1-3. So buchia phare daștin te cheren amen te șioras asfa?

 CANA șiordean i palutni data asfa? Po iechdata șioras asfa anda bucuria. Tha, butivar, rovas că amaro ilo si duchado. Sar exemplo, șioras asfa cana hasaras iech varecas cuci ando merimos. I Lorilei *, iech phei andal Statele Unite, phendea: „Ande chichiva momentea, i duch că hasardem mânra șeiorra sas cadichi de bari, că chanci ci anelas manghe mângâierea. Pușlem man sar daștilas mânro ilo phagărdo hai pherdo duch te marel mai dur?”.

² Si vi aver motivea anda save daștilas-pe te rovas. I Hiromi, iech pioniera anda Japonia, phenel: „Po iechdata, som peradi anda codoia că le manușa ci camen te așunen i vestea lași. Le asfența andel iacha rughisarav le Iehovas te arachav varecas cai rodel o ciacimos”.

³ Naches vi tu prin iech anda cadal situații? But anda amende daștin te phenen că da. (1 Pet. 5:9) Savore camas ‘te slujisaras le Iehovasche pherde bucuria’. Cu sea cadala, po iechdata daiștil-pe te slujisaras lesche asfența, anda codoia că sam perade, duchade sau nachas prin iech situația phari cai zumavel amari loialitatea caring o Iehova. (Ps. 6:6; 100:2) So daisaras te cheras cana simțosaras amen perade anda cadal sentimentea?

4. So va dichaia mai dur?

⁴ O exemplo le Isusosco daștil te ajutil amen but. Po iechdata, le Isusos sas-les emoții zurale hai anda codoia „dine lesche asfa”. (Ioan 11:35; Luca 19:41; 22:44; Evr. 5:7) Mai dur, va dichaia cadal situații hai va avela te sichioas chichiva sicaimata cai daștin te ajutin amen. Sa cadea, va dichaia so daisaras te cheras caște nachas părdal le pharimata cai daștin te cheren amen te șioras asfa.

5. So sichioas anda o Isus anda i relatarea anda Ioan 11:32-36?

⁵ Ando ivend le bărșesco 32 a.e., o Lazăr, o lașio amal le Isusosco, pelea nasfalo hai mulea. (Ioan 11:3, 14) O Isus iubilas but le Lazăros hai lesche pheian, i Maria hai i Marta. Cadala sas-le zurales duchade că hasarde penghe cuci phrales. Pala o merimos le Lazărosco, o Isus gălea caring i Betania, o gav cai beșenas i Maria hai i Marta. Cana așundea că o Isus avilea, i Marta gălea sigo angla leste. Te imaginisaras amenghe i emoția anda o glaso la Martaco cana phendea lesche: „Raia, dacă avileanas cade, mânro phral ci merelas”. (Ioan 11:21) Sigo pala codoia, cana dichlea la Maria hai le coaveren că rovenas „le Isusosche dine lesche asfa”. (Citisar Ioan 11:32-36.)

6. Sostar ruia o Isus cana mulea o Lazăr?

⁶ Sostar ruia o Isus ande codoi ocazia? O lil Perspicacitate anda o hachiarimos le Scripturengo del amenghe o răspunso: „Cana așundea că lesco amal o Lazăr mulea hai cana dichlea chichi de duchade sas lesche pheia, «o Isus ruia ande peste» hai pala codoia «dine lesche asfa»”. * Daștil-pe că o Isus gândisardea-pe ca i duch cai simțosardea-la lesco cuci amal cana sas-lo nasfalo hai ca le sentimentea cai sas-les cana dea peschi sama că lesco merimos sas pașă. Siguro, o Isus ruia vi anda codoia că dichlea chichi de but sas duchade i Maria hai i Marta anda o merimos lenghe phralengo. Dacă hasardean ando merimos ieche jenes andai familia sau ieche pașarde amales, siguro vi tut sas tut sentimentea sar cadala. Te dichas trin sicaimata cai daisaras te sichioas-le anda cadai relatarea.

