1. Ande so familia barilea o Iacov?

 O IACOV, o phral * le Isusosco, barilea ande iech familia cai sas-la iech spiritualitatea zurali. O Iosif hai i Maria iubisarenas zurales but le Iehovas hai slujinas lesche pherde zelo. O Iacov bucurisardea-pe catar iech aver binecuvântarea: sas o phral codolesco cai avelas te arăsal o Mesia. So privilegio zurales baro sas le Iacovos te bariol ande iech familia sar cadaia!

2. So motivea sas le Iacovos te dichel but buchia lașe ca pesco phral mai baro?

² Le Iacovos sas-les but motivea te dichel but buchia lașe ca pesco phral. (Mat. 13:55). Sar exemplo, cana sas-les 12 bărșa, o Isus prinjianelas cadichi de mișto le Scripturi, că codolenghe cai sicavenas i Legea anda Ierusalimo, ci avelas lenghe te pachian. (Luca 2:46, 47) Daștil-pe că o Iacov cărdea buchi le Isusoia sar tâmploro, hai cadea daisardea te beșel but timpo pașa leste. Cadea că o Iacov arăslea te prinjianel zurales mișto le Isusos. O phral Nathan Knorr * phenelas butivar: „Cana cheres buchi ande iech than ieche manușeia, prinjianes but buchia anda leste”. Daștil-pe că o Iacov dichlea sar „o Isus bariolas andi înțelepciunea, ando ucimos hai andi favoarea angla o Del hai le manușa”. (Luca 2:52) Cadea că, ajucărdeamas amen ca o Iacov te avel mașcar le dintune discipoli le Isusosche, buchi cai ci întâmplosardea-pe.

3. So cărdea o Iacov cana o Isus începosardea peschi buchi?

³ O Iacov ci arăslea iech discipolo le Isusosco chichi timpo cado sas pi phuv. (Ioan 7:3-5) Daștil-pe că vo chiar sas mașcar  le neamuri cai pachianas că o Isus „hasardea peschi goghi”. (Mar. 3:21) Chanci ci sicavel că o Iacov sas pașa leschi dei, i Maria, cana o Isus sas mudardo po stâlpo de tortură. (Ioan 19:25-27)

4. So sicaimata va avela te dichas mai dur?

⁴ Pala codoia, o Iacov sicadea pachiamos ando Isus hai arăslea iech jeno respectime andi congregația creștino. Ande cado articolo, va dichaia dui buchia cai daisaras te sichioas-le catar o Iacov: 1) Sostar trebul te așias umilo? hai 2) Sar daisaras te avas lașe sicaitori?

5. So cărdea o Iacov pala so o Isus sicadea-pe lesche?

⁵ Cana arăslea o Iacov iech continuatorii le Isusosco? Pala so sas-lo jiuvindime o Isus „sicadea-pe le Iacovosche, hai pala codoia sea le apostolenghe”. (1 Cor. 15:7) Pala cadai întrunirea le Isusoaia o Iacov cărdilea iech discipolo. Pala codoia, vo sas ande iech camera de opral anda o Ierusalimo ande iech than le apostolența hai ajucărenas o spirito sfânto promiso. (Fap. 1:13, 14) Pala iech timpo, le Iacovos sas-les o privilegio te cherel partea anda o corpo de guvernarea anda o iechto secolo. (Fap. 15:6, 13-22; Gal. 2:9) Angla o bărș 62 a.e., vo sas inspirime te scriil le creștinenghe machle anda codol ghiesa iech lil. Voi daștil te ajutil savoren anda amende, indiferento că si amen speranța cerisco sau te traisaras pi phuv. (Iac. 1:1) Cadea sar phenel o Josephus, iech istorico anda o iechto secolo, o Iacov sas șiuto te avel mudardo catar o baro rașai iudeo o Anania codo Tărno. O Iacov așilea loialo le Iehovasche ji cana phandadea peschi cursa pi phuv.

