1. So cărdea o Iehova anda tute?

ANES tuche amintea sar cărdilean iech Martoro le Iehovasco? Mai anglal așundean „i vestea lași”, daștil-pe că catar che dada, ieche colegostar catar i buchi sau catar i școala sau ieche Martorestar cai avilea tute chăre. (Mar. 13:10) Pala codoia, varecon cărdea pesche timpo hai cărdea but eforturi caște studiisarel tuia. Cana studiisardean, arăslean te iubis le Iehovas hai te hachiares că vi vo iubil-tu. O Iehova țârdea-tu co ciacimos hai acana sar discipolo le Isus Cristososco si tut i speranța te trais anda sea o timpo. (Ioan 6:44) Siguro, san zurales recunoscătorii le Iehovasche că folosisardea varecas te sicavel-tu o ciacimos hai că camlea te aves Lesco slujitorii.

2. So va dichaia ande cado articolo?

² Acana că prinjianas o ciacimos, si ame o privilegio te ajutisaras vi averen te aven amența po drom cai îngărel ca i viața. Daștil-pe că si amenghe ușoro te predichisaras chăr chărestar, tha daștil te avel amenghe mai pharo te începosaras hai te încăras studii biblico. Mai dur, va avela te dichas chichiva buchia cai daștin te ajutin-ame. Va avela te hachiaras so cherel-ame te camas te cheras discipoli hai so daisaras te cheras cana, anda anumime motivea, si amenghe pharo te încăras iech studio biblico. Tha mai anglal, va avela te dichas sostar si importanto na numai te predichisaras, tha vi te sicavas le manușen te respectin le norme andai Biblia.

3. Sostar predichisaras?

³ Cana sas-lo pi phuv, o Isus dea pesche continuatoren iech lucrarea cai încărel anda dui buchia. I iechto buchi cai phendea lenghe te cheren-la sas te predichin i vestea lași  anda o Regato hai sicadea lenghe sar trebul te cheren cadaia. (Mat. 10:7; Luca 8:1) Sar exemplo, o Isus phendea pesche discipolenghe so te cheren cana le manușa ascultin o mesajo anda o Regato, hai so te cheren cana le manușa ci camen te ascultin-les. (Luca 9:2-5) Mai but, vo phendea lenghe de mai anglal ji cai va arăsăla lenghi lucrarea de predicare, cana phendea lenghe că lesche continuatori va avela te șion mărturia ‘sea le națiunenghe’. (Mat. 24:14; Fap. 1:8) Indiferento că le manușa avelas te așunen sau nici o mesajo, le discipoli trebuisarde te den duma anda o Regato le Devlesco hai anda le binecuvântări cai avelas te anel-le.

4. Cadea sar phenel-pe ando Matei 28:18-20, savi si i duito buchi cai phendea-la o Isus pesche discipolenghe te cheren-la?

⁴ I duito buchi cai phendea-la o Isus pesche continuatorenghe te cheren-la sas te sicaven le manușen te respectin sea lesche porunci. Chichiva manușa phenen că cadai lucrarea sas dini numai le creștinenghe ando o iechto secolo, tha si ciaces cadaia? Nici. O Isus sicadea că i lucrarea de predicare hai o fapto te sicavas averen, avelas te cherel-pe vi ande amare ghiesa „ji co phandaimos le sistemosco”. (Citisar Matei 28:18-20.) Daștil-pe că o Isus dea cadai porunca cana sicadea-pe mai but sar 500 discipolenghe. (1 Cor. 15:6) Hai cana phendea le Ioanosche o mesajo le lilesco Revelația, o Isus sicadea claro că sea lesche discipoli trebun te sicaven averen anda o Iehova. (Rev. 22:17)

5. Cadea sar phenel-pe ando 1 Corinteni 3:6-9, sar sicadea o Pavel o phanglimos mașcar i predicarea hai o sicaimos?

⁵ O apostolo Pavel phendea că i lucrarea prin savi sicavas le manușen si sar i buchi cai cherel-pe ca iech phuv hai sicadea că trebul te cheras mai but sar te șioas numai le semințea. Vo phendea caring le corinteni: „Me șiutem andi phuv, o Apolo chinghiardea . . . Tume san i phuv ande savi șiutea semințea o Del”. (Citisar 1 Corinteni 3:6-9.) Sar manușa cai cheras buchi ‘ca i phuv le Devleschi’, ci arăsăl numai te șioas andi phuv le semințea le ciacimasche, trebul vi te chinghiaras-le hai te dichas mai butivar sar barion. (Ioan 4:35) Sa cadea, jianas că o Iehova si codo cai cherel te bariol.

