1. So sicavel că aghies ci mai si „iubirea ciaci” ande but familii?

I BIBLIA phendea de mai anglal că, andel ghiesa de palal, le manușen ci va mai avela-len „iubirea ciaci”. (2 Tim. 3:1, 3) Aghies, dichas sar pherel-pe cadai profeția. Sar exemplo, milioanea familii arăsăn co divorțo, le dada holearici iech pe aver mechen pala lende le șiaven cai simțon-pe neiubime. Aver familii, chiar cana beșen sea ande codo chăr sile sar niște străini. Iech manuș cai del sfaturi le familienghe cai sile probleme phenel: „Le dada hai le șiave așen dur iech averestar caște aven corcore, conectin-pe ca iech calculatorii, ca iech tableta, ca iech telefono sau ca iech joco video. Chiar cana train sea ande codo chăr, von ci prinjianen-pe ciaces iech averes”.

2, 3. a) Cadea sar phenel-pe ando Romani 12:10, caring caste trebul te sicavas afecțiunea tandro? b) So va dichaia ande cado articolo?

² Ame ci camas te arăsas sar but manușa anda cadai lumea saven nai-le iubirea. (Rom. 12:2) Mai but, camas te sicavas afecțiunea tandro caring codola anda amari familia hai vi caring amare phrala anda i congregația. (Citisar Romani 12:10.) So si i afecțiunea tandro? Cadaia si i bari iubirea so simțosaren-la le jene anda iech familia cai silen iech amalimos chidino iech avereia. Trebul te sicavas cadai iubirea vi caring amare phrala hai pheia anda amari familia spiritualo. Cadea încăras i unitatea mașcar amende hai sicavas că anas închinarea ciaci le Iehovasche. (Mica 2:12)

³ Mai dur, va avela te dichas chichiva exemplea anda save daisaras te sichioas sar te sicavas afecțiunea tandro.

4. Cadea sar phenel-pe ando Iacov 5:11 chichi de bari si i iubirea le Iehovaschi?

⁴ I Biblia sicavel ce calități șucar si le Iehovas. Sar exemplo, voi phenel că „o Del silo iubirea”. (1 Ioan 4:8) Chiar cana avelas te prinjianas numai cadai buchi anda o Iehova, arăsălas caște camas te avas lesche amala. Tha i Biblia phenel amenghe că o Iehova silo „pherdo afecțiunea tandro”. (Citisar Iacov 5:11.) Ce șucar si sicadi i bari iubirea le Iehovaschi cai siles caring amende!

5. Sar sicavel o Iehova îndurarea hai sar daisaras te cheras vi ame sa cadea?

⁵ Ando Iacov 5:11, daisaras te dichas că i afecțiunea tandro le Iehovaschi hai i îndurarea, iech aver calitatea cai țârdel-ame leste, sile șiute ande iech than. (Ex. 34:6) O Iehova sicavel peschi îndurarea caring amende, sar exemplo cana iertil amare greșeli. (Ps. 51:1) I Biblia ajutil-ame te hachiaras că i îndurarea ci însemnol numai iertarea. Si iech sentimento zuralo, cai avel anda o ilo ieche manușesco cana dichel varecas ando pharimos hai cadaia cherel-les te camel te ajutil-les. O Iehova sicavel amenghe că lesche sentimentea caring amende sile mai zurale sar le sentimentea iecha deiache caring laco șiavorro. (Is. 49:15) Cana nachas prin pharimata, i îndurarea cherel le Iehovas te ajutil-ame. (Ps. 37:39; 1 Cor. 10:13) Vi ame trebulas te sicavas îndurarea amare phralenghe hai pheianghe hai te iertisaras-le, bi te încăras holi pe lende ande amaro ilo. (Ef. 4:32) Iech aver modalitatea importanto prin savi sicavas îndurarea caring lende si te avas pașa lende cana sile zumaimata. Cana i iubirea cherel-ame te sicavas îndurarea caring aver, imitisaras le Iehovas, cai sicavel i mai bari afecțiunea tandro. (Ef. 5:1)

6. Sar sicade penghe o Ionatan hai o David afecțiunea tandro?

⁶ I Biblia del duma anda manușa imperfecți cai sicade afecțiunea tandro, cadea  sar sas o David hai o Ionatan. Voi phenel: „Mașcar o Ionatan hai o David phanglea-pe iech amalimos chidino hai o Ionatan iubisardea-les sar pes”. (1 Sam. 18:1) O David sas-lo machlo te avel rege pala o Saul. O Saul sas cadichi de pherdo holi ande pesco ilo că camlea te mudarel-les. Tha lesco șiavo o Ionatan ci așilea de leschi partea cana camlea te mudarel le Davidos. O Ionatan hai o David țolaharde penghe că va așena amala hai că va ajutina-pe iech averes sea o timpo. (1 Sam. 20:42)

7. So daisardeas te cherel ca o David hai o Ionatan te na aven amala?

⁷ I afecțiunea tandro mașcar o David hai o Ionatan sas zurales specialo, chiar cana sas but buchia cai daisardeas te na mechen-le te aven amala. Sar exemplo, o Ionatan sas cam 30 bărșența mai phuro sar o David. Vo daisardeas te gândil-pe că o David sas-lo prea tărno caște avel lesco amal. Cu sea cadala, o Ionatan ci dichlea cadea le Davidos. Mai but, vo sicadea lesche iech baro respecto.