6. So diferența sas mașcar o Iacov hai le conducători religioși anda lesche ghiesa?

⁶ O Iacov sas umilo. Sostar daisaras te phenas cadai buchi? Mașcar sar dichlea o Iacov ji la urmă le Isusos hai o modo sar dichenas-les but conducători religioși sas iech bari diferența. Cana o Iacov dichlea claro le dovezi zurale cai sicavenas că o Isus sas o șiav le Devlesco, vo acceptisardea-le pherdo umilința. Tha le bare rașaia anda o Ierusalimo ci cărde cadaia. Sar exemplo, von ci daisarde te anen dovezi că o Isus ci jiuvindisardea le Lazăros. Tha, ando than te acceptin că o Isus sas bișaldo catar o Iehova, von încercosarde te mudaren cadichi le Isusos hai vi le Lazăros. (Ioan 11:53; 12:9-11) Pala codoia, cana o Isus sas jiuvindime, von cărde iech plano caște garaven cado ciacimos. (Mat. 28:11-15) Coriarde  barimastar, von ci camle te pachian că o Isus si o Mesia.

7. Sostar trebul te na avas baricane?

⁷ O sicaimos: Te na avas baricane hai te mechas amen sicade. Chichiva nasfalimata daștin te cheren ca le artere le ilesche te chiden-pe, hai te na mai mechen ca o ilo te marel cadea sar trebul. Sa cadea, o baricanimos daștil cherel amaro ilo figurativo sar iech bar hai te cherel-les te na camel te așunel i îndrumarea le Iehovaschi. Le farisei phandade cadichi de but pengo ilo, că ci camle te acceptin le dovezi claro cai sas lenghe sicade prin o spirito le Devlesco. (Ioan 12:37-40) Anda codoia că phirade-pe ande iech modo cadea de nasul hasarde i posibilitatea te train veșnico. (Mat. 23:13, 33) Cadea că, hachiaras chichi de importanto si ca vi mai dur te mechas ca o Cuvânto le Devlesco hai lesco spirito te paruven amaro phiraimos hai te influențin amari goghi hai le decizii cai las-le. (Iac. 3:17) Na cadea sar le conducători religioși, o Iacov sas umilo hai mechlea-pe sicado catar o Iehova. Cadai calitatea ajutisardea-les te arăsăl vi iech lașio sicaitorii.

8. So va ajutila amen te arăsas lașe sicaitori?

⁸ Le Iacovos ci sas-les iech sicaimos laico baro. Le conducători religioși anda lesche ghiesa dichenas-les, sar iech manuș „bi sicaimasco hai simplo”, cadea sar le apostolen Petru hai Ioan. (Fap. 4:13) O Iacov arăslea iech lașio sicaitorii hai cadaia dichiol-pe claro anda o lil cai phiravel lesco anav. Cadea sar o Iacov, daștil-pe că nici amen na-i ame iech sicaimos laico baro. Cu sea cadala, vi amen daisaras te arăsas lașe sicaitori anda codoia că sam ajutime catar o spirito sfânto hai primisaras sicaimos catar i organizația le Iehovaschi. Te dichas mai dur so felo sicaitorii sas o Iacov hai le sicaimata cai sichioas-le lestar.

9. Sar sicadea averen o Iacov?

⁹ O Iacov ci folosisardea cuvintea bare sau explicații phare. Cadea că, codola cai ascultinas-les hachiarenas so trebunas te cheren hai sar. Sar exemplo, te dichas o modo simplo ande savo o Iacov sicadea le creștinen că trebunas te suportin le buchia neorta bi te  mechen te bariol i holi ande lengo ilo. Vo phendea: „Ame pachias că fericime sile codola cai perseverisarde. Așundean anda i perseverența le Iovoschi hai dichlean o sfârșito cai dea-les lesche o Iehova, că o Iehova silo pherdo afecțiunea hai îndurătorii”. (Iac. 5:11) Dichiol-pe claro că o Iacov delas duma andal Scripturi cana sicavelas averen. Vo folosisardea o Cuvânto le Devlesco caște ajutil codolen cai așunenas-les te hachiaren că o Iehova pochinel sea o timpo codolen cai si lesche loiali, cadea sar cărdea vi le Iovoia. O Iacov phendea cadai ideea ande iech modo logico hai folosisardea cuvintea simplo. Cadea că, vo ci ortosardea i atenția caring leste, tha caring o Iehova.

