1, 2. Cadea sar phenel-pe ando Matei 5:11, sar trebulas te dichas le zumaimata?

O ISUS promitisardea codolenghe cai urmin-les că va avena ciaces fericime, tha vo mai phendea lenghe că va nachena prin zumaimata. (Mat. 10:22, 23; Luca 6:20-23) Ame, sar discipoli le Cristososche, sam ciaces bucurime. Tha sar simțosaras-ame cana amari familia așel amenghe contra, sam persecutime catar le guvernea sau amare colegi catar i buchi sau i școala zumaven ame? Cadal situații daștin te cheren-ame te avas îngrijorime.

² Le mai but manușa, ci arachen iech motivo de bucurie cana nachen prin persecuții. Tha exacto cadaia phenel amenghe o Cuvânto le Devlesco te cheras. Sar exemplo, o discipolo Iacov phendea amenghe, te na mechas-ame perade catar le zumaimata, tha te dichas-le sar iech motivo de bucurie. (Iac. 1:2, 12) Vi o Isus phendea că trebul te avas fericime chiar cana sam persecutime. (Citisar Matei 5:11.) Tha sar daisaras te încăras amari bucuria cana nachas prin zumaimata? Daisaras te sichioas but buchia anda so scriisardea o Iacov ando lil caring le dintune creștini. Mai anglal, te dichas prin ce pharimata nachle von.

3. So întâmplosardea-pe ca țâra timpo pala soste o Iacov cărdilea iech discipolo le Isusosco?

³ Ca țâra timpo pala soste o Iacov, o phral vitrego le Isusosco, cărdilea discipolo, le creștini anda o Ierusalimo sas-le zurales persecutime. (Fap. 1:14; 5:17, 18) Cana o discipolo Ștefan sas-lo mudardo, but creștini nașle anda o foro  „hulade-pe ande Iudeea hai Samaria”, hai arăsle ji ando Cipro hai Antiohia. (Fap. 7:58–8:1; 11:19) Prin ce but pharimata trebuisarde von te nachen! Cu sea cadala, von predichisarde mai dur pherde zelo i vestea lași oricai găle, cadea că ande sea o Imperio Romano cărde-pe congregații. (1 Pet. 1:1) Tha ajucărenas-le timpuri vi mai phare.

4. Prin ce aver zumaimata nachle le dintune creștini?

⁴ Le dintune creștini nachle prin mai but zumaimata. Sar exemplo, ando bărș 50 a.e., o împărato romano Claudiu dea ordino ca sea le evrei te tilearen anda i Roma. Cadea că, le iudei cai cărdile creștini trebulas te mechen penghe chăra hai te jian te beșen ande aver thana. (Fap. 18:1-3) Cam ando bărș 61 a.e., o apostolo Pavel phendea anda le creștini că sas-le prasade angla aver, șiudine ando phandaimos hai sas ciorde lenghe buchia. (Evr. 10:32-34) Mai but, cadea sar aver manușa, unii creștini sas ciore hai nasfale. (Rom. 15:26; Filip. 2:25-27)

5. Save pușimatande va arachaia o răspunso?

⁵ Cana scriisardea pesco lil, angla o bărș 62 a.e., o Iacov jianglea mișto prin ce zumaimata nachenas lesche phrala hai pheia. Tela inspirația divino, vo dea-le sfaturi cai avenas te ajutin-le te încheren penghi bucuria, andel zumaimata. Mai dur, va avela te dichas chichiva idei anda o lil le Iacovosco hai va avela te das o răspunso ca le pușimata cai aven: Anda ce bucuria dea duma o Iacov? So daștilas te ciorel amendar cadai bucuria? Hai sar daștin i înțelepciunea, o pachiamos hai o tromai te ajutin-ame te încăras amari bucuria cana nachas prin zumaimata?

