1, 2. Prin save pharimata nachen chichiva manușa le Iehovasche?

 CANA nachas prin iech baro pharimos, amari viața daștil te paruvel-pe cu sea. Sar exemplo, ieche phralesche po anav Luis a sas lesche arachlo iech pharo nasfalimos. O medico phendea lesche că mai siles chichiva șiona te trail. I Monika hai laco rrom, cai sas phuro de congregație, cherenas but andi buchi le Iehovaschi. Tha, ande iech ghies i Monika dea peschi sama că laco rrom păcătuilas garades de mai but bărșa. I Olivia, iech phei corcori, trebulas te tiliarel sigo chăral anda codoia că ande codo than avelas iech baro brâșând barvaleasa. Cana risailea parpale, i Olivia arachlea pesco chăr perado. Bi te ajucăren-pe, i viața cadale phralenghi parudea-pe cu sea. Nachlean vi tu prin iech baro pharimos cai parudea sea chi viața?

² Chiar cana sam le manușa le Iehovasche vi amen nachas prin pharimata hai nasfalimata, cadea sar savore jene. Mai but, daștil-pe că va avela te nachas prin persecuții cana codola cai urân amen așen amenghe contra. Chiar cana o Iehova ci feril amen cadale pharimatandar, vo promitil amenghe că va avela pașa amende. (Is. 41:10) Le Iehovasche ajutorosa daisaras te avas mai dur voime, te cheras lașe alosarimata hai te așias lesche loialo chiar ande le mai bare pharimata. Ande cado articolo, va avela te dichas ștar buchia prin save o Iehova daștil te ajutil amen ande le mai cale ghiesa anda amari viața. Sa cadea, va avela te dichas so trebul te cheras amen caște țârdas miștimata anda lesco ajutorii.

O IEHOVA VA FERILA TUT

3. Cana avel iech baro pharimos ande amari viața, so daștil te avel amenghe pharo te cheras?

³ O pharimos. Cana ande amari viața avel iech baro pharimos, daștil te avel amenghe pharo te gândisaras ujes hai te  cheras lașe alosarimata. Sostar? Daștil-pe că amaro ilo silo phagărdo duchatar hai amari goghi sili pherdi gândurența phare. Daisaras te simțosaras amen hasarde sar cana jias pe iech drom bi te jianas caring te las-la. Cadea simțosarde-pe vi amare pheia anda save deam duma mai anglal. I Olivia phenel: „Pala so mânro chăr sas-lo perado catar o baro brâșând hai barval, somas hasardi hai ci mai jianglem so te cherav”. I Monika, saveaco rrom athadea-la, phenel: „Somas zurales peradi hai simțosardem man hohadi. Iech bari duch halas mânro ilo. Ci daisardem te vazdav man pale pe pânrende. Sas manghe pharo te cherav vi le buchia de fiesavo ghies. Ci pachiaiem niciechdata că cadaia daștilas te întâmplol-pe chiar manghe”. Sar promitil amenghe o Iehova că va ajutila amen cana simțosaras că le pharimata peraven amen?

4. Cadea sar phenel-pe ando Filipeni 4:6, 7, so promitil amenghe o Iehova?

⁴ So cherel o Iehova anda amende. Vo promitil amenghe că va dela amen leschi pacea. (Citisar Filipeni 4:6, 7.) Tha so si i pacea le Devleschi? Si iech bari liniștea cai pherel amari goghi hai amaro ilo anda codoia că si amen iech amalimos chidino le Iehovasa. Cadai pacea „nachavel orisavo hachiarimos”. Si mai but sar daisaras te gândisaras amen. Simțosardean vroiechdata vi tu iech bari liniștea pala so manglean tut anda sea o ilo le Iehovasche? Cadaia si „i pacea le Devleschi”.

5. Sar feril i pacea le Devleschi amari goghi hai ilo?

⁵ O verseto anda Filipeni 4:7, phenel vi că i pacea le Devleschi „va păzila”, sau va ferila amaro ilo hai goghi. Andi șib grecisco i duma cai însemnol „te păzil” si iech duma cai folosilas-pe caște sicavel le soldațen saven sas-len i buchi te beșen de pază hai te ferin iech foro catar le atacuri. Le manușa cai beșenas code daștinas te soven andi pacea, anda codoia că jianenas că cadal soldați cherenas penghi buchi ca le udara le forosche. Sa cadea, cana i pacea le Devleschi păzil amare ile hai goghi, amen sam liniștime anda codoia că jianas că sam andi siguranța. (Ps. 4:8) Cadea sar i Ana anda o Israelo purano, daisaras te simțosaras iech anumime pacea, chiar cana amari situația ci paruvel-pe sigo. (1 Sam. 1:16-18) Hai cana amaro ilo silo liniștime daisaras te gândisaras mai ujes hai te cheras alosarimata goghiaver.

