1. So daisaras te pachias hai sostar?

 CANA diches sea le pharimata andai lumea aghies, si tuche pharo te pachias că le buchia va paruvena-pe hai va avena mai lașe? Le phanglimata andai familia sile sea mai covle. Le manușa cărdion sea mai ratavale, roden o marimos hai gândin-pe numai pende. But jene hasarde penghi pachiv anda codola cai silen autoritatea. Tha chiar cadal buchia cai si aghies daștin te zuriaren amaro pachiamos. Sostar? Anda codoia că le manușa phiraven-pe exacto cadea sar sas phendo de mai anglal ande iech bari profeția andal „ghiesa de palal”. (2 Tim. 3:1-5) O modo sar pherel-pe cadai profeția – cai niciech manuș le ileia lașio ci daștil te phenel că na-i ciaces – sicavel claro că o Isus Cristos rail sar Rege ando Regato le Devlesco. Tha cadaia si numai iech anda le but profeții cai den duma anda o Regato. Mai dur, amaro pachiamos va avela zuriardo ando timpo so va avela te dichas aver profeții cai pherdile-pe ande amare ghiesa.

2. So va avela te dichas ande cado articolo hai sostar? (Dich i imaginea pa i coperta.)

² Ande cado articolo, va avela te dichas: 1) iech profeția cai ajutil-ame te jianas cana astardea te rail o Regato le Devlesco, 2) profeții cai ajutin-ame te hachiaras că o Isus silo Rege ando cerii ando Regato le Devlesco hai 3) profeții cai sicaven sar va avena chosle cu sea le dușmani le Regatosche le Devlesco. Cadea sar va avela te dichas, cadal profeții potrivin-pe ande iech  than, cadea sar le piese anda iech puzzle-o, hai va ajutina-ame te hachiaras cai sam ando calendaro le Iehovasco.

3. So asigurarea arachas andi profeția anda Daniel 7:13, 14 anda o Rege le Regatosco le Devlesco?

³ Andi profeția anda Daniel 7:13, 14, arachas i asigurarea că o Isus Cristos si codo cai jianel te rail o mai mișto ando Regato le Devlesco. Vo ci va avela parudo niciechdata hai le manușa anda sea le națiuni ‘va slujina lesche’ pherde bucuria. Iech aver profeția anda o lil Daniel phendea de mai anglal că o Isus avelas te astarel te rail ando Regato pala so avelas te nachel iech perioada profetico cai bușiol „efta timpuri”. Daisaras te jianas cana sas cărdo o Isus Rege?

4. Sar ajutil-ame o Daniel 4:10-17 te jianas o bărș ande savo o Cristos sas-lo cărdo Rege? (Dich vi i nota de subsol.)

⁴ Citisar Daniel 4:10-17. Le „efta timpuri” si iech perioada anda 2 520 bărșa. Cadaia astardea ande 607 a.a.e., cana le babilonieni duriarde le palutne reges pa o trono le Iehovasco, anda Ierusalim. Cadai perioada phandadea-pe ande 1914, cana o Iehova cărdea le Isusos – „codo cai siles o drepto legalo” – Rege lesche Regatosco. * (Ezec. 21:25-27)

5. Sar sam zuriarde cana hachiaras i profeția anda le „efta timpuri”?

⁵ Sar zuriarel-ame cadai profeția? Cana hachiaras i profeția anda le „efta timpuri”, zuriaras amaro pachiamos că o Iehova pherel pesche promisiuni co timpo alosardo lestar. Cadea sar o Iehova pherdea i profeția anda sar sas cărdo o Isus Rege co timpo potrivime, sa cadea vo va pherela vi le coaver profeții co mai lașio timpo, alosardo lestar. Daisaras te pachias ciaces că o ghies le Iehovasco „ci va arăsăla târzio”! (Hab. 2:3)

6. a) So buchia cai dichas că si aghies pi phuv sicaven că o Cristos astardea te rail ando cerii? b) Sar zuriarel i profeția anda Revelația 6:2-8 cadai buchi?

