1. Ande so situația phari arăslea o David?

 O DAVID nașlea caște hastravel peschi viața. O Saul, sas o zuralo rege le Israelosco, hai camlea te mudarel-les. Cana ci mai sas-les haben, o David gălea ando foro Nob hai manglea catar o rașai Ahimelec iech țâra haben, numai panji manre. (1 Sam. 21:1, 3) Pala codoia, vo hai lesche manușa garade-pe ande iech peștera. (1 Sam. 22:1) Tha te dichas sar arăslea o David ande cadai situația?

2. So phiraimos nasul începosardea te avel le Saulos? (1 Samuel 23:16, 17)

² O Saul sas pherdo invidia anda codoia că o David arăslea te avel iubime catar le manușa hai câștighisardea but victorii militaro. Mai but, o Saul jianglea că, anda codoia că ci sas ascultătorii, o Iehova ci mai mechlea-les te avel rege le Israelosco hai alosardea ande lesco than le Davidos. (Citisar 1 Samuel 23:16, 17.) Tha, anda codoia că sas încă rege, le Saulos sas-les iech bari armata hai but manușa cai sas de leschi partea. Cadea că, o David trebuisardea te nașel caște așel andi viața. Tha gândilas-pe o Saul că daștilas te luptil contra o scopo le Devlesco anda o David? (Is. 55:11) I Biblia ci phenel cadai buchi. Tha jianas că o phiraimos nasul cai începosardea te avel-les ci cărdea lesche mișto.

3. So sentimentea sas le Davidos cana nachlea prin iech situația zurales phari?

³ O David ci sas iech manuș baricano. Vo ci șiutea-pe corcoro rege le Israelosco, o Iehova șiutea-les ande cadai poziția. (1 Sam. 16:1, 12, 13) O Saul arăslea te dichel le Davidos sar iech  dușmano hai camlea te mudarel-les. Tha o David ci doșardea le Iehovas anda i situația zurales phari ande savi sas-lo hai nici na rovardea-pe anda codoia că sas-les țâra haben hai că trebulas te beșel ande iech peștera. Tha, pala so fal-pe, cana garavelas-pe ande cadai peștera, vo cărdea i șucar ghili anda așarimos anda savi cheren partea le cuvintea: „Codolenghe cai roden le Iehovas ci va lipsola lenghe chanci lașio”, o verseto de bază cadale articolosco. (Ps. 34:10)

4. So pușimata va dichaia mai dur hai sostar?

⁴ Ande amare ghiesa po iechdata bute slujitoren le Iehovasche ci sas-le but haben sau aver buchia cai trebulas len. * Cadai situația cărdilea vi mai phari andi pandemia. Ando timpo so pașiol o baro necazo, ajucăras-ame te nachas prin situații vi mai phare. (Mat. 24:21) Cadea că, si mișto te jianas o răspunso ca ștar pușimata: Ande so felo ‘ci lipsolas chanci lașio’ le Davidosche? Sostar trebul te avas mulțumime le buchianța cai si amen? Sostar daisaras te avas siguri că o Iehova va lela sama pe amende? Hai sar daisaras te avas pregătime anda o viitorii?

5, 6. Sar ajutil amen o Psalmo 23 te hachiaras ca so referisardea-pe o David cana phendea că le slujitorenghe le Devlesche „ci va lispsola lenghe chanci lașio”?

⁵ Ca so cărdea o David referirea cana phendea că le slujitorenghe le Iehovasche „ci va avela te lipsol lenghe chanci lașio”? Caște hachiaras so camlea vo te phenel, te dichas so phenel-pe vi ando Psalmo 23. (Citisar Psalmo 23:1-6.) Le dintune cuvintea cai phenel-le o David ande pesco psalmo si cadala: „O Iehova si mânro Păstorii, ci va avela te lipsol manghe chanci”. Mai dur, o David phenel chichiva cuci buchia cai ci hasaren-pe: miștimata spiritualo cai siles anda codoia că acceptosardea le Iehovas sar lesco Păstorii. O Iehova îngărel-les „pe le droma le ortomasche” hai si pașa leste pherdo loialitatea vi ande timpuri liniștime hai  vi ande timpuri phare. Vo hachiarel că, chiar cana silo ‘pe le phuvea pherde ciar’ le Iehovasche, cadaia ci însemnol că ci va avela-les pharimata. Po iechdata, va avela perado, sar cana jialas tele ‘ande iech valea cai si iech bari ucial’, hai va avela astardo catar le dușmani. Tha, anda codoia că o Iehova, lesco Păstorii lel sama pe leste, ‘ci va darala catar nici iech nasulimos’.

