1. So avel ande chi goghi cana gândis tut co Iehova?

 PUȘLEAN TUT vroiechdata sar si o Iehova? Cana des duma lesa ando manglimos, so avel tuche andi goghi? Chiar cana amen ci daisaras te dichas le Iehovas, i Biblia sicavel mai but buchia anda sar silo vo. Anda o Iehova phenel-pe că silo „iech cham hai iech scuto” hai „iech iag cai thabol zurales”. (Ps. 84:11; Evr. 12:29) O Ezechiel dichlea le Iehovas ande iech viziunea hai phendea că leschi prezența si sar iech cuci bar anda safiro, cai strălucil sar o sumnacai hai sar iech curcubeo. (Ezec. 1:26-28) Cana citisaras cadal buchia, amaro ilo silo pherdo catar iech bari pachiv anda o Iehova. Tha ande sa codo timpo, cadala daștin te cheren amen te hachiaras vi mai but chichi de țâne sam angla leste.

2. Sostar daștil te avel amenghe pharo te pachias că o Iehova iubil amen?

² Anda codoia că ci daisaras te dichas le Iehovas, daștil te avel amenghe pharo te pachias că vo iubil amen. Chichiva pachian că o Iehova ci daștil te iubil-len anda codoia că nachle prin but pharimata ande lenghi viața. Daștil-pe că ci simțosarde niciechdata i iubirea ieche dadeschi. O Iehova hachiarel so si ande amaro ilo hai jianel sostar si amenghe pharo te pașioas lestar. Caște ajutil amen te nachas părdal cado pharimos, vo dea amen pesco Lil caște prinjianas-les sar silo vo ciaces.

3. Sostar trebul te prinjianas mai mișto i iubirea le Iehovaschi?

³ I corcori duma cai sicavel sar si ciaces o Iehovas si i iubirea. (1 Ioan 4:8) O Iehova silo iubirea hai sea so cherel vo sicavel iubirea. I iubirea le Devleschi si cadea de bari hai zurali că vo sicavel-la vi caring codola cai ci iubin-les. (Mat. 5:44, 45) Ande cado articolo, va avela te hachiaras mai mișto sar silo o Iehova hai sode but iubil amen vo. Chichi va avela te prinjianas mai mișto amare Devles, cadichi mai but va avela te iubisaras-les.

O IEHOVA IUBIL AMEN ZURALES BUT

4. Sar cherel tut te simțosares tut i bari iubirea le Iehovaschi? (Dich vi i imaginea.)

⁴ „O Iehova silo pherdo iubirea.” (Iac. 5:11) Andi Biblia phenel- pe că o Iehova si sar iech dei pherdi iubirea. (Is. 66:12, 13) Te gândisaras amen sar lel sama iech dei pe pesco șiavorro. Pherdi iubirea voi încărel-les andi angali ca pesco colin hai del duma lesa șucar hai liniștime. Cana rovel sau siles ducha, voi cherel sea so daștil caște avel lesche mai mișto. Cana sam duchade, vi amen daisaras te pachias că o Iehova silo pașa amende hai sicavel amenghe iubirea. O psalmisto scriisardea: „Cana le gânduri phare chidine-pe ande mande, tu andean manghe mângâierea hai sastiardean mânro ilo”. (Ps. 94:19)

5. Sar zuriarel tut te jianes că o Iehova sicavel tuche iubirea loialo?

⁵ O Iehova silo loialo. (Ps. 103:8) Vo ci mechel amen cana cheras vareso nasul. I națiunea Israel duchadea butivar o ilo le Iehovasco. Cu sea cadala, cana le israelițen falea-len nasul anda so cărde, vo sicadea caring lende peschi bari iubirea cai ci nachel, prin le dumes: „Anda codoia că arăslean cuci ande mânre iacha, sas tuche sicadi pachiv hai me iubisardem tut”. (Is. 43:4, 5) Aghies, le Iehovas siles sa cadai iubirea loialo vi caring amende. Daisaras te pachias ciaces cadaia. Vo ci mechel amen nici cana cheras buchia zurales nasul. Cana sicavas căința hai risaras amen parpale co Iehova, dichas că leschi iubirea caring amende sili neparudi. Vo promitil amenghe că „va iertila anda sasto ilo”. (Is. 55:7) I Biblia sicavel că cadai iertarea anel ‘timpuri cai zuriaren le Iehovastar’. (Fap. 3:19)

6. So sicavel amen o Zaharia 2:8 anda o Iehova?

⁶ Citisar Zaharia 2:8. Anda codoia că iubil amen, o Iehova hachiarel so si ande amaro ilo hai camel te feril amen. Oricana sam duchade, vi o Iehova silo duchado. Cadea că daisaras te mangas amen pherde pachiamos hai te phenas lesche: „Ferisar man sar o udud che iachengo.” (Ps. 17:8) I iach si iech partea sensibilo hai cuci anda o corpo. Cana o Iehova phenel că sam sar o udud lesche iachengo, si sar cana phenelas: „Cana varecon duchavel tumen, duchavel vareso cuci anda mande”.