6. So trebul te cheres caște avel tut i pacea le Devleschi? (Dich vi le imagini.)

⁶ So trebul te cheras amen. Cana le pharimata peraven tut, achar „le paznicos” caște feril tut. Sar? Mang tut ji cana simțosares i pacea le Devleschi. (Luca 11:9; 1 Tes. 5:17) O Luis, anda savo deam duma mai anglal, phenel sar vo hai leschi rromni, i Ana, daisarde te așen zurale cana așunde că mai siles numai chichiva  șiona te trail. O Luis phendea: „Cana naches prin iech buchi sar cadaia, si zurales pharo te cheres alosarimata anda sar te les sama pe chio sastimos hai aver buchia. Ci daisardeamas te nachas prin cado pharimos bi te mangas amen. Cadaia andea amenghe pacea”. O Luis hai leschi rromni mangle-pe le Iehovasche anda sea o ilo butivar caște avel-len pacea andi goghi, iech ilo liniștime hai goghiaverimos caște cheren alosarimata lașe. Hai chiar simțosarde lesco ajutorii. Dacă vi tu naches prin iech baro pharimos, mang tut vi mai dur hai va avela te diches sar i pacea le Iehovaschi va păzila chi goghi hai chio ilo. (Rom. 12:12)

O IEHOVA DEL TUT ZURALIMOS CAȘTE NA PERES

7. So daisaras te simțosaras cana nachas prin iech baro pharimos?

⁷ O pharimos. Cana si amen iech baro pharimos daștil-pe că ci simțosaras, ci gândisaras hai ci cheras le buchia cadea sar trebul. Daștil-pe că nachas sigo catar iech sentimento ca aver. I Ana, anda savi deam duma mai anglal, nachlea prin cadaia pala so laco rrom mulea. Voi phenel: „Cana le phare gânduri chidenas-pe ande mande, astardemas te rovav manghe corcori milatar. Poiechdata somas holiardi anda codoia că mânro rrom ci mai sas-lo pașa mande”. Mai but, i Ana simțosardea-pe corcori hai peradi anda codoia că trebulas te cherel alosarimata cai mai anglal cherelas-len o Luis. Butivar, simțosardea-pe sar mașcar iech baro brâșând pi marea. Sar ajutil amen o Iehova cana cadal pharimata astaren te tasaven amen sar iech baro pai?

8. Cadea sar phenel-pe ando Isaia 33:6, so promitil amenghe o Iehova?

⁸ So cherel o Iehova anda amende. Vo promitil amenghe că va dela amen zuralimos caște na peras. (Citisar Isaia 33:6.) Ando mașcar ieche bare brâșândesco, iech barca daștil te mișchil-pe zurales anda iech than ande aver hai sili ando pericolo te mechel-pe tele ando pai. Caște na mișchin-pe cadea de zurales, ca but bărci si șiute phaca specialo cai zinghion ande fiesavi rig la barcachi tela o pai. Cadea, o drom cai cherel-les silo mai siguro hai mai ușoro vi anda le pasageri. Tha cadal phaca specialo cheren buchi mai mișto cana i barca jial angle. Sa cadea, o Iehova zuriarel amen caște na peras cana jias angle pherde pachiamos prin le bare brâșânda la viațache.

