1. So daraimata daștinas te aven amen?

 SAVORE manușa daran poiechdata. Si ciaces, de cana prinjianas o ciacimos, amen ci mai daras le mulendar, le spiritendar nasul sau catar so va întâmplola-pe ando viitorii. Cu sea cadala, traisaras ande iech timpo pharo cana dichas „buchia cai daraven”, sar avenas marimata, mudarimata hai nasfalimata. (Luca 21:11) Sa cadea daștil-pe că daras le manușendar, sar avelas le jenendar anda amari familia sau le guvernendar cai așen amenghe contra anda codoia că anas închinarea le Iehovasche. Chichiva anda amende daisaras te avas darade, cana gândisaras amen dacă chiar va avela te așias zurale ande iech pharimos prin savo nachas aghies sau va avela te nachas ando viitorii.

2. Prin so nachlea o David ando foro Gat?

² Poiechdata vi le Davidos astardea-les i dar. Sar exemplo, cana o rege Saul phirelas pala leste caște mudarel-les, vo alosardea te nașel ando foro filisteano Gat. Na pala but timpo, o Achiș, o rege anda Gat, așundea că o David sas o zuralo războinico așardo ande iech ghili anda codoia că mudardea deșemiienghe filisteni. Atunci le Davidos „astardea-les iech bari dar”. (1 Sam. 21:10-12) Vo sas-lo darado anda so daștilas te cherel lesche o Achiș. Sar nachlea o David părdal pesche daraimata?

3. Sar duriardea pestar o David le daraimata? (Psalmo 56:1-3, 11)

³ Ando Psalmo 56, o David phendea so sas-les po ilo ando timpo so beșelas ando Gat. Ande cado psalmo, vo sicadea na numai save sas lesche daraimata, tha vi sar daisardea te duriarel-len pestar. Cana astardea-les i dar, o David șiutea pesco pachiamos ando Iehova. (Citisar Psalmo 56:1-3, 11.) Les sas-les iech lașio motivo te cherel cadaia. Le ajutoroia le Iehovasco, vo alosardea te cherel vareso neobișnuime. Vo cărdea-pe că silo dilo,  hai lesco plano înclistea mișto. Cana o Achiș dichlea-les pachiaia că leschi prezența mai but holiarel-les sar te daravel-les. Cadea că o David daisardea te hastral lestar. (1 Sam. 21:13–22:1)

4. Sar daisaras te zuriaras amaro pachiamos ando Iehova? Cheren iech ilustrarea.

⁴ Vi amen daisaras te duriaras amendar le daraimata cana șioas amaro pachiamos ando Iehova. Tha sar te zuriaras amaro pachiamos ando Iehova, vi mai but cana sam astarde daratar? Te gândisaras amen ca iech ilustrarea. Cana așunes că si tut iech nasfalimos pharo, mai anglal san darado. Tha daștis te duriares chi dar cana șios chio pachiamos ande chio doctoro. Daștil-pe că jianes că vo sastiardea vi avere manușen cai sas-len cado nasfalimos. Sa cadea, vo așunel tut atento hai cadaia cherel tut te pachias că vo hachiarel ciaces so si tut po ilo. Pala codoia, phenel tuche că trebul te les draba cai sas-le lașe vi anda aver manușa. Sa cadea, amen zuriaras amaro pachiamos ando Iehova cana gândisaras amen ca so cărdea, so cherel hai so va cherela vo anda amende. Cadea cărdea vi o David. Ando timpo so va avela te dichas chichiva anda lesche dumes, cai o Del cărdea-les te scriil-len ando Psalmo 56, te pușias amen so daisaras te cheras caște zuriaras amaro pachiamos ando Iehova hai te duriaras amendar le daraimata.

SO CĂRDEA O IEHOVA ANDEL PURANE GHIESA?

5. Ca so gândisardea-pe o David caște duriarel pesche daraimata? (Psalmo 56:12, 13)

⁵ Chiar cana leschi viața sas-li ando pericolo, o David gândisardea-pe ca so cărdea deja o Iehova. (Citisar Psalmo 56:12, 13.) Vo încărdea ande peschi goghi cadai buchi sea peschi viața. Poiechdata, vo gândisardea-pe ca le șucar buchia andai creația, cai ajutisarde-les te na bâstrel că le Iehovas siles o mai baro zuralimos hai că vo iubil le manușen. (Ps. 65:6-9) Sa cadea, vo gândisardea-pe ca so cărdea o Iehova anda aver. (Ps. 31:19; 37:25, 26) Hai, i mai importanto buchi, gândisardea-pe ca so cărdea o Iehova anda leste. O Iehova sas-lo pașa leste hai ferisardea-les încă de cana sas-lo iech țâno șiavorro. (Ps. 22:9, 10) Si ciaces, sea cadal buchia savende gândisardea-pe zuriarde o pachiamos le Davidosco ando Iehova.

