Mânre dada prinjiande o ciacimos andel bărșa 1920 angla so te căsătorin-pe. Me năștisailem ande 1939 andi Anglia. Cana somas țânorro, gălem mânre dadența ca-l întruniri, hai pala codoia înscriisarde-ma ca i Școala anda o Servicio Teocratico. Vi acana anav manghe amintea o ghies cana încărdem i iechto tema. Trebuisardea te jiav opre pe iech cutia, te avav mai ucio, caște dichav părdal o pupitro. Atunci sas man șov bărș hai sas man but emoții cana dichlem le bare manușen anda o auditorio.

Mânro dad scriisardea manghe iech prezentarea simplo pe iech cartono caște folosisarav-la andi predicarea. Cana gălem i iechto data corcoro ca iech udar, sas man ohto bărș. Somas zurales bucurime cana o murș cai avilea co udar citisardea mânri prezentarea hai acceptisardea o lil „O Del te avel arachlo ciacio”. Atunci nașlem sigo ca mânro dad te phenav lesche. I predicarea hai le întruniri ande manghe bari bucuria hai ajutisarde-ma te bariarav mânri dorința te slujisarav le Iehovasche cu timp integral.

Le ciacimata anda i Biblia arăsle vi mai but ande mânro ilo cana mânro dad cărdea manghe iech abonamento ca o Turno de veghe. Cana arăsălas fiesavi revista abia ajucărdemas te lav-la avri anda i poșta hai te citisarav-la. Mânro pachiamos ando Iehova barilea hai cărdea-ma te camav te dedichisarav-ma lesche.

Ande 1950, me hai mânre dada samas ando New York ca o Congreso „I teocrația bariol”. Joine, 3 august i tema le ghieseschi sas „O ghies anda le misionari”. Ande cado ghies o phral Carey Barber, cai mai târzio slujisardea ando Corpo de Guvernare, încărdea i tema anda o bolimos. Co sfârșito la cuvântareaco pala soste șiutea le dui pușimata anda o  bolimos, me uștilem ande pânrende hai phendem: „Da!”. Sas man 11 bărș cana boldem-ma, tha jianglem că cărdem iech baro paso. Cu sea cadala, sas manghe dar te jiav andre ando pai anda codoia că încă ci jianglem te naiovav. Mânro caco avilea manța ca i piscina hai phendea manghe că sea va avela mișto. Hai cadea sas. Sea întâmplosardea-pe cadea de sigo, că mânre pânre ci arăsle tele. Somas dino catar iech phral ca aver; iech boldea-ma hai aver vazdea-ma avri anda i piscina. Anda codo ghies specialo, o Iehova continuisardea te ortol mânre droma.

Cana terminisardem i școala, camlem te cherav o pionierato, tha mânre profesori phende manghe că trebulas te jiav mai dur ca universitatea. Von încărde-pe but mandar te cherav cadaia hai ji la urmă gălem. Tha, sigo dem mânri seama că ci daisardem te așiav zuralo ando ciacimos hai, ande sea codo timpo te avav atento ca le studii, cadea că pala o iechto bărș tileardem. Phendem le Iehovasche anda cadai buchi hai scriisardem iech lil pherdo respecto mânre profesorenghe caște phenav lenghe sostar alosardem te tilearav. Șiutem mânro pachiamos ando Iehova hai începosardem o pionierato.

Mânro servico cu timp integral începosardea ande iulia 1957 ando foro Wellingborough. Manglem le phralendar catar o Betelo anda Londra te den man iech partenero cai sas-les experiența ando pionierato. O phral Bert Vaisey sicadea-ma but buchia hai ajutisardea-ma te cherav manghe iech lașio programo andi predicarea. Andi congregația sas șov phure pheia, o phral Vaisey hai me. O fapto te pregătisarav-ma hai te jiav ca sea-l întruniri dea-ma but ocazii te bariarav mânri încrederea ando Iehova hai te sicavav mânro pachiamos.

Pala soste somas phandado iech țâra timpo anda codoia că ci camlem te cherav o servicio militaro, prinjiandem la Barbara, iech phei cai sas pioniera specialo. Căsătorisardeam-ame ande 1959, hai camleam te jias oricai samas bișalde. Mai anglal amari repartiția sas ando Lancashire, ando nord-vesto la Angliaco. Pala codoia, andi ianuaria 1961, somas achardo te cherav i Școala anda o Servicio le Regatosco co Betelo andi Londra. Ci avilea manghe te pachiav, că pala i școala, somas numime supraveghetoro intineranto. Dui curche, somas sicado catar iech supraveghetoro de circumscripția cai sas-les mai but experiența, ando foro Birmingham hai i Barbara daisardea te avel manța. Pala codoia, găleam parpale andi amari repartiția andi Lancashire hai Cheshire.

Cana samas andi vacanța, ando august 1962, primisardeam iech lil catar i filiala. Ande leste sas dui cereri anda i Școala Galaad. Pala soste rughisardeam-ame le Iehovasche, me hai i Barbara pherdeam le cereri hai bișaldeam-le sigo parpale ca i filiala. Panji șiona mai târzio, samas po drom caring o Brooklyn, New York, caște las partea ca i 38-to clasa catar i Școala Galaad. Cothe ajucărelas-ame iech sicaimos biblico anda deș șiona.

