1, 2. a) Cana anas amenghe vi mai but catar iech manuș cuci cai mulea? b) So cărdea o Isus andi riat angla te merel?

 CHIAR cana nachlea but timpo de cana amare cuci manușa mule, sea o timpo anas amenghe amintea lendar. Gândisaras amen lende vi mai but ando ghies cana mule.

² Ande fiesavo bărș, amen sam mașcar milioanea manușa pa sea i phuv cai comemorisaras o merimos ieche manușeco cas iubisaras-les but – o Isus Cristos. (1 Pet. 1:8) Cana si cado evenimento, anas amenghe amintea codolestar cai dea peschi viața caște hastravel amen anda o păcato hai o merimos. (Mat. 20:28) O Isus camlea ca sea lesche continuatori te anen penghe amintea anda lesco merimos. Andi riat angla te merel, vo cărdea iech cina specialo hai poruncisardea: „Continuin te cheren cadai buchi ande mânri amintirea”. (Luca 22:19)

3. So va dichaia mai dur?

³ Iech țâno număro anda codola cai jian ca i Comemorarea le merimaschi le Cristososchi silen i speranța te train ando cerii. Tha, cana si cado evenimento jian vi milioanea manușa cai silen i speranța te train pi phuv. Ande cado articolo, va dichaia le motivea anda save le dui grupuri abia ajucăren i Comemorarea ande fiesavo bărș. Mai dur, va dichaia so miștimata si amen anda codoia că jias ca i Comemorarea. Mai anglal, te dichas chichiva motivea anda save codola machle len partea ca i Comemorarea.

4. Sostar han codola machle anda o manro hai pien anda i mol ca i Comemorarea?

⁴ Ande fiesavo bărș, codola machle abia ajucăren i Comemorarea, evenimento cai von sile participanți, adică han anda o manro hai pien anda i mol. Sostar si potrivime ca von te len anda le emblemea? Caște das răspunso ca cado pușimos te dichas so întâmplosardea-pe andi palutni riat le Isusoschi pi phuv. Pala so încărdea i patraghi, o Isus cărdea iech cina cai si prinjiandi sar i cina le Raieschi. Vo dea le 11 apostolen i mol hai o manro hai phendea lenghe te len anda lende. Sa cadea, o Isus dea lenghe duma anda dui legămintea, o nevo legământo hai o legământo anda o Regato. * (Luca 22:19, 20, 28-30) Cadala cărde posibilo ca codol apostoli hai iech țâno număro andal continuatori le Isusosche te arăsan regi hai rașaia ando cerii. (Rev. 5:10; 14:1) Numai i rămășița machli *, cai si partea anda cadal dui legămintea, daștin te han anda o manro hai te pien anda i mol ca i Comemorare.

5. So hachiaren codola machle anda i speranța cai primisarde-la?

⁵ Cana si i Comemorarea, codola machle meditosaren ca lenghi speranța, hai cado si iech aver motivo anda savo abia ajucăren cado evenimento. O Iehova dea len iech speranța zurales șucar – te bucurin-pe viațatar ando cerii, iech viața bimerimasco hai bichernimasco, te slujil pașa o glorifichime Isus Cristos hai le coaver creștini cai cheren partea anda le 144000 hai, vi mai but te aven chiar andi prezența le Devleschi o Iehova. (1 Cor. 15:51-53; 1 Ioan 3:2) Codola machle hachiaren că, chiar cana sas-le acharde, von va bucurina-pe anda sea cadal privilegii ando cerii numai dacă așen loialo ji co merimos. (2 Tim. 4:7, 8) I meditarea ca i speranța cerisco anel codolenghe machle iech bari bucuria. (Tit 2:13) Tha so daștil te phenel-pe anda le „aver bacrea”? (Ioan 10:16) Save si chichiva motivea anda save cado grupo jial ca i Comemorarea?