6. Cadea sar phenel-pe ando Luca 6:22, 23, sostar daștil iech creștino te avel bucurime cana nachel prin zumaimata?

⁶ Le manușa pachian că daștin te aven bucurime numai cana silen iech lașio sastimos, but love hai iech șucar familia. Tha i bucuria anda savi scriisardea o Iacov cherel parte anda o rodo le spiritosco sfânto hai ci încărel conto catar i situația ieche manușeschi. (Gal. 5:22) Iech creștino daștil te avel bucurime cana jianel că siles i aprobarea le Iehovaschi hai urmil o exemplo le Isusosco. (Citisar Luca 6:22, 23; Col. 1:10, 11) Cadai bucuria si sar i iag anda iech lampa. Anda codoia că sili protejime andi lampa, voi daștil te thabol sea o timpo. Sa cadea, i bucuria thabol mai dur ando ilo ieche creștinosche chiar cana nachel prin situații phare. Cadai bucuria ci hasarel-pe cana aven pharimata sar si iech nasfalimos, țâra love, prasamos sau persecuții catar i familia sau averendar. Cana codola cai si contra amenghe camen te mudaren i iag la bucuriachi anda amaro ilo, voi thabol mai dur, hai mai zurales. Le zumaimata le pachiamasche prin save nachas sicaven că sam ciace discipoli le Cristososche. (Mat. 10:22; 24:9; Ioan 15:20) Anda codoia, o Iacov scriisardea: „Mânre phrala, cana nachen prin but zumaimata dichen-le sar iech motivo te aven zurales bucurime”. (Iac. 1:2)

7, 8. Sar cheren le zumaimata amaro pachiamos mai zuralo?

⁷ O Iacov phenel iech aver motivo sostar le creștini alosaren te nachen vi prin zumaimata phare. Vo phenel: „Tumaro pachiamos cai silo zumado cadea, îngărel ca i perseverența”. (Iac. 1:3) Le zumaimata daștin te aven sar o proceso prin savo si cărdi iech lama oțeloschi. I lama sili tachiardi, hai pala codoia sili sigo șudriardi caște avel mai zurali. Sa cadea, cana nachas prin zumaimata, amaro pachiamos zuriarel-pe. Anda codoia, o Iacov phendea: „Mechen ca i perseverența te cherel peschi buchi, caște aven cadea sar trebul hai sasteveste ande sea”. (Iac. 1:4) Cana dichas că le zumaimata cheren mai zuralo amaro pachiamos, daisaras te suportisaras-le bucuriaia.

⁸ Ande pesco lil, o Iacov mai dea duma vi anda chichiva buchia cai daștin te cioren amari bucuria. Save si cadala hai sar daisaras te nachas părdal lende?

9. Sostar trebul amenghe înțelepciunea?

⁹ O pharimos: Cana ci jianas so te cheras. Cana nachas prin zumaimata camas te  dichas caring o Iehova caște las decizii plăcuto lesche, cai sile ando miștimos le phralengo hai cai ajutin-ame te așias integri. (Ier. 10:23)Trebul amenghe înțelepciunea caște jianas so te cheras hai so te phenas codolenghe cai sile contra amenghe. Cana ci jianas so te cheras, daisaras te simțosaras-ame perade hai te hasaras sigo amari bucuria.

10. Cadea sar phenel-pe ando Iacov 1:5, so trebul te cheras caște avel-ame înțelepciunea?

¹⁰ So te cheras: Te mangas le Iehovastar înțelepciunea. Caște na hasaras amari bucuria cana nachas prin zumaimata, trebul mai anglal te mangas le Iehovastar înțelepciunea, caște las lașe decizii. (Citisar Iacov 1:5.) Tha so trebulas te cheras cana fal-ame că o Iehova ci răspunzol sigo ca amare rugăciuni? O Iacov phenel că trebul ‘te mangas sea o timpo’ înțelepciunea le Devlestar. O Iehova ci holiavel-pe cana rughisaras-ame mai butivar. Cana rughisaras-ame te del amenghe înțelepciunea andel zumaimata, amaro Dad cerisco del-ame ‘but mai but sar mangas, bi te reproșil-amenghe’. (Ps. 25:12, 13) O Iehova jianel prin so nachas, duchal-les amendar hai abia ajucărel te ajutil-ame. Cadai buchi anel amenghe bari bucuria! Tha sar del-ame o Iehova înțelepciunea?