10. Savo si iech modo prin savo daisaras te imitisaras le Iacovos cana sicavas averen?

¹⁰ O sicaimos: Te sicavas ande iech modo simplo hai te folosisaras o Cuvânto le Devlesco. Amaro obiectivo ci trebulas te avel codo te ortosaras i atenția caring amaro prinjianimos, tha caring o baro prinjianimos le Iehovasco hai pe leschi grija pherdi iubirea cai siles caring amende. (Rom. 11:33) Daisaras te arăsas te cheras cadaia dacă, atunci cana sicavas, bazosaras amen pe le Scripturi. Sar exemplo, ando than te phenas codolenghe casa studiisaras so avelas te cheras amen ande lengo than, trebulas te ajutisaras len te hachiaren, prin le exemplea anda i Biblia, sar gândil o Iehova hai so sentimentea siles. Cadea că, lenghi mai importanto motivația va avela codoia te aven cuci andel iacha le Iehovasche, na amenghe.

11. So problemea sas chichiva creștinen andal ghiesa le Iacovosche hai so sfaturi dea lenghe vo? (Iacov 5:13-15)

¹¹ O Iacov dichlea le buchia cadea sar sas-le ciaces. Anda lesco lil, hachiaras că o Iacov prinjianelas le zumaimata prin save nachenas lesche phrala. Vo dea lenghe sfaturi claro caște daștin te nachen părdal lende. Sar exemplo, chichiva anda cadala ci ascultinas sigo le sfaturi. (Iac. 1:22) Aver dichenas iachența lașe numai codolen cai sas-le barvale. (Iac. 2:1-3) Hai aver ci încărenas parpale penghi șib. (Iac. 3:8-10) Chiar cana cadale creștinen sas-le bare problemea, o Iacov pachiaia că daștinas te paruven-pe. Vo dea len sfaturi pherde lașimos, tha directo hai zuriardea codolen cai sas-le covle spiritualo te manghen o ajutorii le phurengo anda i congregația. (Citisar Iacov 5:13-15.)

12. Sar daștil te avel amen iech atitudinea lași cana ajutisaras codolen casa studiisaras?

¹² O sicaimos: Te dichas le buchia cadea sar sile ciaces, tha te dichas averen ande iech modo lașio. Daștil-pe că bute manușenghe savența studiisaras i Biblia si lenghe pharo te aplichin lache sfaturi. (Iac. 4:1-4) Daștilas te nachel mai but timpo ca von te mechen le buchia nasul anda lengo phiraimos hai te bariaren calități creștino. Cadea sar o Iacov, trebul te avel amen tromai hai te phenas codolenghe casa studiisaras so paruimata trebunas te cheren, tha sa cadea trebul te avel amen iech atitudinea lași hai te pachias zurales că o Iehova țârdel peste codolen umili hai del lenghe zuralimos caște cheren paruimata. (Iac. 4:10)

13. Cadea sar phenel-pe ando Iacov 3:2, so phendea o Iacov anda peste?

¹³ O Iacov dichlea-pe cadea sar sas-lo ciaces. Vo ci pachiaia că anda codoia că sas o phral le Isusosco sau anda le privilegii cai primisardea-le, sas-lo mai importanto sau mai opre sar lesche phrala hai pheia. Cana delas duma le coavere creștinenghe vo phenelas lenghe „mânre cuci phrala”. (Iac. 1:16, 19; 2:5) Vo ci camlea te sicavel că sas perfecto. Tha mai but,  cărdea referirea vi peste cana phendea: „Savore greșisaras butivar”. (Citisar Iacov 3:2.)

14. Sostar trebul te phenas că vi amen greșisaras?

¹⁴ O sicaimos: Te na bâstras că savore păcătuisaras. Ci trebul te pachias că sam mai opre sar codola casa studiisaras. Dacă mechas te hachiarel-pe că amen ci greșisaras niciechdata, von daștinas te pachian că ci va daștina vroiechdata te cheren so phenel lenghe o Del. Tha, dacă phenas lenghe anda ilo că nici amenghe ci sas sea o timpo ușoro te respectisaras le principii biblico hai phenas lenghe sar ajutisardea amen o Iehova te cheras paruimata ande amari viața, codola casa studiisaras va hachiarena că vi von daștin te arăsan slujitori le Iehovasche.

