O Iehova camel ca codola cai căsătorin-pe te aven fericime, te avel-le iech phanglimos chidino iech avereia cai te încărel but timpo. (Mat. 19:4-6) Dacă cames te căsătoris-tu, sar daștis te araches tuche iech lașio partenero anda i căsătoria? Anda codoia că amaro Creatorii, o Iehova jianel so trebul te cheras caște avel-ame iech șucar perioada anda i curtarea hai iech căsătoria fericime. Cadea că, dacă aplichisaras le principii cai vo dea-le amenghe, va avaia ciaces fericime. Te dichas chichiva anda lende.

Mai anglal, trebul te hachiaras iech buchi anda amende: „O ilo athavel mai but sar oriso hai ci del-pe parpale chancestar”. (Ier. 17:9) Cana dui manușa cai camen te căsătorin-pe începosaren te dichen-pe caște prinjianen-pe mai mișto, daștilas te aven-le sigo sentimentea zurale cai cheren-le te na mai gândin claro. Cana le manușa len i decizia te căsătorin-pe bazome numai pe sentimentea, butivar von arăsăn te aven duchade. (Prov. 28:26) Anda codoia, ci si mișto ca von te sicaven penghe sentimentea prea sigo sau te cheren penghe iech promisiunea angla so te prinjianen-pe mișto iech averes.

Andel Proverbe 22:3 phenel-pe: „Codo cai gândil-pe mai de anglal dichel o pericolo hai garavel-pe, tha codola cai ci sile experiența jian mai dur hai suportin le urmări”. Ce pericolea garaven le site-uri andal întâlniri? Sar exemplo, unii dine penghe întâlniri online manușența cas ci prinjianenas hai, mai târzio, dine penghi sama că cadala chălde-pe lenghe sentimentența hai athade-le. Sa cadea, manușa bipachivale cărde penghe conturi falso caște len love le manușendar cas daisarde te athaven ușoro. Unii anda codola cai sas-le andel zăia cadale buchianghe nasul, phenenas că sile Martori le Iehovasche.

Te dichas iech aver pericolo. Chichiva site-uri andal întâlniri folosisaren calcule matematico caște phenen le manușenghe save manușența potrivin-pe. Tha, na-i niciech dovada că cadal formule matematico chiar sile lașe. Avelas mișto te șioas amaro pachiamos ande cadal formule cărde le manușendar ande buchia cadea de importanto, sar i căsătoria? Sar daștilas te comparil-pe iech calculo matematico le principiența sasteveste andai Biblia? (Prov. 1:7; 3:5-7)

 Iech aver principio cai arachel-pe andel Proverbe 14:15 phenel: „O manuș naivo pachial orisavo cuvânto, tha codo goghiaver lel sama ca lesche pași”. Angla so te gândisares-tu dacă varecon si iech lașio partenero anda i căsătoria, trebul te prinjianes-les mișto. Tha si pharo te cheres cadai buchi online. Daștis te phenes că prinjianes ciaces le coavere jenes numai anda codoia că diches lesche informații catar o profilo sau anda codoia că den duma prin mesajea? But jene cai pachiaie că arachle penghi ciaci iubirea, ci avilea lenghe te pachian sar si codo manuș cana dichle-pe hai prinjiande-pe mai mișto.

Ando Psalmo 26:4 phenel-pe: „Ci beșav le manușența cai athaven hai beșav dur codolendar cai garaven con sile”. Caște cheren sea mai bute manușen te camen te prinjianen-le, but jene pachian că si normalo te hohaven andel informații pa lengo profilo online. Daștil-pe că von garaven penghe trăsături nasul sau ci sicaven sar sile von ciaces cana sile online. Unii phenen că sile Martori le Iehovasche, tha cathar daisaras te jianas dacă sile ciaces Martori bolde? Sile manușa maturo spiritualo? Sile iech amalimos chidino le Iehovaia? Sile prinjiande sar lașe manușa ande lenghi congregația? Sile iech phiraimos na cadea de lașio sau sile chiar ‘iech amalimos nasul’? (1 Cor. 15:33, n.s.; 2 Tim. 2:20, 21) Sile libero pala le principii biblico te căsătorin-pe? Trebul te jianes o răspunso cadale pușimatande. Tha, daștilas te avel tuche pharo te prinjianes-le bi te ajutin-tu le phrala cai prinjianen mișto codole jenes. (Prov. 15:22) Siguro, iech slujitoro loialo le Iehovasco ci trebul te gândisarel-pe te căsătoril-pe varecaia cai na-i creștino hai te șiol-pe ande iech „jugo inegalo”. (2 Cor. 6:14; 1 Cor. 7:39)

Cadea sar dichleam, si but pericolea pe le site-uri andal întâlniri. Si aver moduri mai lașe te arachen hai te prinjianen ieche parteneros andai căsătoria. Save si cadala? Dacă daștin te aven încărde întruniri publico, le Martori le Iehovasche daștin te prinjianen avere phralen hai pheian ca le întruniri la congregațiache, ca le congresea hai ande aver ocazii.

Cana ci daștin te aven încărde întruniri publico, sar si ando timpo la pandemiaco de COVID-19, ame folosisaras le dispozitivea electronico caște jias ca le întruniri, cai daștis te prinjianes avere Martoren save nai-le căsătorime. Code daștis te diches sar len partea ca le întruniri hai sar sicaven pengo pachiamos prin le răspunsuri cai den-le. (1 Tim. 6:11, 12) Mai but, pala i întrunirea, daștin te den duma ande camere separime (breakout rooms). Sa cadea, cana cheren-pe reuniuni virtualo, daștis te diches sar phiravel-pe averența o jeno castar san interesime hai cadaia va ajutila-tu te prinjianes mai mișto lesco caractero. (1 Pet. 3:4) Ando timpo, chichi prinjianen tume mai mișto, des chi sama dacă si tume sa codol obiectivea hai valori hai dacă san lașe iech anda aver.

Cana codola cai camen te căsătorin-pe, roden penghe iech partenero cadea sar sicaven le principii biblico, va avela-le iech căsătoria fericime hai va pherena-pe ande lengo cazo le cuvintea andal Proverbe 18:22 cai phenel-pe: „Con arachel iech lași rromni [sau iech lașio rrom] arachel vareso cuci hai primisarel o lașimos le Iehovasco”.