6. So trebul te cheras cana sicavas averen?

⁶ Amari buchi si te rodas codolen cai sile „o ilo lașio anda i viața veșnico”. (Fap. 13:48) Ca von te arăsăn discipoli, ame trebul te ajutisaras-le: 1) te hachiaren, 2) te pachian hai 3) te cheren so sichion andai Biblia. (Ioan 17:3; Col. 2:6, 7; 1 Tes. 2:13) Savore andai congregația daștin te ajutin-le cana sicaven lenghe iubirea hai cana primisaren-le anda sea o ilo ca le întruniri. (Ioan 13:35) Mai but, codo cai încărel o studio trebul te del anda pesco timpo hai te cherel eforturi caște ajutil codoles cai studiil te mechel le buchia cai sile „zurales șiute ando ilo”, ande save pachialas hai cai cherelas-le. (2 Cor. 10:4, 5) Po iechdata, daștil te nachel mai but timpo ji cana ajutisaras ieche manușes te cherel le paruimata cai trebun caște bolel-pe. Tha, si ciaces, meritil te cheras cadal eforturi!

7. So cherel-ame te predichisaras hai te sicavas averen caște cărdion discipoli?

⁷ So cherel-ame te predichisaras hai te sicavas averen? I iechto buchi si amari iubirea anda o Iehova. Cana das amari zor te respectisaras i porunca le Isusoschi, sicavas le Iehovasche că iubisaras-les. (1 Ioan  5:3) Te gândisaras-ame ca iech buchi: i iubirea anda o Iehova cărdea-ame te predichisaras chăr chărestar. Daștil-pe că i iechto data ci sas amenghe ușoro. Mai jianes so simțosardean cana mardean co iechto udar? Siguro sas-tu emoții. Tha jianglean că o Isus camel te cheres cadai lucrarea hai dean chi zor te ascultis catar leschi porunca. Daștil-pe că acana i lucrarea chăr chărestar ci mai fal-tu cadea de phari. Tha, so daștis te phenes anda o fapto te încăres studii biblico? Vi numai o gândo daravel-tu? Dacă da, mang le Iehovas te ajutil-tu te naches părdal chi dar hai te del-tu tromai caște începosares iech studio biblico. Vo daștil te ajutil-tu te cames vi mai but te cheres discipoli.

8. Cadea sar phenel-pe ando Marcu 6:34, so mai cherel-ame te sicavas averen?

⁸ I duito buchi cai cherel-ame te sicavas averen o ciacimos si i iubirea andal manușa. Iech data, o Isus hai lesche discipoli sas-le zurales chine pala iech ghies pherdo andi lucrarea de predicare. Cana jianas caring iech than te odihnin-pe, iech bari mulțimea manușenghi avilea angla lende. Cana dichlea-le, o Isus simțosardea mila caring lende hai începosardea te sicavel-le „but buchia”. (Citisar Marcu 6:34.) Vo cărdea iech baro eforto andal manușa. O Isus șiutea-pe ande lengo than hai dichlea că sas-le duchade hai că trebulas lenghe iech speranța. Anda codoia, vo camlea te ajutil-le. Vi aghies, le manușa sile sa ande cadai situația. Chiar cana dichiolas-pe că sile fericime, von sile sar niște bacrea cai hasardile hai nai-le nici iech păstoro. O apostolo Pavel phendea anda cadal manușa că sile bi Devlesco hai nai-le nici iech speranța. (Ef. 2:12) Von sile po „drom cai îngărel ca i distrugerea”. (Mat. 7:13) Cana dichas ande ce situația spiritualo sile codola anda amaro teritorio, i iubirea hai i mila va cherela-ame te camas te ajutisaras-le. Hai o mai lașio modo te ajutisaras-le si te studiisaras i Biblia lența.