15. Sar sas le ilustrări cai cărdea-le o Iacov?

¹⁵ O Iacov folosisardea ilustrări lașe. Si ciaces că vo sas-lo ajutime catar o spirito sfânto, tha daștil-pe că sichilea te sicavel vi cana studiisardea le ilustrări pesche phralesche mai baro, o Isus. Le ilustrări save o Iacov folosil-le ande pesco lil sile simplo hai o sicaimos anda lende hachiare-pe claro. (Citisar Iacov 3:2-6, 10-12.)

16. Sostar trebul te folosisaras ilustrări lașe?

¹⁶ O sicaimos: Te folosisaras ilustrări lașe. Cana folosisaras ilustrări cai arăsan ando ilo, amare cuvinte cheren-pe imagini jiuvinde andi goghi codolenghe cai ascultin amen. Cadea că, von va anena penghe amintea mai ușoro le ciacimata biblico importanto. O Isus folosisardea zurales mișto le ilustrări, hai lesco phral lea-pe pala lesco exemplo. Te dichas iech ilustrarea cărdi catar o Iacov hai te dichas sostar sas voi lași.

17. Sostar si lași i ilustrarea anda Iacov 1:22-25?

¹⁷ Citisar Iacov 1:22-25. I ilustrarea le Iacovoschi anda iech murș cai dichel-pe andi oglinda si lași anda mai but motivea. I ideea cai vo camlea te phenel-la si claro, hai cadaia si că ci arăsal numai te citisaras o Cuvânto le Devlesco, tha trebul vi te cheras so citisaras. Caște sicavel cadai ideea, o Iacov alosardea te cherel iech ilustrarea ușoro hachiarimasco anda codola cai ascultinas les: iech murș cai dichel-pe andi oglinda. Savo si o sicaimos anda cadai ilustrarea? Ci si goghiaver ca iech manuș te dichel-pe andi oglinda, te dichel că trebul te cherel chichiva paruimata hai cu sea  cadala te na cherel-le. Sa cadea, ci si goghiaver te citisaras o Cuvânto le Devlesco, te dichas so paruimata trebul te cheras ande amaro phiraimos sau amare obiceiuri hai te na cheras chanci.

18. Save si trin buchia savendar camas te încăras conto cana cheras iech ilustrarea?

¹⁸ Cana cheras iech ilustrarea, daisaras te las-ame pala o exemplo le Iacovosco hai te avel amen andi goghi trin buchia. I ilustrarea trebul: 1) te avel potrivime anda o subiecto anda savo das duma, 2) te avel ușoro hachiarimasco anda codola cai ascultin amen hai 3) te avel-la iech sicaimos claro. Dacă si tuche pharo te cheres ilutrări lașe dich o Indexo le publicațiengo Watch Tower. Co subtitlo „Ilustrări”, va aracheia but exemple cai daștis te folosisares-le. Na bâstăr că le ilustrări sile sar iech microfono, von va zuriarena i ideea cai camas te phenas-la. Cadea că, cher ilustrări numai andai ideei importanto cai cames te sicaves-le. Si ciaces că, o motivo anda savo camas te lașiaras o modo sar predichisaras ci si codo te das amen bare, tha te ajutisaras chichi mai bute manușen te cheren partea anda i familia fericime le Iehovaschi.

19. Sar daisaras te sicavas că si cuci anda amende i familia spiritualo anda savi cheras partea?

¹⁹ Chiar cana ci sas amen o privilegio te bariuvas pașa iech phral perfecto, si amen i pachiv te cheras partea anda iech bari familia spiritualo hai te slujisaras le Iehovasche. Sicavas că iubisaras amare phralen hai pheian cana cheras amenghe timpo te beșas ande iech than lența, te sichioas lendar hai te las partea ande iech than cai i lucrarea de predicare hai anda sicaimos. Cana das amari zor te las amen pala o exemplo le Iacovosco ande soste priveal amari atitudinea, amaro phiraimos hai vi o modo sar predichisaras, das pachiv amare Dadesche iubitorii, Iehova, hai ajutisaras codolen le ileia ujo te arăsăn lesche slujitori.