sicaven pengo pachiamos prin le lașe buchia cai cheren-le anda le coaver.

15. So daisaras te cheras caște sicavas amaro pachiamos?

¹⁵ Caște avas arachle orta, o Iehova ci ajucărel amendar te cheras sea so cărdea o Avraam. Si but buchia cai daisaras te cheras-le caște sicavas amaro pachiamos. Sar exemplo, cana avel varecon nevo andi congregația, te cheras-les te simțol-pe mișto hai te ajutisaras amare phralen hai pheian cai silen nevoia ajutorostar. Sa cadea, si zurales importanto te las sama pe amari familia. O Del dichel cuci sea cadal buchia cai cheras-le hai va del-ame but miștimata. (Rom. 15:7; 1 Tim. 5:4, 8; 1 Ioan 3:18) Iech anda le mai importanto buchia prin savi daisaras te sicavas amaro pachiamos si cana das duma pherde zelo andai vestea lași le manușența. (1 Tim. 4:16) Savore daisaras  te sicavas prin le buchia cai cheras-le că si amen pachiamos că le promisiuni le Devlesche va pherena-pe hai că o drom pe savo phenel amenghe vo te jias si o mai lașio. Hai dacă cheras cadea, daisaras te pachias ciaces că va avela te avas arachle orta le Iehovastar hai va avela te arăsas lesche amala.

16. Sar i speranța zuriardea o pachiamos le Avraamosco?

¹⁶ Ando Romani, capitolo 4, dichas iech aver cuci sicaimos cai sichioas-les le Avraamostar: că si importanto te avel amen speranța. O Iehova promitisardea că prin o Avraam, va avena binecuvântime but națiuni. Te gândisaras-ame so șucar speranța sas cadaia anda leste! (Gen. 12:3; 15:5; 17:4; Rom. 4:17) O Avraam arăslea ca 100 bărș, hai i Sara ca 90 bărșa, tha ci sas-len încă iech șiavo. Andel iacha le manușenghe ci mai daștilas te avel-len iech șiavo. Cadaia zumadea ciaces o pachiamos le Avraamosco. „Cu sea cadala, prin speranța, les sas-les pachiamos că va avela o dad bute națiunengo.” (Rom. 4:18, 19) Hai ji la urmă, so ajucărdea o Avraam pherdilea-pe. Vo cărdilea o dad le Isaacosco, o șiavo cai ajucărdea-les cadea de but! (Rom. 4:20-22)

17. Catar jianas că daisaras te avas arachle orta le Iehovastar hai te arăsas lesche amala?

¹⁷ Daisaras te cheras so si mișto andel iacha le Devlesche, te avas arachle orta lestar hai te arăsas lesche amala, cadea sar sas vi o Avraam. O Pavel chiar phendea cadai buchi ando Romani 4:23, 24: „Le dumes «sas-lo arachlo orta» ci sas-le scriime numai anda [o Avraam], tha vi anda amende, cai va avela te avas arachle orta, anda codoia că pachias ande Codo cai uștiadea andal mule le Isusos, amaro Rai”. Cadea sar le Avraamos, vi amen trebul te avel amen pachiamos, te cheras lașe buchia hai te pachias zurales că sea so promitisardea o Iehova va pherela-pe. Ando articolo cai avel, va avela te das duma anda amari speranța, anda savi o Pavel del duma mai dur, ando Romani, capitolo 5.