⁶ Cana lesco servicio pi phuv pașiolas catar o sfârșito, o Isus phendea de mai anglal chichiva buchia cai va avena pe sea i phuv hai cai va ajutina lesche continuatoren te jianen că vo astardea te rail sar Rege ando cerii. Mașcar aver buchia, vo dea duma anda războaia, bochalimos hai izdraimata phuveache. Sa cadea, vo phendea că va avena nasfalimata „anda iech than ande aver”. I pandemia de COVID-19 si iech exemplo cai sicavel că i profeția pherel-pe. Cadal buchia cheren partea anda „o semno” cai sicavel i prezența le Cristososchi. (Mat. 24:3, 7; Luca 21:7, 10, 11) Pala mai but sar 60 bărșa catar lesco merimos hai pala so risailo co cerii, o Isus phendea încă iech data le apostolosche Ioan ande iech viziunea că cadal buchia va avena te pheren-pe. (Citisar Revelația 6:2-8.) Sea cadal buchia astarde ande 1914, cana o Isus sas cărdo Rege le Regatosco.

7. Sostar arăslea mai nasul i situația pa i phuv de cana o Isus sas cărdo Rege?

⁷ Cana o Isus sas cărdo Rege, sostar arăslea i situația pa i phuv vi mai nasul? I Revelația 6:2 sicavel amenghe vareso zurales importanto: i dintuni buchi cai o Isus cărdea-la sar Rege, sas te astarel iech războio contra o Beng hai lesche benga. Anda Revelația, capitolo 12, hachiaras că o Satan hasardea o marimos hai, ande iech than pesche benghența, sas-lo șiudino tele pașa i phuv. Cadaia îngărdea ca bare vaiuri pi phuv hai, de atunci,  o Satan șiorel peschi holi opral le manușa. (Rev. 12:7-12)

8. Sar sam zuriarde cana dichas că le profeții anda o Regato pheren-pe?

⁸ Sar zuriaren-ame cadal profeții? Sea so si aghies pi phuv hai le paruimata cai dichion-pe mișto ando phiraimos le manușengo, sicaven ciaces că o Isus sas cărdo Rege. Cadea că, ando than te mechas-ame holiarde cana dichas că le manușa cheren buchia nasul andai ura, te anas amenghe andi goghi că sea so cheren pheren le profeții andai Biblia. Amen jianas că o Regato rail! (Ps. 37:1) Anda codoia, daisaras te ajucăras-ame ca le pharimata andai lumea te aven vi mai nasul ando timpo so o Armaghedono pașiol vi mai but. (Mar. 13:8; 2 Tim. 3:13) Sam zurales recunoscători că amaro Dad cerisco iubitorii ajutil-ame te hachiaras sostar traisaras ande cadal timpuri phare!

9. So phenel i profeția anda Daniel 2:28, 31-35 anda o palutno zuralimos mondialo hai cana sas cado cărdo?

⁹ Citisar Daniel 2:28, 31-35. Aghies, dichas sar pherel-pe cadai profeția. O suno cai sas le Nebucadnețaros sicadea so avelas te avel „co sfârșito le ghiesengo”, pala so o Cristos avelas te astarel te rail. Mașcar le dușmani pa i phuv le Isusosche, avelas te avel vi o paltuno zuralimos mondialo anda savo del-pe duma andi Biblia, reprezentime catar ‘le pânre anda sastrî hai phuv’. Cado palutno zuralimos mondialo rail deja hai si o Zuralimos Anglo-Americano, cai sas cărdo ando Iechto Războio Mondialo, cana i Marea Britanie hai le Statele Unite phandade iech phanglimos specialo. Anda o suno cai sas le Nebucadnețaros andai statuia, hachiaras dui buchia anda  cado zuralimos mondialo, cai si diferime catar le coaver zuralimata de mai anglal.