7. Sostar trebul te zuriaras amaro pachiamos andi iubirea le Iehovaschi?

⁷ O Iehova camel te pachias anda sea o ilo că vo iubil fiesaves mașcar amende. Tha vo jianel că daștil te avel amenghe pharo te pachias cadai buchi, vi mai but cana nachleam prin pharimata ande amari viața. Daștil-pe că nachas chiar acana prin situații cai cheren amen te pușias amen dacă o Iehova iubil amen ciaces. So  daștil te zuriarel amaro pachiamos ande leschi iubirea? Si importanto te dichas sar sicadea o Iehova peschi iubirea caring o Isus, caring codola machle hai caring le aver bacrea.

SAR SICAVEL O IEHOVA PESCHI IUBIREA?

8. Sostar pachialas o Isus anda sea o ilo că lesco Dad iubilas-les?

⁸ Mașcar o Iehova hai lesco cuci șiavo si iech phanglimos zuralo hai pherdo iubirea cai încărel de miliardea bărșa. Cado si o mai purano phanglimos anda o universo. O Iehova sicadea peschi iubirea caring o Isus, cadea sar citisaras ando Matei 17:5. O Iehova daisardeas te phenel harnes: „Cado si o jeno cas aprobisardem-les”. Tha vo camlea te cherel prinjiando le manușenghe chichi de but iubil le Isusos, anda codoia phendea: „Cado si mânro Șiav, codo iubime”. O Iehova dea-pe baro le Isusosa hai anda so avelas te cherel vo anda sea le manușa. (Ef. 1:7) O Isus jianelas anda sea o ilo că lesco Dad iubilas-les. Anda leste i iubirea le Iehovaschi sas ciaci hai daștilas te simțol-la pe peschi morci. Cadea că, pherdo pachiamos vo phendea mai butivar că lesco Dad iubilas-les. (Ioan 3:35; 10:17; 17:24)

9. Save dumes sicaven i iubirea le Iehovaschi caring codola machle? (Romani 5:5)

⁹ O Iehova sicadea peschi iubirea vi caring lesche slujitori machle. (Citisar Romani 5:5.) Ande iech lil sicavel-pe că i duma „sas șiordi” folosime le Pavelostar, daștil te avel phendi vi prin le dumes „sas șiordi avri sar iech pai cai thabdel”. Chichi de mișto sicavel cadaia i bari iubirea cai si le Iehovas caring codola machle! Von jianen că sile „iubime le Devlestar”. (Iuda 1) O apostolo Ioan sicadea vi so si ando ilo le creștinengo machle cana scriisardea: „Gândisaren tumen so bari iubirea sicadea amenghe o Dad, că phenel-pe amenghe că sam le șiave le Devlesche!”. (1 Ioan 3:1) Tha iubil o Iehova numai codolen machle? Nici. Vo sicadea peschi iubirea caring savore anda amende.

10. Savi si i mai bari buchi cai sicavel i iubirea le Iehovaschi caring tute?

¹⁰ Savi si i mai bari buchi cai sicavel i iubirea le Iehovaschi caring amende? I răscumpărarea. Prin cadaia o Iehova sicadea i mai bari iubirea cai daștilas varecon te sicavel-la vroiechdata. (Ioan 3:16; Rom. 5:8) O Iehova mechlea ca lesco cuci Șiavo te nachel prin bare ducha hai te merel anda savore manușa, ca amare păcatea te daștin te aven iertime hai te daisaras te arăsas Lesche amala. (1 Ioan 4:10) Chichi gândisaras amen mai but ca o baro prețo pochindo le Iehovastar hai le Isusostar, cadichi mai but daisaras te hachiaras lenghi bari iubirea anda fiesavo mașcar amende. (Gal. 2:20) I răscumpărarea ci sas pochindi numai caște sicavel-pe o ortomos le Iehovasco. O Iehova cărdea amenghe cado daro anda iubirea. Vo sicadea peschi iubirea anda amende cana dea sea so sas lesche mai cuci – lesco Șiavo iubime.

