Cu sea cadala, o Iehova camel te ajucăras o timpo cana va cherela so promitisardea. Sostar manghel vo amendar cadaia hai so ajutil amen te avas voime ando timpo so ajucăras?

SOSTAR CAMEL O IEHOVA TE AJUCĂRAS?

I Biblia phenel: „Tha o Iehova ajucărel pherdo răbdarea caște sicavel tumenghe lașimos; vo va vazdela-pe caște sicavel tumenghe îndurarea. Că o Iehova silo iech Del le ortomasco. Fericime sile sea codola cai ajucăren-les!”. (Is. 30:18) O Del phendea le profetosche Isaia te scriil cadal dumes anda le iudei șărale anda lesco timpo. (Is. 30:1) Tha, mașcar cadal iudei sas vi chichiva jene cai slujinas le Iehovasche pherde pachiamos, cadea că cadal dumes dine-len iech speranța. Cadal dumes den speranța vi le slujitoren le Iehovasche de aghies.

Cadea că, trebul te ajucăras pherde răbdarea anda codoia că vi o Iehova ajucărel pherdo răbdarea. Vo deja alosardea o ghies hai o ceaso cana va chosela cadai lumea nasul hai vo ajucărel te avel codo timpo. (Mat. 24:36) Atunci savore va daștina te dichen că sea so phendea o Beng anda o Iehova hai anda lesche slujitori si numai hohaimata. Vo va chosela le Satanos hai savoren cai așen de leschi rig, tha amenghe ‘va sicavela îndurarea’.

Ji atunci, o Iehova ci daștil te duriarel sea amare pharimata, tha del amen i asigurarea că daisaras te avas voime ando timpo so ajucăras. Cado ciacimos dichiol-pe andal dumes scriime catar o Isaia, cai sicaven că le manușa le Iehovasche daștin te aven bucurime, chiar cana ajucăren ca le buchia te paruven-pe hai te aven mai mișto. (Is. 30:18) a Sar daisaras te avas voime? Mai dur, va avela te dichas ștar buchia cai daștin te ajutin amen.

SAR DAISARAS TE AVAS VOIME ANDO TIMPO SO AJUCĂRAS?

Te încăras amari goghi ca le lașe buchia anda amari viața. O rege David dichlea but nasulimos ande sea le ghiesa lesca viațache. (Ps. 37:35) Cu sea cadala, vo scriisardea: „Na phen chanci angla o Iehova hai ajucăr-les pherdo răbdarea. Na astar tut holiatar anda o manuș savesche înclen sea le buchia nasul cai șiutea-len pesche andi goghi”.  (Ps. 37:7) Vi o David lea-pe pala pesco sfato hai încărdea pesco dichimos caring leschi speranța. Sa cadea, încărdea ande peschi goghi fiesavi buchi lași cai cărdea-la o Iehova anda leste. (Ps. 40:5) Dacă vi amen gândisaras amen ca le lașe buchia anda amari viața hai ci încăras amari goghi ca le buchia nasul cai dichas-len pașa amende, va avela amenghe mai ușoro te ajucăras le Iehovas.

Te așaras le Iehova oricana. O murș cai scriisardea o Psalmo 71, daștil-pe că sas sa o David, phendea le Iehovasche le dumes cai aven: „Tha me va avela te ajucărav vi mai dur; va avela te așarav tut sea mai but”. (Ps. 71:14) Sar avelas vo te așarel le Iehovas? Vo dea duma averența anda pesco Del hai ghilabadea lesche ghilea anda așarimos. (Ps. 71:16, 23) Vi amen daisaras te arachas bucuria ando timpo so ajucăras le Iehovas cana așaras-les prin i predicarea, prin so das duma ande fiesavo ghies hai prin le ghilea. Cana ghilabas iech ghili le Regatoschi, te dichas atento le șucar versuri cai zuriaren amen!

Te zuriaras amen amare phralența. Cana nachlea prin pharimata, o David phendea le Iehovasche: „Angla codola loialo tuche va avela te șioav mânri speranța ande chio anav”. (Ps. 52:9) Daisaras te avas zuriarde cana beșas amare phralența, na numai ca le întruniri sau andi predicare, tha vi cana chidas amen ande iech than caște simțosaras amen mișto. (Rom. 1:11, 12)

Te zuriaras amari speranța. Ando Psalmo 62:5, o David phendea: „Me ajucărav le Devles bi te phenav chanci, că mânri speranța avel lestar!”. Cana ieche manușes siles iech speranța zurali cadaia cherel-les te ajucărel pherdo pachiamos. I speranța si zurales importanto, vi mai but cana trebul te jias angle ande cado sistemo mai but timpo sar ajucărdeam amen. Trebul te pachias că le promisiuni le Iehovasche va pherena-pe, orichichi de but trebulas te ajucăras pala lende. Zuriaras amari speranța cana sichioas anda o Lil le Devlesco: le profeții, o phanglimos cai si mașcar sea le lila biblico hai le buchia cai sicavel-len o Iehova anda peste. (Ps. 1:2, 3). Sa cadea, trebul ‘te mangas amen spiritosa sfânto’ caște avel amen iech amalimos chidino le Iehovasa, ando timpo so ajucăras i viața veșnico cai promitisardea-la amenghe. (Iuda 20, 21)

Vi amen daisaras te pachias, cadea sar o rege David, că o Iehova sicavel peschi grija hai iubirea loialo caring codola cai ajucăren-les. (Ps. 33:18, 22) Cadea că, te ajucăras vi mai dur le Iehovas pherde răbdarea. Ande sea cado timpo te încăras amari goghi ca le lașe buchia anda amari viața, te așaras le Devles, te beșas amare phralența hai te zuriaras amari speranța.