7. So sicadea o Isus anda o Iehova cana ruia anda pesche amala?

⁷ O Iehova hachiarel amare sentimentea. O Isus si „i reprezentararea exacto” lesche Dadeschi. (Evr. 1:3) Cadea că, cana ruia, o Isus  sicadea le sentimentea lesche Dadesche. (Ioan 14:9) Dacă vi tuche mulea iech jeno saveste încărdean but, daștis te pachias zurales că o Iehova dichel prin so naches hai, mai but, silo zurales duchado anda tute. Vo camel te sastiarel chio ilo duchado. (Ps. 34:18; 147:3)

8. Sostar daisaras te pachias zurales că o Isus va jiuvindila codolen cuci amenghe?

⁸ O Isus camel te jiuvindil codolen cuci amenghe. Chiar angla te rovel, o Isus phendea la Martache: „Chio phral va uștela andal mule”, hai i Marta pachiaia le Isusos. (Ioan 11:23-27) Anda codoia că sas iech slujitoarea loialo le Iehovashi, i Marta siguro jianelas anda le jiuvindimata cai cărde-le bute bărșența mai anglal le profeții o Ilie hai o Elisei. (1 Regi 17:17-24; 2 Regi 4:32-37) Daștil-pe că voi așundea vi anda le jiuvindimata cai cărdea-le o Isus. (Luca 7:11-15; 8:41, 42, 49-56) Vi tu daștis te pachias zurales că va avela te diches codolen cuci cai mule. Le asfa cai șiordea-le o Isus cana sas pașa lesche cuci amala cai sas-le duchade sicaven că von camel but te jiuvindil le mulen.

9. Cadea sar o Isus, sar daisaras te ajutisaras codolen cai sile duchade? Den iech exemplo.

⁹ Te avas pașa codola cai sile duchade. O Isus na numai ruia pașa i Marta hai i Maria, tha vi ascultisardea len hai phendea lenghe buchia cai zuriardea len. Vi amen daisaras te cheras sa cadea. O Dan, iech phuro de congregație cai beșel andi Australia, phenel: „Cana mânri rromni mulea, sas man bari nevoia catar ajutorii. Mai but phrala hai lenghe rromnia camle te ascultin-ma ca orisavi ora anda o ghies hai anda i riat. Mechle man te phenav so sea sas pe mânro ilo, bi te cheren-ma te pachiav că ci simțon-pe mișto cana dichen mânre asfa. Sa cadea, dine man ajutorii practico, sar exemplo halade mânri mașina, chinde manghe le buchia cai trebunas man hai cărde manghe haben cana me ci daisardem te cherav sea cadala. Mai but, rughisarde-pe butivar manța. Von sicade că sile ciace amala hai phrala «cărde anda o ghies le pharimasco»”. (Prov. 17:17)

10. Anda so evenimento del-pe duma ande Luca 19:36-40.

¹⁰ Ando 9 nisan 33 a.e., o Isus arăslea co Ierusalimo. Cana pașiolas catar o foro, but manușa zinghiarenas pengo hureaimos po drom, angla leste, hai denas cingar că si lengo Rege. Siguro, cado sas iech evenimento pherdo bucuria. (Citisar Luca 19:36-40.) Anda codoia daștil-pe că le discipoli le Isusosche ci dichle de mai anglal so avelas te întâmplol-pe. „Cana pașilea catar o Ierusalimo, [o Isus] dichlea o foro hai ruia anda leste.” Le asfența andel iacha, o Isus phendea de mai anglal so viitorii nasul ajucărelas codolen cai beșenas ando Ierusalimo. (Luca 19:41-44)

11. Sostar ruia o Isus anda codola cai beșenas ando Ierusalimo?

¹¹ O Isus sas zurales duchado anda codoia că jianelas, că chiar cana primisarde-les șucar, but anda codola cai traisarde ande lesche ghiesa ci avenas te primin mișto o mesajo anda o Regato. Cadea că, o Ierusalimo avelas te avel perado, hai codola cai așenas andi viața avenas te aven îngărde sar captivi. (Luca 21:20-24) Cadea sar phendea de mai anglal o Isus, but andal evrei ci acceptisarde-les. So cheren le manușa anda chio teritorio cana așunen o mesajo anda o Regato? Dacă na bute jenen anda lende silen iech atitudinea lași, so daștis te sichios anda o evenimento ande savo o Isus ruia anda lesche pașarde? Mai dur, va dichaia trin sicaimata cai daștin te ajutin amen.

