1, 2. So buchia daștin te cheren amen te șioras asfa?

 FIESAVO anda amende șiordeam asfa. Poiechdata, cana întâmplol-pe vareso șucar ande amari viața, daisaras te rovas bucuriatar, sar avelas, cana cărdiol iech șiavorro, cana anas amenghe amintea vareso șucar sau cana dichas amen pale ieche drago amalesa cai ci dichleam-les de but bărșa.

² Cu sea cadala, butivar, le asfa sicaven că amaro ilo silo șindo duchatar. Daisaras te rovas cana varecon drago amenghe phiravel-pe amența nasul. Daisaras te șioras asfa vi cana si amen iech baro nasfalimos sau cana hasaras varecas drago ando merimos. Ande codol ghiesa, daisaras te avas sa cadea sar o Ieremia cana dichlea că le babilonieni perade o foro Ierusalim. O Ieremia phendea: „Mânre asfa șioren-pe sar le bare paia . . . Mânre iacha roven sea o timpo, bi te așiaven-pe”. (Plâng. 3:48, 49)

3. So si ando ilo le Iehovasco cana dichel că lesche manușa sile duchade? (Isaia 63:9)

³ O Iehova jianel chichi asfa șiordeam anda codoia că nachleam prin buchia cai duchade but amaro ilo. I Biblia phenel amenghe că vo jianel fiesavo pharimos prin savo nachleam hai cai cărdea amen te șioras asfa, tha vi că așunel amen cana das cingar pala o ajutorii. (Ps. 34:15) O Iehova na numai dichel hai așunel amari duch. Sar iech dad pherdo iubirea, vi lesco ilo silo duchado cana dichel amen hai silo gata te ajutil amen. (Citisar Isaia 63:9.)

4. So exemplea andai Biblia va avela te dichas hai so va avela te sichioas anda o Iehova?

⁴ Ande pesco lil, o Iehova sicavel amen so cărdea cana lesche manușa șiorde asfa. Caște jianas cadaia, va avela te dichas prin so nachle i Ana, o David hai o rege Ezechia. Sostar ruie cadal manușa le Iehovasche? So cărdea o Iehova anda lende? Hai sar  zuriarel amen lengo exemplo cana șioras asfa anda codoia că varecon drago amenghe merel, mechel amen, sau anda codoia că si amen iech baro nasfalimos?

O IEHOVA DICHEL CANA ROVES ANDA CODOIA CĂ MULEA TUCHE VARECON DRAGO

5. So sas ando ilo la Anaco cana nachlea prin cadal pharimata?

⁵ La Ana sas-la but pharimata cai cărde-la te avel duchadi hai te șiorel but asfa. Iech anda le pharimata sas că lache rromes mai sas-les încă iech jiuvli. Laco anav sas Penina hai voi dichelas jiungale iachența la Ana. Mai but, i Ana ci daisardea te așel phari, hai i Penina sas-la chichiva șiave. (1 Sam. 1:1, 2) Voi holiarelas la Ana sea o timpo anda codoia că ci daștilas te avel-la șiavorre. So avelas ande chio ilo dacă avelas te naches prin sa codol buchia sar i Ana? I Ana sas cadea de holiardi, că „rovelas hai ci halas”. La „sas-la iech bari duch ando ilo”. (1 Sam. 1:6, 7, 10)

6. So cărdea i Ana caște simțol-pe mai mișto?

⁶ So cărdea i Ana caște simțol-pe mai mișto? Iech anda le buchia cai cărdea-len sas că gălea te anel închinarea le Iehovasche co tabernacolo. Code, daștil-pe varecai pașa o than cai jias andre ando tabernacolo, astardea „te manghel-pe le Iehovasche hai te rovel zurales but”. Voi manglea zurales le Iehovas ‘te dichel laco pharimos hai te anel pesche amintea latar’. (1 Sam. 1:10b, 11) I Ana șiordea pesco ilo angla o Iehova ando manglimos. Cana o Iehova dichlea la Ana sar rovelas, lesco ilo sas-lo duchado. Voi sas iech cuci șei ande lesche iacha hai camlea te lel o pharimos pa laco ilo.

7. Sar simțosardea-pe i Ana pala so pâtărdea pesco ilo angla o Iehova?

⁷ So simțosardea i Ana pala so pâtărdea pesco ilo angla o Iehova hai pala so o baro rașai Eli, phendea lache că laco manglimos sas așundo? I Biblia phenel: „I jiuvli gălea pe laco drom, halea hai lachi fața ci mai sas holiardi”. (1 Sam. 1:17, 18) Chiar cana laco pharimos încă ci nachlea, la Ana sas-la mai but pacea ando ilo. Voi mechlea pesco pharimos hai i duch cai sas-la ando ilo andel vasta le Iehovasche. O Iehova dichlea lachi duch, așundea laco manglimos hai, pala iech timpo, binecuvântisardea-la caște daștil te așel phari. (1 Sam. 1:19, 20; 2:21)

8, 9. Pala sar phenel-pe ando Evrei 10:24, 25, sostar trebulas te cheras sea so daisaras caște jias ca amare întruniri? (Dich vi i imaginea.)