8. Sostar pachias că o Ionatan sas iech lașio amal?

⁸ O Ionatan daisardeas te avel invidioso po David. Anda codoia că o Ionatan sas o șiavo le regesco, daisardeas te manghel pesco drepto te avel vo rege pala pesco dad. (1 Sam. 20:31) Tha cana o Iehova cărdea le Davidos rege, o Ionatan sas-lo umilo hai așilea loialo le Iehovasche anda sea o ilo. Vo sas loialo vi le Davidosche, chiar cana cadai buchi cărdea ca o Saul te astarel-pe holeatar. (1 Sam. 20:32-34)

9. Sostar ci dichlea o Ionatan le Davidos sar ieche dușmanos? Explichin.

⁹ O Ionatan sicadea afecțiunea tandro caring o David hai ci dichlea-les sar ieche dușmanos. Vo sas iech lașio arcașo hai iech războinico bidarano. Anda leste hai anda lesco dad, o Saul, phenelas-pe că sas-le „mai iuto sar le acvile” hai „mai zurale sar le leii”. (2 Sam. 1:22, 23) Catar hachiaras că o Ionatan daisardeas te del-pe baro că silo zuralo. Tha o Ionatan ci camlea te sicavel că silo mai lașio sar o David hai ci sas-lo invidioso pe leste. Mai but, o David sas-lo cuci ande lesche iacha, cana dichlea lesco tromai hai pachiamos ando Iehova. Sar exemplo, pala soste mudardea le Goliatos, o Ionatan începosardea te iubil-les sar pes. Sar daisaras te sicavas vi ame iech afecțiunea tandro sar cadaia caring amare phrala hai pheia?

10. So însemnol ‘te iubisaras-ame zurales iech averes’?

¹⁰ I Biblia phenel amenghe ‘te iubisaras-ame zurales iech averes, anda ilo’. (1 Pet. 1:22) O Iehova si o mai lașio exemplo cai sicavel-ame sar te cheras cadaia. Leschi iubirea si cadichi de bari, că dacă ame așias lesche loiali, chanci ci daștil te încărel-ame dur catar leschi iubirea. (Rom. 8:38, 39) O termeno grecisco anda o cuvânto „zurales” sicavel amenghe i ideea anda iech manuș cai zinghiol caring varesoste hai del pesche mai but zor. Po iechdata, vi ame trebul, ando senso figurativo te zinghiaras-ame sau te das amari zor, adică te cheras eforturi caște sicavas afecțiunea tandro anda iech phral sau phei. Cana aver holearen-ame, trebul te ‘suportisaras-ame iech averes pherde iubirea hai te cheras sea so daștisaras caște încăras i unitatea le spiritoschi ando phanglimos la paceaco’. (Ef. 4:1-3) Cana cheras sea so daisaras caște încăras o „phanglimos la paceaco”, ci va avela te gândisaras-ame sea o timpo ca le greșeli cai cărde-le amare phrala. Mai but, va avela te cheras eforturi te dichas amare  phralen cadea sar dichel-le o Iehova. (1 Sam. 16:7; Ps. 130:3)

11. Sostar daștil te avel amenghe pharo po iechdata te sicavas afecțiunea tandro?

¹¹ Daștil te avel amenghe pharo te sicavas afecțiunea tandro caring amare phrala vi mai but cana prinjianas mișto lenghe defectea. Cadaia daștil-pe că sas iech problema prin savi nachle vi unii creștini anda o secolo I. Sar exemplo, i Evodia hai i Sintiche cărde buchi mișto, pherde zelo le Paveloia „anda i vestea lași”. Cu sea cadala, ci jiangliol-pe sostar, po iechdata von ci hachiarde-pe mișto hai hale-pe. Anda codoia, o Pavel phendea lenghe „te avel-le sa codoi gândirea ando Rai”. (Filip. 4:2, 3)

12. Sar daisaras te sicavas afecțiunea tandro caring amare phrala hai pheia?

¹² Sar daisaras te sicavas afecțiunea tandro caring le phrala hai le pheia? Cana cheras eforturi te prinjianas-le mai mișto, va avela amenghe mai ușoro te hachiaras-le hai te iubisaras-le. Le bărșa hai o than catar aven ci trebulas te cheren-ame te na avas lența amala. Cadea sar dichleam, o Ionatan sas cam 30 bărșența mai phuro sar o David. Cu sea cadala, mașcar lende sas iech amalimos chidino. Daștias vi tu te cheres tuche iech amal mai tărno sau mai phuro sar tute? Dacă va avela te cheres cadea, va sicaveia că ‘iubisares le saste phralen’. (1 Pet. 2:17)

