O apostolo Pavel scriisardea le Timoteiosche, cai, cadea sar vo, sas iech phuro: „Phenav tuche ciaces angla o Del, angla o Isus Cristos hai angla le îngeri alosarde, te încăres cadal buchia cai sas tuche phende bi te gândis nasul anda aver angla te prinjianes-len hai bi te sicaves lașimos mai but iechesche sar averesche.” (1 Tim. 5:21)

Mai anglal, te das duma anda codola cai ci cheren partea anda cado grupo îngerengo. Jianas ciaces că codola 144 000 ci sile mașcar codol „îngeri alosarde”. Cana o Pavel scriisardea le Timoteiosche, ci sas încă nici iech creștino machlo ando cerii. Le apostoli hai le coaver creștini machle ci sas-le jiuvinde ando cerii cana o Pavel scriisardea cado lil. Cadea că „le îngeri alosarde” ci sile von. (1 Cor. 15:50-54; 1 Tes. 4:13-17; 1 Ioan 3:2)

Sa cadea, „le îngeri alosarde” ci daștin te aven nici le îngeri cai ci așunde le Iehovastar co Potopo. Von line-pe pala o Satan hai cărdile îngeri nasul, dușmani le Isusosa (Gen. 6:2; Luca 8:30, 31; 2 Pet. 2:4) Ando viitorii, von va avena șiudine ando abiso anda 1 000 bărșa hai pala codoia va avena mudarde ande iech than le Benghesa. (Iuda 6; Rev. 20:1-3, 10)

„Le îngeri alosarde” anda save dea duma o Pavel, trebun te aven îngeri cai cheren buchi le ‘Devlesa hai le Isus Cristososa’ cai del-pe duma anda lende ande sa codo verseto.

Si but mii îngeri cai așen loiali pașa o Iehova. (Evr. 12:22, 23) Ci trebul te pachias că fiesave îngeros si lesche dini te cherel sa codoi buchi le Iehovastar. (Rev. 14:17, 18) Te anas amenghe amintea cana ieche corcore îngerosche sas lesche dini i buchi te mudarel 185 000 soldați asirieni. (2 Regi 19:35) Daștil-pe că bute îngerenghe sas lenghe dini te ‘chiden anda le [Isusosco] Regato sea le buchia cai peraven averen hai vi codolen cai cheren o nasulimos.’ (Mat. 13:39-41) Aver daștil-pe că „va chidena ande iech than codolen alosarde” ando cerii. (Mat. 24:31) Hai cu sea cadala, averenghe sas phendo ‘te len sama amendar ande sea amare droma’. (Ps. 91:11; Mat. 18:10; Dich vi Matei 4:11; Luca 22:43)

Daștil-pe că „le îngeri alosarde” anda save del-pe duma ando 1 Timotei 5:21 sas lenghe dini i buchi te len sama le manușendar le Devlesche. Ande cado capitolo o Pavel dea sfaturi goghiaver le phurenghe savenghe i congregația trebul te del pachiv. Le phure trebunas te cheren penghi buchi ‘bi te gândin nasul anda aver anglal te prinjanel-len hai bi te sicaven lașimos mai but iechesche sar averesche’ hai ci trebunas te cheren iech alosarimos bi te gândin-pe mișto mai anglal. Iech buchi importanto sostar trebun te așunen o sfato le Pavelosco si că von cheren cadal buchia „angla o Del, angla o Isus Cristos hai angla le îngeri alosarde.” Si ciaces, chichiva îngerenghe sas dini i buchi te len sama la congregațiatar, sar avelas te ajutin le manușen le Devlesche cana phenen i vestea lași, te len sama lendar hai vi te phenen le Iehovasche so dichen pi phuv. (Mat. 18:10; Rev. 14:6.)