⁸ So sichioas amen. Naches vi tu prin iech pharimos cai cherel tut te șiores asfa duchatar? Daștil-pe că san duchado anda codoia că mulea tuche varecon drago andai familia sau iech lașio amal. Ande cadal phare ghiesa, si normalo că cames te așes corcoro. Tha gândisar tut ca i Ana: voi simțosardea-pe mai mișto hai sas-li zuriardi cana gălea co tabernacolo le Iehovasco. Sa cadea, vi tu daștis te  simțos tut mai mișto cana jias ca amare întruniri, chiar dacă i duch pusavel chio ilo. (Citisar Evrei 10:24, 25.) Cothe, ando timpo so așunas șucar versetea andai Biblia cai zuriaren amen, o Iehova daștil te ajutil amen te șioas gânduri lașe ando than le gândurengo nasul. Cadea, va avela te simțosaras amen mai mișto, chiar cana amaro pharimos ci va nachela sigo.

⁹ Ca amare întruniri, amare phrala hai pheia zuriaren amen hai sicaven amen chichi de but iubin amen. Cana beșas lența, simțosaras amen mai mișto. (1 Tes. 5:11, 14) Te dichas prin so nachlea iech pioniero specialo caschi rromni mulea. Vo phendea: „Încă șiorav but asfa. Poiechdata, si manghe cadea de but doro mânra rromniatar că ci daștiv te așavav man ando roimos. Tha le întruniri zuriaren man ciaces. Le gugle dumes cai phenen-len manghe la phrala hai le pheia hai vi lenghe răspunsuri, sastiaren mânro ilo. Chiar cana, poiechdata, na-i man pacea ando ilo sau si man but phare gânduri po șăro, de fiesavi data cana jiav ca le întruniri, simțosarav man mai mișto”. Cana sam ca le întruniri, o Iehova daștil te folosil-pe le phralendar hai le pheiandar caște ajutin amen.

10. Sar daisaras te las amen pala i Ana cana nachas prin iech pharimos cai duchavel amaro ilo?

¹⁰ Sa cadea, i Ana sas-li zuriardi cana phendea le Iehovasche sea so sas ande laco ilo. Vi tu daștis ‘te șiudes sea che phare gânduri pe leste’, anda codoia că vo va așunela tut. (1 Pet. 5:7) Iech phei cai laco rrom sas-lo mudardo catar le ciora anel pesche amintea: „Simțosardem man sar cana mânro ilo sas-lo phagărdo duchatar hai pachiaiem că ci avelas te sastiarel-pe niciechdata. Pala so dem duma le Iehovasa ando manglimos, simțosardem iech pacea ando ilo. Tha, poiechdata, ci jianglem sar te phenav le Iehovasche so si ande mânro ilo. Cana somas zurales peradi hai daradi, manglem le Iehovasche te del man pacea. Hai chiar pala codoia, simțosardem iech bari liniștea hai daisardem te cherav mai dur mânre buchia”. Cana phenes le Iehovasche so cherel tut holiardo sau duchado, o Iehova hachiarel so si ande chio ilo hai jianel sar simțos tut. Chiar cana chio pharimos ci nachel, o Iehova daștil te zuriarel chio ilo hai te del tut pacea. (Ps. 94:19; Filip. 4:6, 7) Sa cadea, vo va dela tut but miștimata anda codoia că așilean pașa leste hai ci mechlean tut. (Evr. 11:6)

O IEHOVA DICHEL CANA ȘIORES ASFA ANDA CODOIA CĂ VARECON DRAGO TUCHE MECHEL TUT

11. So sas ando ilo le Davidosco cana aver phirade-pe lesa zurales nasul?

¹¹ Ande peschi viața, o David nachlea prin but pharimata, cai cărde-les te șiorel asfa. But manușa urânas-les. Chiar vi chichiva anda lesche amala hai anda leschi familia ci așile lesche loialo hai hohade-les. (1 Sam. 19:10, 11; 2 Sam. 15:10-14, 30) Vo scriisardea: „Som chino de cana rovav cadea de zurales; sasti riat pherav mânro pato asfența, chinghiarav-les mânre roimasa”. Sostar simțosardea-pe cadea o David? Anda i doș ‘codolenghi cai prasanas-les zurales’. (Ps. 6:6, 7) Cana aver phirade-pe zurales nasul le Davidosa, lesco ilo sas cadea de duchado, că vo șiorelas but asfa.