9. Sar daștin te ajutin amen le instrumentea anda o rodimos te așias zurale caște na peras? (Dich vi le imagini.)

⁹ So trebul te cheras amen. Cana astarel iech baro brâșând ande chio ilo, de chi zor te cheres mai dur sea le buchia spiritualo cai zuriaren chio pachiamos. Daștil-pe că ci va mai avela te cheres cadea de but sar mai anglal, tha na bâstăr că o Iehova ci ajucărel tutar prea but. (Dich  vi Luca 21:1-4.) Si importanto te cheres tuche timpo te sichios corcoro andai Biblia hai te gândis tut ca so sichilean. Sostar? Anda codoia că, ando timpo, o Iehova dea amen prin peschi organizația but șucar articolea hai materialea video cai ajutin amen te așias zurale hai te na peras. Caște arachas-len, daisaras te folosisaras le instrumentea anda o rodimos cai si amen, sar avelas i aplicația JW Library, o Indexo le publicațiengo Watch Tower hai o Ghido de cercetare anda le Martori le Iehovasche. I Monika phendea că folosilas cadal instrumentea de fiesavi data cana dichelas că pașionas le cale ghiesa hai astarelas o brâșând ande laco ilo. Sar exemplo, voi rodelas dumes sar avenas „holi”, „athaimos” sau „loialitatea”, pala codoia citilas ji cana simțolas-pe mai mișto. Voi phenel: „Cana astardemas te cherav cadaia ci sas man liniștea, tha ando timpo so citisardemas mai dur simțosardemas sar o Iehova lelas man ande peschi bari angali”. O Iehova daștil te ajutil vi tut te așes zuralo caște na peres ji cana „le bare paia” liniștin-pe ande chio ilo. (Ps. 119:143, 144)

O IEHOVA VA AVELA PAȘA TUTE

10. Sar daștil te paruvel amari viața iech baro pharimos?

¹⁰ O pharimos. Pala iech baro pharimos, daisaras te simțosaras amen chine, bi zuralimasco hai perade. Daisaras te avas sar iech sportivo cai mai anglal nașelas sigo, tha acana phirel banghes. Chiar vi le mai țâne buchia cai trebul te cheras-len, daștinas te aven iech pharimos anda amende. Mai but, daștil-pe că ci mai camas te cheras nici le buchia cai mai anglal anenas amenghe bucuria. Cadea sar o Ilie, daisaras te simțosaras că camas numai te sovas hai că ci mai așilea zor ande amende caște vazdas amen. (1 Regi 19:5-7) So promitil o Iehova că va cherela anda amende cana simțosaras amen covle?

11. Sar mai ajutil amen o Iehova? (Psalmo 94:18)

¹¹ So cherel o Iehova anda amende. Vo promitisardea că va avela pașa amende caște încărel amen opre. (Citisar Psalmo 94:18.) Cadea sar ieche sportivos cai nașel hai perel siles nevoia varecastar te avel pașa leste hai te încărel-les caște phirel mai dur, sa cadea vi amen si amen nevoia catar o ajutorii caște jias angle ande amari buchi anda o Iehova. Ando Isaia 41:13, o Iehova sicavel amenghe sar va avela vo pașa amende ande codola momentea: „Că me, o Iehova, chio Del, astarav chio ciacio vast, me, Codo cai phenel tuche: «Na dara! Me va avela te ajutiv-tu!»”. O rege David dichlea pe peschi morci sar sas-lo o Iehova pașa leste andel ghiesa phare, cana le dușmani rodenas te  mudaren-les. Vo phendea le Iehovasche: „Chio vast o ciacio încărel-ma”. (Ps. 18:35) Tha, sar silo o Iehova pașa amende cana sam perade?

12. Prin caste daștilas o Iehova te ajutil amen?

¹² Butivar, o Iehova del amen pesco vast caște vazdel amen prin aver manușa, hai cherel-len te ajutin amen. Sar exemplo, cana o David sas-lo perado, lesco amal o Ionatan gălea leste caște zuriarel-les hai caște sastiarel lesco ilo prin lesche dumes. (1 Sam. 23:16, 17) Sa cadea, o Iehova folosisardea le Eliseios caște ajutil le Ilies. (1 Regi 19:16, 21; 2 Regi 2:2) Aghies, o Iehova daștil te ajutil amen prin le jene anda amari familia, prin amare amala sau prin le phure de congregație. Tha, cana amaro ilo silo pusado duchatar, daștil-pe că camas te beșas corcore hai te phandavas amen ande amende. Ande codol momentea, daștil-pe că ci camas te das duma chanicasa. Hai cadaia si normalo. Tha so daisaras te cheras caște simțosaras o ajutorii le Iehovasco?