 Ca i Școala Galaad, ame sichileam but buchia anda o Cuvânto le Devlesco, anda leschi organizația hai vi anda amare phrala hai pheia pa sea-i phuv. Anda codoia că samas zurales tărne sichileam but buchia catar amare colegi andai clasa. Sas man o privilegio te cherav buchi ande fiesavo ghies pașa o phral Fred Rusk, iech andal instructori. Vo ajutisardea-ma te hachiarav că de fiesavi data cana dav iech sfato, cado sfato trebul te avel bazome pi Biblia. Mașcar codola cai încărde cuvântări ca i școala sas but phrala cai sas-le experiența sar o phral Nathan Knorr, Frederick Franz hai Karl Klein. I umilința cai sicadea-la o phral Macmillan sas iech exemplo anda amende. Anda leschi cuvântarea sichileam sar o Iehova ajutisardea pesche poporos andi phari perioada cana ujardea-les mașcar le bărșa 1914 hai 1919.

Caring o sfârșito le cursosco, o phral Knorr phendea manghe hai la Barbarache că va avaia bișalde ande Burundi, Africa. Găleam sigo cai i biblioteca anda o Betelo caște dichas ando Anuaro chichi phrala sas atunci ande Burundi. Ci avilea amenghe te pachias că ci arachleam nici iech raporto anda cado them. Ciaces, avelas te jias ande iech teritorio cai ci cărdea-pe încă i lucrarea de predicare, pe iech continento anda savo jiangleam țâra buchia. Amare ile începosarde te maren zurales, tha i rugăciunea ajutisardea-ame te avas pale liniștime.

Ande amari nevi repartiția, sea-l buchia sas diferime: i clima, i cultura, hai trebuisardea te sichioas iech aver șib, i franceza. Trebuisardea te arachas vi iech than cai te beșas. Pala dui ghiesa avilea amende o Harry Arnott, iech anda amare colegi catar o Galaad cai jialas parpale ande leschi repartiția andi Zambia. Vo ajutisardea-ame te arachas iech apartamento cai arăslea amaro dintuno chăr misionaro. Tha, na pa but timpo, le autorități începosarde te așen contra amenghe, anda codoia că ci jiangle chanci anda le Martori le Iehovasche. Cana începosardeam te avas bucurime ande amari repartiția, le autorități phende amenghe că ci daisaras te așias ando them dacă na-i ame iech permiso buchiaco. Falea amenghe pharo că trebuisardea te tilearas hai te jias ande aver them, andi Uganda.

Sas amenghe dar te jias andi Uganda bi te avel-ame viza, tha șiuteam amaro pachiamos ando Iehova. Iech phral canadiano, cai slujisardea  andi Uganda, avilea amența ca o Oficio anda Imigrări hai explichisardea amari situația. O funcționaro mechlea-ame chichiva șiona caște cheras amenghe iech permiso te beșas cothe. Sas claro că o Iehova ajutisardea-ame.

Amari viața ande cadai nevi repartiția sas zurales diferime la viațatar anda Burundi. Andi Uganda predichilas-pe deja, chiar cana sas numai 28 phrala ande sea o them. Ando teritorio arachleam but manușa cai denas duma engleza. Tha, na pa but timpo, deam amari seama că trebulas te sichioas măcar iech anda le but șiba localo caște ajutisaras codolen interesime te progresin. Începosardeam te predichisaras ando foro Kampala hai andel thana de pașa leste. Cade le mai but manușa denas duma i șib luganda, cadea că alosardeam te sichioas cadai șib. Nachle but bărșa ji cana sichileam-la mișto, tha cadai buchi ajutisardea-ame but andi predicarea. Acana, daisardeam te hachiaras mai mișto le necesități spiritualo le manușenghe casa studiisardeam i Biblia. Anda codoia, von pâtărde penghe ile caring amende, hai phende amenghe so simțosarde anda so sichile.

Samas fericime te sicavas le manușen umilo o ciacimos, tha arachleam bari bucuria vi ando privilegio te slujisarav sar supraveghetoro ando them. Tela i îndrumarea la filialachi anda Kenya, ame găleam ande iech călătoria caște „arachas thana” cai le pionieri specialo te pâtrăn o drom anda i predicarea. Butivar, le manușa anda codola thana sicade amenghe bari ospitalitatea, chiar cana von ci dine duma niciechdata ji atunci ieche Martoreia. Von cărde-ame te simțosaras-ame mișto primime hai chiar dine ame te has.

Tha, ajucărelas-ame iech aver călătoria. Anda Kampala, găleam dui ghiesa le trenoia ji ando porto Mombasa, anda Kenya, hai pala codoia leam o vaporo caring le insule Seychelles, anda o Oceano Indiano. Mai târzio, mașcar le bărșa 1965 hai 1972, me hai i Barbara, vizitisardeam ande iech modo regulato le Insule Seychelles. Co începuto, cothe sas numai dui phrala, tha pala codoia cărdilea iech grupa hai mai târzio iech șucar congregația. Aver călătorii, îngărde-ma te vizitisarav le phralen anda i Eritreea, Etiopia hai Sudan.