13. Sostar daștil-pe te na simțosaras-ame sa cadea de pașă le saste phralendar anda i congregația?

¹³ Chiar cana trebul te sicavas afecțiunea tandro caring amare phrala, cadaia ci însemnol că daisaras te avas sa cadea de pașă le saste phralendar anda i congregația. Ci daisaras te ajucăras-ame te avel cadea. Si normalo te simțosaras-ame mai pașă le phralendar cai placian-le sa codol buchia sar amen. O Isus phendea anda sea-l apostoli că si lesche „amala”, tha le Ioanos iubisardea-les o mai but. (Ioan 13:23; 15:15; 20:2) Cu sea cadala, o Isus ci phiradea-pe mai șucar leia sar averența. Sar exemplo, cana vo hai o Iacov, lesco phral, mangle penghe bare thana ando Regato, o Isus phendea lenghe: „Te beșes ca mânri ciaci  sau ca mânri stângo na-i vareso so me daștiv te dav”. (Mar. 10:35-40) Cadea sar o Isus, nici ame ci trebul te phiravas-ame mai șucar amare amalența sar averența. (Iac. 2:3, 4) Dacă avelas te cheras cadea, ci ajutisaras i congregația te avel chidini. (Iuda 17-19)

14. Cadea sar phenel-pe ando Filipeni 2:3, so va ajutila-ame te na das ame bare că sam mai lașe sar aver?

¹⁴ Cana sicavas afecțiunea tandro iech caring aver, ci va avela te das ame bare că sam mai lașe sar aver anda i congregația. O Ionatan ci sicadea că silo mai lașio sar o David hai ci dichlea-les sar ieche dușmanos. Cadea sar o Ionatan, nici ame ci trebulas te avas invidioși pe amare phrala anda codoia că cheren unele buchia mai mișto sar ame, tha, ‘pherde umilința, te dichas-le mai opral de amende’. (Citisar Filipeni 2:3.) Te na bâstras că fiesavo phral daștil te cherel vareso mișto andi congregația. Dacă așias umili, va dichaia le calități amare phralenghe hai pheianghe hai va avela te sichioas but buchia lendar. (1 Cor. 12:21-25)

15. So sichioas anda i experiența prin savi nachlea i Tanya hai lachi familia?

¹⁵ Cana ande amari viața întâmplol-pe vareso nasul, o Iehova anel amenghe mângâierea prin amare phrala hai pheia, cai sicaven afecțiunea tandro caring amende hai ajutin-ame. Te gândisaras-ame ca i experiența iecha familiachi, cai avelas parpale catar iech congreso cai sas-les i tema „I iubirea ci terminil-pe niciechdata”, încărdo andel Statele Unite ande 2019. I Tanya, iech dei trine șiavența phenel: „Trademas i mașina caring o hotelo cana iech șoferii hasardea o control hai dea ame dab. Ci întâmplosardea- pe amența chanci nasul, tha daraileam zurales. Avileam avri andai mașina hai așileam de iech rig pi autostrada. Iech murș cărdea amenghe semno le vasteia te jias caring leschi mașina. Sas iech phral cai avelas parpale catar o congreso. Așile po than vi panji delegați anda i Suedia. Le pheia dine ame angali, man hai mânra șeia, hai cadaia cărdea-ame te simțosaras-ame mai mișto. Phendiom lenghe că sam mișto hai că daștin te jian mai dur, tha von ci camle te tiliaren. Așile amența vi pala soste avilea i ambulanța caște aven siguri că si ame sea so trebul-ame. Ande cadai phari situația, simțosardeam i iubirea le Iehovaschi. I experiența prin savi nachleam zureardea amari iubirea caring amare phrala, tha, mai opral sar orisoste, bariardea amari iubirea hai recunoștința caring o Iehova”. Nachlean vi tu prin iech situația phari, ande savi iech phral sau phei sicadea tuche afecțiunea tandro?

16. Sostar si importanto te sicavas afecțiunea tandro?

¹⁶ Ce șucar buchia daștin te aven anda o fapto că sicavas afecțiunea tandro? Anas mângâierea amare phralenghe cana nachen prin pharimata. O poporo le Devlesco silo mai chidino. Sicavas că sam discipoli le Isusosche hai cadaia țârdel codolen cai silen lașio ilo, ca i închinarea uji. Hai, i mai importanto buchi, anas laude le Iehovasche „O Dad cai sicavel îndurări tandro hai o Del orisavea mângâiereaco”. (2 Cor. 1:3) Cadea că, te sicavas hai te bariaras mai dur amari afecțiunea tandro!