9. Cadea sar phenel-pe ando Filipeni 2:13, sar daștil te ajutil-tu o Iehova?

⁹ O fapto te încăres iech studio biblico însemnol te des anda chio timpo hai te cheres eforturi. Anda codoia, daștil-pe că daras te începosares studii biblico. Dacă san ande cadai situația, phen le Iehovasche sea so si ande chio ilo. Mang-les te ajutil-tu te cames te araches hai te încăres iech studio. (Citisar Filipeni 2:13.) O apostolo Ioan del-ame i asigurarea că o Del va dela răspunso ca amare rugăciuni cai sile pala leschi voința. (1 Ioan 5:14, 15) Cadea că, daștis te pachias că o Iehova va ajutila-tu te cames te cheres discipoli.

10, 11. So daștilas te așiavel-ame te încăras iech studio biblico?

¹⁰ Anda amende i lucrarea te sicavas averen si zurales importanto, chiar cana si ame pharimata cai daștinas te așiaven-ame te cheras cadai lucrarea cadea sar camas. Mai dur, va avela te dichas chichiva anda cadal pharimata hai va avela te hachiaras sar daisaras te nachas părdal lende.

¹¹ I situația ande savi sam ci mechel-ame te cheras chichi de but camas. Sar exemplo, unii phrala sile mai phure sau nasfale. San vi tu ande cadai situația? Dacă da, gândisar-tu ca iech andal lecții cai sichileam-le andi pandemia de COVID-19. Dichleam că daisaras te încăras mișto studii biblico prin o telefono sau prin aver dispozitivea electronico. Cadea, i tehnologia ajutisardea-ame te daisaras te începosaras hai te încăras studii biblico chiar vi de chăral. Mai daisaras te phenas încă iech lași  buchi. Unii manușa camen te studiin i Biblia ca ore diferime codolendar ande save le mai but phrala sile obișnuime te predichin, sar exemplo, de teharin sau pi riat târzio. Daștias te studiis vi tu cadale manușența? O Isus sicadea le Nicodimos ciacimata importanto ando timpo la rachiaco, cana cado daisardea te dichel-pe le Isusoia. (Ioan 3:1, 2)

12. So del-ame pachiamos ande amende că daisaras te încăras iech studio biblico?

¹² Ci si ame pachiamos ande amende că daisaras te încăras studii biblico. Daștil-pe te pachias că, angla so te studiisaras varecaia trebulas te avel-ame mai but prinjianimos andai Biblia sau te avas sicaitorea mai lașe. Ita trin buchia cai daștin te ajutin-ame te avel-ame mai but pachiamos ande amende. I iechto buchi si că o Iehova pachial că daisaras te sicavas averen. (2 Cor. 3:5) I duito buchi si că o Isus, cai siles ‘sea i autoritatea ando cerii hai pi phuv’, dea-tu i buchi te sicaves averen. (Mat. 28:18) Hai i trinto buchi si că o Iehova hai le phrala ajutin-tu. O Iehova sicadea le Isusos so te phenel hai vo daștil te sicavel vi tut. (Ioan 8:28; 12:49) Mai but, daștis te rughisares le phrales cai si o supraveghetorii chia grupaco de serviciu, ieche pionieres sau ieche phrales cai siles experiența te ajutil-tu te începosares hai te încăres iech studio biblico. Caște astares mai but tromai, jia ca iech studio încărdo iechestar anda lende.

13. Sostar trebul te folosisaras le neve metodea?

¹³ Si amenghe pharo te folosisaras le neve metodea anda o sicaimos. Aghies, o modo sar încăras studii biblico parudea-pe. Amari publicația principalo anda o studio, Bucurisar-tu viațatar anda sea o timpo!, manghel amendar te pregătisaras-ame anda o studio hai te încăras-les ande iech modo diferime sar samas sicade. Citisaras mai țâra paragrafea hai das duma mai but le manușeia casa studiisaras. Cana sicavas averen, folosisaras mai but materialea video hai aver materialea pa amaro site-o hai andai aplicația JW Library^®. Dacă ci jianas te folosisaras cadal instrumentea, te rughisaras varecas te ajutil-ame. Si ciaces, na-i ușoro te folosisaras iech nevi metoda, anda codoia că sam sicade te cheras le buchia ande iech anumime felo. Tha, le ajutoroia le Iehovasco hai amare phralengo va avela amenghe mai ușoro te folosisaras le neve metodea hai va placiala-ame vi mai but te studiisaras averența. Iech pioniero phendea că cadai metoda anda o studio „anel bucuria vi codolesche cai studiil i Biblia hai vi codolesche cai încărel o studio”.