⁶ Acana te das răspunso ca o pușimos: Ande so felo ‘ci lipsolas chanci lașio’ le Davidosche? Vo primisardea sea so trebulas lesche po plano spiritualo. Leschi fericirea ci încărelas catar le buchia materialo. O David sas mulțumime le buchianța cai delas-le lesche o Iehova. I mai cuci buchi anda leste sas că o Iehova dea-les but miștimata hai că lelas sama pe leste.

7. Cadea sar phenel-pe ando Luca 21:20-24, prin so zumaimata nachle le creștini anda o iechto secolo cai traisarde andi Iudeea?

⁷ Anda le cuvintea le Davidosche hachiaras chichi de importanto si te dichas corecto le buchia materialo. Daisaras te bucurisaras-ame le buchiandar cai si amen, cu sea cadala von ci trebun te aven le mai importanto buchia anda amende. Le creștini anda o iechto secolo cai beșenas andi Iudeea trebunas te hachiaren cado baro ciacimos. (Citisar Luca 21:20-24.) O Isus phendea lenghe că, atunci cana va dichena o Ierusalimo „înconjurime catar le armatea cai șiute penghe țărhea code”, von trebunas „te nașen ca le plaina”. Chiar dacă așile andi viața anda codoia că nașle, von hasarde but buchia. Acana chichiva bărșa, i revista O Turno de veghe phendea cadai buchi: „Von mechle penghe phuvea hai penghe chăra bi te chiden nici le buchia anda penghe chăra. Von pachiaie-pe ando Iehova că avelas te lel sama pe lende hai că avelas te ajutil-le, von șiute i închinarea co Iehova mai opre sar oriso aver vareso cai daștilas te fal importanto”.

8. So sicaimos importanto daisaras te sichioas cana dichas prin so nachle le creștini anda o iechto secolo cai trainas andi Iudeea?

⁸ So sicaimos importanto daisaras te sichioas cana dichas prin so nachle vi le creștini anda Iudeea anda o iechto secolo? Ande O Turno de veghe anda savo deam duma mai anglal, phenel-pe mai dur: „Daștil-pe că va avena vi zumaimata cai va sicavena sar dichas amen le buchia materialo; si cadala mai importanto anda amende sau mai importanto si i salvarea cai va avela anda fiesavo anda amende catar o Del? Cana va avela o sfârșito daștil-pe te nachas prin pharimata hai te na avel-ame le buchia cai trebun amenghe. Trebul te avas gata te cheras oriso trebul, cadea sar cărde vi le creștini anda o iechto secolo, cai nașle anda Iudeea”. *

9. Sar zuriarel-ame o sfato cai dea-les o Pavel le evreienghe?

⁹ Daisaras te imaginisaras amenghe chichi de pharo sas anda le creștini te mechen palal sea so sas len hai te începosaren iech viața nevi? Len trebulas te avel-le pachiamos că o Iehova va avela te lel sama pe lende po plano materialo. So aver buchi ajutisardea-le? Panji bărșa mai anglal ca le romani te înconjurin o Ierusalimo, o apostolo Pavel dea le evreienghe iech lașio sfato: „Tumaro modo viațaco te avel bi te iubin le love, hai te aven mulțumime soia si tumen. Că vo phendea: «Niciechdata ci va avela te mechav-tu, hai niciechdata ci va avela te duriarav-ma tutar»”. Cadea că, daisaras te avas pherde tromai hai te phenas: «O Iehova si mânro ajutorii; ci va avela te darav. So daștil te cherel manghe o manuș?»”. (Evr. 13:5, 6) Codolenghe cai ascultisarde so phendea o Pavel mai anglal ca le romani te aven contra lenghe, sas lenghe but mai ușoro te începosaren iech viața simplo, dur catar lengo chăr. Von daisarde  te pachian zurales că o Iehova va avela te lel sama pe lende. Le cuvintea le Pavelosche den amenghe sa codoi siguranța.