12. Pala sar phenel-pe ando Psalmo 56:8, so pachiaia ciaces o David?

¹² Chiar cana nachlea prin bare pharimata, o David jianglea mișto că o Iehova iubilas-les. Vo scriisardea: „O Iehova va așunela mânro zuralo roimos!”. (Ps. 6:8) Aver data, o David phendea le șucar dumes cai arachen-pe ando Psalmo 56:8. (Citisar.) Cana citisaras so scriisardea vo, daisaras te hachiaras mișto că o Iehova iubil amen zurales but hai camel te simțosaras amen mișto. O David phendea că o Iehova chidea lesche asfa ande iech gonorro  hai scriisardea-len ande iech lil. Vo pachiaia ciaces că o Iehova dichlea leschi duch hai anel pesche aminte latar. O David jianelas vi că lesco Dad, pherdo iubirea, jianglea na numai o pharimos prin savo nachlea, tha vi sar cărdea-les te simțosarel-pe.

13. So daștil te zuriarel amaro ilo cana aver holiaren amen sau mechen amen? (Dich vi le imagini.)

¹³ So sichioas amen. Chio ilo si phagărdo duchatar anda codoia că varecon ande savo sas tut pachiamos cărdea tut te aves perado? Daștil-pe că ande chio ilo si iech bari duch anda codoia că varecon casa camlean te căsătoris tut mechlea tut, sau mechlea tut chiar chio rrom sau chi rromni. Sau daștil-pe că varecon drago tuche ci mai slujil le Iehovasche. Iech phral saveschi rromni sutea aver varecasa hai mechlea-les, phenel: „Ci pachiaiem niciechdata că avelas te întâmplol-pe manghe cadaia. Simțosardem că ci mai somas lașio chancesche, somas perado hai holiardo”. Cana varecon mechel tut sau cherel tut te aves zurales holiardo, te na bâstres că o Iehova ci va avela te mechel tut corcoro niciechdata! O phral anda savo deam duma mai anglal phenel: „Hachiardem că daștil-pe ca le manușa te na așen pașa tute sea o timpo, tha o Iehova va avela tusa anda sea o timpo. Vo si amari Stânca. Oriso avelas amența, o Iehova va ajutila amen de fiesavi data. Vo ci va mechela codoles cai așel loialo lesche”. (Ps. 37:28) Sa cadea, te anas amenghe amintea că i iubirea le Iehovaschi si mai bari sar i iubirea orisave manușeschi. Cana varecon drago tuche mechel tut, chio ilo silo zurales duchado, tha o Iehova va dichela tut mai dur lașe iachența. San sumnacuno ande lesche iacha! (Rom. 8:38, 39) Na bâstăr niciechdata cado baro ciacimos: Orisar phirade-pe tusa le manușa, chio Dad anda o cerii iubil tut!

14. So phenel-pe ando Psalmo 34:18 că cherel o Iehova?

¹⁴ Cana varecon mechlea tut, so phendea o David ando Psalmo 34:18 daștil te zuriarel tut. (Citisar.) Ande iech lil phenel-pe că „codola cai sile perade” daștin te aven „codola cai pachian că ci mai daștil te avel chanci lașio ande lenghi viața”. Sar ajutil o Iehova codolen cai simțon-pe cadea? O Iehova si „pașa amende”, cadea sar iech dad sau iech dei cai încărel andel vasta pesche șiavorres hai liniștil-les cana rovel. Cana sam duchade anda codoia că varecon mechlea amen, vi o Iehova si duchado hai va avela te ajutil amen sigo. O Iehova camel but te zuriarel amaro ilo cana dichel că sam perade. Mai but, vo phenel amenghe că, ando viitorii, ajucăren amen but lașe buchia hai, cadea, daisaras te jias mai dur hai te na mechas amen cana nachas prin cadal pharimata. (Is. 65:17).