10. a) So phenel i profeția anda Daniel anda o phanglimos anglo-americano? b) Ca so pericolo trebul te las sama? (Dich o chenarii „ I phuv – iech pericolo garado”.)

¹⁰ I iechto buchi cai cherel diferime cado zuralimos catar le coaver zuralimata mondialo andai viziunea, sicade prin metalea zurale sar avelas o sumnacai sau o rup, si că o phanglimos anglo-americano silo sicado sar iech hamimos anda sastrî hai phuv. I phuv reprezentil le manușen simplo. (Dan. 2:43) Aghies, daisaras te dichas claro că le manușa roden te aven respectime lenghe drepturi civilo, roden pengo ciacimos prin le protestea hai dichiol-pe lenghi influența vi cana si alosarimata politico. Cadea, „i phuv” covliarel o zuralimos cai si le zuralimas mondialo de aghies caște cherel so camel.

11. Sar si zuriardo amaro pachiamos că traisaras andel palutne ghiesa cana dichas că o Zuralimos Mondialo Anglo-Americano rail aghies?

¹¹ I duito buchi cai hachiaras-la si că o Zuralimos Anglo-Americano si o palutno zuralimos mondialo anda savo del-pe duma andi Biblia, anda codoia că silo reprezentime prin le pânre andai statuia. Ande lesco than ci va avela iech aver zuralimos, tha va avela choslo cu sea catar o Regato le Devlesco co Armaghedono, ande iech than le coavere guvernența le manușenghe. * (Rev. 16:13, 14, 16; 19:19, 20)

12. So aver vareso sicavel amenghe i profeția anda Daniel hai sar daștil cadaia te zuriarel-ame hai te del-ame speranța?

¹² Sar zuriarel-ame cadai profeția? I profeția anda Daniel sicavel amenghe încă iech data că traisaras ando timpo le sfârșitosco. Acana mai but sar 2 500 bărșa mai anglal, o Daniel phendea că, pala o Babilono, aver ștar zuralimata mondialo avenas te rain opral o poporo le Devlesco. Mai but, vo sicadea că o Zuralimos Mondialo Anglo-Americano avelas te avel o palutno anda lende. Cadaia zuriarel amaro pachiamos hai del-ame speranța că, na pa but timpo, o Regato le Devlesco va chosela cu sea le guvernea le manușenghe hai vo va raila pe sea i phuv. (Dan. 2:44)

13. Cas reprezentil „o ohto-to rege” hai le „deș regi” anda Revelația 17:9-12 hai sar pherdilea-pe cadai profeția?

¹³ Citisar Revelația 17:9-12. Le phagherimata cai cărdea-le o Iechto Războio Mondialo îngărdea te pherel-pe iech aver profeția anda le ghiesa de palal. Anda codoia că le conducători la lumeache camle te anen i pacea pe sea i phuv, ande ianuaria 1920, von cărde i Liga le Națiunenghi, cai sas parudi andi Organizația Națiunilor Unite andi octombria 1945. Andi Biblia, voi sili numime „o ohto-to rege”. Tha cadaia ci si iech zuralimos mondialo. Laco zuralimos hai le buchia cai daștil te cherel-le aven catar le zuralimata politico cai susținin-la. Andi Biblia, cadal zuralimata politico sile numime le „deș regi”.

14, 15. a) So sicavel amenghe i Revelația 17:3-5 anda „o Babilono o Baro”? b) So cheren le manușa cai mai anglal așile pașa i religia neciaci?