12. So sicaven amenghe anda o Iehova le asfa șiorde catar o Isus anda lesche pașarde?

 ¹² Le Iehovas duchal-les anda le manușa. Le asfa le Isusosche den amenghe duma anda i grija cai si le Iehovas caring le manușa. Vo „ci camel ca vroiech te avel distrugime, tha camel ca savore te arăsăn ca i căința”. (2 Pet. 3:9) Vi aghies, daisaras te sicavas iubirea caring amare pașarde dacă cheras sea o timpo sea so daisaras caște arăsas ca lengo ilo prin o mesajo anda i vestea lași. (Mat. 22:39) *

13, 14. Sar sicadea o Isus compasiunea caring le manușa hai sar daisaras vi amen te sicavas cadai calitatea?

¹³ O Isus cărdea sea so daisardea caște cherel peschi buchi. Vo sicadea iubirea caring le manușa hai predichisardea de fiesavi data cana sas-les ocazia. (Luca 19:47, 48) So cărdea le Isusos te cherel cadai buchi? I compasiunea cai sas-les caring le manușa. Po iechdata, sas cadea de but manușa cai camenas te ascultin-les că vo hai lesche discipoli „ci daștinas nici barem te han”. (Mar. 3:20) Sa cadea, cana iech murș camlea te del duma leia ando timpo la rachiaco, o Isus camlea te dichel-pe leia. (Ioan 3:1, 2) But anda codola cai ascultisarde le Isusos ji la urmă ci arăsle discipoli. Tha savorenghe sas șiuti iech bari mărturia. Vi amen camas te das savorenghe i ocazia te așunen i vestea lași. (Fap. 10:42) Caște daisaras te cheras cadai buchi, trebul te cheras chichiva paruimata ande o modo sar predichisaras.

¹⁴ Te camas te cheras le paruimata cai trebun. Dacă ci predichisaras ca ore diferime, daștil-pe că ci va avela te arăsas ca chichiva anda codola cai camen te așunen i vestea lași. Iech pioniera po anav Matilda phenel: „Me hai mânro rrom încercosaras te das duma le manușența ca ore diferime. De teharin predichisaras ando teritorio comercialo. Co mismeri, cana but manușa si ando foro, las partea ca i mărturia publico. Andi palunti partea anda o ghies predichisaras chăr chărestar caște arachas mai bute manușen chăre”. Ci trebulas te predichisaras numai cana si mișto anda amende, tha trebul te cheras paruimata ande amaro programo caște predichisaras cana daștil-pe te arachas le manușen. Dacă va avela te cheras  cadea, daisaras te pachias zurales că o Iehova va dichela cuci amare eforturi.

15. Cadea sar phenel-pe ando Luca 22:39-44, so întâmplosardea-pe andi palutni riat anda i viața le Isusoschi?

¹⁵ Andi riat târzio, ande 14 nisan 33 a.e., o Isus sas gălea andi bar Ghetsimani hai rughisardea-pe anda sea o ilo le Iehovasche. (Citisar Luca 22:39-44.) Ande codo timpo pharo, o Isus „cărdea implorări … hai dea cingar asfența”. (Evr. 5:7) Anda so rughisardea-pe o Isus andi riat angla te merel? Te primil zuralimos caște așel loialo le Iehovasche hai te cherel leschi voința. O Iehova așundea i rugăciunea lesche Șiaveschi phendi anda iech ilo duchado hai bișaldea iech îngero te zuriarel-les.

16. So buchi duchavelas le Isusos cana sas-lo andi bar Ghetsimani?

¹⁶ Ci si amen nici iech îndoiala, că ando timpo so rughisardea-pe andi bar Ghetsimani, o Isus șiordea but asfa. O gândo că avelas te avel dichlo sar codo cai del duma nasul anda o Del duchavelas-les but. Sa cadea, simțosarelas că pe lesche dume sas iech phari resposabilitatea: te așel loialo hai te ujiarel o anav lesche Dadesco. Dacă naches prin iech situația cai șiol co zumaimos chi loialitatea anda o Iehova, so daștis te sichios anda le asfa cai șiordea-le o Isus? Te dichas aver trin sicaimata.