11. So sichioas anda Ieremia 31:3?

¹¹ Cadea sar dichleam, o Iehova ci încărel-pe parpale te sicavel amenghe peschi iubirea. (Citisar Ieremia 31:3.) O Iehova țârdea amen peste anda codoia că iubil amen. (Dich vi o Deuteronomo 7:7, 8.) Chanci hai chonic ci daștil te încărel amen dur cadala iubireatar. (Rom. 8:38, 39) So si ande chio ilo cana hachiares mai mișto i bari iubirea cai si le Iehovas caring tute? Citisar o Psalmo 23 hai dich sar cărdea le Davidos te simțosarel i iubirea hai i grija le Iehovaschi, pala codoia gândisar tut sar zuriarel vi tut cadaia.

SO SI ANDE CHIO ILO CANA HACHIARES CHICHI DE BUT IUBIL TUT O IEHOVA?

12. Anda so del-pe duma ando Psalmo 23?

¹² Citisar Psalmo 23:1-6. O Psalmo 23 si iech ghili cărdi le Davidostar, ande savi vo sicadea pesco pachiamos andi iubirea hai grija le  Iehovaschi. O David sicavel o zuralo amalimos cai si mașcar leste hai lesco Păstorii, o Iehova. Vo simțosardea-pe ferime anda codoia că mechlea le Iehovas te sicavel lesche o drom, hai șiutea sea pesco pachiamos ande Leste. Mai but, o David jianelas că o Iehova avelas te sicavel lesche iubirea ande sea le ghiesa lesca viațache. So cărdea le Davidos te pachial cadaia?

13. Sostar pachialas o David anda sea o ilo că o Iehova avelas te lel sama lestar?

¹³ „Ci va avela te lipsol manghe chanci.” Sea leschi viața, o David simțosardea sar o Iehova lea sama lestar hai dea-les sea so trebuisardea lesche. Sa cadea, le Davidos sas-les iech amalimos chidino le Iehovasa hai jianelas că sas-lo cuci ande lesche iacha. Anda codoia, o David pachialas anda sea o ilo că oriso avelas ando viitorii, o Iehova avelas te lel sama mai dur lestar. Lesco pachiamos andi bari iubirea le Iehovaschi sas cadea de zuralo, că ci mechlea-pe perado catar le pharimata. Mai but, cadaia anelas lesche iech bari bucuria hai pacea ando ilo. (Ps. 16:11)

14. Sar lel sama o Iehova amendar pherdo iubirea?

¹⁴ O Iehova lel sama amendar pherdo iubirea, vi mai but cana aven pharimata ande amari viața. I Claire a cai slujil co Betelo de mai but sar 20 bărșa, simțosardea-pe bi zuralimasco, cana avile pe lachi familia mai but pharimata iech pala aver. Laco dad cărdea iech baro accidento vascularo co șăro, iech anda lache pheia sas-li șiudini avri andai congregația, laca familia sas-la pharimata le lovența cadea că hasarde penghi țâni afacerea hai pengo chăr. Sar simțosardea cadai familia i iubirea le Iehovaschi? I Claire phenel: „O Iehova lea sama ca mânra familia te avel-len sea so sas-len nevoia ande fiesavo ghies. Butivar, o Iehova dea amen mai  but sar gândisardeam amen. Cana avel manghe andi goghi sar simțosardem i iubirea le Iehovaschi ande codol momentea, mânro ilo pherel-pe bucuriatar hai ci va avela te bâstrav niciechdata so cărdea vo anda mande. Cadala ajutisarde man te așiav zurali hai te slujiv vi mai dur le Iehovasche cana avile aver pharimata ande mânri viața”.

15. Sostar simțosardea-pe o David zuriardo? (Dich vi i imaginea.)

¹⁵ „Vo del-ma zuralimos.” Poiechdata, o David simțosardea-pe perado, anda codoia că nachelas prin but pharimata. (Ps. 18:4-6) Tha, i iubirea hai i grija le Iehovaschi, zuriarde-les. O Iehova îngărdea pesche amales cai sas-lo chino caring „le phuvea cai si but ciar” hai „ca le thana anda odihna mișto chinghiarde”. Cadea, o David simțosardea-pe zuriardo hai daisardea te slujil mai angle le Iehovasche voime. (Ps. 18:28-32)

16. Sar zuriardea tut i iubirea le Iehovaschi?

¹⁶ Vi amen aghies daisaras te nachas prin mai but pharimata hai zumaimata. Tha le dumes inspirime cai aven sile sa cadea de ciace vi anda amende: „Anda codoia că le Iehovas siles iech iubirea loialo amen ci peleam”. (Plâng. 3:22; Col. 1:11) Te dichas prin so nachlea i Rachel. Voi sas-li zurales peradi cana andi pandemia de COVID-19, laco rrom mechlea o ciacimos hai vi la. Sar ajutisardea-la o Iehova? Voi phenel: „O Iehova cărdea te simțosarav man iubime. Vo lea sama te aven pașa mande mânre amala. Cadala beșle manța, andine manghe haben, bișialde manghe mesajea hai versetea cai zuriarde man, asaie manghe hai andine ande mânri goghi că le Iehovas siles grija mandar. Mulțumisarav sea timpo le Iehovasche anda i șucar familia iubitoro cai si man”.