O IEHOVA DICHEL LE ASFA CAI ȘIORES-LEN ANDA CODOIA CĂ SI TUT IECH BARO NASFALIMOS

15. Sostar o Ezechia rovelas hai ci mai sas-les pacea ando ilo?

¹⁵ Cana sas-les 39 bărșa, o Ezechia, o rege anda Iuda, cărdilea zurales nasfalo. O Iehova bișialdea le profetos Isaia te phenel le Ezechiasche că lesco nasfalimos avelas te mudarel-les. (2 Regi 20:1) Falas-pe că le Ezechias ci mai sas-les so te cherel. Cana așundea cadaia, o Ezechia sas-lo cadea de perado că astardea te șiorel cărche asfa. Vo manglea-pe zurales le Iehovasche caște ajutil-les. (2 Regi 20:2, 3)

16. So cărdea o Iehova anda o Ezechia cana așundea lesco manglimos?

¹⁶ Cana o Iehova așundea o manglimos cai phendea-les o Ezechia le iachența pherde asfa, vo hachiardea leschi duch hai sicadea lesche lașimos. Vo phendea: „Așundem chio manglimos. Dichlem che asfa. Hai sastiarav tut”. Prin o profeto Isaia, o Iehova cărdea iech promisiunea  hai sicadea peschi bari mila. Vo phendea că avelas te cherel le Ezechias te trail mai but bărșa hai te na mechel o Ierusalimo ando vast le asiriengo. (2 Regi 20:4-6)

17. Sar ajutil amen o Iehova cana si amen iech baro nasfalimos? (Psalmo 41:3) (Dich vi le imagini.)

¹⁷ So sichioas amen. Si tut iech baro nasfalimos cai fal-pe că ci daștil te sastiarel-pe? Mang tut le Iehovasche chiar vi asfența! I Biblia phenel anda o Iehova că si „o Dad cai sicavel iech bari mila hai o Del cai zuriarel amen” cana nachas prin sea amare pharimata. (2 Cor. 1:3, 4) Acana, ci daisaras te ajucăras amen ca o Iehova te duriarel amendar sea le pharimata, tha daisaras te pachias anda sea o ilo că vo va ajutila amen. (Citisar Psalmo 41:3.) Prin pesco spirito sfânto, o Iehova va zuriarela amen hai va dela amen goghiaverimos hai pacea ando ilo caște ajutil amen te jias mai dur hai te na mechas amen. (Prov. 18:14; Filip. 4:13) Iech aver ajutoro cai del-les amenghe si cana phenel amenghe că, ando viitorii, ci va mai avela niciech anda le nasfalimata cai si amen acana. (Is. 33:24)

18. So verseto lel o pharimos pa chio ilo cana naches prin iech baro pharimos? (Dich vi o chenarii „ So phenel amenghe o Iehova caște avas mai liniștime”.)

¹⁸ So phendea o Iehova le Ezechiasche zuriardea-les. Vi amen daisaras te avas zuriarde cana citisaras anda o Lil le Devlesco. O Iehova camlea te aven scriime andi Biblia dumes cai zuriaren amen hai cai den amen zor te jias mai dur cana nachas prin iech pharimos cai ciorel amari pacea. (Rom. 15:4) Cana iech phei andai Africa de Vest așundea că sas-la cancero, ruia zurales but. Voi phenel: „Iech anda le versetea cai lea o pharimos pa mânro ilo sas Isaia 26:3. Chiar cana, butivar, ci sas man so te cherav ande le pharimata prin save nachlem, cado verseto ajutisardea man te hachiarav că o Iehova daștil te del man pacea ando ilo hai te așiav mai  liniștime”. Si tut vi tut iech verseto cai ciaiol tut but hai cai ajutil tut te naches părdal le pharimata cai fal-pe că ci va nachena niciechdata?

19. So ajucărel amen ando viitorii?

¹⁹ Fiesave ghiesesa cai nachel, sam sea mai pașă catar o sfârșito cadala lumeaco nasul, cadea că ajucăras amen te avel amen sea mai but motivea sostar te șioras asfa. Tha, cadea sar dichleam anda o exemplo la Anaco, le Davidosco hai le regesco Ezechia, o Iehova dichel amen hai hachiarel amen cana șioras asfa. Vo iubil amen anda codoia că așias pașa leste chiar cana sam duchade hai ci bâstrăl le asfa cai șioras-len. Cadea că, cana nachas prin pharimata, te pâtras amaro ilo angla o Iehova ando manglimos. Te na beșas dur amare phralendar hai pheiandar cai iubin amen andai congregația hai te mechas amen sea o timpo zuriarde catar le dumes pherde iubirea cai mechlea-len o Iehova ande pesco lil. Te pachias anda sea o ilo că o Iehova va pochinela amen parpale bute buchianța lașe anda codoia că așias lesche fideli. Iech anda le mai șucar buchia cai o Iehova va cherela-len co timpo alosardo, si că va chosela sea le asfa cai șioras-len duchatar cana varecon drago amenghe mulea, mechlea amen sau cana ci mai jianas so te cheras ande iech pharimos. (Rev. 21:4) Si ciaces, andi lumea nevi va avela te șioras asfa, tha va avela te șioras asfa numai bucuriatar!