17. So sichioas anda o Iehova anda o modo sar phiradea-pe cana ascultisardea le rugăciuni le Isusosche cărde anda sea o ilo?

¹⁷ O Iehova ascultil amare rugăciuni cărde anda sea o ilo. O Iehova ascultisardea le rugăciuni le Isusosche cărde anda sea o ilo. Sostar? Anda codoia că i mai importanto buchi anda o Isus sas codoia te așel loialo pesche Dadesche hai te ujiarel lesco anav. Dacă vi anda amende si importanto sa cadai buchi, adică te așias loiali le Iehovasche hai te ujiaras lesco anav, vo va dela răspunso ca amare rugăciuni anda o ajutorii. (Ps. 145:18, 19)

18. Ande so modo si o Isus iech amal cai hachiarel amen?

¹⁸ O Isus hachiarel amare sentimentea. Cana sam perade catar le îngrijorări, bucurisaras-ame te avel amen pașa amende iech amal cai hachiarel amen, cadichi mai but iech cai nachlea prin situații sar amare. Cado amal si o Isus. Vo jianel sar si te simțosares tut covlo  hai te avel tut nevoia catar ajutorii. Sa cadea, hachiarel amen sar manușa hai va lela sama te primisaras o ajutorii catar si amen nevoia „co momento potrivime”. (Evr. 4:15, 16) Cadea sar o Isus, acceptisardea o ajutorii catar iech îngero andi bar Ghetsimani, vi amen trebulas te acceptisaras o ajutorii le Iehovasco, cai del-les amenghe prin mai but moduri, sar exemplo, prin iech publicația, iech video, iech cuvântarea sau iech vizita cai zuriarel amen cai avel catar iech phuro sau catar iech phral spiritualo.

19. Sar daștil te avel amen o zuralimos cai trebul amenghe caște daisaras te nachas părdal le pharimata cai șion co zumaimos amari loialitatea? Den iech exemplo.

¹⁹ O Iehova del amenghe peschi pacea. Sar zuriarel amen o Iehova? Cana rughisaras amen primisaras „i pacea le Devleschi cai nachavel orisavo hachiarimos”. (Filip. 4:6, 7) I pacea catar o Iehova, anel amenghe liniștea ando ilo hai ajutil amen te gândisaras cadea sar trebul. Iech phei po anav Luz simțosardea pe lachi morci o zuralimos la rugăciuneaco. Voi phenel: „Butivar, simțosarav-ma corcori. Cadal sentimentea cheren-ma po iechdata te pachiav că o Iehova ci iubil man. Ande codola momentea, rughiv-ma sigo le Iehovasche hai phenav lesche so simțosarav. I rugăciunea ajutil man te încărav tela o controlo mânre sentimentea”. Cadea sar sicavel i experiența cadala pheiachi, o Iehova del amen pace prin i rugăciunea.

20. So sichileam anda le momentea cana o Isus ruia?

²⁰ So șucar sicaimata cai zuriaren-ame hai ajutin-ame daisaras te sichioas anda le Isusosche asfa! Andea amenghe amintea că trebul te avas pașa amare phrala duchade hai te avel amen pahiamos că o Iehova hai o Isus va avena pașa amende cana hasaras ando merimos varecas cuci. Sam vi mai hotărâme te sicavas compasiunea andi predicarea hai cana sicavas averen, anda codoia că o Iehova hai o Isus Cristos sicaven cadai calitatea zurales importanto. Sa cadea, sam bucurime te jianas că o Iehova hai lesco Șiav hachiaren amare sentimentea hai amare covlimata. Siguro, von va ajutina amen te na mechas-ame. Te cheras vi mai dur so sichileam ji ando ghies cana o Iehova va pherela peschi promisiunea te ‘chosel sea asfa anda amare iacha’. (Rev. 21:4)