6. So va ajutila amen te șioas amaro pachiamos ando Iehova cana sam astarde daratar?

 ⁶ Cana astarel tut i dar, șiu tuche o pușimos: „So cărdea o Iehova andel purane ghiesa?”. Pala codoia, gândisar tut ca le buchia andai creația. Sar exemplo, cana ‘diches atento’ sar o Iehova lel sama le ciricleandar hai le lulughiandar – cai ci sas-le cărde pala lesco chipo hai cai ci daștin te anen lesche închinarea – amaro pachiamos ando Iehova că vo daștil te lel sama vi amendar zuriarel-pe. (Mat. 6:25-32) Sa cadea, gândisar tut ca so cărdea o Iehova anda lesche manușa. Sar exemplo, daștis te rodes te prinjianes mai but anda iech jeno andai Biblia cai sicadea iech baro pachiamos sau daștis te citis i experiența ieche slujitoreschi le Iehovasco anda amare ghiesa. a Mai but, gândisar tut ca sar lea sama tutar o Iehova ji acana. Sar țârdea tut vo co ciacimos? (Ioan 6:44) Sar dea tut răspunso ca che manglimata? (1 Ioan 5:14) So miștimata si tut ande fiesavo ghies anda codoia că lesco cuci Șiavo dea peschi viața anda tute? (Ef. 1:7; Evr. 4:14-16)

7. Sar ajutisardea la Vanessa i relatarea anda o Daniel te duriarel peschi dar?

⁷ I Vanessa b, iech phei anda Haiti, nachlea prin iech pharimos cai daradea-la but. Iech murș anda o than cai beșelas sunilas-la hai scriilas lache mesaje ande fiesavo ghies, caște cherel-la te avel-la iech relația lesa. I Vanessa phendea lesche că ci camel cadaia, tha vo astardea te phiravel-pe sea mai jiungales lasa hai chiar daradea-la că va cherela lache vareso nasul. Voi phenel: „Somas zurales daradi!”. Sar duriardea i Vanessa peschi dar? Voi cărdea sea so daisardea caște feril-pe. Iech phuro de congregație ajutisardea-la te jial ca le autorități hai te phenel lenghe so întâmplolas-pe lasa. Tha, voi vi gândisardea-pe ca sar ferisardea o Iehova pesche manușen andel purane ghiesa. I Vanessa mai phenel: „O iechto jeno cai avilea ande mânri goghi sas o profeto Daniel. Chiar cana ci sas-lo doșalo, vo sas-lo șiudino ande iech hâv pherdi lei bochale. Tha, o Iehova ferisardea-les. Manglem le Iehovas te ajutil vi man hai mechlem le buchia ande lesche vasta. Pala codoia, ci mai somas daradi”. (Dan. 6:12-22)

SO CHEREL O IEHOVA ACANA?

8. So pachialas o David anda sea o ilo? (Psalmo 56:8)

⁸ Chiar cana o David sas-lo pașă te avel mudardo cana sas-lo ando Gat, vo ci încărdea peschi goghi ca lesche daraimata. Mai but, vo alosardea te gândil-pe ca so cherelas o Iehova anda leste ande codo momento. O David daisardea te simțol că o Iehova sicavelas lesche so trebul te cherel, că ferilas-les hai că hachiarelas so sas ande lesco ilo. (Citisar Psalmo 56:8.) Le Davidos sas-les vi amala, sar avelas o Ionatan hai o baro rașai Ahimelec, cai zuriarde-les hai dine pengo vast caște ajutin-les. (1 Sam. 20:41, 42; 21:6, 8, 9) Hai chiar cana o rege Saul rodelas te mudarel-les, o David scăpisardea hai așilea jiuvindo. Vo pachialas anda sea o ilo că o Iehova prinjianelas mișto o pharimos prin savo nachelas hai sar duchavelas-les cadaia.

9. So dichel o Iehova ca fiesavo anda amende?

⁹ Cana naches prin iech pharimos cai daravel tut, na bâstăr că o Iehova dichel prin so naches hai vi sar cherel tut codo pharimos te simțosares tut. Sar exemplo, o Iehova dichlea na numai le nasulimata cai cherenas-len le egipteni le israelițenghe, tha vi prinjianelas mișto le ducha prin save nachenas. (Ex. 3:7) Hai o David scriisardea ande iech psalmo că o Iehova dichlea na numai ‘lesco pharimos’, tha vi ‘chichi de bari sas leschi duch’. (Ps. 31:7) Chiar cana o  poporo le Devlesco țârdea buchia nasul anda codoia că cărde alosarimata negoghiaver, „vi vo sas-lo duchado”. (Is. 63:9) Cadea că, cana daras, o Iehova hachiarel prin so naches hai camel anda sea o ilo te ajutil tut te duriares che daraimata.