6. Sostar codola anda aver bacrea jian ande fiesavo bărș ca i Comemorarea?

⁶ Vi codola anda aver bacrea jian ca i Comemorarea, tha ci len andal emblemea, von numai dichen. Le creștini cai silen i speranța te train pi phuv sas-le acharde i iechto data ande iech te jian ca i Comemorarea ando bărș 1938. Dich so phenelas O Turno de veghe anda 1 martia anda codo bărș: „Si chichi daștil-pe de potrivime [ca codola anda aver bacrea] te jian cana si cadai întrunirea sar manușa cai dichen. … Cado evenimeto trebulas te avel hai chiar si iech ocazia pherdi bucuria vi anda lende”. Cadea sar le manușa cai sile acharde ca iech abiav, sile bucurime te jian, sa cadea codola anda aver bacrea sile bucurime te jian ca i Comemorarea sar manușa cai dichen.

7. Sostar abia ajucăren codola anda aver bacrea i cuvântarea anda i Comemorare?

⁷ Cadea sar codola machle, vi codola anda aver bacrea meditosaren ca lenghi speranța. Von abia ajucăren i cuvântarea anda i Comemorarea anda codoia că voi del duma mai but anda so va cherena o Isus Cristos hai le 144000 regi anda le manușa loialo ando timpo le Raimasco anda Iech Mia Bărșa. Tela i  conducerea le Isus Cristososchi, cadal regi va ajutina te cherel-pe i phuv iech paradiso hai va anena ca i perfecțiunea le manușen ascultători. Chichi de șucar si anda codola anda aver bacrea cana jian ca i Comemorarea te imaginisaren penghe sar pheren-pe chichiva profeții sar codola anda Isaia 35:5, 6; 65:21-23 hai Revelația 21:3, 4! Cana imaginisaren penghe că train andi lumea nevi pașa codola cai si lenghe cuci, von zuriaren penghi speranța hai hotărârea te slujin le Iehovasche sea o timpo! (Mat. 24:13; Gal. 6:9)

8. Savo si iech aver motivo anda savo codola anda aver bacrea jian ca i Comemorarea?

⁸ Iech aver motivo anda savo le aver bacrea jian ca i Comemorarea si codo te sicaven penghi iubirea anda codola machle hai te aven pașa lende. Cadea sar phenen chichiva profeții anda o Cuvânto le Devlesco, mașcar codola machle hai codola anda aver bacrea avelas te avel iech panghlimos chidino. Te dichas chichiva anda cadala.

9. Sar sicavel i profeția anda o Zaharia so sentimentea si le avere bacrean caring codola machle?

⁹ Citisar Zaharia 8:23. Cadai profeția sicavel prin iech imaginea cai arăsăl ando ilo le sentimentea cai si codolen anda aver bacrea caring penghe phrala hai pheia machle. Le cuvintea ‘iech iudeo’ hai „tumen” sicaven sa codo grupo: i rămășița machli. (Rom. 2:28, 29) Le „deș manușa anda sea le șiba le națiunenghe” reprezentin codolen anda aver bacrea. Von ‘astaren-pe chidino’ catar codola machle, adică aven pașa lende hai așen astarde chidines lendar ando timpo so anen închinarea ande iech than le Iehovasche. Cadea că, si normalo ca andi riat cana si i Comemorarea, le aver bacrea te sicaven că sile anda sea pengo ilo pașa codola machle prin o fapto că jian ca i Comemorarea.