¹⁴ Citisar Revelația 17:3-5. O Del cărdea ca o apostolo Ioan te dichel ande iech viziunea iech prostituata, „o Baro Babilono”, cai reprezentil o imperio mondialo la religiachi neciaci. So sicavel amenghe cadai profeția? De mai but timpo, le organizații religioso neciace cheren buchi ande iech than le guvernența cadala lumeache hai ajutin-le. Tha, na pa but timpo, o Iehova ‘va șiola ando ilo’ le conducătorengo politico „te îngăren ji le șăreste lesco gândo”. So va anela cadaia? Le „deș regi”, adică le zuralimata politico, va jiana contra le organizații religioso neciace hai va chosena-le cu sea. (Rev. 17:1, 2, 16, 17)

 ¹⁵ Tha catar jianas că o sfârșito le Babilonosco o Baro si pașă? Caște arachas o răspunso cadale pușimaste, ajutil-ame te anas amenghe andi goghi că o purano foro Babilono sas-lo ferime catar le paia anda i bari len Eufrat. O lil Revelația sicavel că le milioanea manușa cai așen pașa o Baro Babilono sile sar niște ‘paia’. (Rev. 17:15) Tha voi mai phenel vi că le paia avenas te șuchion hai cadaia sicavel că o imperio mondialo la religiaco neciaci avelas te hasarel bute manușen. (Rev. 16:12) Cadai profeția pherel-pe aghies anda codoia că but manușa risarde o dumo la religiache hai astarde te roden răspunsuri ca lenghe pușimata aver varecai.

16. Sar sam zuriarde cana hachiaras le profeții anda o fapto că i Organizația Națiunilor Unite sas cărdi hai anda o sfârșito le Babilonosco o Baro?

¹⁶ Sar zuriaren-ame cadal profeții? O fapto că i Organizația Națiunilor Unite sas cărdi hai că sea mai țâra manușa așen de i rig la religiachi neciaci, sicaven că traisaras andel ghiesa de palal. Chiar cana le paia simbolico cai așen de i partea le Babilonoschi șuchion sea mai but, o sfârșito anda sea o timpo le organizațiengo religioso neciace va avela anda iech  aver than. Cadea sar sas sicado mai anglal, o Iehova va șiola ando ilo codole „deș regenghe” – le zuralimata politico cai susținin i Organizația Națiunilor Unite – „te îngăren ji le șăreste lesco gândo”. Cadal națiuni va distrugina deiechdata i religia neciaci hai sea i lumea ci va ajucărela-pe cadala buchiate. * (Rev. 18:8-10) Cana o Babilono o Baro va avela distrugime, sea i lumea le Satanoschi va avela te izdral hai daștil-pe că va avena bare pharimata. Tha o poporo le Devlesco daștil te avel bucurime anda dui motivea: i religia neciaci, cai si iech purano dușmano le Iehovasco, va avela chosli cu sea anda sea o timpo, hai amari eliberarea anda cadai lumea nasul si pașă! (Luca 21:28)

17, 18. a) Sar daisaras te zuriaras amaro pachiamos vi mai dur? b) So va avela te dichas ando articolo cai avel?

¹⁷ O Daniel phendea de mai anglal că „o ciacio prinjianimos va bariola”. Aghies, dichas sar pheren-pe cadal cuvintea. Hachiaras mișto le profeții andal ghiesa ande save traisaras. (Dan. 12:4, 9, 10) Cana dichas chichi de exacto pheren-pe, amari pachiv anda o Iehova hai anda lesco Cuvânto inspirime bariol vi mai but. (Isa. 46:10; 55:11) Te zuriaras mai dur amaro pachiamos prin o studio atento la Bibliaco hai te ajutisaras vi averen te aven-le iech amalimos chidino le Iehovaia. Vo va ferila sea codolen cai pachian-pe cu sea ande leste hai va dela-len „iech pacea cai încărel”. (Is. 26:3)

¹⁸ Ando articolo cai avel, va avela te dichas chichiva profeții anda i congregația creștino ando timpo le sfârșitosco. Cadala potrivin-pe perfecto le coavere profețiența andal ghiesa de palal. Va avela te dichas vi dovezi cai sicaven că o Isus, amaro Rege, conducil pesche continuatoren.