TETRAGHINE, 18 ianuaria 2023, sas șiuto iech anunțo specialo po site-o jw.org cai phenelas-pe că le phrala Gage Fleegle hai Jeffrey Winder sas-le alosarde te slujin ando Corpo de Guvernare le Martorengo le Iehovasche. Le dui phrala slujin loialo le Iehovasche de but timpo.

O phral Fleegle barilea ande iech familia Martorenghi le Iehovasche, ando stato Pennsylvania (SUA) mai ando vesto. Cana sas-lo tărno șiavo, leschi familia muchisailea ande iech gav caște cheren mai but buchi andi predicarea. Ca țâra timpo pala codoia, ande 20 noiembria 1988, o phral Fleegle boldea-pe.

Lesco dad hai dei zuriarde-les sea o timpo te cherel mai but andi buchi le Devleschi hai te astarel o servicio cu timp integral. Butivar, lende chăre avenas phrala cai vizitinas le congregații hai beteliști, cadea că o phral Fleegle daisardea te dichel i bari bucuria cai sas cadale phralen. Ca țâra timpo pala o bolimos, ande 1 septembria 1989, vo astardea o pionierato regularo. Dui bărșa mai târzio, ande octombria 1991, sas-lo achardo te slujil co Betelo anda Brooklyn. Cadea arăslea te cherel so șiutea pesche andi goghi cana sas-les 12 bărșa.

O phral Fleegle cărdea buchi ohto bărșa co departamento cai phandenas-pe le lila, pala codoia sas-lo șiuto te slujil co Departamento anda o servicio. Ande codo timpo, vo slujisardea chichiva bărșa ande iech congregația de șib ruso. Ando bărș 2006 cărdea o abiav pesca rromniasa, i Nadia, cai arăslea te slujil pașa leste co Betelo. Ande iech than von slujisarde ando teritorio anda i șib portughezo hai de mai but sar deș bărșa slujin ando teritorio anda i șib spaniolo. Pala mai but bărșa co Departamento anda o servicio, o phral sas-lo șiuto te cherel buchi co Birovo le Comitetosco anda o sicaimos, hai pala codoia co Birovo le Comitetosco anda o servicio. Ande martia 2022, vo sas-lo numime asistento le Comitetosco anda o servicio anda o Corpo de Guvernare.

 O phral Winder barilea ande Murrieta, California (SUA), ande iech familia Martorenghi le Iehovasche hai boldea-pe ande 29 martia 1986. Chiar ando șion cai avilea, astardea o pionierato auxiliaro. Cadai buchi andea lesche but bucuria, cadea că camlea te cherel-la vi mai dur. Ande 1 octombria 1986, pala so chichiva șiona cărdea o pionierato auxiliaro, vo astardea o pionierato regularo.

Cana sas-lo tărno șiavo, o phral Winder gălea te dichel pesche duie phralen mai bare, cai slujinas co Betelo. Cana dichlea so șucar si, șiutea pesche andi goghi că camelas te slujil vi vo code. Ando șion mai 1990, vo sas-lo achardo co Betel, ande Wallkill.

O phral Winder cărdea buchi ande mai but departamentea anda o Betelo, sar avelas: co ujimos, ca i ferma hai co Birovo le Betelosco. Ando bărș 1997 cărdea o abiav pesca rromniasa i Angela, hai de atunci slujin ande iech than co Betelo. Ando bărș 2014, sas-le bișialde co Warwick, cai o phral Winder cărdea buchi ca o proiecto anda o vazdimos le sediosco mondialo. Ando bărș 2016, von muchisarde-pe co Centro anda o sicaimos Watchtower, anda Patterson, cai o phral Winder cărdea buchi co Departamento andal servicii audio/video. Pala ștar bărșa, von găle parpale co Warwick, hai o phral Winder sas-lo șiuto te cherel buchi co Birovo le Comitetosco anda o personalo. Ande martia 2022, vo sas-lo numime asistento le Comitetosco anda personalo anda o Corpo de Guvernare.

Mangas amen ca o Iehova te del but miștimata cadale phralen, „manușa sar daruri”, cai cheren phares buchi anda o Regato le Devlesco. (Ef. 4:8)