Andi Uganda, i situația politico parudea-pe sigo. Le forțe militaro line o zuralimos ando them hai le bărșa cai avile sas pherde dar hai teroarea. Ande sea codo timpo, hachiardeam că sam goghiaver cana urmisaras o sfato la Bibliaco cai phenel ‘te das le Cezarosche so si le Cezarosco’. (Mar. 12:17) Sar exemplo, cana le autorități mangle catar le străini anda Uganda te înregistrin-pe ca o posto de poliție cai sas mai pașe catar lengo chăr, ame cărdeam cadaia sigo. Chichiva ghiesa mai târzio, cana me hai iech aver misionaro găleamas prin i Kampala, chichiva ofițeri de poliție avile caring amende. Amare ile începosarde te maren zurales. Von ande amenghe i acuzația că sam spioni hai îngărde-ame ca o sedio centralo la polițiaco, cai ame phendeam lenghe că sam misionari hai că ci cărdeam chanci nasul. Chiar cana phendeam lenghe că samas deja înregistrime ca i poliția, von ci camle te pachian-ame. Anda codoia samas bișalde tela i paza ca o posto de poliție cai sas pașa amaro chăr de misionari. Ce liniștime samas cana o ofițero de othar prinjandea-ame hai phendea lenghe că samas înregistrime hai pala codoia mechle-ame te tilearas.

 Ande codola ghiesa, nachleam prin momentea zurales phare cana le soldați, cai butivar sas mate, așavenas-ame po than. Atunci rughisardeam-ame hai simțosardeam iech bari pacea ando ilo hai de fiesavi data samas mechle te jias mai dur andi siguranța. Tha, falea amenghe pharo că, ando bărș 1973, sea-l misionari sas-le șiudine avri anda Uganda.

Amari repartiția pale parudea-pe. De cadai data samas bișalde ande Côte d’Ivoire, Africa de Vest. Cado sas iech aver baro paruimos anda amende. Trebuisardea te sichioas iech nevi cultura, te das duma pale franceza sea o timpo hai vi te sichioas te traisaras ande iech than le misionarența anda aver thema. Cu sea cadala, dichleam pale o vast le Iehovasco, cana le manușa umilo hai sincero anda cado teritorio acceptisarde sigo i vestea lași. Me hai i Barbara dichleam sar amaro pachiamos ando Iehova ortosardea amare droma.

Bi te ajucăras ame, i Barbara cărdilea nasfali, sas-la cancero. Butivar găleam andi Europa ca voi te cherel o tratamento, tha ande 1983 deam amari seama că ci mai daisaras te mai slujisaras ande amari repartiția andi Africa. Anda codoia, amare ile rovenas!

Ando timpo so slujisardeam co Betelo anda i Londra, i Barbara cărdilea vi mai nasfali, hai ji la urmă mulea. I familia Betel sas pașa mande ande cadai phari situația. Mai but, iech cuplo ajutisardea-ma but te nachav părdal hai te sicavav mai dur pachiamos ando Iehova. Mai târzio, prinjandem iech phei cai sas navetista co Betelo. Voi slujisardea sar pioniera specialo hai lachi iubirea anda o Iehova sicadea că sas-li spiritualo. Me hai i Ann căsătorisardeam-ame ande 1989 hai de atunci slujisaras co Betelo anda i Londra.

Mașcar le bărșa 1995 hai 2018, sas man o privilegio te slujisarav sar reprezentanto le sediosco mondialo (mai anglal bușiolas supraveghetoro de zonă) hai vizitisardem cam 60 thema. Oricai somas, dichlem sar o Iehova binecuvântisardea pesche slujitoren, indiferento prin ce situații nachen.

Ande 2017, iech anda cadal vizite andea man parpale andi Africa, cadea că vi i Ann daisardea te avel manța ande Burundi. Ce bucurime samas le dui te dichas ce but phrala sas acana cade: mai but sar 15 500. Pe iech andal străzi cai predichisardem chăr chărestar ande 1964, acana si iech șucar Betelo!

Somas zurales bucurime cana primisardem i lista anda le thema cai trebulas te vizitisarav-le ande 2018. Pe cadai lista sas o Côte d’Ivoire. Cana arăslem ando foro Abidjan, sas sar cana gălem chăre. Ando Betelo dichlem că pi lista de telefoane sas o anav ieche phralesco cas me prinjiandem-les o Sossou hai că vo beșelas andi camera de pașa amende. Andem manghe amintea că vo slujisardea sar supraveghetoro le forosco cana me somas ando Abidjan. Tha codo, ci sas o Sossou cas me prinjiandem-les, vo sas lesco șiavo.

O Iehova încărdea sea o timpo peschi promisiunea. Le pharimata prin save nachlem, sicade-ma că, dacă șioas amaro pachiamos ando Iehova, vo ortosarel amare droma. Camas anda sea o ilo te jias mai dur pe cado drom cai îngărel-ame andi lumea i nevi! (Prov. 4:18)