10. So ‘secreto’ phendea amenghe o Pavel?

¹⁰ O Pavel dea iech sfato sar cado le Timoteiosche hai vi fiesavesche anda amende: „Cadea că, dacă si amen haben hai hureaimos, va avela te avas mulțumime cadale buchianța”. (1 Tim. 6:8) Camlea o Pavel te phenel că ci trebul te bucurisaras-ame catar iech haben lașio, te avel amen iech șucar chăr sau te chinas po iechdata hureaimos? Nici, na cado sas o mesajo cai phendea-les o Pavel. Tha, vo phenel amenghe te avas mulțumime orisavea buchiaia materialo. (Filip. 4:12) Cado sas o „secreto” le Pavelosco. Niciech buchi materialo cai daștil te avel-ame ci si mai cuci sar o amalimos cai si amen amare Devleia. (Hab. 3:17, 18)

11. Sar sicaven le cuvintea cai phendea-le o Moise caring le israeliți chichi de importanto si te avas mulțumime?

¹¹ Ande soste priveal le buchia cai trebun amenghe, daștil te avel iech diferența mașcar so pachias amen că trebul-ame hai so pachial o Iehova. Te dichas so phendea o Moise le israelițenghe pala 40 bărșa cai beșle ando pustio: „O Iehova, tumaro Del, binecuvântisardea tumen ande sea so cărdean. Vo prinjianel mișto tumaro drom prin cado baro pustio. Ande cadal 40 bărșa, o Iehova, tumaro Del, sas-lo tumența hai ci lipsosardea tumenghe chanci”. (Deut. 2:7) Ande cadai perioada, o Iehova dea le israelițenghe sar haben mana. O hureaimos cai phirade-les sas sa codo saveia găle avri  anda o Egipto hai ci rimosardea-pe. (Deut. 8:3, 4) Chiar cana, anda chichiva cadal buchia fanas-pe că ci arăsănas, o Moise andea amintea le israelițenghe că sas len sea so trebulas lenghe. O Iehova va dichela pherdo bucuria caring amende dacă sichioas te avas mulțumime, te dichas cuci vi chiar le țâne buchia cai primisaras-le hai te hachiaras că sile daruri lestar.

12. Sar sicadea o David că șiutea pesco pachiamos ando Iehova hai na ande pesco zuralimos?

¹² O David jianglea că o Iehova si loialo hai ciaces interesime codolendar cai iubin-les. Chiar dacă, leschi viața sas șiuti ando pericolo cana scriisardea o Psalmo 34, o David dichlea le iachența le pachiamasche le ‘îngeros le Iehovasco cai șiutea peschi țărha pașa leste’. (Ps. 34:7) Daștil-pe că o David comparisardea le îngeros le Iehovasco ieche soldatoia cai șiol peschi țărha po câmpo hai si sea o timpo atento ca le atacuri le dușmanosche. Cu sea, că vo sas iech războinico tromano, hai o Iehova phendea lesche că va avela rege, o David ci pachiaia-pe ande peste că jianel mișto te folosil i praștia sau i sabia caște mudarel lesche dușmanen. (1 Sam. 16:13; 24:12) O David șiutea pesco pachiamos ando Del, hai sas siguro că o îngero le Iehovasco ‘avelas te hastravel codolen cai daran Lestar’. Ciaces, aghies ci ajucăras-ame ca o Iehova te feril amen prin iech miracolo. Tha jianas că sea codola cai șion pengo pachiamos ando Iehova va avena te primin viața veșnico chiar dacă va avela te meren.

13. Cana o Gog anda Magog va avela contra amenghe, sostar va fala-pe că si ușoro te luptil contra amenghe hai sostar ci trebul te avel amenghe dar? (Dich i imaginea pa i coperta.)