17. Sostar ci darailo o David „catar niciech nasulimos”?

¹⁷ „Ci darav catar niciech nasulimos, că tu san manța”. Butivar, o David sas-lo pașă te merel. Les sas-les but dușmani zurale. Cu sea cadala, i iubirea le Iehovaschi cărdea-les te simțosarel-pe ferime hai andi siguranța. De fiesavi data, vo simțosardea că o Iehova silo pașa leste, hai cadaia dea-les zuralimos. Cadea că, vo daisardea te ghilabal: „[O Iehova] hastradea man catar sea mânre daraimata”. (Ps. 34:4) Chiar cana le Davidos sas-les sostar te daral, i iubirea le Iehovaschi sas mai zurali sar lesche daraimata.

18. Sar daștil te zuriarel tut i iubirea le Iehovaschi cana naches prin iech situația phari cai daravel tut?

¹⁸ Sar zuriarel amen i iubirea le Iehovaschi  cana nachas prin situații phare cai daraven amen? Iech pioniera po anav Susi phendea sar simțosardea-pe voi hai laco rrom cana lengo șiavo mudardea-pe: „Cana vareso cadea de nasul avel bi te ajucăres tut, chio ilo silo phagărdo, simțosares tut bi zuralimasco hai darado. Tha, i bari iubirea le Iehovaschi cărdea amen te simțosaras amen andi siguranța hai ferime”. I Rachel, anda savi deam duma mai anglal, anel pesche andi goghi: „Ande iech riat, cana mânro ilo sas-lo astardo catar iech bari duch, somas zurales peradi hai daradi. Ruiem hai dem cingar ando manglimos caring o Iehova. Pe thaneste, simțosardem sar o Iehova dea man pacea ando ilo hai liniștisardea man, cadea sar iech dei liniștil pesche șiavorres. O Iehova țâniardea mânri duch, hai daisardem te sovav. Ci va avela te bâstrav niciechdata codo momento”. O Tasos, iech phuro de congregație, sas-lo phandado ștar bărșa anda codoia că ci camlea te cherel o servicio militaro. Sar simțosardea vo i iubirea hai i grija le Iehovaschi? O Tasos phenel: „O Iehova dea man sea so sas man nevoia hai chiar mai but sar ajucărdem man. Cadaia zuriardea man că daștiv te șioav sea mânro pachiamos ande leste. Sa cadea, prin pesco zuralo spirito sfânto, o Iehova dea man bucuria chiar cana o phandaimos ci sas iech than cadea de șucar. Cadai buchi ajutisardea man te hachiarav că dacă camav te dichav lesco lașimos, trebul te beșav chichi mai pașă lestar. Cadea că, chiar cana somas phandado, astardem o pionerato regularo”.

TE PAȘIOAS AMARE DEVLESTAR IUBITORII

19. a) So va avela te phenas ande amare manglimata cana jianas că o Iehova iubil amen? b) So ciaiol tut o mai but ca i iubirea le Iehovaschi? (Dich o chenarii „ Dumes cai cheren amen te simțosaras i bari iubirea le Iehovaschi”.)

¹⁹ Sea le experiențea cai dichleam-len sicaven că o Iehova, „o Del la iubireaco” silo amența. (2 Cor. 13:11) Vo lel sama fiesavestar mașcar amende. Cadea sar sicavel-pe ando Psalmo 32:10, sam „înconjurime catar leschi iubirea loialo”. Cana gândisaras amen sar sicadea amenghe o Iehova iubirea, vo va avela vi mai ciacio ande amare iacha hai va avela amen iech amalimos sea mai chidino lesa. Daisaras te pașioas lestar ando manglimos hai te phenas lesche so but si amen nevoia lesca iubireatar. Te das duma lesa anda sea amare phare gânduri, hai te pachias anda sea o ilo că vo hachiarel amen hai că camel te ajutil amen. (Ps. 145:18, 19)

20. Sar tachiarel amare ile i bari iubirea le Iehovaschi hai sar țârdel amen pașa leste?

²⁰ I bari iubirea le Iehovaschi tachiarel amare ile hai țârdel amen leste cadea sar iech iag țârdel amen peste hai tachiarel amen ande iech ghies șilalo. I iubirea le Iehovaschi si na numai zurali tha vi gugli. Cadea că, mech ca i iubirea le Iehovaschi te pherel chi viața hai sicav lesche vi tu parpale iubirea cadea sar o psalmisto, cai scriisardea: „Iubisarav le Iehovas”. (Ps. 116:1)