10. Sostar pachias anda sea o ilo că anda o Iehova san zurales cuci hai că vo va ajutila tut te naches părdal orisavo pharimos?

¹⁰ Cana naches prin iech pharimos, daștil-pe că ci diches sar silo o Iehova pașa tute. Cadea că mang-les te ajutil tut te diches cadaia. (2 Regi 6:15-17) Pala codoia șiu tuche le pușimata: „Somas zuriardo cana așundem iech tema sau iech comentario ca iech întrunirea? Arachlem vareso cai zuriardea man ande iech publicația, ande iech materialo video sau andel dumes anda iech ghili? Phendea manghe varecon iech șucar sicaimos sau avilea ande mânri goghi iech șucar verseto?”. Dacă ci sam atento, daisaras te arăsas te na mai dichas cuci i iubirea amare phralenghi hai o haben spiritualo cai primisaras-les. Tha, cadala sile șucar daruri cai aven le Iehovastar. (Is. 65:13; Mar. 10:29, 30) Von sicaven chichi de but iubil amen o Iehova hai că daisaras te pachias amen ciaces ande leste. (Is. 49:14-16)

11. So ajutisardea la Aida te duriarel pesche daraimata?

¹¹ I Aida, anda Senegal, dichlea o vast le Iehovasco sar ajutisardea-la cana nachlea prin iech baro pharimos ande lachi viața. Laco dad hai dei ajucărenas-pe te lel sama pe lende le lovența anda codoia că voi sas i mai bari mașcar lache phrala. Tha i Aida cărdea peschi viața mai simplo caște daștil te cherel o pionierato. Cadea că, ci sas-la prea but love. Lachi familia holiardea-pe cana așundea so alosardea te cherel. I Aida phenel: „Sas manghe dar că ci va avela man sar te ajutiv mânra deia hai mânre dades hai că savore manușa va prasana man. Arăslem chiar te doșarav le Iehovas anda codoia că mechlea ca le buchia te cărdion cadea de nasul”. Pala codoia, i Aida așundea iech tema ca iech întrunirea. Voi phenel mai dur: „O phral cai încărdea i tema andea ande amari goghi că o Iehova prinjianel mișto le ducha amare ilesche. Ando timpo, le sfaturi dine le phurendar tha vi averendar ajutisarde man te pachiav man pale andi iubirea le Iehovaschi. Cana șiordem mânro ilo ando  manglimos, mânro pachiamos ando Iehova că avelas te ajutil man zuriarelas-pe sea mai but hai, de fiesavi data cana dichlemas sar delas man vo răspunso ca le manglimata, simțosardem iech bari pacea ando ilo”. Ji la urmă, i Aida arachlea iech than buchiaco cai mechlea-la na numai te cherel mai dur o pionerato, tha vi te ajutil pesca familia lovența. Voi phenel: „Sichilem te șioav sea mânro pachiamos ando Iehova. Acana, cana mangav man, o mai butivar simțosarav sar sea mânre daraimata hasardion-pe”.

SO VA CHERELA O IEHOVA ANDO VIITORII?

12. Cadea sar phenel-pe ando Psalmo 56:9, so pachialas anda sea o ilo o David?

¹² Citisar Psalmo 56:9. Cado verseto sicavel iech aver buchi prin savi o David duriardea pesche daraimata. Chiar cana leschi viața sas-li vi mai dur ando pericolo, vo gândisardea-pe ca so avelas te cherel o Iehova anda leste ando viitorii. O David jianglea că o Iehova va hastravela-les ando mai lașio momento. O Iehova phendea anda leste că avelas te arăsăl o nevo rege le Israelosco. (1 Sam. 16:1, 13) Anda o David orisavi promisiunea cărdi le Iehovastar sas sar cana pherdilea-pe deja.

13. So va cherela o Iehova ando viitorii?

¹³ So promitisardea o Iehova că va cherela vi anda amende? Ci ajucăras amen ca o Iehova te chosel sea amare pharimata aghies. c Tha, o Iehova promitil amenghe că, na pa but timpo, va cherela cadaia andi lumea nevi. (Is. 25:7-9) Si ciaces, amare Creatoros siles o zuralimos te uștavel parpale viațate le mulen, te sastiarel amen hai te hastravel amen codolendar cai așen amenghe contra. (1 Ioan 4:4)