14. So ci trebul te bâstras cana predichisaras ande iech teritorio pharo hai sar zuriarel-ame 1 Corinteni 3:6, 7?

¹⁴ Predichisaras ande iech teritorio cai si pharo te începosaras studii biblico. Unii manușa fal-pe că ci interesil-le amaro mesajo sau chiar ci camen te așunen-les. Sar daștil te avel-ame iech atitudinea lași ando timpo so predichisaras ande iech teritorio sar cado? Te na bâstras că, andel ghiesa phare cai traisaras, i viața le manușenghi daștil te paruvel-pe bi te ajucăren-pe, hai unii manușa cai ci camle te așunen amaro mesajo, den penghi sama că sile necesități spiritualo. (Mat. 5:3) Unii manușa cai mai anglal ci lenas amare publicații, mai târzio camle te studiin i Biblia. Sa cadea, jianas că o Iehova si o Stăpâno po secerișo. (Mat. 9:38) Vo camel te șioas mai dur andi phuv hai te chinghiaras. Tha, ci trebul te bâstras că Vo si codo cai cherel te bariol. (1 Cor. 3:6, 7) Hai, chiar cana aghies ci încăras iech studio biblico, zuriarel-ame  but te jianas că o Iehova binecuvântil-ame pala amare eforturi, na pala amare rezultatea. *

15. So simțol o Iehova cana dichel că varecon camel te studiil i Biblia hai cherel so sichiol?

¹⁵ O Iehova silo zurales fericime cana iech manuș acceptil o ciacimos biblico hai camel te phenel-les vi averenghe. (Prov. 23:15, 16) Sa cadea, vo bucuril-pe cana dichel o zelo pesche slujitorengo de aghies. Sar exemplo, chiar cana sas pandemia, ando bărș de serviciu 2020 încărde-pe 7 705 765 studii biblico hai 241 994 manușa dedichisarde penghi viața le Iehovasche hai bolde-pe. Cadal neve discipoli va încărena studii biblico hai cadea, vi von, va cherena discipoli. (Luca 6:40) Si ciaces, cana ajutisaras averen te arăsăn discipoli, bucurisaras o ilo le Iehovasco.

16. Ce obiectivo daștias te șios tuche?

¹⁶ Cana cheras discipoli, trebul te cheras bare eforturi. Cu sea cadala, le ajutoroia le Iehovasco daisaras te ajutisaras codolen neve te iubin amare Dades cerisco. Daștias te șios tuche o obiectivo te începosares hai te încăres iech studio biblico? Dacă folosisaras-ame catar orisavi ocazia caște începosaras studii biblico, ci va avela amenghe te pachias ce rezultatea lașe va avena-ame. Daisaras te avas siguri că o Iehova va binecuvântila amare eforturi.

17. Sar va avela te simțosaras-ame cana va daisaraia te încăras iech studio biblico?

¹⁷ Si ame o baro privilegio te predichisaras hai te sicavas averen o ciacimos. Cadai buchi cherel-ame ciaces fericime. O apostolo Pavel, cai ajutisardea bute manușen anda Tesalonic te cărdion discipoli, phendea so sas ande lesco ilo cadea: „Savi si i speranța, i bucuria sau i coroana saveaia va avela te das-ame bare angla amaro Rai o Isus ando timpo lesca prezențaco? Oare na chiar tumența? Ciaces, tume san amari gloria hai bucuria”. (1 Tes. 2:19, 20; Fap. 17:1-4) But slujitori le Iehovasche de aghies simțosaren sa cadea. Iech phei po anav Stéphanie, cai ande iech than pesche rromeia ajutisarde mai bute manușen te bolen-pe, phenel: „Na-i bucuria mai bari sar codoia te ajutis averen te dedichin penghi viața le Iehovasche”.