11. So aver vareso trebul te cheras caște avel-ame înțelepciunea?

¹¹ O Iehova del-ame înțelepciunea prin lesco cuvânto. (Prov. 2:6) Anda codoia, trebul te studiisaras i Biblia hai amare publicații. Tha ci arăsăl te avel-ame doar prinjianimos. Trebul te mechas ca i înțelepciunea le Devleschi te cherel buchi ande amari viața hai te aplichisaras le sfaturi cai del-le amenghe vo. O Iacov phendea: „Cheren so phenel o cuvânto, na numai așunen-les”. (Iac. 1:22) Cana traisaras cadea sar phenel amenghe o Del, cărdioas mai pașnici, mai rezonabili hai  mai îndurători. (Iac. 3:17) Cadal calități va ajutina-ame te nachas părdal orisavo zumaimos bi te hasaras amari bucuria.

12. Sostar si importanto te prinjianas mișto i Biblia?

¹² O Cuvânto le Devlesco si sar iech oglinda cai ajutil-ame te dichas cai trebul te cheras paruimata hai sar. (Iac. 1:23-25) Sar exemplo, cana studiisaras i Biblia, daisaras te das amari seama că trebul amenghe mai but stăpânirea de sine. O Iehova daștil te ajutil-ame te avas blânzi cana aver manușa holiaren-ame sau cana nachas prin situații phare. Ande cadal situații i blândețea ajutil-ame te cheras lenghe fața mai mișto, te gândisaras mai claro hai te las decizii mai lașe. (Iac. 3:13) Cadea că si zurales importanto te prinjianas mișto i Biblia.

13. Sostar trebulas te studiisaras le exemplea mechle le manușendar anda i Biblia?

¹³ Po iechdata, sichioas anda amare greșeli, tha cadaia duchavel-ame. O mai lașio modo te avel-ame înțelepciunea si te sichioas andal averende exemplea lașe sau nasul. Anda codoia, o Iacov phendea amenghe te dichas o exemplo le manușengo anda i Biblia, sar avelas o Avraam, i Rahav, o Iov hai o Ilie. (Iac. 2:21-26; 5:10, 11, 17, 18) Cadal slujitori le Iehovasche nachle prin zumaimata tha ci hasarde penghi bucuria. Lengo exemplo de perseverență sicavel că o Iehova daștil te ajutil vi ame te cheras sa cadea.

14, 15. Sostar trebul te rezolvisaras amare îndoieli?

¹⁴ O pharimos: Cana si ame îndoieli. Po iechdata, daștil te avel amenghe pharo te hachiaras vareso anda o Cuvânto le Devlesco. Sau daștil-pe că o Iehova ci del răspunso ca amare rugăciuni cadea sar ajucărdeam-ame. Cadal situații daștin te anen amenghe îndoieli. Dacă ci las-le andi seama, von daștin te covliaren amaro pachiamos hai te duriaren ame catar o Iehova. (Iac. 1:7, 8) Chiar daștinas te cheren ame te hasaras amari speranța.

¹⁵ O Apostolo Pavel phendea că amari speranța si sar iech ancora. (Evr. 6:19) Cadaia cherel ca iech corabia te avel stabilo cana avel iech baro brișind hai ci mechel-la te jial caring le stânci. Tha i ancora sili lași chichi timpo o lanțo cai phandel-la ca i nava ci șindiol-pe. Cadea sar i rugina hal o lanțo catar iech ancora, sa cadea le îndoieli han amaro pachiamos. Cana nachel prin opoziția, iech manuș cai siles îndoieli daștil te hasarel pesco pachiamos andel promisiuni le Iehovasche. Cana hasaras amaro pachiamos, hasaras vi amari speranța. O Iacov phenel că „codoles cai siles îndoieli si sar o valo la mareaco phirado la barvaliatar hai șiudino anda iech rig ande aver”. (Iac. 1:6) Iech manuș cai silo cadea ci va avela bucurime.