10. Sar pherdea o Iehova i profeția anda Ezechiel 37:15-19, 24, 25?

¹⁰ Citisar Ezechiel 37:15-19, 24, 25. Caște pherel-pe cadai profeția, o Iehova cărdea iech phanglimos cai ci daștil te avel distrugime niciechdata mașcar codola machle hai aver bacrea. I profeția del duma anda dui rovlea. Codolen cai sile i speranța te train ando cerii sile sar i rovli „anda Iuda” – o tribo anda savo sas alosarde le regi le Israelosche – , hai codolen cai sile i speranța te train pi phuv sile sar i rovli „le Efraimoschi”. * O Iehova phanglea le dui grupuri cadea ca von te cărdion „iech corcori rovli”. Cadea că, codola anda le dui grupuri slujin ande iech than tela i conducerea lenghe Regeschi, o Isus Cristos. Ande fiesavo bărș, codola machle hai le aver bacrea jian ca i Comemorarea na sar dui grupuri hulade, tha sar „iech corcori turma ieche corcore păstoroia”. (Ioan 10:16)

11. Savi si i mai importanto buchi prin savi le aver bacrea ajutin le phralen le Cristososche? (Matei 25:31-36, 40)

¹¹ Citisar Matei 25:31-36, 40. „Le bacrea” anda save dea duma o Isus reprezentin codola orta cai sile i speranța te train pi phuv hai train ando timpo le sfârșitosco, adică codola anda aver bacrea. Von ajutin pherde loialitatea codolen cai așile andal phrala le Cristososche, ando iechto rândo ajutin len te cheren penghi bari buchi te predichin hai te cheren discipoli pe sea i phuv. (Mat. 24:14; 28:19, 20)

12, 13. Save si aver moduri prin save aver bacrea ajutin le phralen le Cristososche?

¹² Ande fiesavo bărș, ande le curche de angla i Comemorarea, le aver bacrea ajutin le phralen le Cristososche hai len partea chichi  mai but ca iech campania mondialo caște acharen le manușen interesime ca i Comemorarea. (Dich o chenarii „ Pregătis tut anda i Comemorarea?”.) Sa cadea, von cheren sea so trebul, cadea ca i Comemorarea te daștil te avel încărdi ande fiesavi congregația pe sea i phuv, chiar cana, ande but anda lende ci si manușa cai len andal emblemea. Codola anda aver bacrea sile bucurime te ajutin ande cadal momentea le phralen le Cristososche. Von jianen că o Isus dichel sea cadal eforturi sar cana avelas cărde anda leste. (Mat. 25:37-40)

¹³ Indiferento so speranța si amen, so aver motivea si amen te jias ca i Comemorare?

14. Sar sicadea amenghe iubirea o Iehova hai o Isus?

¹⁴ Sam recunoscători anda i iubirea savi o Iehova hai o Isus sicade-la amenghe. O Iehova sicadea peschi iubirea caring amende ande but moduri, tha iech anda lende vazdel-pe opral le coaver. Amaro Del bișaldea pesche cuci Șiaves te suferisarel hai te merel anda amende, hai cado sas o mai baro modo prin savo sicadea peschi iubirea. (Ioan 3:16) Vi o Isus sicadea but iubirea, anda codoia că dea peschi viața ande amaro miștimos. (Ioan 15:13) Si claro, amen ci daisaras te pochinas parpale niciechdata le Iehovas hai le Isusos anda i iubirea cai sicade-la amenghe. Tha daisaras te sicavas ande fiesavo ghies recunoștința prin o modo ande savo traisaras amari viața. (Col. 3:15) Hai cana jias ca i Comemorarea, anas amenghe aminte catar i iubirea cai von sicadela amenghe, hai cadea sicavas vi amen amari iubirea anda lende.

15. Sostar si cuci i răscumpărarea anda codola machle, hai vi anda le aver bacrea?

¹⁵ I răscumpărarea si zurales cuci anda amende. (Mat. 20:28) Codola machle dichen cuci i răscumpărarea, anda codoia că daștil te avel len iech speranța zurales șucar. Anda codoia că silen pachiamos andi jertfa le Cristososchi, o Iehova cărdea len orta hai lea len sar lesche șiave. (Rom. 5:1; 8:15-17, 23) Vi codola anda aver bacrea sile recunoscători anda i răscumpărarea. Anda codoia că silen pachiamos ando rat șiordo catar o Cristos, von bucurin-pe catar i aprobarea le Iehovaschi, daștin te anen lesche iech servicio ujo hai daștin te așen andi viața ando ‘baro necazo’. (Rev. 7:13-15) Cadichi codola machle hai vi le aver bacrea daștin te sicaven penghi recunoștința anda i răscumpararea cana jian ande fiesavo bărș ca i Comemorarea.