14. Ca so buchia daisaras te gândisaras amen?

¹⁴ Cana sam astarde daratar, te gândisaras amen ca so va cherela o Iehova ando viitorii. Te gândisaras amen sar va avela te simțosaras amen cana o Satan ci va mai avela, cana mașcar amende va avena numai manușa orta hai cana i imperfecțiunea va hasardiola țâra po țâra ande fiesavo ghies. Iech demonstrația anda o congreso regionalo anda 2014 sicadea amenghe sar daisaras te gândisaras amen mai but ca amari speranța. Iech dad dea duma pesca familiasa anda sar le versetea anda 2 Timotei 3:1-5 daștinas te aven scriime diferime dacă cadala sicavenas sar avelas i viața ando Paradiso: „Tha te jianes că andi lumea nevi va avena le mai șucar timpuri. Anda codoia că le manușa va iubina-pe iech averes, va iubina le barvalimata spiritualo, va avena modesto, umili, va așarena le Devles, va așunena penghe dadestar hai deiatar, va avena recunoscători, loialo, va sicavena iech ciaci iubirea penghe familienghe, va hachiarena-pe ande sea le buchia, va dena duma șucar sea o timpo anda le coaver, va jianena te încăren-pe parpale, va avena lașe, va iubina o miștimos, va avena demno pachiamasche, va avena gata te mechen pendar, ci va avena puchiarde barimastar, va iubina mai but le Devles sar le plăceri, sea cadala va cherena-len anda iech pachiamos sfânto; pașio le manușendar sar cadala”. Des duma chia familiasa sau che phralența ando pachiamos anda sar va avela i viața andi lumea nevi?

15. So ajutisardea la pheia Tanja te duriarel pesche daraimata?

¹⁵ I Tanja, iech phei anda Macedonia de Nord, daisardea te duriarel pesche daraimata cana gândisardea-pe ca so va cherela anda late o Iehova ando viitorii. Cana sichiolas andai Biblia, laco dad hai lachi dei așile lache zurales contra. Voi phenel: „Chichiva buchia savendar darailem, chiar întâmplosarde-pe. Mânro dad hai mânri dei daravenas man că dacă cărdioav Martora mudaren man, hai mânri dei marelas man pala fiesavi întrunirea”. Ji la urmă, von  dine-la avri anda o chăr. So cărdea i Tanja? Voi phenel: „Încărdem ande mânri goghi i fericirea cai va avela te simțosarav-la anda sea o timpo anda codoia că alosardem te așiav loialo le Iehovasche. Sa cadea, gândisarde man ca sar va pochinela man o Iehova andi lumea nevi anda orisavi buchi avelas te hasarav-la ande cado sistemo hai sar sea le buchia nasul va avena bâstărde”. I Tanja așilea zurali ando pachiamos. Le ajutorosa le Iehovasco, voi arachlea pesche iech than cai te beșel. Aghies, i Tanja slujil ando servicio cu timp integral fericime ande iech than pesche rromesa.

TE ZURIARAS AMARO PACHIAMOS ANDO IEHOVA ACANA

16. So va ajutila amen te așias tromane cana i profeția anda Luca 21:26-28 va pherela-pe?

¹⁶ I Biblia phenel că, ando baro necazo, le manușa „va perena tele daratar”. Tha le manușa le Devlesche va așena zurale hai tromane. (Citisar Luca 21:26-28.) Sostar ci va astarela i dar vi amen? Anda codoia că sichileam deja te pachias amen ando Iehova. I Tanja, anda savi deam duma mai anglal, phenel că le buchia prin save nachlea ande peschi viața ajutin-la te nachel părdal le pharimata de aghies. Voi phenel: „Sichilem că na-i niciech situația phari cai o Iehova te na daștil te lașiarel-la. Poiechdata, daștilas te fal-pe că le buchia sile tela o zuralimos avere manușengo. Tha von daștin te cheren numai so mechel-len o Iehova. Hai orichichi de baro daștilas te avel iech pharimos, ande iech ghies va nachela.”

17. Sar va ajutila amen o texto le bărșesco anda 2024? (Dich i imaginea pa i coperta.)

¹⁷ Aghies si but buchia cai daraven amen. Tha, cadea sar o David, daisaras te alosaras te na mechas amen astarde daratar. O texto le bărșesco anda 2024 si iech manglimos cărdo le Davidostar le Iehovasche, cai phenel: „Cana astarel-ma i dar, șioav mânro pachiamos ande tute”. (Ps. 56:3) Ande iech lil phenel-pe anda cado verseto că o David „ci bariarel peschi dar, hai nici ci încărel peschi goghi ca pesche pharimata, tha dichel caring Codo cai va hastravela-les”. Ande cado bărș, te gândisaras amen ca le dumes cai phendea-len o David, vi mai but cana nachas prin situații cai daraven amen. Te cheras amenghe timpo te gândisaras amen ca le buchia cai o Iehova cărdea-len andel purane ghiesa, cherel-len aghies hai va cherela-len ando viitorii. Atunci, cadea sar o David, va daisaraia te phenas: „Ando Del șioav mânro pachiamos – ci darav”. (Ps. 56:4)