¹³ Ando viitorii cai pașiol, amaro pachiamos ando zuralimos le Iehovasco te lel sama pe amende va avela șiuto tela zumaimos. Amari viața va fala-pe că si șiuti ando pericolo cana o Gog anda Magog, iech coaliția anda națiuni, va atachila o poporo le Devlesco. Ande codol momentea, va trebula te pachias zurales că o Iehova daștil te hastravel amen hai va cherela cadai buchi. Andel iacha le națiunenghe, va avaia sar niște bacrea cai chonic ci lel sama pe lende. (Ezec. 38:10-12) Ci va avela amen nici arme hai nici na sam sicade te luptisaras. Andal națiuni, o poporo le Devlesco va fala-pe că si ușoro te luptil-pe contra leste. Von ci va dichena so amen va dichaia le iachența le pachimasche: iech armata îngerenghi cai si pașa amende, gata te feril amen. Hai sar daștinas le națiuni te dichen cadai armata? Len ci silen iech dichimos spiritualo. Ci va avela lenghe te pachian cana le armate cerești va ajutina amen! (Rev. 19:11, 14, 15)

14. Sar daisaras te avas pregătime anda le timpuri cai va avena?

¹⁴ So daisaras te cheras caște avas pregătime anda le timpuri cai ajucăren amen? Ando iechto than, trebul te dichas corecto le buchia materialo, hai te hachiaras că va avela iech timpo cana va trebula te mechas-le palal. Ando duito than, trebul te sichioas te avas mulțumime le buchianța cai si amen hai i mai bari bucuria te arachas-la ande amaro amalimos le Iehovaia. Chichi prinjinas mai mișto amare Devles, cadichi va avela te pachias vi mai zurales că va ferila amen cana o Gog anda Magog va atachila amen.

15. So zumaimata prin save nachlea o David sicade-les că o Iehova ci va mechela-les niciechdata bi te ajutil-les?

¹⁵ So buchi cai ajutisardea le Davidos te avel pregătime anda le zumaimata daștil te ajutin vi amen? O David phendea: „Len hai dichen ce lașio si o Iehova! Fericime si o manuș cai garavel- pe leste”. (Ps. 34:8) Anda cadal cuvintea, hachiaras sostar daisardea o David te bazol-pe po ajutorii le Iehovasco. Vo pachiaia-pe butivar po ajutorii pesche Devlesco, cai ci mechlea-les niciechdata bi te ajutil-les. Cana sas tărno, o David luptisardea contra o Goliat hai phendea cadale manușesche tromano cai daravelas savoren: „Chiar aghies o Iehova va dela tut ande mânro vast”. (1 Sam. 17:46) Pala codoia, cana slujilas le regesche Saul, cado camlea mai butivar te mudarel-les. Tha „O Iehova sas le Davidoia”. (1 Sam. 18:12) O David jianelas că daștilas te pachial-pe ando Iehova vi cana nachelas prin zumaimata.

16. Sar daisaras te dichas chichi de lașio si o Iehova?

¹⁶ Dacă aghies rodas sea o timpo i îndrumarea le Iehovaschi va avela te pachias vi mai zurales că vo va daștila te hastravel amen anda le zumaimata cai va avena. Trebul te sicavas pachiamos hai te camas te pachias amen ando Iehova cana rughisaras codoles caste cheras buchi, te del amen libero caște daisaras te jias ca le congresea sau te paruvel amaro programo ca buchi, caște daisaras te jias ca sea le întruniri hai te jias mai but andi predicarea. Tha te phenas că codo caste cheras buchi ci camel te paruvel amaro programo hai hasaras amari buchi. Va avela amen pachiamos că o Iehova ci va mechela amen niciechdata, tha va lela sama pe amende sea o timpo te avel amen le buchia cai trebun amenghe? (Evr. 13:5) I experiența bute slujitorenghi cai slujin cu timp integral sicavel amenghe că o Iehova ajutisardea len ande le situații zurales phare prin save nachle. O Iehova silo fidelo.

17. Savo si o texto le bărșesco 2022 hai sostar silo potrivime?

¹⁷ Anda codoia că jianas că o Iehova si pașa amende, si amen sea le motivea te nachas bi te daras părdal le ghiesa cai va avena. Amaro Del ci va mechela amen niciechdata chichi timpo șioas leschi voința po iechto than ande amari viața. Anda codoia că trebul te pregătisaras amen andal ghiesa zurales phare cai va avena hai caște avel amen pachiamos că o Iehova ci va mechela amen niciechdata, o Corpo de Guvernare alosardea o Psalmo 34:10 sar texto le bărșesco 2022: „Codolenghe cai roden le Iehovas ci va lipsola lenghe chanci lașio”.