16. So trebulas te cheras caște duriaras amendar le îndoieli?

¹⁶ So te cheras: Te duriaras amendar le îndoieli; te zuriaras amaro pachiamos. Na aș po gânduri, hai cher sigo vareso. Andel ghiesa le profetosche Ilie, le slujitori le Iehovasche începosarde te na aven siguri ande soste pachianas. O Ilie phendea lenghe: „Ji cana ci va jianena ande caste te pachian? Dacă o Iehova si o ciacio Del, jian pala leste; tha, dacă si o Baal, jian pala leste!”. (1 Regi 18:21) Cadaia si ciaces vi aghies! Vi ame trebul te cheras cercetări caște zuriaras amaro pachiamos că o Iehova si o Del, că i Biblia si lesco Cuvânto hai că le Martori le Iehovasche sile lesco poporo. (1 Tes. 5:21) Cana cheras cadea amare îndoieli ci va mai avena, hai amaro pachiamos va zuriarela-pe. Mai but, daisaras te mangas ajutorii le phurendar. Cadea că, si zurales importanto te cheras sigo vareso  dacă camas te încăras amari bucuria ando servicio le Iehovasco.

17. So întâmplol-pe cana hasaras amaro tromai?

¹⁷ O pharimos: Cana sam perade. O Cuvânto le Devlesco phenel: „Dacă san perado ando ghies le necazosco, țâno va avela chio zuralimos”. (Prov. 24:10) O cuvânto ebraico anda „te aves perado” daștil te însemnol vi „te hasares chio tromai”. Cana hasares chio tromai, hasares vi chi bucuria.

18. So însemnol te perseverisaras?

¹⁸ So te cheras: Te mangas le Iehovas te del-ame tromai caște perseverisaras. Trebul amenghe tromai caște nachas părdal le zumaimata. (Iac. 5:11) O cuvânto „perseverența” folosime catar o Iacov, referil-pe ca iech manuș cai așel pe pesco than, hai ci mișchil-pe. Daisaras te gândisaras-ame ca iech soldato cai așel pherdo tromai ca pesco than hai ci nașel chiar cana silo atachime zurales catar le dușmani.

19. So daisaras te sichioas anda o exemplo cai mechlea-les amenghe o apostolo Pavel?

¹⁹ O Apostolo Pavel mechlea amenghe iech șucar exemplo de tromai hai perseverența. Tha po iechdata, vo simțosardea-pe covlo. Cu sea cadala, pachiaia-pe ando Iehova, hai vo dea-les o zuralimos caște perseveril. (2 Cor. 12:8-10; Filip. 4:13) Vi ame daisaras te primisaras cado zuralimos hai tromai dacă recunoștisaras pherde umilința că trebul-ame o ajutorii le Iehovasco. (Iac. 4:10)

20, 21. Anda soste daisaras te avas siguri?

²⁰ Ame daisaras te avas siguri că le zumaimata prin save nachas ci sile iech pedeapsa catar o Iehova. O Iacov phenel: „Chonic, cana silo zumado, te na phenel: «Som zumado le Devlestar». Că o Del ci daștil te avel zumado buchianța nasul hai vo ci zumavel chanicas”. (Iac. 1:13) Cana pachias cado ciacimos, ame pașioas vi mai but amare Dadestar cerisco. (Iac. 4:8)

²¹ O Iehova „ci paruvel-pe”. (Iac. 1:17) Cadea sar sas-lo pașa le creștini anda o secolo I cana nachle prin zumaimata, sa cadea va avela vi pașa amende. Te mangas mai butivar le Iehovastar înțelepciunea, pachiamos hai tromai, hai vo va dela-le amenghe! Cadea, daisaras te avas siguri că vo va ajutila-ame te încăras amari bucuria andel zumaimata.