13. So trebul te cheras ca o Iehova te daștil te ajutil amen? (Dich vi le imagini.)

¹³ So trebul te cheras amen. Te das sea amari zor te na rodas te beșas corcore. O mai butivar, cana beșas corcore, ci dichas mișto le buchia, hai arăsas te gândisaras amen numai amende hai ca amaro pharimos. Cadaia daștilas te cherel amen te alosaras negoghiaver. (Prov. 18:1) Si ciaces, savoren si amen nevoia poiechdata te avas corcore, vi mai but cana nachas prin iech baro pharimos. Tha cana rodas te beșas corcore mai but timpo, daisaras te arăsas te duriaras amendar o vast cai o Iehova zinghiarel-les caște ajutil amen. Cadea că, orichichi de pharo avelas amenghe, te mechas ca le jene anda amari familia, le amala hai le phure de congregație te ajutin amen. Te dichas ande lende o ajutorii prin savo o Iehova silo pașa amende. (Prov. 17:17; Is. 32:1, 2)

O IEHOVA VA SASTIARELA I DUCH ANDA CHIO ILO

14. Prin so pharimata cai daraven amen daisaras te nachas?

¹⁴ O pharimos. Daștil-pe că, poiechdata, va avela te nachas prin pharimata cai va daravena amen. Chichiva manușa loialo le Iehovasche sicade andi Biblia daraile vi von cana le dușmani rodenas-len sau anda aver motivea. (Ps. 18:4; 55:1, 5) Vi amen daștil te astarel amen i dar cana le manușa așen amenghe contra ca i școala sau ca i buchi, sau cana sam persecutime le jenendar anda amari familia sau le guvernendar. Hai cana si amen iech pharo nasfalimos, daisaras te daras anda amari viața. Ande codol momentea, daștil-pe că simțosaras amen bizuralimasco  hai covle, sar iech țâno șiavorro. Tha so cherel o Iehova ande amaro miștimos?

15. Cadea sar phenel-pe ando Psalmo 94:19, so va cherela o Iehova anda amende?

¹⁵ So cherel o Iehova anda amende. Vo sastiarel amaro ilo hai mângâil amen. (Citisar Psalmo 94:19.) Le dumes cai scriisardea-len o psalmisto îngăren amari goghi ca iech șeiorri daradi catar iech baro brâșând cai ci mechel-la te sovel. Tha laco dad, jial andi camera, lel-la andi angali hai încărel-la zurales ca lesco colin ji cana lel-la i lindr. Chiar cana del o brâșând vi mai dur, i angali lache dadeschi cherel-la te na mai daral. Daștil-pe că cana nachas prin pharimata cai daraven amen, simțosaras i nevoia ca amaro Dad cerisco te încărel amen, te phenas cadea, andi angali ji cana le phare gânduri cai duchaven amen nachen. So daisaras te cheras caște simțosaras leschi mângâierea?

16. So daisaras te cheras caște avas mângâime le Iehovastar? (Dich vi le imagini.)

¹⁶ So trebul te cheras amen. Si zurales importanto te cheras amenghe timpo te beșas le Iehovasa, adică te mangas amen lesche hai te citisaras anda lesco Lil. (Ps. 77:1, 12-14) Dacă san sicado te cheres cadaia, cana va avela te naches prin pharimata, daștil-pe că i iechto buchi cai va nachela prin chi goghi va avela te rodes o ajutorii che Dadesco anda o cerii. De duma le Iehovasa anda che daraimata hai che phare gânduri. Hai pala codoia, așun-les cana mângâil tut prin le dumes anda lesco Lil. (Ps. 119:28) Va dicheia că si cotora andai Biblia cai va sastiarena chio ilo cana san astardo daratar. Sar exemplo, daștis te aves zuriardo cana citis anda le lila biblico Iov, Psalmi sau Proverbe, hai vi le dumes le Isusosche anda Matei, o capitolo 6. Cadea că, cana manghes tut hai citis anda o Lil le Devlesco va dicheia o vast le Iehovasco cai ajutil tut te araches mângâierea.

17. So daisaras te pachias anda sea o ilo?

¹⁷ Daisaras te pachias anda sea o ilo că o Iehova va avela pașa amende cana ande amari viața aven bare pharimata. Ci sam niciechdata corcore! (Ps. 23:4; 94:14) O Iehova promitil că va ferila amen, va zuriarela amen caște na peras, va avela pașa amende hai va sastiarela i duch anda amaro ilo. Ande Isaia 26:3 phenel-pe anda o Iehova: „Tu va avela te feris codolen cai mechen-pe cu sea ande chio vast; va avela te des-le iech pacea cai încărel, anda codoia că șion pengo pachiamos ande tute”. Cadea că, te pachias amen ando Iehova hai te mechas-les te ajutil amen. Cana cheras cadea, va avela te astaras pale zuralimos, vi cana nachas prin bare pharimata!