16. Anda so aver motivo jias ca i Comemorarea?

¹⁶ Iech aver motivo anda savo jias ca i Comemorarea si codo că camas te ascultisaras catar o Isus. Indiferento so speranță si amen – te traisaras ando cerii sau pi phuv – , pachias că i porunca: „Continuin te cheren cadai buchi ande mânri amintirea” sili phendi fiesavesche anda amende. (1 Cor. 11:23, 24)

17. Sar ajutil amen i Comemorarea te pașioas mai but le Iehovastar?

¹⁷ Pașioas mai but le Iehovastar. (Iac. 4:8) Cadea sar dichleam, i Comemorarea del amenghe i ocazia te meditosaras ca i speranța cai dea-la amenghe o Iehova hai ca leschi bari iubirea anda amende. (Ier. 29:11; 1 Ioan 4:8-10) Cana gândisaras amen ca amari ciaci speranța hai ca i bari iubirea le Iehovaschi, bariaras amari iubirea anda leste hai amaro amalimos leia zuriarel-pe. (Rom. 8:38, 39)

18. So sam zuriarde te cheras cana meditosaras ca o exemplo le Isusosco?

 ¹⁸ Camas vi mai but te las amen pala o exemplo le Isusosco. (1 Pet. 2:21) Andel ghiesa de angla i Comemorarea, ortosaras amari atenția caring le relatări biblico cai cheren referirea ca o palutno curco le Isusosco pi phuv, ca lesco merimos hai jiuvindimos. Pala codoia, i cuvântarea anda i riat cana si i Comemorarea anel amenghe amintea anda i iubirea le Isusoschi anda amende. (Ef. 5:2; 1 Ioan 3:16) Cana citisaras anda o exemplo cai sicavel că o Isus camlea te del peschi viața anda amende hai meditosaras leste, sam zuriarde ‘te phiras cadea sar phirdea vo’. (1 Ioan 2:6)

19. Sar daisaras te așias andi iubirea le Devleschi?

¹⁹ Sam vi mai hotărâme te așias andi iubirea le Devleschi. (Iuda 20, 21) Cana cheras sea so daisaras caște ascultisaras lestar, te sfințiosaras lesco anav hai te bucurisaras lesco ilo, așias ande leschi iubirea. (Prov. 27:11; Mat. 6:9; 1 Ioan 5:3) Amari prezența ca i Comemorarea cherel amen te avas vi mai hotărâme ca prin o modo ande savo traisaras fiesavo ghies anda amari viața, te phenas: „Iehova, camav te așiav ande chi iubirea anda sea o timpo!”.

20. So motivea zurales importanto si amen te jias ca i Comemorarea?

²⁰ Indiferento savi si amari speranța si amen motivea zurale te jias ca i Comemorarea. Ande fiesavo bărș, chidas amen ande iech than caște anas amenghe amintea catar o merimos ieche manușesco cas iubisaras-les but, o Isus Cristos. Tha, angla sea cadala, meditosaras ca o mai baro gesto cai o Iehova cărdea-les pherdo iubirea anda amende – dea pesche Șiaves sar răscumpărarea. Ande cado bărș, i Comemorarea va avela încărdi paraștune, 15 aprilia 2022, pala so perel o cham. Anda codoia că si amen iech iubirea zurales bari anda o Iehova hai anda lesco Șiavo, chanci ci daștil te așiavel amen te na jias ca i Comemorarea le merimaschi le Isusoschi.